၇. စန္ဒကုမာရစရိယာဝဏ္ဏနာ

၄၅. သတ္တမေ ဧကရာဇဿ အတြဇောတိ ဧကရာဇဿ နာမ ကာသိရညော ဩရသပုတ္တော. နဂရေ ပုပ္ဖဝတိယာတိ ပုပ္ဖဝတိနာမကေ နဂရေ. စန္ဒသဝှယောတိ စန္ဒသဒ္ဒေန အဝှါတဗ္ဗော၊ စန္ဒနာမောတိ အတ္ထော.

အတီတေ ကိရ အယံ ဗာရာဏသီ ပုပ္ဖဝတီ နာမ အဟောသိ. တတ္ထ ဝသဝတ္တိရညော ပုတ္တော ဧကရာဇာ နာမ ရဇ္ဇံ ကာရေသိ. ဗောဓိသတ္တော တဿ ဂေါတမိယာ နာမ အဂ္ဂမဟေသိယာ ကုစ္ဆိမှိ ပဋိသန္ဓိံ အဂ္ဂဟေသိ. ‘‘စန္ဒကုမာရော’’တိဿ နာမမကံသု. တဿ ပဒသာ ဂမနကာလေ အပရောပိ ပုတ္တော ဥပ္ပန္နော၊ တဿ ‘‘သူရိယကုမာရော’’တိ နာမမကံသု. တဿ ပဒသာ ဂမနကာလေ ဧကာ ဓီတာ ဥပ္ပန္နာ၊ ‘‘သေလာ’’တိဿာ နာမမကံသု. ဝေမာတိကာ စ နေသံ ဘဒ္ဒသေနော သူရော စာတိ ဒွေ ဘာတရော အဟေသုံ. ဗောဓိသတ္တော အနုပုဗ္ဗေန ဝုဒ္ဓိပ္ပတ္တော သိပ္ပေသု စ ဝိဇ္ဇာဋ္ဌာနေသု စ ပါရံ အဂမာသိ. တဿ ရာဇာ အနုစ္ဆဝိကံ စန္ဒံ နာမ ရာဇဓီတရံ အာနေတွာ ဥပရဇ္ဇံ အဒါသိ. ဗောဓိသတ္တဿ ဧကော ပုတ္တော ဥပ္ပန္နော၊ တဿ ‘‘ဝါသုလော’’တိ နာမမကံသု. တဿ ပန ရညော ခဏ္ဍဟာလော နာမ ပုရောဟိတော၊ တံ ရာဇာ ဝိနိစ္ဆယေ ဌပေသိ. သော လဉ္ဇဝိတ္တကော ဟုတွာ လဉ္ဇံ ဂဟေတွာ အဿာမိကေ သာမိကေ ကရောတိ၊ သာမိကေ စ အဿာမိကေ ကရောတိ. အထေကဒိဝသံ အဋ္ဋပရာဇိတော ဧကော ပုရိသော ဝိနိစ္ဆယဋ္ဌာနေ ဥပက္ကောသေန္တော နိက္ခမိတွာ ရာဇူပဋ္ဌာနံ ဂစ္ဆန္တံ ဗောဓိသတ္တံ ဒိသွာ တဿ ပါဒေသု နိပတိတွာ ‘‘သာမိ ခဏ္ဍဟာလော ဝိနိစ္ဆယေ ဝိလောပံ ခါဒတိ၊ အဟံ တေန လဉ္ဇံ ဂဟေတွာ ပရာဇယံ ပါပိတော’’တိ အဋ္ဋဿရမကာသိ. ဗောဓိသတ္တော ‘‘မာ ဘာယီ’’တိ တံ အဿာသေတွာ ဝိနိစ္ဆယံ နေတွာ သာမိကမေဝ သာမိကံ အကာသိ. မဟာဇနော မဟာသဒ္ဒေန သာဓုကာရမဒါသိ.

ရာဇာ ‘‘ဗောဓိသတ္တေန ကိရ အဋ္ဋော သုဝိနိစ္ဆိတော’’တိ သုတွာ တံ အာမန္တေတွာ ‘‘တာတ၊ ဣတော ပဋ္ဌာယ တွမေဝ အဋ္ဋကရဏေ ဝိနိစ္ဆယံ ဝိနိစ္ဆိနာဟီ’’တိ ဝိနိစ္ဆယံ ဗောဓိသတ္တဿ အဒါသိ. ခဏ္ဍဟာလဿ အာယော ပစ္ဆိဇ္ဇိ. သော တတော ပဋ္ဌာယ ဗောဓိသတ္တေ အာဃာတံ ဗန္ဓိတွာ ဩတာရာပေက္ခော ဝိစရိ. သော ပန ရာဇာ မုဓပ္ပသန္နော. သော ဧကဒိဝသံ သုပိနန္တေန ဒေဝလောကံ ပဿိတွာ တတ္ထ ဂန္တုကာမော ဟုတွာ ‘‘ပုရောဟိတံ ဗြဟ္မလောကဂါမိမဂ္ဂံ အာစိက္ခာ’’တိ အာဟ. သော ‘‘အတိဒါနံ ဒဒန္တော သဗ္ဗစတုက္ကေန ယညံ ယဇဿူ’’တိ ဝတွာ ရညာ ‘‘ကိံ အတိဒါန’’န္တိ ပုဋ္ဌော ‘‘အတ္တနော ပိယပုတ္တာ ပိယဘရိယာ ပိယဓီတရော မဟာဝိဘဝသေဋ္ဌိနော မင်္ဂလဟတ္ထိအဿာဒယောတိ ဧတေ စတ္တာရော စတ္တာရော ကတွာ ဒွိပဒစတုပ္ပဒေ ယညတ္ထာယ ပရိစ္စဇိတွာ တေသံ ဂလလောဟိတေန ယဇနံ အတိဒါနံ နာမာ’’တိ သညာပေသိ. ဣတိ သော ‘‘သဂ္ဂမဂ္ဂံ အာစိက္ခိဿာမီ’’တိ နိရယမဂ္ဂံ အာစိက္ခိ.

ရာဇာပိ တသ္မိံ ပဏ္ဍိတသညီ ဟုတွာ ‘‘တေန ဝုတ္တဝိဓိ သဂ္ဂမဂ္ဂေါ’’တိ သညာယ တံ ပဋိပဇ္ဇိတုကာမော မဟန္တံ ယညာဝါဋံ ကာရာပေတွာ တတ္ထ ဗောဓိသတ္တာဒိကေ စတ္တာရော ရာဇကုမာရေ အာဒိံ ကတွာ ခဏ္ဍဟာလေန ဝုတ္တံ သဗ္ဗံ ဒွိပဒစတုပ္ပဒံ ယညပသုတဋ္ဌာနေ နေထာတိ အာဏာပေသိ. သဗ္ဗဉ္စ ယညသမ္ဘာရံ ဥပက္ခဋံ အဟောသိ. တံ သုတွာ မဟာဇနော မဟန္တံ ကောလာဟလံ အကာသိ. ရာဇာ ဝိပ္ပဋိသာရီ ဟုတွာ ခဏ္ဍဟာလေန ဥပတ္ထမ္ဘိတော ပုနပိ တထာ တံ အာဏာပေသိ. ဗောဓိသတ္တော ‘‘ခဏ္ဍဟာလေန ဝိနိစ္ဆယဋ္ဌာနံ အလဘန္တေန မယိ အာဃာတံ ဗန္ဓိတွာ မမေဝ မရဏံ ဣစ္ဆန္တေန မဟာဇနဿ အနယဗျသနံ ဥပ္ပါဒိတ’’န္တိ ဇာနိတွာ နာနာဝိဓေဟိ ဥပါယေဟိ ရာဇာနံ တတော ဒုဂ္ဂဟိတဂ္ဂါဟတော ဝိဝေစေတုံ ဝါယမိတွာပိ နာသက္ခိ. မဟာဇနော ပရိဒေဝိ၊ မဟန္တံ ကာရုညမကာသိ. မဟာဇနဿ ပရိဒေဝန္တဿေဝ ယညာဝါဋေ သဗ္ဗကမ္မာနိ နိဋ္ဌာပေသိ. ရာဇပုတ္တံ နေတွာ ဂီဝါယ နာမေတွာ နိသီဒါပေသုံ. ခဏ္ဍဟာလော သုဝဏ္ဏပါတိံ ဥပနာမေတွာ ခဂ္ဂံ အာဒါယ ‘‘တဿ ဂီဝံ ဆိန္ဒိဿာမီ’’တိ အဋ္ဌာသိ. တံ ဒိသွာ စန္ဒာ နာမ ရာဇပုတ္တဿ ဒေဝီ ‘‘အညံ မေ ပဋိသရဏံ နတ္ထိ၊ အတ္တနော သစ္စဗလေန သာမိကဿ သောတ္ထိံ ကရိဿာမီ’’တိ အဉ္ဇလိံ ပဂ္ဂယှ ပရိသာယ အန္တရေ ဝိစရန္တီ ‘‘ဣဒံ ဧကန္တေနေဝ ပါပကမ္မံ၊ ယံ ခဏ္ဍဟာလော သဂ္ဂမဂ္ဂေါတိ ကရောတိ. ဣမိနာ မယှံ သစ္စဝစနေန မမ သာမိကဿ သောတ္ထိ ဟောတု.

‘‘ယာ ဒေဝတာ ဣဓ လောကေ၊ သဗ္ဗာ တာ သရဏံ ဂတာ၊

အနာထံ တာယထ မမံ၊ ယထာဟံ ပတိမာ သိယ’’န္တိ. –

သစ္စကိရိယမကာသိ. သက္ကော ဒေဝရာဇာ တဿာ ပရိဒေဝနသဒ္ဒံ သုတွာ တံ ပဝတ္တိံ ဉတွာ ဇလိတံ အယောကူဋံ အာဒါယ အာဂန္တွာ ရာဇာနံ တာသေတွာ သဗ္ဗေ ဝိဿဇ္ဇာပေသိ. သက္ကောပိ တဒါ အတ္တနော ဒိဗ္ဗရူပံ ဒဿေတွာ သမ္ပဇ္ဇလိတံ သဇောတိဘူတံ ဝဇိရံ ပရိဗ္ဘမန္တော ‘‘အရေ၊ ပါပရာဇ ကာဠကဏ္ဏိ၊ ကဒါ တယာ ပါဏာတိပါတေန သုဂတိဂမနံ ဒိဋ္ဌပုဗ္ဗံ၊ စန္ဒကုမာရံ သဗ္ဗဉ္စ ဣမံ ဇနံ ဗန္ဓနတော မောစေဟိ၊ နော စေ မောစေဿသိ၊ ဧတ္ထေဝ တေ ဣမဿ စ ဒုဋ္ဌဗြာဟ္မဏဿ သီသံ ဖာလေဿာမီ’’တိ အာကာသေ အဋ္ဌာသိ. တံ အစ္ဆရိယံ ဒိသွာ ရာဇာ ဗြာဟ္မဏော စ သီဃံ သဗ္ဗေ ဗန္ဓနာ မောစေသုံ.

အထ မဟာဇနော ဧကကောလာဟလံ ကတွာ သဟသာ ယညာဝါဋံ အဇ္ဈောတ္ထရိတွာ ခဏ္ဍဟာလဿ ဧကေကံ လေဍ္ဍုပ္ပဟာရံ ဒေန္တော တတ္ထေဝ နံ ဇီဝိတက္ခယံ ပါပေတွာ ရာဇာနမ္ပိ မာရေတုံ အာရဘိ. ဗောဓိသတ္တော ပုရေတရမေဝ ပိတရံ ပလိဿဇိတွာ ဌိတော မာရေတုံ န အဒါသိ. မဟာဇနော ‘‘ဇီဝိတံ တာဝဿ ပါပရညော ဒေမ၊ ဆတ္တံ ပနဿ န ဒဿာမ၊ နဂရေ ဝါသံ ဝါ န ဒဿာမ၊ တံ စဏ္ဍာလံ ကတွာ ဗဟိနဂရေ ဝါသာပေဿာမာ’’တိ ရာဇဝေသံ ဟာရေတွာ ကာသာဝံ နိဝါသာပေတွာ ဟလိဒ္ဒိပိလောတိကာယ သီသံ ဝေဌေတွာ စဏ္ဍာလံ ကတွာ စဏ္ဍာလဂါမံ ပဟိဏိံသု. ယေ ပန တံ ပသုဃာတယညံ ယဇိံသု စေဝ ယဇာပေသုဉ္စ အနုမောဒိံသု စ၊ သဗ္ဗေ တေ နိရယပရာယနာ အဟေသုံ. တေနာဟ ဘဂဝါ –

‘‘သဗ္ဗေ ပတိဋ္ဌာ နိရယံ၊ ယထာ တံ ပါပကံ ကရိတွာန၊

န ဟိ ပါပကမ္မံ ကတွာ၊ လဗ္ဘာ သုဂတိံ ဣတော ဂန္တု’’န္တိ. (ဇာ. ၂.၂၂.၁၁၄၃)၊

အထ သဗ္ဗာပိ ရာဇပရိသာ နာဂရာ စေဝ ဇာနပဒါ စ သမာဂန္တွာ ဗောဓိသတ္တံ ရဇ္ဇေ အဘိသိဉ္စိံသု. သော ဓမ္မေန ရဇ္ဇံ အနုသာသန္တော တံ အတ္တနော မဟာဇနဿ စ အကာရဏေနေဝ ဥပ္ပန္နံ အနယဗျသနံ အနုဿရိတွာ သံဝေဂဇာတော ပုညကိရိယာသု ဘိယျောသောမတ္တာယ ဥဿာဟဇာတော မဟာဒါနံ ပဝတ္တေသိ၊ သီလာနိ ရက္ခိ၊ ဥပေါသထကမ္မံ သမာဒိယိ. တေန ဝုတ္တံ –

၄၆. ‘‘တဒါဟံ ယဇနာ မုတ္တော၊ နိက္ခန္တော ယညဝါဋတော၊

သံဝေဂံ ဇနယိတွာန၊ မဟာဒါနံ ပဝတ္တယိ’’န္တိ. – အာဒိ၊

တတ္ထ ယဇနာ မုတ္တောတိ ခဏ္ဍဟာလေန ဝိဟိတယညဝိဓိတော ဝုတ္တနယေန ဃာတေတဗ္ဗတော မုတ္တော. နိက္ခန္တော ယညဝါဋတောတိ အဘိသေကကရဏတ္ထာယ ဥဿာဟဇာတေန မဟာဇနေန သဒ္ဓိံ တတော ယညဘူမိတော နိဂ္ဂတော. သံဝေဂံ ဇနယိတွာနာတိ ဧဝံ ‘‘ဗဟုအန္တရာယော လောကသန္နိဝါသော’’တိ အတိဝိယ သံဝေဂံ ဥပ္ပါဒေတွာ. မဟာဒါနံ ပဝတ္တယိန္တိ ဆ ဒါနသာလာယော ကာရာပေတွာ မဟတာ ဓနပရိစ္စာဂေန ဝေဿန္တရဒါနသဒိသံ မဟာဒါနမဒါသိံ. ဧတေန အဘိသေကကရဏတော ပဋ္ဌာယ တဿ မဟာဒါနဿ ပဝတ္တိတဘာဝံ ဒဿေတိ.

၄၇. ဒက္ခိဏေယျေ အဒတွာနာတိ ဒက္ခိဏာရဟေ ပုဂ္ဂလေ ဒေယျဓမ္မံ အပရိစ္စဇိတွာ. အပိ ဆပ္ပဉ္စ ရတ္တိယောတိ အပ္ပေကဒါ ဆပိ ပဉ္စပိ ရတ္တိယော အတ္တနော ပိဝနခါဒနဘုဉ္ဇနာနိ န ကရောမီတိ ဒဿေတိ.

တဒါ ကိရ ဗောဓိသတ္တော သကလဇမ္ဗုဒီပံ ဥန္နင်္ဂလံ ကတွာ မဟာမေဃော ဝိယ အဘိဝဿန္တော မဟာဒါနံ ပဝတ္တေသိ. တတ္ထ ကိဉ္စာပိ ဒါနသာလာသု အန္နပါနာဒိဥဠာရုဠာရပဏီတပဏီတမေဝ ယာစကာနံ ယထာရုစိတံ ဒိဝသေ ဒိဝသေ ဒီယတိ၊ တထာပိ အတ္တနော သဇ္ဇိတံ အာဟာရံ ရာဇာရဟဘောဇနမ္ပိ ယာစကာနံ အဒတွာ န ဘုဉ္ဇတိ၊ တံ သန္ဓာယ ဝုတ္တံ ‘‘နာဟံ ပိဝါမီ’’တိအာဒိ.

၄၈. ဣဒါနိ တထာ ယာစကာနံ ဒါနေ ကာရဏံ ဒဿေန္တော ဥပမံ တာဝ အာဟရတိ ‘‘ယထာပိ ဝါဏိဇော နာမာ’’တိအာဒိနာ. တဿတ္ထော – ယထာ နာမ ဝါဏိဇော ဘဏ္ဍဋ္ဌာနံ ဂန္တွာ အပ္ပေန ပါဘတေန ဗဟုံ ဘဏ္ဍံ ဝိက္ကိဏိတွာ ဝိပုလံ ဘဏ္ဍသန္နိစယံ ကတွာ ဒေသကာလံ ဇာနန္တော ယတ္ထဿ လာဘော ဥဒယော မဟာ ဟောတိ၊ တတ္ထ ဒေသေ ကာလေ ဝါ တံ ဘဏ္ဍံ ဟရတိ ဥပနေတိ ဝိက္ကိဏာတိ.

၄၉. သကဘုတ္တာပီတိ သကဘုတ္တတောပိ အတ္တနာ ပရိဘုတ္တတောပိ. ‘‘သကပရိဘုတ္တာပီ’’တိပိ ပါဌော. ပရေတိ ပရသ္မိံ ပဋိဂ္ဂါဟကပုဂ္ဂလေ. သတဘာဂေါတိ အနေကသတဘာဂေါ အာယတိံ ဘဝိဿတိ. ဣဒံ ဝုတ္တံ ဟောတိ – ယထာ ဝါဏိဇေန ကီတဘဏ္ဍံ တတ္ထေဝ အဝိက္ကိဏိတွာ တထာရူပေ ဒေသေ ကာလေ စ ဝိက္ကိဏိယမာနံ ဗဟုံ ဥဒယံ ဝိပုလံ ဖလံ ဟောတိ၊ တထေဝ အတ္တနော သန္တကံ အတ္တနာ အနုပဘုဉ္ဇိတွာ ပရသ္မိံ ပဋိဂ္ဂါဟကပုဂ္ဂလေ ဒိန္နံ မဟပ္ဖလံ အနေကသတဘာဂေါ ဘဝိဿတိ၊ တသ္မာ အတ္တနာ အဘုဉ္ဇိတွာပိ ပရဿ ဒါတဗ္ဗမေဝါတိ. ဝုတ္တဉှေတံ ဘဂဝတာ – ‘‘တိရစ္ဆာနဂတေ ဒါနံ ဒတွာ သတဂုဏာ ဒက္ခိဏာ ပါဋိကင်္ခိတဗ္ဗာ. ပုထုဇ္ဇနဒုဿီလေ ဒါနံ ဒတွာ သဟဿဂုဏာ’’တိ (မ. နိ. ၃.၃၇၉) ဝိတ္ထာရော. အပရမ္ပိ ဝုတ္တံ ‘‘ဧဝံ စေ၊ ဘိက္ခဝေ၊ သတ္တာ ဇာနေယျုံ ဒါနသံဝိဘာဂဿ ဝိပါကံ၊ ယထာဟံ ဇာနာမိ၊ န အဒတွာ ဘုဉ္ဇေယျုံ၊ န စ နေသံ မစ္ဆေရမလံ စိတ္တံ ပရိယာဒါယ တိဋ္ဌေယျ. ယောပိ နေသံ အဿ စရိမော အာလောပေါ စရိမံ ကဗဠံ၊ တတောပိ န အသံဝိဘဇိတွာ ဘုဉ္ဇေယျု’’န္တိအာဒိ (ဣတိဝု. ၂၆).

၅၀. ဧတမတ္ထဝသံ ဉတွာတိ ဧတံ ဒါနဿ မဟပ္ဖလဘာဝသင်္ခါတဉ္စေဝ သမ္မာသမ္ဗောဓိယာ ပစ္စယဘာဝသင်္ခါတဉ္စ အတ္ထဝသံ ကာရဏံ ဇာနိတွာ. န ပဋိက္ကမာမိ ဒါနတောတိ ဒါနပါရမိတော ဤသကမ္ပိ န နိဝတ္တာမိ အဘိက္ကမာမိ ဧဝ. ကိမတ္ထံ? သမ္ဗောဓိမနုပတ္တိယာတိ သမ္ဗောဓိံ သဗ္ဗညုတညာဏံ အနုပ္ပတ္တိယာ အနုပ္ပတ္တိယတ္ထံ၊ အဓိဂန္တုန္တိ အတ္ထော.

တဒါ ဗောဓိသတ္တော မဟာဇနေန ပိတရိ စဏ္ဍာလဂါမံ ပဝေသိတေ ဒါတဗ္ဗယုတ္တကံ ပရိဗ္ဗယံ ဒါပေသိ နိဝါသနာနိ ပါရုပနာနိ စ. သောပိ နဂရံ ပဝိသိတုံ အလဘန္တော ဗောဓိသတ္တေ ဥယျာနကီဠာဒိအတ္ထံ ဗဟိဂတေ ဥပသင်္ကမတိ၊ ပုတ္တသညာယ ပန န ဝန္ဒတိ၊ န အဉ္ဇလိကမ္မံ ကရောတိ၊ ‘‘စိရံ ဇီဝ၊ သာမီ’’တိ ဝဒတိ. ဗောဓိသတ္တောပိ ဒိဋ္ဌဒိဝသေ အတိရေကသမ္မာနံ ကရောတိ. သော ဧဝံ ဓမ္မေန ရဇ္ဇံ ကာရေတွာ အာယုပရိယောသာနေ သပရိသော ဒေဝလောကံ ပူရေသိ.

တဒါ ခဏ္ဍဟာလော ဒေဝဒတ္တော အဟောသိ၊ ဂေါတမီ ဒေဝီ မဟာမာယာ၊ စန္ဒာ ရာဇဓီတာ ရာဟုလမာတာ၊ ဝါသုလော ရာဟုလော၊ သေလာ ဥပ္ပလဝဏ္ဏာ၊ သူရော မဟာကဿပေါ၊ ဘဒ္ဒသေနော မဟာမောဂ္ဂလ္လာနော၊ သူရိယကုမာရော သာရိပုတ္တော၊ စန္ဒရာဇာ လောကနာထော.

တဿ ဣဓာပိ ပုဗ္ဗေ ဝုတ္တနယေနေဝ ယထာရဟံ သေသပါရမိယော နိဒ္ဓါရေတဗ္ဗာ. တဒါ ခဏ္ဍဟာလဿ ကက္ခဠဖရုသဘာဝံ ဇာနန္တောပိ အဇ္ဈုပေက္ခိတွာ ဓမ္မေန သမေန အဋ္ဋဿ ဝိနိစ္ဆယော၊ အတ္တာနံ မာရေတုကာမဿေဝ ခဏ္ဍဟာလဿ တထာ ယညဝိဓာနံ ဇာနိတွာပိ တဿ ဥပရိ စိတ္တပ္ပကောပါဘာဝေါ၊ အတ္တနော ပရိသံ ဂဟေတွာ ပိတု သတ္တု ဘဝိတုံ သမတ္ထောပိ ‘‘မာဒိသဿ နာမ ဂရူဟိ ဝိရောဓော န ယုတ္တော’’တိ အတ္တာနံ ပုရိသပသုံ ကတွာ ဃာတာပေတုကာမဿ ပိတု အာဏာယံ အဝဋ္ဌာနံ၊ ကောသိယာ အသိံ ဂဟေတွာ သီသံ ဆိန္ဒိတုံ ဥပက္ကမန္တေ ပုရောဟိတေ အတ္တနော ပိတရိ ပုတ္တေ သဗ္ဗသတ္တေသု စ မေတ္တာဖရဏေန သမစိတ္တတာ၊ မဟာဇနေ ပိတရံ မာရေတုံ ဥပက္ကမန္တေ သယံ ပလိဿဇိတွာ တဿ ဇီဝိတဒါနဉ္စ၊ ဒိဝသေ ဒိဝသေ ဝေဿန္တရဒါနသဒိသံ မဟာဒါနံ ဒဒတောပိ ဒါနေန အတိတ္တဘာဝေါ၊ မဟာဇနေန စဏ္ဍာလေသု ဝါသာပိတဿ ပိတု ဒါတဗ္ဗယုတ္တကံ ဒတွာ ပေါသနံ၊ မဟာဇနံ ပုညကိရိယာသု ပတိဋ္ဌာပနန္တိ ဧဝမာဒယော ဂုဏာနုဘာဝါ နိဒ္ဓါရေတဗ္ဗာတိ.

စန္ဒကုမာရစရိယာဝဏ္ဏနာ နိဋ္ဌိတာ.