၈. သိဝိရာဇစရိယာဝဏ္ဏနာ

၅၁. အဋ္ဌမေ အရိဋ္ဌသဝှယေ နဂရေတိ အရိဋ္ဌပုရနာမကေ နဂရေ. သိဝိ နာမာသိ ခတ္တိယောတိ သိဝီတိ ဂေါတ္တတော ဧဝံနာမကော ရာဇာ အဟောသိ.

အတီတေ ကိရ သိဝိရဋ္ဌေ အရိဋ္ဌပုရနဂရေ သိဝိရာဇေ ရဇ္ဇံ ကာရေန္တေ မဟာသတ္တော တဿ ပုတ္တော ဟုတွာ နိဗ္ဗတ္တိ. ‘‘သိဝိကုမာရော’’တိဿ နာမမကံသု. သော ဝယပ္ပတ္တော တက္ကသိလံ ဂန္တွာ ဥဂ္ဂဟိတသိပ္ပေါ အာဂန္တွာ ပိတု သိပ္ပံ ဒဿေတွာ ဥပရဇ္ဇံ လဘိတွာ အပရဘာဂေ ပိတု အစ္စယေန ရာဇာ ဟုတွာ အဂတိဂမနံ ပဟာယ ဒသ ရာဇဓမ္မေ အကောပေတွာ ရဇ္ဇံ ကာရေန္တော နဂရဿ စတူသု ဒွါရေသု နဂရမဇ္ဈေ နိဝေသနဒွါရေတိ ဆ ဒါနသာလာယော ကာရေတွာ ဒေဝသိကံ ဆသတသဟဿပရိစ္စာဂေန မဟာဒါနံ ပဝတ္တေသိ. အဋ္ဌမီစာတုဒ္ဒသီပန္နရသီသု သယံ ဒါနသာလံ ဂန္တွာ ဒါနဂ္ဂံ ဩလောကေတိ.

သော ဧကဒါ ပုဏ္ဏမဒိဝသေ ပါတောဝ သမုဿိတသေတစ္ဆတ္တေ ရာဇပလ္လင်္ကေ နိသိန္နော အတ္တနာ ဒိန္နဒါနံ အာဝဇ္ဇေန္တော ဗာဟိရဝတ္ထုံ အတ္တနာ အဒိန္နံ နာမ အဒိသွာ ‘‘န မေ ဗာဟိရကဒါနံ တထာ စိတ္တံ တောသေတိ၊ ယထာ အဇ္ဈတ္တိကဒါနံ၊ အဟော ဝတ မမ ဒါနသာလံ ဂတကာလေ ကောစိ ယာစကော ဗာဟိရဝတ္ထုံ အယာစိတွာ အဇ္ဈတ္တိကမေဝ ယာစေယျ၊ သစေ ဟိ မေ ကောစိ သရီရေ မံသံ ဝါ လောဟိတံ ဝါ သီသံ ဝါ ဟဒယမံသံ ဝါ အက္ခီနိ ဝါ ဥပဍ္ဎသရီရံ ဝါ သကလမေဝ ဝါ အတ္တဘာဝံ ဒါသဘာဝေန ယာစေယျ၊ တံတဒေဝဿ အဓိပ္ပါယံ ပူရေန္တော ဒါတုံ သက္ကောမီ’’တိ စိန္တေသိ. ပါဠိယံ ပန အက္ခီနံ ဧဝ ဝသေန အာဂတာ. တေန ဝုတ္တံ –

‘‘နိသဇ္ဇ ပါသာဒဝရေ၊ ဧဝံ စိန္တေသဟံ တဒါ’’.

၅၂. ‘‘ယံကိဉ္စိ မာနုသံ ဒါနံ၊ အဒိန္နံ မေ န ဝိဇ္ဇတိ၊

ယောပိ ယာစေယျ မံ စက္ခုံ၊ ဒဒေယျံ အဝိကမ္ပိတော’’တိ.

တတ္ထ မာနုသံ ဒါနန္တိ ပကတိမနုဿေဟိ ဒါတဗ္ဗဒါနံ အန္နပါနာဒိ. ဧဝံ ပန မဟာသတ္တဿ ဥဠာရေ ဒါနဇ္ဈာသယေ ဥပ္ပန္နေ သက္ကဿ ပဏ္ဍုကမ္ဗလသိလာသနံ ဥဏှာကာရံ ဒဿေသိ. သော တဿ ကာရဏံ အာဝဇ္ဇေန္တော ဗောဓိသတ္တဿ အဇ္ဈာသယံ ဒိသွာ ‘‘သိဝိရာဇာ အဇ္ဇ သမ္ပတ္တယာစကာ စက္ခူနိ စေ ယာစန္တိ၊ စက္ခူနိ ဥပ္ပါဋေတွာ နေသံ ဒဿာမီတိ စိန္တေသီ’’တိ သက္ကော ဒေဝပရိသာယ ဝတွာ ‘‘သော သက္ခိဿတိ နု ခေါ တံ ဒါတုံ၊ ဥဒါဟု နောတိ ဝီမံသိဿာမိ တာဝ န’’န္တိ ဗောဓိသတ္တေ သောဠသဟိ ဂန္ဓောဒကဃဋေဟိ နှတွာ သဗ္ဗာလင်္ကာရေဟိ ပဋိမဏ္ဍိတေ အလင်္ကတဟတ္ထိက္ခန္ဓဝရဂတေ ဒါနဂ္ဂံ ဂစ္ဆန္တေ ဇရာဇိဏ္ဏော အန္ဓဗြာဟ္မဏော ဝိယ ဟုတွာ တဿ စက္ခုပထေ ဧကသ္မိံ ဥန္နတပ္ပဒေသေ ဥဘော ဟတ္ထေ ပသာရေတွာ ရာဇာနံ ဇယာပေတွာ ဌိတော ဗောဓိသတ္တေန တဒဘိမုခံ ဝါရဏံ ပေသေတွာ ‘‘ဗြာဟ္မဏ၊ ကိံ ဣစ္ဆသီ’’တိ ပုစ္ဆိတော ‘‘တဝ ဒါနဇ္ဈာသယံ နိဿာယ သမုဂ္ဂတေန ကိတ္တိဃောသေန သကလလောကသန္နိဝါသော နိရန္တရံ ဖုဋော၊ အဟဉ္စ အန္ဓော၊ တသ္မာ တံ ယာစာမီ’’တိ ဥပစာရဝသေန ဧကံ စက္ခုံ ယာစိ. တေန ဝုတ္တံ –

၅၃. ‘‘မမ သင်္ကပ္ပမညာယ၊ သက္ကော ဒေဝါနမိဿရော၊

နိသိန္နော ဒေဝပရိသာယ၊ ဣဒံ ဝစနမဗြဝိ.

၅၄. ‘‘နိသဇ္ဇ ပါသာဒဝရေ၊ သိဝိရာဇာ မဟိဒ္ဓိကော၊

စိန္တေန္တော ဝိဝိဓံ ဒါနံ၊ အဒေယျံ သော န ပဿတိ.

၅၅. ‘‘တထံ နု ဝိတထံ နေတံ၊ ဟန္ဒ ဝီမံသယာမိ တံ၊

မုဟုတ္တံ အာဂမေယျာထ၊ ယာဝ ဇာနာမိ တံ မနံ.

၅၆. ‘‘ပဝေဓမာနော ပလိတသိရော၊ ဝလိဂတ္တော ဇရာတုရော၊

အန္ဓဝဏ္ဏောဝ ဟုတွာန၊ ရာဇာနံ ဥပသင်္ကမိ.

၅၇. ‘‘သော တဒါ ပဂ္ဂဟေတွာန၊ ဝါမံ ဒက္ခိဏဗာဟု စ၊

သိရသ္မိံ အဉ္ဇလိံ ကတွာ၊ ဣဒံ ဝစနမဗြဝိ.

၅၈. ‘‘‘ယာစာမိ တံ မဟာရာဇ၊ ဓမ္မိက ရဋ္ဌဝဍ္ဎန၊

တဝ ဒါနရတာ ကိတ္တိ၊ ဥဂ္ဂတာ ဒေဝမာနုသေ.

၅၉. ‘‘‘ဥဘောပိ နေတ္တာ နယနာ၊ အန္ဓာ ဥပဟတာ မမ၊

ဧကံ မေ နယနံ ဒေဟိ၊ တွမ္ပိ ဧကေန ယာပယာ’’’တိ.

တတ္ထ စိန္တေန္တော ဝိဝိဓံ ဒါနန္တိ အတ္တနာ ဒိန္နံ ဝိဝိဓံ ဒါနံ စိန္တေန္တော၊ အာဝဇ္ဇေန္တော ဒါနံ ဝါ အတ္တနာ ဒိန္နံ ဝိဝိဓံ ဗာဟိရံ ဒေယျဓမ္မံ စိန္တေန္တော. အဒေယျံ သော န ပဿတီတိ ဗာဟိရံ ဝိယ အဇ္ဈတ္တိကဝတ္ထုမ္ပိ အဒေယျံ ဒါတုံ အသက္ကုဏေယျံ န ပဿတိ၊ ‘‘စက္ခူနိပိ ဥပ္ပါဋေတွာ ဒဿာမီ’’တိ စိန္တေသီတိ အဓိပ္ပါယော. တထံ နု ဝိတထံ နေတန္တိ ဧတံ အဇ္ဈတ္တိကဝတ္ထုနောပိ အဒေယျဿ အဒဿနံ ဒေယျဘာဝေနေဝ ဒဿနံ စိန္တနံ သစ္စံ နု ခေါ၊ ဥဒါဟု၊ အသစ္စန္တိ အတ္ထော. သော တဒါ ပဂ္ဂဟေတွာန၊ ဝါမံ ဒက္ခိဏဗာဟု စာတိ ဝါမဗာဟုံ ဒက္ခိဏဗာဟုဉ္စ တဒါ ပဂ္ဂဟေတွာ၊ ဥဘော ဗာဟူ ဥက္ခိပိတွာတိ အတ္ထော. ရဋ္ဌဝဍ္ဎနာတိ ရဋ္ဌဝဍ္ဎီကရ. တွမ္ပိ ဧကေန ယာပယာတိ ဧကေန စက္ခုနာ သမဝိသမံ ပဿန္တော သကံ အတ္တဘာဝံ တွံ ယာပေဟိ၊ အဟမ္ပိ ဘဝတော လဒ္ဓေန ဧကေန ယာပေမီတိ ဒဿေတိ.

တံ သုတွာ မဟာသတ္တော တုဋ္ဌမာနသော ‘‘ဣဒါနေဝါဟံ ပါသာဒေ နိသိန္နော ဧဝံ စိန္တေတွာ အာဂတော၊ အယဉ္စ မေ စိတ္တံ ဉတွာ ဝိယ စက္ခုံ ယာစတိ၊ အဟော ဝတ မေ လာဘာ၊ အဇ္ဇ မေ မနောရထော မတ္ထကံ ပါပုဏိဿတိ၊ အဒိန္နပုဗ္ဗံ ဝတ ဒါနံ ဒဿာမီ’’တိ ဥဿာဟဇာတော အဟောသိ. တမတ္ထံ ပကာသေန္တော သတ္ထာ အာဟ –

၆၀. ‘‘တဿာဟံ ဝစနံ သုတွာ၊ ဟဋ္ဌော သံဝိဂ္ဂမာနသော၊

ကတဉ္ဇလီ ဝေဒဇာတော၊ ဣဒံ ဝစနမဗြဝိံ.

၆၁. ‘‘‘ဣဒါနာဟံ စိန္တယိတွာန၊ ပါသာဒတော ဣဓာဂတော၊

တွံ မမ စိတ္တမညာယ၊ နေတ္တံ ယာစိတုမာဂတော.

၆၂. ‘‘‘အဟော မေ မာနသံ သိဒ္ဓံ၊ သင်္ကပ္ပေါ ပရိပူရိတော၊

အဒိန္နပုဗ္ဗံ ဒါနဝရံ၊ အဇ္ဇ ဒဿာမိ ယာစကေ’’’တိ.

တတ္ထ တဿာတိ တဿ ဗြာဟ္မဏရူပဓရဿ သက္ကဿ. ဟဋ္ဌောတိ တုဋ္ဌော. သံဝိဂ္ဂမာနသောတိ မမ စိတ္တံ ဇာနိတွာ ဝိယ ဣမိနာ ဗြာဟ္မဏေန စက္ခု ယာစိတံ၊ ဧတ္တကံ ကာလံ ဧဝံ အစိန္တေတွာ ပမဇ္ဇိတော ဝတမှီတိ သံဝိဂ္ဂစိတ္တော. ဝေဒဇာတောတိ ဇာတပီတိပါမောဇ္ဇော. အဗြဝိန္တိ အဘာသိံ. မာနသန္တိ မနသိ ဘဝံ မာနသံ၊ ဒါနဇ္ဈာသယော၊ ‘‘စက္ခုံ ဒဿာမီ’’တိ ဥပ္ပန္နဒါနဇ္ဈာသယောတိ အတ္ထော. သင်္ကပ္ပေါတိ မနောရထော. ပရိပူရိတောတိ ပရိပုဏ္ဏော.

အထ ဗောဓိသတ္တော စိန္တေသိ – ‘‘အယံ ဗြာဟ္မဏော မမ စိတ္တာစာရံ ဉတွာ ဝိယ ဒုစ္စဇမ္ပိ စက္ခုံ မံ ယာစတိ၊ သိယာ နု ခေါ ကာယစိ ဒေဝတာယ အနုသိဋ္ဌော ဘဝိဿတိ၊ ပုစ္ဆိဿာမိ တာဝ န’’န္တိ စိန္တေတွာ တံ ဗြာဟ္မဏံ ပုစ္ဆိ. တေနာဟ ဘဂဝါ ဇာတကဒေသနာယံ –

‘‘ကေနာနုသိဋ္ဌော ဣဓမာဂတောသိ၊ ဝနိဗ္ဗက စက္ခုပထာနိ ယာစိတုံ၊

သုဒုစ္စဇံ ယာစသိ ဥတ္တမင်္ဂံ၊ ယမာဟု နေတ္တံ ပုရိသေန ဒုစ္စဇ’’န္တိ.(ဇာ. ၁.၁၅.၅၃)၊

တံ သုတွာ ဗြာဟ္မဏရူပဓရော သက္ကော အာဟ –

‘‘ယမာဟု ဒေဝေသု သုဇမ္ပတီတိ၊ မဃဝါတိ နံ အာဟု မနုဿလောကေ၊

တေနာနုသိဋ္ဌော ဣဓမာဂတောသ္မိ၊ ဝနိဗ္ဗကော စက္ခုပထာနိ ယာစိတုံ.

‘‘ဝနိဗ္ဗတော မယှံ ဝနိံ အနုတ္တရံ၊ ဒဒါဟိ တေ စက္ခုပထာနိ ယာစိတော၊

ဒဒါဟိ မေ စက္ခုပထံ အနုတ္တရံ၊ ယမာဟု နေတ္တံ ပုရိသေန ဒုစ္စဇ’’န္တိ. (ဇာ. ၁.၁၅.၅၄-၅၅)၊

မဟာသတ္တော အာဟ –

‘‘ယေန အတ္ထေန အာဂစ္ဆိ၊ ယမတ္ထမဘိပတ္ထယံ၊

တေ တေ ဣဇ္ဈန္တု သင်္ကပ္ပါ၊ လဘ စက္ခူနိ ဗြာဟ္မဏ.

‘‘ဧကံ တေ ယာစမာနဿ၊ ဥဘယာနိ ဒဒါမဟံ၊

သ စက္ခုမာ ဂစ္ဆ ဇနဿ ပေက္ခတော၊

ယဒိစ္ဆသေ တွံ တဒ တေ သမိဇ္ဈတူ’’တိ. (ဇာ. ၁.၁၅.၅၆-၅၇)၊

တတ္ထ ဝနိဗ္ဗကာတိ တံ အာလပတိ. စက္ခုပထာနီတိ ဒဿနဿ ပထဘာဝတော စက္ခူနမေဝေတံ နာမံ. ယမာဟူတိ ယံ လောကေ ‘‘ဒုစ္စဇ’’န္တိ ကထေန္တိ. ဝနိဗ္ဗတောတိ ယာစန္တဿ. ဝနိန္တိ ယာစနံ. တေ တေတိ တေ တဝ တဿ အန္ဓဿ သင်္ကပ္ပါ. သ စက္ခုမာတိ သော တွံ မမ စက္ခူဟိ စက္ခုမာ ဟုတွာ. တဒ တေ သမိဇ္ဈတူတိ ယံ တွံ မမ သန္တိကာ ဣစ္ဆသိ၊ တံ တေ သမိဇ္ဈတူတိ.

ရာဇာ ဧတ္တကံ ကထေတွာ ‘‘အယံ ဗြာဟ္မဏော သက္ကေန အနုသိဋ္ဌော ဣဓာဂတောသ္မီတိ ဘဏတိ၊ နူန ဣမဿ ဣမိနာ ဥပါယေန စက္ခု သမ္ပဇ္ဇိဿတီ’’တိ ဉတွာ ‘‘ဣဓေဝ မယာ စက္ခူနိ ဥပ္ပါဋေတွာ ဒါတုံ အသာရုပ္ပ’’န္တိ စိန္တေတွာ ဗြာဟ္မဏံ အာဒါယ အန္တေပုရံ ဂန္တွာ ရာဇာသနေ နိသီဒိတွာ သိဝကံ နာမ ဝေဇ္ဇံ ပက္ကောသာပေသိ. အထ ‘‘အမှာကံ ကိရ ရာဇာ အက္ခီနိ ဥပ္ပါဋေတွာ ဗြာဟ္မဏဿ ဒါတုကာမော’’တိ သကလနဂရေ ဧကကောလာဟလံ အဟောသိ. အထ နံ ရညော ဉာတိသေနာပတိအာဒယော ရာဇဝလ္လဘာ အမစ္စာ ပါရိသဇ္ဇာ နာဂရာ ဩရောဓာ စ သဗ္ဗေ သန္နိပတိတွာ နာနာဥပါယေဟိ နိဝါရေသုံ. ရာဇာပိ နေ အနုဝါရေသိ တေနာဟ –

‘‘မာ နော ဒေဝ အဒါ စက္ခုံ၊ မာ နော သဗ္ဗေ ပရာကရိ၊

ဓနံ ဒေဟိ မဟာရာဇ၊ မုတ္တာ ဝေဠုရိယာ ဗဟူ.

‘‘ယုတ္တေ ဒေဝ ရထေ ဒေဟိ၊ အာဇာနီယေ စလင်္ကတေ၊

နာဂေ ဒေဟိ မဟာရာဇ၊ ဟေမကပ္ပနဝါသသေ.

‘‘ယထာ တံ သိဝယော သဗ္ဗေ၊ သယောဂ္ဂါ သရထာ သဒါ၊

သမန္တာ ပရိကိရေယျုံ၊ ဧဝံ ဒေဟိ ရထေသဘာ’’တိ. (ဇာ. ၁.၁၅.၅၈-၆၀)၊

အထ ရာဇာ တိဿော ဂါထာ အဘာသိ –

‘‘ယော ဝေ ဒဿန္တိ ဝတွာန၊ အဒါနေ ကုရုတေ မနော၊

ဘူမျံ သော ပတိတံ ပါသံ၊ ဂီဝါယံ ပဋိမုဉ္စတိ.

‘‘ယော ဝေ ဒဿန္တိ ဝတွာန၊ အဒါနေ ကုရုတေ မနော၊

ပါပါ ပါပတရော ဟောတိ၊ သမ္ပတ္တော ယမသာဓနံ.

‘‘ယဉှိ ယာစေ တဉှိ ဒဒေ၊ ယံ န ယာစေ န တံ ဒဒေ၊

သွာဟံ တမေဝ ဒဿာမိ၊ ယံ မံ ယာစတိ ဗြာဟ္မဏော’’တိ. (ဇာ. ၁.၁၅.၆၁-၆၃)၊

တတ္ထ မာ နော၊ ဒေဝါတိ နောတိ နိပါတမတ္တံ. ဒေဝ၊ မာ စက္ခုံ အဒါသိ. မာ နော သဗ္ဗေ ပရာကရီတိ အမှေ သဗ္ဗေ မာ ပရိစ္စဇိ. အက္ခီသု ဟိ ဒိန္နေသု တွံ ရဇ္ဇံ န ကရိဿသိ၊ ဧဝံ တယာ မယံ ပရိစ္စတ္တာ နာမ ဘဝိဿာမာတိ အဓိပ္ပါယေန ဧဝမာဟံသု. ပရိကိရေယျုန္တိ ပရိဝါရေယျုံ. ဧဝံ ဒေဟီတိ ယထာ တံ အဝိကလစက္ခုံ သိဝယော စိရံ ပရိဝါရေယျုံ၊ ဧဝံ ဒေဟိ ဓနမေဝဿ ဒေဟိ၊ မာ အက္ခီနိ၊ အက္ခီသု ဟိ ဒိန္နေသု န တံ သိဝယော ပရိဝါရေဿန္တီတိ ဒဿေတိ.

ပဋိမုဉ္စတီတိ ပဋိပဝေသေတိ. ပါပါ ပါပတရော ဟောတီတိ လာမကာ လာမကတရော နာမ ဟောတိ. သမ္ပတ္တော ယမသာဓနန္တိ ယမဿ အာဏာပဝတ္တိဋ္ဌာနံ ဥဿဒနိရယံ ဧသ ပတ္တော နာမ ဟောတိ. ယဉှိ ယာစေတိ ယံ ဝတ္ထုံ ယာစကော ယာစတိ၊ ဒါယကောပိ တဒေဝ ဒဒေယျ၊ န အယာစိတံ၊ အယဉ္စ ဗြာဟ္မဏော စက္ခုံ မံ ယာစတိ၊ န မုတ္တာဒိကံ ဓနံ၊ တံ ဒဿာမီတိ ဝဒတိ.

အထ နံ ‘‘အာယုအာဒီသု ကိံ ပတ္ထေတွာ စက္ခူနိ ဒေသိ ဒေဝါ’’တိ ပုစ္ဆိံသု. မဟာပုရိသော ‘‘နာဟံ ဒိဋ္ဌဓမ္မိကံ သမ္ပရာယိကံ ဝါ သမ္ပတ္တိံ ပတ္ထေတွာ ဒေမိ၊ အပိ စ ဗောဓိသတ္တာနံ အာစိဏ္ဏသမာစိဏ္ဏော ပေါရာဏကမဂ္ဂေါ ဧသ၊ ယဒိဒံ ဒါနပါရမိပူရဏံ နာမာ’’တိ အာဟ. တေန ဝုတ္တံ –

‘‘အာယုံ နု ဝဏ္ဏံ နု သုခံ ဗလံ နု၊ ကိံ ပတ္ထယာနော နု ဇနိန္ဒ ဒေသိ၊

ကထဉှိ ရာဇာ သိဝိနံ အနုတ္တရော၊ စက္ခူနိ ဒဇ္ဇာ ပရလောကဟေတု.

‘‘န ဝါဟမေတံ ယသသာ ဒဒါမိ၊ န ပုတ္တမိစ္ဆေ န ဓနံ န ရဋ္ဌံ၊

သတဉ္စ ဓမ္မော စရိတော ပုရာဏော၊ ဣစ္စေဝ ဒါနေ ရမတေ မနော မမာ’’တိ. (ဇာ. ၁.၁၅.၆၄-၆၅)၊

တတ္ထ ပရလောကဟေတူတိ၊ မဟာရာဇ၊ ကထံ နာမ တုမှာဒိသော ပဏ္ဍိတပုရိသော သက္ကသမ္ပတ္တိသဒိသံ သန္ဒိဋ္ဌိကံ ဣဿရိယံ ပဟာယ ပရလောကဟေတု စက္ခူနိ ဒဒေယျာတိ.

န ဝါဟန္တိ န ဝေ အဟံ. ယသသာတိ ဒိဗ္ဗဿ ဝါ မာနုသဿ ဝါ ဣဿရိယဿ ကာရဏာ၊ အပိစ သတံ ဗောဓိသတ္တာနံ ဓမ္မော ဗုဒ္ဓကာရကော စရိတော အာစရိတော အာစိဏ္ဏော ပုရာတနော ဣစ္စေဝ ဣမိနာ ကာရဏေန ဒါနေယေဝ ဤဒိသော မမ မနော နိရတောတိ.

ဧဝဉ္စ ပန ဝတွာ ရာဇာ အမစ္စေ သညာပေတွာ သိဝကံ ဝေဇ္ဇံ အာဏာပေသိ – ‘‘ဧဟိ၊ သိဝက၊ မမ ဥဘောပိ အက္ခီနိ ဣမဿ ဗြာဟ္မဏဿ ဒါတုံ သီဃံ ဥပ္ပါဋေတွာ ဟတ္ထေ ပတိဋ္ဌပေဟီ’’တိ. တေန ဝုတ္တံ –

၆၃. ‘‘ဧဟိ သိဝက ဥဋ္ဌေဟိ၊ မာ ဒန္ဓယိ မာ ပဝေဓယိ၊

ဥဘောပိ နယနံ ဒေဟိ၊ ဥပ္ပါဋေတွာ ဝနိဗ္ဗကေ.

၆၄. ‘‘တတော သော စောဒိတော မယှံ၊ သိဝကော ဝစနံကရော၊

ဥဒ္ဓရိတွာန ပါဒါသိ၊ တာလမိဉ္ဇံဝ ယာစကေ’’တိ.

တတ္ထ ဥဋ္ဌေဟီတိ ဥဋ္ဌာနဝီရိယံ ကရောဟိ. ဣမသ္မိံ မမ စက္ခုဒါနေ သဟာယကိစ္စံ ကရောဟီတိ ဒဿေတိ. မာ ဒန္တယီတိ မာ စိရာယိ. အယဉှိ အတိဒုလ္လဘော စိရကာလံ ပတ္ထိတော မယာ ဥတ္တမော ဒါနက္ခဏော ပဋိလဒ္ဓေါ၊ သော မာ ဝိရဇ္ဈီတိ အဓိပ္ပါယော. မာ ပဝေဓယီတိ ‘‘အမှာကံ ရညော စက္ခူနိ ဥပ္ပါဋေမီ’’တိ စိတ္တုတြာသဝသေန မာ ဝေဓယိ သရီရကမ္ပံ မာ အာပဇ္ဇိ. ဥဘောပိ နယနန္တိ ဥဘောပိ နယနေ. ဝနိဗ္ဗကေတိ ယာစကဿ မယှန္တိ မယာ. ဥဒ္ဓရိတွာန ပါဒါသီတိ သော ဝေဇ္ဇော ရညော အက္ခိကူပတော ဥဘောပိ အက္ခီနိ ဥပ္ပါဋေတွာ ရညော ဟတ္ထေ အဒါသိ.

ဒေန္တော စ န သတ္ထကေန ဥဒ္ဓရိတွာ အဒါသိ. သော ဟိ စိန္တေသိ – ‘‘အယုတ္တံ မာဒိသဿ သုသိက္ခိတဝေဇ္ဇဿ ရညော အက္ခီသု သတ္ထပါတန’’န္တိ ဘေသဇ္ဇာနိ ဃံသေတွာ ဘေသဇ္ဇစုဏ္ဏေန နီလုပ္ပလံ ပရိဘာဝေတွာ ဒက္ခိဏက္ခိံ ဥပသိင်္ဃာပေသိ၊ အက္ခိ ပရိဝတ္တိ၊ ဒုက္ခာ ဝေဒနာ ဥပ္ပဇ္ဇိ. သော ပရိဘာဝေတွာ ပုနပိ ဥပသိင်္ဃာပေသိ၊ အက္ခိ အက္ခိကူပတော မုစ္စိ၊ ဗလဝတရာ ဝေဒနာ ဥဒပါဒိ၊ တတိယဝါရေ ခရတရံ ပရိဘာဝေတွာ ဥပနာမေသိ၊ အက္ခိ ဩသဓဗလေန ပရိဗ္ဘမိတွာ အက္ခိကူပတော နိက္ခမိတွာ နှာရုသုတ္တကေန ဩလမ္ဗမာနံ အဋ္ဌာသိ၊ အဓိမတ္တာ ဝေဒနာ ဥဒပါဒိ၊ လောဟိတံ ပဂ္ဃရိ၊ နိဝတ္ထသာဋကာပိ လောဟိတေန တေမိံသု. ဩရောဓာ စ အမစ္စာ စ ရညော ပါဒမူလေ ပတိတွာ ‘‘ဒေဝ၊ အက္ခီနိ မာ ဒေဟိ၊ ဒေဝ၊ အက္ခီနိ မာ ဒေဟီ’’တိ မဟာပရိဒေဝံ ပရိဒေဝိံသု.

ရာဇာ ဝေဒနံ အဓိဝါသေတွာ ‘‘တာတ၊ မာ ပပဉ္စံ ကရီ’’တိ အာဟ. သော ‘‘သာဓု၊ ဒေဝါ’’တိ ဝါမဟတ္ထေန အက္ခိံ ဓာရေတွာ ဒက္ခိဏဟတ္ထေန သတ္ထကံ အာဒါယ အက္ခိသုတ္တကံ ဆိန္ဒိတွာ အက္ခိံ ဂဟေတွာ မဟာသတ္တဿ ဟတ္ထေ ဌပေသိ. သော ဝါမက္ခိနာ ဒက္ခိဏက္ခိံ ဩလောကေတွာ ပရိစ္စာဂပီတိယာ အဘိဘုယျမာနံ ဒုက္ခဝေဒနံ ဝေဒေန္တော ‘‘ဧဟိ၊ ဗြာဟ္မဏာ’’တိ ဗြာဟ္မဏံ ပက္ကောသာပေတွာ ‘‘မမ ဣတော စက္ခုတော သတဂုဏေန သဟဿဂုဏေန သတသဟဿဂုဏေန သမန္တစက္ခုမေဝ ပိယတရံ၊ တဿ မေ ဣဒံ အက္ခိဒါနံ ပစ္စယော ဟောတူ’’တိ ဗြာဟ္မဏဿ အက္ခိံ အဒါသိ. သော တံ ဥက္ခိပိတွာ အတ္တနော အက္ခိမှိ ဌပေသိ၊ တံ တဿာနုဘာဝေန ဝိကသိတနီလုပ္ပလံ ဝိယ ဟုတွာ ဥပဋ္ဌာသိ. မဟာသတ္တော ဝါမက္ခိနာ တဿ တံ အက္ခိံ ဒိသွာ ‘‘အဟော သုဒိန္နံ မယာ အက္ခီ’’တိ အန္တောသမုဂ္ဂတာယ ပီတိယာ နိရန္တရံ ဖုဋသရီရော ဟုတွာ အပရမ္ပိ အဒါသိ. သက္ကောပိ တံ တထေဝ ကတွာ ရာဇနိဝေသနာ နိက္ခမိတွာ မဟာဇနဿ ဩလောကေန္တဿေဝ နဂရာ နိက္ခမိတွာ ဒေဝလောကမေဝ ဂတော.

ရညော နစိရဿေဝ အက္ခီနိ အာဝါဋဘာဝံ အပ္ပတ္တာနိ ကမ္ဗလဂေဏ္ဍုကံ ဝိယ ဥဂ္ဂတေန မံသပိဏ္ဍေန ပူရေတွာ စိတ္တကမ္မရူပဿ ဝိယ ရုဟိံသု၊ ဝေဒနာ ပစ္ဆိဇ္ဇိ. အထ မဟာသတ္တော ကတိပါဟံ ပါသာဒေ ဝသိတွာ ‘‘ကိံ အန္ဓဿ ရဇ္ဇေနာတိ အမစ္စာနံ ရဇ္ဇံ နိယျာတေတွာ ဥယျာနံ ဂန္တွာ ပဗ္ဗဇိတွာ သမဏဓမ္မံ ကရိဿာမီ’’တိ စိန္တေတွာ အမစ္စာနံ တမတ္ထံ အာရောစေတွာ ‘‘မုခဓောဝနာဒိဒါယကော ဧကော ပုရိသော မယှံ သန္တိကေ ဟောတု၊ သရီရကိစ္စဋ္ဌာနေသုပိ မေ ရဇ္ဇုကံ ဗန္ဓထာ’’တိ ဝတွာ သိဝိကာယ ဂန္တွာ ပေါက္ခရဏိတီရေ ရာဇပလ္လင်္ကေ နိသီဒိ. အမစ္စာပိ ဝန္ဒိတွာ ပဋိက္ကမိံသု. ဗောဓိသတ္တောပိ အတ္တနော ဒါနံ အာဝဇ္ဇေသိ. တသ္မိံ ခဏေ သက္ကဿ အာသနံ ဥဏှာကာရံ ဒဿေသိ. သက္ကော တံ ဒိသွာ ‘‘မဟာရာဇဿ ဝရံ ဒတွာ စက္ခုံ ပဋိပါကတိကံ ကရိဿာမီ’’တိ ဗောဓိသတ္တဿ သမီပံ ဂန္တွာ ပဒသဒ္ဒမကာသိ. မဟာသတ္တေန စ ‘‘ကော ဧသော’’တိ ဝုတ္တေ –

‘‘သက္ကောဟမသ္မိ ဒေဝိန္ဒော၊ အာဂတောသ္မိ တဝန္တိကေ၊

ဝရံ ဝရဿု ရာဇီသိ၊ ယံ ကိဉ္စိ မနသိစ္ဆသီ’’တိ. (ဇာ. ၁.၁၅.၇၁) –

ဝတွာ တေန –

‘‘ပဟူတံ မေ ဓနံ သက္က၊ ဗလံ ကောသော စနပ္ပကော၊

အန္ဓဿ မေ သတော ဒါနိ၊ မရဏညေဝ ရုစ္စတီ’’တိ. (ဇာ. ၁.၁၅.၇၂) –

ဝုတ္တေ အထ နံ သက္ကော အာဟ – ‘‘သိဝိရာဇ၊ ကိံ ပန တွံ မရိတုကာမော ဟုတွာ မရဏံ ရောစေသိ၊ ဥဒါဟု အန္ဓဘာဝေနာ’’တိ. အန္ဓဘာဝေန၊ ဒေဝါတိ. ‘‘မဟာရာဇ၊ ဒါနံ နာမ န ကေဝလံ သမ္ပရာယတ္ထမေဝ ဒိယျတိ၊ ဒိဋ္ဌဓမ္မတ္ထာယပိ ပစ္စယော ဟောတိ၊ တသ္မာ တဝ ဒါနပုညမေဝ နိဿာယ သစ္စကိရိယံ ကရောဟိ၊ တဿ ဗလေနေဝ တေ စက္ခု ဥပ္ပဇ္ဇိဿတီ’’တိ ဝုတ္တေ ‘‘တေန ဟိ မယာ မဟာဒါနံ သုဒိန္န’’န္တိ ဝတွာ သစ္စကိရိယံ ကရောန္တော –

‘‘ယေ မံ ယာစိတုမာယန္တိ၊ နာနာဂေါတ္တာ ဝနိဗ္ဗကာ၊

ယောပိ မံ ယာစတေ တတ္ထ၊ သောပိ မေ မနသော ပိယော၊

ဧတေန သစ္စဝဇ္ဇေန၊ စက္ခု မေ ဥပပဇ္ဇထာ’’တိ. (ဇာ. ၁.၁၅.၇၄) –

အာဟ.

တတ္ထ ယေ မန္တိ ယေ မံ ယာစိတုမာဂစ္ဆန္တိ၊ တေသုပိ အာဂတေသု ယော ဣမံ နာမ ဒေဟီတိ ဝါစံ နိစ္ဆာရေန္တော မံ ယာစတေ၊ သောပိ မေ မနသော ပိယော. ဧတေနာတိ သစေ မယှံ သဗ္ဗေပိ ယာစကာ ပိယာ၊ သစ္စမေဝေတံ မယာ ဝုတ္တံ၊ ဧတေန မေ သစ္စဝစနေန ဧကံ စက္ခု ဥပပဇ္ဇထ ဥပ္ပဇ္ဇတူတိ.

အထဿ ဝစနသမနန္တရမေဝ ပဌမံ စက္ခု ဥဒပါဒိ. တတော ဒုတိယဿ ဥပ္ပဇ္ဇနတ္ထာယ –

‘‘ယံ မံ သော ယာစိတုံ အာဂါ၊ ဒေဟိ စက္ခုန္တိ ဗြာဟ္မဏော၊

တဿ စက္ခူနိ ပါဒါသိံ၊ ဗြာဟ္မဏဿ ဝနိဗ္ဗတော.

‘‘ဘိယျော မံ အာဝိသီ ပီတိ၊ သောမနဿဉ္စနပ္ပကံ၊

ဧတေန သစ္စဝဇ္ဇေန၊ ဒုတိယံ မေ ဥပပဇ္ဇထာ’’တိ. (ဇာ. ၁.၁၅.၇၅-၇၆) –

အာဟ.

တတ္ထ ယံ မန္တိ ယော မံ. သောတိ သော စက္ခုယာစကော ဗြာဟ္မဏော. အာဂါတိ အာဂတော. ဝနိဗ္ဗတောတိ ယာစန္တဿ. မံ အာဝိသီတိ ဗြာဟ္မဏဿ စက္ခူနိ ဒတွာ အန္ဓကာလေပိ တထာရူပံ ဝေဒနံ အဂဏေတွာ ‘‘အဟော သုဒိန္နံ မေ ဒါန’’န္တိ ပစ္စဝေက္ခန္တံ မံ ဘိယျော အတိရေကတရာ ပီတိ အာဝိသိ. သောမနဿဉ္စနပ္ပကန္တိ အပရိမာဏံ သောမနဿံ ဥပ္ပဇ္ဇိ. ဧတေနာတိ သစေ တဒါ မမ အနပ္ပကံ ပီတိသောမနဿံ ဥပ္ပန္နံ၊ သစ္စမေဝေတံ မယာ ဝုတ္တံ၊ ဧတေန မေ သစ္စဝစနေန ဒုတိယမ္ပိ စက္ခု ဥပပဇ္ဇတူတိ.

တံခဏညေဝ ဒုတိယမ္ပိ စက္ခု ဥဒပါဒိ. တာနိ ပနဿ စက္ခူနိ နေဝ ပါကတိကာနိ၊ န ဒိဗ္ဗာနိ. သက္ကဗြာဟ္မဏဿ ဟိ ဒိန္နံ စက္ခုံ ပုန ပါကတိကံ ကာတုံ န သက္ကာ၊ ဥပဟတစက္ခုနော စ ဒိဗ္ဗစက္ခု နာမ နုပ္ပဇ္ဇတိ၊ ဝုတ္တနယေန ပနဿ အာဒိမဇ္ဈပရိယောသာနေသု အဝိပရီတံ အတ္တနော ဒါနပီတိံ ဥပါဒါယ ပီတိဖရဏဝသေန နိဗ္ဗတ္တာနိ ‘‘သစ္စပါရမိတာစက္ခူနီ’’တိ ဝုတ္တာနိ. တေန ဝုတ္တံ –

၆၅. ‘‘ဒဒမာနဿ ဒေန္တဿ၊ ဒိန္နဒါနဿ မေ သတော၊

စိတ္တဿ အညထာ နတ္ထိ၊ ဗောဓိယာယေဝ ကာရဏာ’’တိ.

တတ္ထ ဒဒမာနဿာတိ စက္ခူနိ ဒါတုံ ဝေဇ္ဇေန ဥပ္ပါဋေန္တဿ. ဒေန္တဿာတိ ဥပ္ပါဋိတာနိ တာနိ သက္ကဗြာဟ္မဏဿ ဟတ္ထေ ဌပေန္တဿ. ဒိန္နဒါနဿာတိ စက္ခုဒါနံ ဒိန္နဝတော. စိတ္တဿ အညထာတိ ဒါနဇ္ဈာသယဿ အညထာဘာဝေါ. ဗောဓိယာယေဝ ကာရဏာတိ တဉ္စ သဗ္ဗညုတညာဏဿေဝ ဟေတူတိ အတ္ထော.

၆၆. သဗ္ဗညုတညာဏဿ သုဒုလ္လဘတာယ ဧဝံ သုဒုက္ကရံ မယာ ကတန္တိ န စက္ခူနံ န အတ္တဘာဝဿပိ အပ္ပိယတာယာတိ ဒဿေန္တော ‘‘န မေ ဒေဿာ’’တိ ဩသာနဂါထမာဟ. တတ္ထ အတ္တာ န မေ န ဒေဿိယောတိ ပဌမော န-ကာရော နိပါတမတ္တော. အတ္တာ န မေ ကုဇ္ဈိတဗ္ဗော၊ န အပ္ပိယောတိ အတ္ထော. ‘‘အတ္တာနံ မေ န ဒေဿိယ’’န္တိပိ ပါဌော. တဿတ္ထော – မေ အတ္တာနံ အဟံ န ဒေဿိယံ န ကုဇ္ဈေယျံ န ကုဇ္ဈိတုံ အရဟာမိ န သော မယာ ကုဇ္ဈိတဗ္ဗောတိ. ‘‘အတ္တာပိ မေ န ဒေဿိယော’’တိပိ ပဌန္တိ. အဒါသဟန္တိ အဒါသိံ အဟံ. ‘‘အဒါသိဟ’’န္တိပိ ပါဌော.

တဒါ ပန ဗောဓိသတ္တဿ သစ္စကိရိယာယ စက္ခူသု ဥပ္ပန္နေသု သက္ကာနုဘာဝေန သဗ္ဗာ ရာဇပရိသာ သန္နိပတိတာဝ အဟောသိ. အထဿ သက္ကော မဟာဇနမဇ္ဈေ အာကာသေ ဌတွာ –

‘‘ဓမ္မေန ဘာသိတာ ဂါထာ၊ သိဝီနံ ရဋ္ဌဝဍ္ဎန၊

ဧတာနိ တဝ နေတ္တာနိ၊ ဒိဗ္ဗာနိ ပဋိဒိဿရေ.

‘‘တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ၊

သမန္တာ ယောဇနသတံ၊ ဒဿနံ အနုဘောန္တု တေ’’တိ. (ဇာ. ၁.၁၅.၇၇-၇၈) –

ဣမာဟိ ဂါထာဟိ ထုတိံ ကတွာ ဒေဝလောကမေဝ ဂတော. ဗောဓိသတ္တောပိ မဟာဇနပရိဝုတော မဟန္တေန သက္ကာရေန နဂရံ ပဝိသိတွာ ရာဇဂေဟဒွါရေ သုသဇ္ဇိတေ မဟာမဏ္ဍပေ သမုဿိတသေတစ္ဆတ္တေ ရာဇပလ္လင်္ကေ နိသိန္နော စက္ခုပဋိလာဘေန တုဋ္ဌဟဋ္ဌပမုဒိတာနံ ဒဋ္ဌုံ အာဂတာနံ နာဂရာနံ ဇာနပဒါနံ ရာဇပရိသာယ စ ဓမ္မံ ဒေသေန္တော –

‘‘ကော နီဓ ဝိတ္တံ န ဒဒေယျ ယာစိတော၊ အပိ ဝိသိဋ္ဌံ သုပိယမ္ပိ အတ္တနော၊

တဒိင်္ဃ သဗ္ဗေ သိဝယော သမာဂတာ၊ ဒိဗ္ဗာနိ နေတ္တာနိ မမဇ္ဇ ပဿထ.

‘‘တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ၊

သမန္တာ ယောဇနသတံ၊ ဒဿနံ အနုဘောန္တိ မေ.

‘‘န စာဂမတ္တာ ပရမတ္ထိ ကိဉ္စိ၊ မစ္စာနံ ဣဓ ဇီဝိတေ၊

ဒတွာန မာနုသံ စက္ခုံ၊ လဒ္ဓံ မေ စက္ခု အမာနုသံ.

‘‘ဧတမ္ပိ ဒိသွာ သိဝယော၊ ဒေထ ဒါနာနိ ဘုဉ္ဇထ၊

ဒတွာ စ ဘုတွာ စ ယထာနုဘာဝံ၊ အနိန္ဒိတာ သဂ္ဂမုပေထ ဌာန’’န္တိ. (ဇာ. ၁.၁၅.၇၉-၈၂) –

ဣမာ ဂါထာ အဘာသိ. တတ္ထ ဓမ္မေန ဘာသိတာတိ၊ မဟာရာဇ၊ ဣမာ တေ ဂါထာ ဓမ္မေန သဘာဝေနေဝ ဘာသိတာ. ဒိဗ္ဗာနီတိ ဒိဗ္ဗာနုဘာဝယုတ္တာနိ. ပဋိဒိဿရေတိ ပဋိဒိဿန္တိ. တိရောကုဋ္ဋန္တိ ပရကုဋ္ဋံ. တိရောသေလန္တိ ပရသေလံ. သမတိဂ္ဂယှာတိ အတိက္ကမိတွာ. သမန္တာ ဒသဒိသာ ယောဇနသတံ ရူပဒဿနံ အနုဘောန္တု သာဓေန္တု.

ကော နီဓာတိ ကော နု ဣဓ. အပိ ဝိသိဋ္ဌန္တိ ဥတ္တမမ္ပိ သမာနံ. န စာဂမတ္တာတိ စာဂပ္ပမာဏတော အညံ ဝရံ နာမ နတ္ထိ. ဣဓ ဇီဝိတေတိ ဣမသ္မိံ ဇီဝလောကေ. ‘‘ဣဓ ဇီဝတ’’န္တိပိ ပဌန္တိ. ဣမသ္မိံ လောကေ ဇီဝမာနာနန္တိ အတ္ထော. အမာနုသန္တိ ဒိဗ္ဗစက္ခု မယာ လဒ္ဓံ၊ ဣမိနာ ကာရဏေန ဝေဒိတဗ္ဗမေတံ ‘‘စာဂတော ဥတ္တမံ နာမ နတ္ထီ’’တိ. ဧတမ္ပိ ဒိသွာတိ ဧတံ မယာ လဒ္ဓံ ဒိဗ္ဗစက္ခုံ ဒိသွာပိ.

ဣတိ ဣမာဟိ စတူဟိ ဂါထာဟိ န ကေဝလံ တသ္မိံယေဝ ခဏေ၊ အထ ခေါ အနွဒ္ဓမာသမ္ပိ ဥပေါသထေ မဟာဇနံ သန္နိပါတေတွာ ဓမ္မံ ဒေသေသိ. တံ သုတွာ မဟာဇနော ဒါနာဒီနိ ပုညာနိ ကတွာ ဒေဝလောကပရာယနော အဟောသိ.

တဒါ ဝေဇ္ဇော အာနန္ဒတ္ထေရော အဟောသိ၊ သက္ကော အနုရုဒ္ဓတ္ထေရော၊ သေသပရိသာ ဗုဒ္ဓပရိသာ၊ သိဝိရာဇာ လောကနာထော.

တဿ ဣဓာပိ ဝုတ္တနယေနေဝ ယထာရဟံ ပါရမိယော နိဒ္ဓါရေတဗ္ဗာ. တထာ ဒိဝသေ ဒိဝသေ ယထာ အဒိန္နပုဗ္ဗံ ဗာဟိရဒေယျဓမ္မဝတ္ထု န ဟောတိ၊ ဧဝံ အပရိမိတံ မဟာဒါနံ ပဝတ္တေန္တဿ တေန အပရိတုဋ္ဌဿ ကထံ နု ခေါ အဟံ အဇ္ဈတ္တိကဝတ္ထုကံ ဒါနံ ဒဒေယျံ၊ ကဒါ နု ခေါ မံ ကောစိ အာဂန္တွာ အဇ္ဈတ္တိကံ ဒေယျဓမ္မံ ယာစေယျ၊ သစေ ဟိ ကောစိ ယာစကော မေ ဟဒယမံသဿ နာမံ ဂဏှေယျ၊ ကဏယေန နံ နီဟရိတွာ ပသန္နဥဒကတော သနာဠံ ပဒုမံ ဥဒ္ဓရန္တော ဝိယ လောဟိတဗိန္ဒုံ ပဂ္ဃရန္တံ ဟဒယံ နီဟရိတွာ ဒဿာမိ. သစေ သရီရမံသဿ နာမံ ဂဏှေယျ၊ အဝလေခနေန တာလဂုဠပဋလံ ဥပ္ပါဋေန္တော ဝိယ သရီရမံသံ ဥပ္ပါဋေတွာ ဒဿာမိ. သစေ လောဟိတဿ နာမံ ဂဏှေယျ၊ အသိနာ ဝိဇ္ဈိတွာ ယန္တမုခေ ဝါ ပတိတွာ ဥပနီတံ ဘာဇနံ ပူရေတွာ လောဟိတံ ဒဿာမိ. သစေ ပန ကောစိ ‘‘ဂေဟေ မေ ကမ္မံ နပ္ပဝတ္တတိ၊ တတ္ထ မေ ဒါသကမ္မံ ကရောဟီ’’တိ ဝဒေယျ၊ ရာဇဝေသံ အပနေတွာ တဿ အတ္တာနံ သာဝေတွာ ဒါသကမ္မံ ကရိဿာမိ. သစေ ဝါ ပန ကောစိ အက္ခီနံ နာမံ ဂဏှေယျ၊ တာလမိဉ္ဇံ နီဟရန္တော ဝိယ အက္ခီနိ ဥပ္ပါဋေတွာ တဿ ဒဿာမီတိ ဧဝံ အနညသာဓာရဏဝသီဘာဝပ္ပတ္တာနံ မဟာဗောဓိသတ္တာနံယေဝ အာဝေဏိကာ ဥဠာရတရာ ပရိဝိတက္ကုပ္ပတ္တိ၊ စက္ခုယာစကံ လဘိတွာ အမစ္စပါရိသဇ္ဇာဒီဟိ နိဝါရိယမာနဿာပိ တေသံ ဝစနံ အနာဒိယိတွာ အတ္တနော ပရိဝိတက္ကာနုရူပံ ပဋိပတ္တိယာ စ ပရမာ ပီတိပဋိသံဝေဒနာ၊ တဿာ ပီတိမနတာယ အဝိတထဘာဝံ နိဿာယ သက္ကဿ ပုရတော သစ္စကိရိယာကရဏံ၊ တေန စ အတ္တနော စက္ခူနံ ပဋိပါကတိကဘာဝေါ၊ တေသဉ္စ ဒိဗ္ဗာနုဘာဝတာတိ ဧဝမာဒယော မဟာသတ္တဿ ဂုဏာနုဘာဝါ ဝေဒိတဗ္ဗာတိ.

သိဝိရာဇစရိယာဝဏ္ဏနာ နိဋ္ဌိတာ.