၅. မဟာဂေါဝိန္ဒစရိယာဝဏ္ဏနာ

ပဉ္စမေ သတ္တရာဇပုရောဟိတောတိ သတ္တဘူအာဒီနံ သတ္တန္နံ ရာဇူနံ သဗ္ဗကိစ္စာနုသာသကပုရောဟိတော. ပူဇိတော နရဒေဝေဟီတိ တေဟိ ဧဝ အညေဟိ စ ဇမ္ဗုဒီပေ သဗ္ဗေဟေဝ ခတ္တိယေဟိ စတုပစ္စယပူဇာယ သက္ကာရသမ္မာနေန စ ပူဇိတော. မဟာဂေါဝိန္ဒဗြာဟ္မဏောတိ မဟာနုဘာဝတာယ ဂေါဝိန္ဒဿာဘိသေကေန အဘိသိတ္တတာယ စ ‘‘မဟာဂေါဝိန္ဒော’’တိ သင်္ခံ ဂတော ဗြာဟ္မဏော၊ အဘိသိတ္တကာလတော ပဋ္ဌာယ ဟိ ဗောဓိသတ္တဿ အယံ သမညာ ဇာတာ၊ နာမေန ပန ဇောတိပါလော နာမ. တဿ ကိရ ဇာတဒိဝသေ သဗ္ဗာဝုဓာနိ ဇောတိံသု. ရာဇာပိ ပစ္စူသသမယေ အတ္တနော မင်္ဂလာဝုဓံ ပဇ္ဇလိတံ ဒိသွာ ဘီတော အတ္တနော ပုရောဟိတံ ဗောဓိသတ္တဿ ပိတရံ ဥပဋ္ဌာနံ အာဂတံ ပုစ္ဆိတွာ ‘‘မာ ဘာယိ၊ မဟာရာဇ၊ မယှံ ပုတ္တော ဇာတော၊ တဿာနုဘာဝေန န ကေဝလံ ရာဇဂေဟေယေဝ၊ သကလနဂရေပိ အာဝုဓာနိ ပဇ္ဇလိံသု၊ န တံ နိဿာယ တုယှံ အန္တရာယော အတ္ထိ၊ သကလဇမ္ဗုဒီပေ ပန ပညာယ တေန သမော န ဘဝိဿတိ၊ တဿေတံ ပုဗ္ဗနိမိတ္တ’’န္တိ ပုရောဟိတေန သမဿာသိတော တုဋ္ဌစိတ္တော ‘‘ကုမာရဿ ခီရမူလံ ဟောတူ’’တိ သဟဿံ ဒတွာ ‘‘ဝယပ္ပတ္တကာလေ မယှံ ဒဿေထာ’’တိ အာဟ. သော ဝုဒ္ဓိပ္ပတ္တော အပရဘာဂေ အလမတ္ထဒဿော သတ္တန္နံ ရာဇူနံ သဗ္ဗကိစ္စာနုသာသကော ဟုတွာ ပဗ္ဗဇိတွာ စ သတ္တေ ဒိဋ္ဌဓမ္မိကသမ္ပရာယိကေဟိ အနတ္ထေဟိ ပါလေတွာ အတ္ထေဟိ နိယောဇေသိ. ဣတိ ဇောတိတတ္တာ ပါလနသမတ္ထတာယ စ ‘‘ဇောတိပါလော’’တိဿ နာမံ အကံသု. တေန ဝုတ္တံ ‘‘နာမေန ဇောတိပါလော နာမာ’’တိ (ဒီ. နိ. ၂.၃၀၄).

တတ္ထ ဗောဓိသတ္တော ဒိသမ္ပတိဿ နာမ ရညော ပုရောဟိတဿ ဂေါဝိန္ဒဗြာဟ္မဏဿ ပုတ္တော ဟုတွာ အတ္တနော ပိတု တဿ စ ရညော အစ္စယေန တဿ ပုတ္တော ရေဏု၊ သဟာယာ စဿ သတ္တဘူ၊ ဗြဟ္မဒတ္တော၊ ဝေဿဘူ၊ ဘရတော၊ ဒွေ စ ဓတရဋ္ဌာတိ ဣမေ သတ္တ ရာဇာနော ယထာ အညမညံ န ဝိဝဒန္တိ. ဧဝံ ရဇ္ဇေ ပတိဋ္ဌာပေတွာ တေသံ အတ္ထဓမ္မေ အနုသာသန္တော ဇမ္ဗုဒီပတလေ သဗ္ဗေသံ ရာဇူနံ အညေသဉ္စ ဗြာဟ္မဏာနံ ဒေဝနာဂဂဟပတိကာနံ သက္ကတော ဂရုကတော မာနိတော ပူဇိတော အပစိတော ဥတ္တမံ ဂါရဝဋ္ဌာနံ ပတ္တော အဟောသိ. တဿ အတ္ထဓမ္မေသု ကုသလတာယ ‘‘မဟာဂေါဝိန္ဒော’’တွေဝ သမညာ ဥဒပါဒိ. ယထာဟ ‘‘ဂေါဝိန္ဒော ဝတ၊ ဘော ဗြာဟ္မဏော၊ မဟာဂေါဝိန္ဒော ဝတ၊ ဘော ဗြာဟ္မဏော’’တိ (ဒီ. နိ. ၂.၃၀၅). တေန ဝုတ္တံ –

၃၇. ‘‘ပုနာပရံ ယဒါ ဟောမိ၊ သတ္တရာဇပုရောဟိတော၊

ပူဇိတော နရဒေဝေဟိ၊ မဟာဂေါဝိန္ဒဗြာဟ္မဏော’’တိ.

အထ ဗောဓိသတ္တဿ ပုညာနုဘာဝသမုဿာဟိတေဟိ ရာဇူဟိ တေသံ အနုယုတ္တေဟိ ခတ္တိယေဟိ ဗြာဟ္မဏဂဟပတိကေဟိ နေဂမဇာနပဒေဟိ စ ဥပရူပရိ ဥပနီတော သမန္တတော မဟောဃော ဝိယ အဇ္ဈောတ္ထရမာနော အပရိမေယျော ဥဠာရော လာဘသက္ကာရော ဥပ္ပဇ္ဇိ၊ ယထာ တံ အပရိမာဏာသု ဇာတီသု ဥပစိတဝိပုလပုညသဉ္စယဿ ဥဠာရာဘိဇာတဿ ပရိသုဒ္ဓသီလာစာရဿ ပေသလဿ ပရိယောဒါတသဗ္ဗသိပ္ပဿ သဗ္ဗသတ္တေသု ပုတ္တသဒိသမဟာကရုဏာဝိပ္ဖါရသိနိဒ္ဓမုဒုဟဒယဿ. သော စိန္တေသိ – ‘‘ဧတရဟိ ခေါ မယှံ မဟာလာဘသက္ကာရော၊ ယံနူနာဟံ ဣမိနာ သဗ္ဗသတ္တေ သန္တပ္ပေတွာ ဒါနပါရမိံ ပရိပူရေယျ’’န္တိ. သော နဂရဿ မဇ္ဈေ စတူသု ဒွါရေသု အတ္တနော နိဝေသနဒွါရေတိ ဆ ဒါနသာလာယော ကာရေတွာ ဒေဝသိကံ အပရိမိတဓနပရိစ္စာဂေန မဟာဒါနံ ပဝတ္တေသိ. ယံ ယံ ဥပါယနံ အာနီယတိ၊ ယဉ္စ အတ္တနော အတ္ထာယ အဘိသင်္ခရီယတိ၊ သဗ္ဗံ တံ ဒါနသာလာသု ဧဝ ပေသေသိ. ဧဝံ ဒိဝသေ ဒိဝသေ မဟာပရိစ္စာဂံ ကရောန္တဿ စဿ စိတ္တဿ တိတ္တိ ဝါ သန္တောသော ဝါ နာဟောသိ၊ ကုတော ပန သင်္ကောစော. ဒါနဂ္ဂဉ္စဿ လာဘာသာယ အာဂစ္ဆန္တေဟိ ဒေယျဓမ္မံ ဂဟေတွာ ဂစ္ဆန္တေဟိ စ မဟာသတ္တဿ စ ဂုဏဝိသေသေ ကိတ္တယန္တေဟိ မဟာဇနကာယေဟိ အန္တောနဂရံ ဗဟိနဂရဉ္စ သမန္တတော ဧကောဃဘူတံ ကပ္ပဝုဋ္ဌာနမဟာဝါယုသင်္ဃဋ္ဋပရိဗ္ဘမိတံ ဝိယ မဟာသမုဒ္ဒံ ဧကကောလာဟလံ ဧကနိန္နာဒံ အဟောသိ. တေန ဝုတ္တံ –

၃၈. ‘‘တဒါဟံ သတ္တရဇ္ဇေသု၊ ယံ မေ အာသိ ဥပါယနံ၊

တေန ဒေမိ မဟာဒါနံ၊ အက္ခောဘံ သာဂရူပမ’’န္တိ.

တတ္ထ တဒါဟန္တိ ယဒါ သတ္တရာဇပုရောဟိတော မဟာဂေါဝိန္ဒဗြာဟ္မဏော ဟောမိ၊ တဒါ အဟံ. သတ္တရဇ္ဇေသူတိ ရေဏုအာဒီနံ သတ္တန္နံ ရာဇူနံ ရဇ္ဇေသု. အက္ခောဘန္တိ အဗ္ဘန္တရေဟိ စ ဗာဟိရေဟိ စ ပစ္စတ္ထိကေဟိ အပ္ပဋိသေဓနီယတာယ ကေနစိ အက္ခောဘနီယံ. ‘‘အစ္စုဗ္ဘ’’န္တိပိ ပါဌော. အတိပုဏ္ဏဒါနဇ္ဈာသယဿ ဒေယျဓမ္မဿ စ ဥဠာရဘာဝေန ဝိပုလဘာဝေန စ အတိဝိယ ပရိပုဏ္ဏန္တိ အတ္ထော. သာဂရူပမန္တိ သာဂရသဒိသံ၊ ယထာ သာဂရေ ဥဒကံ သကလေနပိ လောကေန ဟရန္တေန ခေပေတုံ န သက္ကာ၊ ဧဝံ တဿ ဒါနဂ္ဂေ ဒေယျဓမ္မန္တိ.

၃၉. ဩသာနဂါထာယ ဝရံ ဓနန္တိ ဥတ္တမံ ဣစ္ဆိတံ ဝါ ဓနံ. သေသံ ဝုတ္တနယမေဝ.

ဧဝံ မဟာသတ္တော ပဌမကပ္ပိကမဟာမေဃော ဝိယ မဟာဝဿံ အဝိဘာဂေန မဟန္တံ ဒါနဝဿံ ဝဿာပေန္တော ဒါနဗျာဝဋော ဟုတွာပိ သေသံ သတ္တန္နံ ရာဇူနံ အတ္ထဓမ္မေ အပ္ပမတ္တော အနုသာသတိ. သတ္တ စ ဗြာဟ္မဏမဟာသာလေ ဝိဇ္ဇာသိပ္ပံ သိက္ခာပေတိ၊ သတ္တ စ နှာတကသတာနိ မန္တေ ဝါစေတိ. တဿ အပရေန သမယေန ဧဝံ ကလျာဏော ကိတ္တိသဒ္ဒေါ အဗ္ဘုဂ္ဂတော ‘‘သက္ခိ မဟာဂေါဝိန္ဒော ဗြာဟ္မဏော ဗြဟ္မာနံ ပဿတိ၊ သက္ခိ မဟာဂေါဝိန္ဒော ဗြာဟ္မဏော ဗြဟ္မုနာ သာကစ္ဆေတိ သလ္လပတိ မန္တေတီ’’တိ (ဒီ. နိ. ၂.၃၁၂). သော စိန္တေသိ – ‘‘ဧတရဟိ ခေါ မယှံ အယံ အဘူတော ကိတ္တိသဒ္ဒေါ အဗ္ဘုဂ္ဂတော ‘ဗြဟ္မာနံ ပဿတိ၊ သက္ခိ မဟာဂေါဝိန္ဒော ဗြာဟ္မဏော ဗြဟ္မုနာ သာကစ္ဆေတိ သလ္လပတိ မန္တေတီ’တိ၊ ယံနူနာဟံ ဣမံ ဘူတံ ဧဝ ကရေယျ’’န္တိ. သော ‘‘တေ သတ္တ ရာဇာနော သတ္တ စ ဗြာဟ္မဏမဟာသာလေ သတ္တ စ နှာတကသတာနိ အတ္တနော ပုတ္တဒါရဉ္စ အာပုစ္ဆိတွာ ဗြဟ္မာနံ ပဿေယျ’’န္တိ စိတ္တံ ပဏိဓာယ ဝဿိကေ စတ္တာရော မာသေ ဗြဟ္မဝိဟာရဘာဝနမနုယုဉ္ဇိ. တဿ စေတသာ စေတောပရိဝိတက္ကမညာယ ဗြဟ္မာ သနင်္ကုမာရော ပုရတော ပါတုရဟောသိ. တံ ဒိသွာ မဟာပုရိသော ပုစ္ဆိ –

‘‘ဝဏ္ဏဝါ ယသဝါ သိရိမာ၊ ကော နု တွမသိ မာရိသ၊

အဇာနန္တာ တံ ပုစ္ဆာမ၊ ကထံ ဇာနေမု တံ မယ’’န္တိ. (ဒီ. နိ. ၂.၃၁၈)၊

တဿ ဗြဟ္မာ အတ္တာနံ ဇာနာပေန္တော –

‘‘မံ ဝေ ကုမာရံ ဇာနန္တိ၊ ဗြဟ္မလောကေ သနန္တနံ၊

သဗ္ဗေ ဇာနန္တိ မံ ဒေဝါ၊ ဧဝံ ဂေါဝိန္ဒ ဇာနာဟီ’’တိ. (ဒီ. နိ. ၂.၃၁၈) –

ဝတွာ တေန –

‘‘အာသနံ ဥဒကံ ပဇ္ဇံ၊ မဓုသာကဉ္စ ဗြဟ္မုနော၊

အဂ္ဃေ ဘဝန္တံ ပုစ္ဆာမ၊ အဂ္ဃံ ကုရုတု နော ဘဝ’’န္တိ. (ဒီ. နိ. ၂.၃၁၈) –

ဥပနီတံ အတိထိသက္ကာရံ အနတ္ထိကောပိ ဗြဟ္မာ တဿ စိတ္တသမ္ပဟံသနတ္ထံ ဝိဿာသကရဏတ္ထဉ္စ သမ္ပဋိစ္ဆန္တော ‘‘ပဋိဂ္ဂဏှာမ တေ အဂ္ဃံ၊ ယံ၊ တွံ ဂေါဝိန္ဒ၊ ဘာသသီ’’တိ. ဝတွာ ဩကာသဒါနတ္ထံ –

‘‘ဒိဋ္ဌဓမ္မဟိတတ္ထာယ၊ သမ္ပရာယသုခါယ စ၊

ကတာဝကာသော ပုစ္ဆဿု၊ ယံကိဉ္စိ အဘိပတ္ထိတ’’န္တိ. (ဒီ. နိ. ၂.၃၁၈) –

ဩကာသမကာသိ.

အထ နံ မဟာပုရိသော သမ္ပရာယိကံ ဧဝ အတ္ထံ –

‘‘ပုစ္ဆာမိ ဗြဟ္မာနံ သနင်္ကုမာရံ၊ ကင်္ခီ အကင်္ခိံ ပရဝေဒိယေသု၊

ကတ္ထဋ္ဌိတော ကိမှိ စ သိက္ခမာနော၊ ပပ္ပေါတိ မစ္စော အမတံ ဗြဟ္မလောက’’န္တိ. (ဒီ. နိ. ၂.၃၁၉) –

ပုစ္ဆိ.

တဿ ဗြဟ္မာ ဗျာကရောန္တော –

‘‘ဟိတွာ မမတ္တံ မနုဇေသု ဗြဟ္မေ၊ ဧကောဒိဘူတော ကရုဏေဓိမုတ္တော၊

နိရာမဂန္ဓော ဝိရတော မေထုနသ္မာ၊ ဧတ္ထဋ္ဌိတော ဧတ္ထ စ သိက္ခမာနော၊

ပပ္ပေါတိ မစ္စော အမတံ ဗြဟ္မလောက’’န္တိ. (ဒီ. နိ. ၂.၃၁၉) –

ဗြဟ္မလောကဂါမိမဂ္ဂံ ကထေသိ.

တတ္ထ မံ ဝေ ကုမာရံ ဇာနန္တီတိ ဝေ ဧကံသေန မံ ‘‘ကုမာရော’’တိ ဇာနန္တိ. ဗြဟ္မလောကေတိ သေဋ္ဌလောကေ. သနန္တနန္တိ စိရတနံ ပေါရာဏံ. ဧဝံ၊ ဂေါဝိန္ဒ၊ ဇာနာဟီတိ၊ ဂေါဝိန္ဒ၊ ဧဝံ မံ ဓာရေဟိ.

အာသနန္တိ ဣဒံ ဘောတော ဗြဟ္မုနော နိသီဒနတ္ထာယ အာသနံ ပညတ္တံ. ဣဒံ ဥဒကံ ပရိဘောဇနီယံ ပါဒါနံ ဓောဝနတ္ထံ ပါနီယံ ပိပါသဟရဏတ္ထာယ. ဣဒံ ပဇ္ဇံ ပရိဿမဝိနောဒနတ္ထံ ပါဒဗ္ဘဉ္ဇနတေလံ. ဣဒံ မဓုသာကံ အတက္ကံ အလောဏိကံ အဓူပနံ ဥဒကေန သေဒိတံ သာကံ သန္ဓာယ ဝဒတိ. တဒါ ဟိ ဗောဓိသတ္တဿ တံ စတုမာသံ ဗြဟ္မစရိယံ အဘိသလ္လေခဝုတ္တိပရမုက္ကဋ္ဌံ အဟောသိ. တဿိမေ သဗ္ဗေ အဂ္ဃေ ကတွာ ပုစ္ဆာမ၊ တယိဒံ အဂ္ဃံ ကုရုတု ပဋိဂ္ဂဏှာတု နော ဘဝံ ဣဒံ အဂ္ဃန္တိ ဝုတ္တံ ဟောတိ. ဣတိ မဟာပုရိသော ဗြဟ္မုနော နေသံ အပရိဘုဉ္ဇနံ ဇာနန္တောပိ ဝတ္တသီသေ ဌတွာ အတ္တနော အာစိဏ္ဏံ အတိထိပူဇနံ ဒဿေန္တော ဧဝမာဟ. ဗြဟ္မာပိဿ အဓိပ္ပါယံ ဇာနန္တော ‘‘ပဋိဂ္ဂဏှာမ တေ အဂ္ဃံ၊ ယံ တွံ၊ ဂေါဝိန္ဒ၊ ဘာသသီ’’တိ အာဟ.

တတ္ထ တဿ တေ အာသနေ မယံ နိသိန္နာ နာမ ဟောမ၊ ပါဒေါဒကေန ပါဒါ ဓောတာ နာမ ဟောန္တု၊ ပါနီယံ ပီတာ နာမ ဟောမ၊ ပါဒဗ္ဘဉ္ဇနေန ပါဒါ မက္ခိတာ နာမ ဟောန္တု၊ ဥဒကသာကမ္ပိ ပရိဘုတ္တံ နာမ ဟောတူတိ အတ္ထော.

ကင်္ခီ အကင်္ခိံ ပရဝေဒိယေသူတိ အဟံ သဝိစိကိစ္ဆော ပရေန သယံ အဘိသင်္ခတတ္တာ ပရဿ ပါကဋေသု ပရဝေဒိယေသု ပဉှေသု နိဗ္ဗိစိကိစ္ဆံ.

ဟိတွာ မမတ္တန္တိ ‘‘ဣဒံ မမ၊ ဣဒံ မမာ’’တိ ပဝတ္တနကံ ဥပကရဏတဏှံ စဇိတွာ. မနုဇေသူတိ သတ္တေသု. ဗြဟ္မေတိ ဗောဓိသတ္တံ အာလပတိ. ဧကောဒိဘူတောတိ ဧကော ဥဒေတိ ပဝတ္တတီတိ ဧကောဒိဘူတော ဧကီဘူတော၊ ဧကေန ကာယဝိဝေကံ ဒဿေတိ. အထ ဝါ ဧကော ဥဒေတီတိ ဧကောဒိ၊ သမာဓိ. တံ ဘူတော ပတ္တောတိ ဧကောဒိဘူတော၊ ဥပစာရပ္ပနာသမာဓီဟိ သမာဟိတောတိ အတ္ထော. ဧတံ ဧကောဒိဘာဝံ ကရုဏာဗြဟ္မဝိဟာရဝသေန ဒဿေန္တော ‘‘ကရုဏေဓိမုတ္တော’’တိ အာဟ. ကရုဏဇ္ဈာနေ အဓိမုတ္တော၊ တံ ဈာနံ နိဗ္ဗတ္တေတွာတိ အတ္ထော. နိရာမဂန္ဓောတိ ကိလေသသင်္ခါတဝိဿဂန္ဓရဟိတော. ဧတ္ထဋ္ဌိတောတိ ဧတေသု ဓမ္မေသု ဌိတော၊ ဧတေ ဓမ္မေ သမ္ပာဒေတွာ. ဧတ္ထ စ သိက္ခမာနောတိ ဧတေသု ဓမ္မေသု သိက္ခမာနော၊ ဧတံ ဗြဟ္မဝိဟာရဘာဝနံ ဘာဝေန္တောတိ အတ္ထော. အယမေတ္ထ သင်္ခေပေါ၊ ဝိတ္ထာရော ပန ပါဠိယံ (ဒီ. နိ. ၂.၂၉၃ အာဒယော) အာဂတောယေဝါတိ.

အထ မဟာပုရိသော တဿ ဗြဟ္မုနော ဝစနံ သုတွာ အာမဂန္ဓေ ဇိဂုစ္ဆန္တော ‘‘ဣဒါနေဝါဟံ ပဗ္ဗဇိဿာမီ’’တိ အာဟ. ဗြဟ္မာပိ ‘‘သာဓု၊ မဟာပုရိသ၊ ပဗ္ဗဇဿု. ဧဝံ သတိ မယှမ္ပိ တဝ သန္တိကေ အာဂမနံ သွာဂမနမေဝ ဘဝိဿတိ၊ တွံ၊ တာတ၊ သကလဇမ္ဗုဒီပေ အဂ္ဂပုရိသော ပဌမဝယေ ဌိတော၊ ဧဝံ မဟန္တံ နာမ သမ္ပတ္တိံ ဣဿရိယဉ္စ ပဟာယ ပဗ္ဗဇနံ နာမ ဂန္ဓဟတ္ထိနော အယောဗန္ဓနံ ဆိန္ဒိတွာ ဝနဂမနံ ဝိယ အတိဥဠာရံ၊ ဗုဒ္ဓတန္တိ နာမေသာ’’တိ မဟာဗောဓိသတ္တဿ ဒဠှီကမ္မံ ကတွာ ဗြဟ္မလောကမေဝ ဂတော. မဟာသတ္တောပိ ‘‘မမ ဣတော နိက္ခမိတွာ ပဗ္ဗဇနံ နာမ န ယုတ္တံ၊ အဟံ ရာဇကုလာနံ အတ္ထံ အနုသာသာမိ၊ တသ္မာ တေသံ အာရောစေတွာ သစေ တေပိ ပဗ္ဗဇန္တိ သုန္ဒရမေဝ၊ နော စေ ပုရောဟိတဋ္ဌာနံ နိယျာတေတွာ ပဗ္ဗဇိဿာမီ’’တိ စိန္တေတွာ ရေဏုဿ တာဝ ရညော အာရောစေတွာ တေန ဘိယျောသောမတ္တာယ ကာမေဟိ နိမန္တိယမာနော အတ္တနော သံဝေဂဟေတုံ ဧကန္တေန ပဗ္ဗဇိတုကာမတဉ္စဿ နိဝေဒေတွာ တေန ‘‘ယဒိ ဧဝံ အဟမ္ပိ ပဗ္ဗဇိဿာမီ’’တိ ဝုတ္တေ ‘‘သာဓူ’’တိ သမ္ပဋိစ္ဆိတွာ ဧတေနေဝ နယေန သတ္တဘူအာဒယော ဆ ခတ္တိယေ၊ သတ္တ စ ဗြာဟ္မဏမဟာသာလေ၊ သတ္တ စ နှာတကသတာနိ၊ အတ္တနော ဘရိယာယော စ အာပုစ္ဆိတွာ သတ္တာဟမတ္တမေဝ တေသံ စိတ္တာနုရက္ခဏတ္ထံ ဌတွာ မဟာဘိနိက္ခမနသဒိသံ နိက္ခမိတွာ ပဗ္ဗဇိ.

တဿ တေ သတ္တရာဇာနော အာဒိံ ကတွာ သဗ္ဗေဝ အနုပဗ္ဗဇိံသု. သာ အဟောသိ မဟတီ ပရိသာ. အနေကယောဇနဝိတ္ထာရာယ ပရိသာယ ပရိဝုတော မဟာပုရိသော ဓမ္မံ ဒေသေန္တော ဂါမနိဂမဇနပဒရာဇဓာနီသု စာရိကံ စရတိ၊ မဟာဇနံ ပုညေ ပတိဋ္ဌာပေတိ. ဂတဂတဋ္ဌာနေ ဗုဒ္ဓကောလာဟလံ ဝိယ ဟောတိ. မနုဿာ ‘‘ဂေါဝိန္ဒပဏ္ဍိတော ကိရ အာဂစ္ဆတီ’’တိ သုတွာ ပုရေတရမေဝ မဏ္ဍပံ ကာရေတွာ တံ အလင်္ကာရာပေတွာ ပစ္စုဂ္ဂန္တွာ မဏ္ဍပံ ပဝေသေတွာ နာနဂ္ဂရသဘောဇနေန ပတိမာနေန္တိ. မဟာလာဘသက္ကာရော မဟောဃော ဝိယ အဇ္ဈောတ္ထရန္တော ဥပ္ပဇ္ဇိ. မဟာပုရိသော မဟာဇနံ ပုညေ ပတိဋ္ဌာပေသိ သီလသမ္ပဒါယ ဣန္ဒြိယသံဝရေ ဘောဇနေ မတ္တညုတာယ ဇာဂရိယာနုယောဂေ ကသိဏပရိကမ္မေ ဈာနေသု အဘိညာသု အဋ္ဌသမာပတ္တီသု ဗြဟ္မဝိဟာရေသူတိ. ဗုဒ္ဓုပ္ပါဒကာလော ဝိယ အဟောသိ.

ဗောဓိသတ္တော ယာဝတာယုကံ ပါရမိယော ပူရေန္တော သမာပတ္တိသုခေန ဝီတိနာမေတွာ အာယုပရိယောသာနေ ဗြဟ္မလောကေ နိဗ္ဗတ္တိ. တဿ တံ ဗြဟ္မစရိယံ ဣဒ္ဓဉ္စေဝ ဖီတဉ္စ ဝိတ္ထာရိကံ ဗာဟုဇညံ ပုထုဘူတံ ယာဝ ဒေဝမနုဿေဟိ သုပ္ပကာသိတံ စိရံ ဒီဃမဒ္ဓါနံ ပဝတ္တိတ္ထ. တဿ ယေ သာသနံ သဗ္ဗေန သဗ္ဗံ အာဇာနိံသု၊ တေ ကာယဿ ဘေဒါ ပရံ မရဏာ သုဂတိံ ဗြဟ္မလောကံ ဥပပဇ္ဇိံသု. ယေ န အာဇာနိံသု၊ တေ အပ္ပေကစ္စေ ပရနိမ္မိတဝသဝတ္တီနံ ဒေဝါနံ သဟဗျတံ ဥပပဇ္ဇိံသု. အပ္ပေကစ္စေ နိမ္မာနရတီနံ။ပေ။ တုသိတာနံ ယာမာနံ တာဝတိံသာနံ စာတုမဟာရာဇိကာနံ ဒေဝါနံ သဟဗျတံ ဥပပဇ္ဇိံသု. ယေ သဗ္ဗနိဟီနာ၊ တေ ဂန္ဓဗ္ဗကာယံ ပရိပူရေသုံ. ဣတိ မဟာဇနော ယေဘုယျေန ဗြဟ္မလောကူပဂေါ သဂ္ဂူပဂေါ စ အဟောသိ. တသ္မာ ဒေဝဗြဟ္မလောကာ ပရိပူရိံသု. စတ္တာရော အပါယာ သုညာ ဝိယ အဟေသုံ.

ဣဓာပိ အကိတ္တိဇာတကေ (ဇာ. ၁.၁၃.၈၃ အာဒယော) ဝိယ ဗောဓိသမ္ဘာရနိဒ္ဓါရဏာ ဝေဒိတဗ္ဗာ – တဒါ သတ္တ ရာဇာနော မဟာထေရာ အဟေသုံ၊ သေသပရိသာ ဗုဒ္ဓပရိသာ၊ မဟာဂေါဝိန္ဒော လောကနာထော. တထာ ရေဏုအာဒီနံ သတ္တန္နံ ရာဇူနံ အညမညာဝိရောဓေန ယထာ သကရဇ္ဇေ ပတိဋ္ဌာပနံ၊ တထာ မဟတိ သတ္တဝိဓေ ရဇ္ဇေ တေသံ အတ္ထဓမ္မာနုသာသနေ အပ္ပမာဒေါ၊ ‘‘ဗြဟ္မုနာပိ သာကစ္ဆံ သမာပဇ္ဇတီ’’တိ ပဝတ္တသမ္ဘာဝနံ ယထာဘူတံ ကာတုံ စတ္တာရော မာသေ ပရမုက္ကံသဂတော ဗြဟ္မစရိယဝါသော. တေန ဗြဟ္မုနော အတ္တနိ သမာပဇ္ဇနံ၊ ဗြဟ္မုနော ဩဝါဒေ ဌတွာ သတ္တဟိ ရာဇူဟိ သကလေန စ လောကေန ဥပနီတံ လာဘသက္ကာရံ ခေဠပိဏ္ဍံ ဝိယ ဆဍ္ဍေတွာ အပရိမာဏာယ ခတ္တိယဗြာဟ္မဏာဒိပရိသာယ အနုပဗ္ဗဇ္ဇာနိမိတ္တာယ ပဗ္ဗဇ္ဇာယ အနုဋ္ဌာနံ၊ ဗုဒ္ဓါနံ သာသနဿ ဝိယ အတ္တနော သာသနဿ စိရကာလာနုပ္ပဗန္ဓောတိ ဧဝမာဒယော ဂုဏာနုဘာဝါ ဝိဘာဝေတဗ္ဗာတိ.

မဟာဂေါဝိန္ဒစရိယာဝဏ္ဏနာ နိဋ္ဌိတာ.