၄. မဟာသုဒဿနစရိယာဝဏ္ဏနာ

၂၈. စတုတ္ထေ ကုသာဝတိမှိ နဂရေတိ ကုသာဝတီနာမကေ နဂရေ၊ ယသ္မိံ ဌာနေ ဧတရဟိ ကုသိနာရာ နိဝိဋ္ဌာ. မဟီပတီတိ ခတ္တိယော၊ နာမေန မဟာသုဒဿနော နာမ. စက္ကဝတ္တီတိ စက္ကရတနံ ဝတ္တေတိ စတူဟိ ဝါ သမ္ပတ္တိစက္ကေဟိ ဝတ္တတိ၊ တေဟိ စ ပရံ ပဝတ္တေတိ၊ ပရဟိတာယ စ ဣရိယာပထစက္ကာနံ ဝတ္တော ဧတသ္မိံ အတ္ထီတိပိ စက္ကဝတ္တီ. အထ ဝါ စတူဟိ အစ္ဆရိယဓမ္မေဟိ သင်္ဂဟဝတ္ထူဟိ စ သမန္နာဂတေန၊ ပရေဟိ အနဘိဘဝနီယဿ အနတိက္ကမနီယဿ အာဏာသင်္ခါတဿ စက္ကဿ ဝတ္တော ဧတသ္မိံ အတ္ထီတိပိ စက္ကဝတ္တီ. ပရိဏာယကရတနပုဗ္ဗင်္ဂမေန ဟတ္ထိရတနာဒိပမုခေန မဟာဗလကာယေန ပုညာနုဘာဝနိဗ္ဗတ္တေန ကာယဗလေန စ သမန္နာဂတတ္တာ မဟဗ္ဗလော. ယဒါ အာသိန္တိ သမ္ဗန္ဓော. တတြာယံ အနုပုဗ္ဗိကထာ –

အတီတေ ကိရ မဟာပုရိသော သုဒဿနတ္တဘာဝတော တတိယေ အတ္တဘာဝေ ဂဟပတိကုလေ နိဗ္ဗတ္တော ဓရမာနကဿ ဗုဒ္ဓဿ သာသနေ ဧကံ ထေရံ အရညဝါသံ ဝသန္တံ အတ္တနော ကမ္မေန အရညံ ပဝိဋ္ဌော ရုက္ခမူလေ နိသိန္နံ ဒိသွာ ‘‘ဣဓ မယာ အယျဿ ပဏ္ဏသာလံ ကာတုံ ဝဋ္ဋတီ’’တိ စိန္တေတွာ အတ္တနော ကမ္မံ ပဟာယ ဒဗ္ဗသမ္ဘာရံ ဆိန္ဒိတွာ နိဝါသယောဂ္ဂံ ပဏ္ဏသာလံ ကတွာ ဒွါရံ ယောဇေတွာ ကဋ္ဌတ္ထရဏံ ကတွာ ‘‘ကရိဿတိ နု ခေါ ပရိဘောဂံ၊ န နု ခေါ ကရိဿတီ’’တိ ဧကမန္တေ နိသီဒိ. ထေရော အန္တောဂါမတော အာဂန္တွာ ပဏ္ဏသာလံ ပဝိသိတွာ ကဋ္ဌတ္ထရဏေ နိသီဒိ. မဟာသတ္တောပိ နံ ဥပသင်္ကမိတွာ ‘‘ဖာသုကာ၊ ဘန္တေ၊ ပဏ္ဏသာလာ’’တိ ပုစ္ဆိ. ဖာသုကာ၊ ဘဒ္ဒမုခ၊ ပဗ္ဗဇိတသာရုပ္ပါတိ. ဝသိဿထ၊ ဘန္တေ၊ ဣဓာတိ? အာမ၊ ဥပါသကာတိ. သော အဓိဝါသနာကာရေနေဝ ‘‘ဝသိဿတီ’’တိ ဉတွာ ‘‘နိဗဒ္ဓံ မယှံ ဃရဒွါရံ အာဂန္တဗ္ဗ’’န္တိ ပဋိဇာနာပေတွာ နိစ္စံ အတ္တနော ဃရေယေဝ ဘတ္တဝိဿဂ္ဂံ ကာရာပေသိ. သော ပဏ္ဏသာလာယံ ကဋသာရကံ ပတ္ထရိတွာ မဉ္စပီဌံ ပညပေသိ၊ အပဿေနံ နိက္ခိပိ၊ ပါဒကဌလိကံ ဌပေသိ၊ ပေါက္ခရဏိံ ခဏိ၊ စင်္ကမံ ကတွာ ဝါလုကံ ဩကိရိ၊ ပရိဿယဝိနောဒနတ္ထံ ပဏ္ဏသာလံ ကဏ္ဋကဝတိယာ ပရိက္ခိပိ၊ တထာ ပေါက္ခရဏိံ စင်္ကမဉ္စ. တေသံ အန္တောဝတိပရိယန္တေ တာလပန္တိယော ရောပေသိ. ဧဝမာဒိနာ အာဝါသံ နိဋ္ဌာပေတွာ ထေရဿ တိစီဝရံ အာဒိံ ကတွာ သဗ္ဗံ သမဏပရိက္ခာရံ အဒါသိ. ထေရဿ ဟိ တဒါ ဗောဓိသတ္တေန တိစီဝရပိဏ္ဍပါတပတ္တထာလကပရိဿာဝနဓမကရဏပရိဘောဂဘာဇနဆတ္တုပါဟနဥဒကတုမ္ဗသူစိကတ္တရ- ယဋ္ဌိအာရကဏ္ဋကပိပ္ဖလိနခစ္ဆေဒနပဒီပေယျာဒိ ပဗ္ဗဇိတာနံ ပရိဘောဂဇာတံ အဒိန္နံ နာမ နာဟောသိ. သော ပဉ္စ သီလာနိ ရက္ခန္တော ဥပေါသထံ ကရောန္တော ယာဝဇီဝံ ထေရံ ဥပဋ္ဌဟိ. ထေရော တတ္ထေဝ ဝသန္တော အရဟတ္တံ ပတွာ ပရိနိဗ္ဗာယိ.

၂၉. ဗောဓိသတ္တောပိ ယာဝတာယုကံ ပုညံ ကတွာ ဒေဝလောကေ နိဗ္ဗတ္တိတွာ တတော စုတော မနုဿလောကံ အာဂစ္ဆန္တော ကုသာဝတိယာ ရာဇဓာနိယာ နိဗ္ဗတ္တိတွာ မဟာသုဒဿနော နာမ ရာဇာ အဟောသိ စက္ကဝတ္တီ. တဿိဿရိယာနုဘာဝေါ ‘‘ဘူတပုဗ္ဗံ၊ အာနန္ဒ၊ ရာဇာ မဟာသုဒဿနော နာမ အဟောသိ ခတ္တိယော မုဒ္ဓါဝသိတ္တော’’တိအာဒိနာ (ဒီ. နိ. ၂.၂၄၂) နယေန သုတ္တေ အာဂတော ဧဝ. တဿ ကိရ စတုရာသီတိ နဂရသဟဿာနိ ကုသာဝတီရာဇဓာနိပ္ပမုခါနိ၊ စတုရာသီတိ ပါသာဒသဟဿာနိ ဓမ္မပါသာဒပ္ပမုခါနိ၊ စတုရာသီတိ ကူဋာဂါရသဟဿာနိ မဟာဗျူဟကူဋာဂါရပ္ပမုခါနိ၊ တာနိ သဗ္ဗာနိ တဿ ထေရဿ ကတာယ ဧကိဿာ ပဏ္ဏသာလာယ နိဿန္ဒေန နိဗ္ဗတ္တာနိ၊ စတုရာသီတိ ပလ္လင်္ကသဟဿာနိ နာဂသဟဿာနိ အဿသဟဿာနိ ရထသဟဿာနိ တဿ ဒိန္နဿ မဉ္စပီဌဿ၊ စတုရာသီတိ မဏိသဟဿာနိ တဿ ဒိန္နဿ ပဒီပဿ၊ စတုရာသီတိ ပေါက္ခရဏိသဟဿာနိ ဧကပေါက္ခရဏိယာ၊ စတုရာသီတိ ဣတ္ထိသဟဿာနိ ပုတ္တသဟဿာနိ ဂဟပတိသဟဿာနိ စ ပတ္တထာလကာဒိပရိဘောဂါရဟဿ ပဗ္ဗဇိတပရိက္ခာရဒါနဿ၊ စတုရာသီတိ ဓေနုသဟဿာနိ ပဉ္စဂေါရသဒါနဿ၊ စတုရာသီတိ ဝတ္ထကောဋ္ဌသဟဿာနိ နိဝါသနပါရုပနဒါနဿ၊ စတုရာသီတိ ထာလိပါကသဟဿာနိ ဘောဇနဒါနဿ နိဿန္ဒေန နိဗ္ဗတ္တာနိ. သော သတ္တဟိ ရတနေဟိ စတူဟိ ဣဒ္ဓီဟိ စ သမန္နာဂတော ရာဇာဓိရာဇာ ဟုတွာ သကလံ သာဂရပရိယန္တံ ပထဝိမဏ္ဍလံ ဓမ္မေန အဘိဝိဇိယ အဇ္ဈာဝသန္တော အနေကသတေသု ဌာနေသု ဒါနသာလာယော ကာရေတွာ မဟာဒါနံ ပဋ္ဌပေသိ. ဒိဝသဿ တိက္ခတ္တုံ နဂရေ ဘေရိံ စရာပေသိ ‘‘ယော ယံ ဣစ္ဆတိ၊ သော ဒါနသာလာသု အာဂန္တွာ တံ ဂဏှာတူ’’တိ. တေန ဝုတ္တံ ‘‘တတ္ထာဟံ ဒိဝသေ တိက္ခတ္တုံ၊ ဃောသာပေမိ တဟိံ တဟိ’’န္တိအာဒိ.

တတ္ထ တတ္ထာတိ တသ္မိံ နဂရေ. ‘‘တဒါဟ’’န္တိပိ ပါဌော၊ တဿ တဒါ အဟံ၊ မဟာသုဒဿနကာလေတိ အတ္ထော. တဟိံ တဟိန္တိ တသ္မိံ တသ္မိံ ဌာနေ၊ တဿ တဿ ပါကာရဿ အန္တော စ ဗဟိ စာတိ အတ္ထော. ကော ကိံ ဣစ္ဆတီတိ ဗြာဟ္မဏာဒီသု ယော ကောစိ သတ္တော အန္နာဒီသု ဒေယျဓမ္မေသု ယံ ကိဉ္စိ ဣစ္ဆတိ. ပတ္ထေတီတိ တဿေဝ ဝေဝစနံ. ကဿ ကိံ ဒီယတု ဓနန္တိ အနေကဝါရံ ပရိယာယန္တရေဟိ စ ဒါနဃောသနာယ ပဝတ္တိတဘာဝဒဿနတ္ထံ ဝုတ္တံ၊ ဧတေန ဒါနပါရမိယာ သရူပံ ဒဿေတိ. ဒေယျဓမ္မပဋိဂ္ဂါဟကဝိကပ္ပရဟိတာ ဟိ ဗောဓိသတ္တာနံ ဒါနပါရမီတိ.

၃၀. ဣဒါနိ ဒါနဃောသနာယ တဿ တဿ ဒေယျဓမ္မဿ အနုစ္ဆဝိကပုဂ္ဂလပရိကိတ္တနံ ဒဿေတုံ ‘‘ကော ဆာတကော’’တိအာဒိ ဝုတ္တံ.

တတ္ထ ဆာတကောတိ ဇိဃစ္ဆိတော. တသိတောတိ ပိပါသိတော. ကော မာလံ ကော ဝိလေပနန္တိပိ ‘‘ဣစ္ဆတီ’’တိ ပဒံ အာနေတွာ ယောဇေတဗ္ဗံ. နဂ္ဂေါတိ ဝတ္ထဝိကလော၊ ဝတ္ထေန အတ္ထိကောတိ အဓိပ္ပါယော. ပရိဒဟိဿတီတိ နိဝါသိဿတိ.

၃၁. ကော ပထေ ဆတ္တမာဒေတီတိ ကော ပထိကော ပထေ မဂ္ဂေ အတ္တနော ဝဿဝါတာတပရက္ခဏတ္ထံ ဆတ္တံ ဂဏှာတိ၊ ဆတ္တေန အတ္ထိကောတိ အတ္ထော. ကောပါဟနာ မုဒူ သုဘာတိ ဒဿနီယတာယ သုဘာ သုခသမ္ဖဿတာယ မုဒူ ဥပါဟနာ အတ္တနော ပါဒါနံ စက္ခူနဉ္စ ရက္ခဏတ္ထံ. ကော အာဒေတီတိ ကော တာဟိ အတ္ထိကောတိ အဓိပ္ပါယော. သာယဉ္စ ပါတော စာတိ ဧတ္ထ စ-သဒ္ဒေန မဇ္ဈနှိကေ စာတိ အာဟရိတွာ ဝတ္တဗ္ဗံ. ‘‘ဒိဝသေ တိက္ခတ္တုံ ဃောသာပေမီ’’တိ ဟိ ဝုတ္တံ.

၃၂. န တံ ဒသသု ဌာနေသူတိ တံ ဒါနံ န ဒသသု ဌာနေသု ပဋိယတ္တန္တိ ယောဇနာ. နပိ ဌာနသတေသု ဝါ ပဋိယတ္တံ၊ အပိ စ ခေါ အနေကသတေသု ဌာနေသု ပဋိယတ္တံ. ယာစကေ ဓနန္တိ ယာစကေ ဥဒ္ဒိဿ ဓနံ ပဋိယတ္တံ ဥပက္ခဋံ. ဒွါဒသယောဇနာယာမေ ဟိ နဂရေ သတ္တယောဇနဝိတ္ထတေ သတ္တသု ပါကာရန္တရေသု သတ္တ တာလပန္တိပရိက္ခေပါ၊ တာသု တာလပန္တီသု စတုရာသီတိ ပေါက္ခရဏိသဟဿာနိ ပါဋိယေက္ကံ ပေါက္ခရဏိတီရေ မဟာဒါနံ ပဋ္ဌပိတံ. ဝုတ္တဉှေတံ ဘဂဝတာ –

‘‘ပဋ္ဌပေသိ ခေါ၊ အာနန္ဒ၊ ရာဇာ မဟာသုဒဿနော တာသံ ပေါက္ခရဏီနံ တီရေ ဧဝရူပံ ဒါနံ အန္နံ အန္နတ္ထိကဿ၊ ပါနံ ပါနတ္ထိကဿ၊ ဝတ္ထံ ဝတ္ထတ္ထိကဿ၊ ယာနံ ယာနတ္ထိကဿ၊ သယနံ သယနတ္ထိကဿ၊ ဣတ္ထိံ ဣတ္ထိတ္ထိကဿ၊ ဟိရညံ ဟိရညတ္ထိကဿ၊ သုဝဏ္ဏံ သုဝဏ္ဏတ္ထိကဿာ’’တိ (ဒီ. နိ. ၂.၂၅၄).

၃၃. တတ္ထာယံ ဒါနဿ ပဝတ္တိတာကာရော – မဟာပုရိသော ဟိ ဣတ္ထီနဉ္စ ပုရိသာနဉ္စ အနုစ္ဆဝိကေ အလင်္ကာရေ ကာရေတွာ ဣတ္ထိမတ္တမေဝ တတ္ထ ပရိစာရဝသေန သေသဉ္စ သဗ္ဗံ ပရိစ္စာဂဝသေန ဌပေတွာ ‘‘ရာဇာ မဟာသုဒဿနော ဒါနံ ဒေတိ၊ တံ ယထာသုခံ ပရိဘုဉ္ဇထာ’’တိ ဘေရိံ စရာပေသိ. မဟာဇနာ ပေါက္ခရဏိတီရံ ဂန္တွာ နှတွာ ဝတ္ထာဒီနိ နိဝါသေတွာ မဟာသမ္ပတ္တိံ အနုဘဝိတွာ ယေသံ တာဒိသာနိ အတ္ထိ၊ တေ ပဟာယ ဂစ္ဆန္တိ. ယေသံ နတ္ထိ၊ တေ ဂဟေတွာ ဂစ္ဆန္တိ. ယေ ဟတ္ထိယာနာဒီသုပိ နိသီဒိတွာ ယထာသုခံ ဝိစရိတွာ ဝရသယနေသုပိ သယိတွာ သမ္ပတ္တိံ အနုဘဝိတွာ ဣတ္ထီဟိပိ သဒ္ဓိံ သမ္ပတ္တိံ အနုဘဝိတွာ သတ္တဝိဓရတနပသာဓနာနိ ပသာဓေတွာ သမ္ပတ္တိံ အနုဘဝိတွာ ယံ ယံ အတ္ထိကာ၊ တံ တံ ဂဟေတွာ ဂစ္ဆန္တိ၊ အနတ္ထိကာ ဩဟာယ ဂစ္ဆန္တိ. တမ္ပိ ဒါနံ ဥဋ္ဌာယ သမုဋ္ဌာယ ဒေဝသိကံ ဒီယတေဝ. တဒါ ဇမ္ဗုဒီပဝါသီနံ အညံ ကမ္မံ နတ္ထိ၊ ဒါနံ ပရိဘုဉ္ဇန္တာ သမ္ပတ္တိံ အနုဘဝန္တာ ဝိစရန္တိ. န တဿ ဒါနဿ ကာလပရိစ္ဆေဒေါ အဟောသိ. ရတ္တိဉ္စာပိ ဒိဝါပိ ယဒါ ယဒါ အတ္ထိကာ အာဂစ္ဆန္တိ၊ တဒါ တဒါ ဒီယတေဝ. ဧဝံ မဟာပုရိသော ယာဝဇီဝံ သကလဇမ္ဗုဒီပံ ဥန္နင်္ဂလံ ကတွာ မဟာဒါနံ ပဝတ္တေသိ. တေန ဝုတ္တံ ‘‘ဒိဝါ ဝါ ယဒိ ဝါ ရတ္တိံ၊ ယဒိ ဧတိ ဝနိဗ္ဗကော’’တိအာဒိ.

တတ္ထ ဒိဝါ ဝါ ယဒိ ဝါ ရတ္တိံ၊ ယဒိ ဧတီတိ ဧတေနဿ ယထာကာလံ ဒါနံ ဒဿေတိ. ယာစကာနဉှိ လာဘာသာယ ဥပသင်္ကမနကာလော ဧဝ ဗောဓိသတ္တာနံ ဒါနဿ ကာလော နာမ. ဝနိဗ္ဗကောတိ ယာစကော. လဒ္ဓါ ယဒိစ္ဆကံ ဘောဂန္တိ ဧတေန ယထာဘိရုစိတံ ဒါနံ. ယော ယော ဟိ ယာစကော ယံ ယံ ဒေယျဓမ္မံ ဣစ္ဆတိ၊ တဿ တဿ တံတဒေဝ ဗောဓိသတ္တော ဒေတိ. န တဿ မဟဂ္ဃဒုလ္လဘာဒိဘာဝံ အတ္တနော ဥပရောဓံ စိန္တေသိ. ပူရဟတ္ထောဝ ဂစ္ဆတီတိ ဧတေန ယာဝဒိစ္ဆကံ ဒါနံ ဒဿေတိ၊ ယတ္တကဉှိ ယာစကာ ဣစ္ဆန္တိ၊ တတ္တကံ အပရိဟာပေတွာဝ မဟာသတ္တော ဒေတိ ဥဠာရဇ္ဈာသယတာယ စ မဟိဒ္ဓိကတာယ စ.

၃၄. ‘‘ယာဝဇီဝိက’’န္တိ ဧတေန ဒါနဿ ကာလပရိယန္တာဘာဝံ ဒဿေတိ. သမာဒါနတော ပဋ္ဌာယ ဟိ မဟာသတ္တာ ယာဝပါရိပူရိ ဝေမဇ္ဈေ န ကာလပရိစ္ဆေဒံ ကရောန္တိ၊ ဗောဓိသမ္ဘာရသမ္ဘရဏေ သင်္ကောစာဘာဝေန အန္တရန္တရာ အဝေါသာနာပတ္တိတော မရဏေနပိ အနုပစ္ဆေဒေါ ဧဝ၊ တတော ပရမ္ပိ တထေဝ ပဋိပဇ္ဇနတော၊ ‘‘ယာဝဇီဝိက’’န္တိ ပန မဟာသုဒဿနစရိတဿ ဝသေန ဝုတ္တံ. နပါဟံ ဒေဿံ ဓနံ ဒမ္မီတိ ဣဒံ ဓနံ နာမ မယှံ န ဒေဿံ အမနာပန္တိ ဧဝရူပံ မဟာဒါနံ ဒေန္တော ဂေဟတော စ ဓနံ နီဟရာပေမိ. နပိ နတ္ထိ နိစယော မယီတိ မမ သမီပေ ဓနနိစယော ဓနသင်္ဂဟော နာပိ နတ္ထိ၊ သလ္လေခဝုတ္တိသမဏော ဝိယ အသင်္ဂဟောပိ န ဟောမီတိ အတ္ထော. ဣဒံ ယေန အဇ္ဈာသယေန တဿိဒံ မဟာဒါနံ ပဝတ္တိတံ၊ တံ ဒဿေတုံ ဝုတ္တံ.

၃၅. ဣဒါနိ တံ ဥပမာယ ဝိဘာဝေတုံ ‘‘ယထာပိ အာတုရော နာမာ’’တိအာဒိမာဟ. တတ္ထိဒံ ဥပမာသံသန္ဒနေန သဒ္ဓိံ အတ္ထဒဿနံ – ယထာ နာမ အာတုရော ရောဂါဘိဘူတော ပုရိသော ရောဂတော အတ္တာနံ ပရိမောစေတုကာမော ဓနေန ဟိရညသုဝဏ္ဏာဒိနာ ဝေဇ္ဇံ တိကိစ္ဆကံ တပ္ပေတွာ အာရာဓေတွာ ယထာဝိဓိ ပဋိပဇ္ဇန္တော တတော ရောဂတော ဝိမုစ္စတိ.

၃၆. တထေဝ ဧဝမေဝ အဟမ္ပိ အဋ္ဋဘူတံ သကလလောကံ ကိလေသရောဂတော သကလသံသာရဒုက္ခရောဂတော စ ပရိမောစေတုကာမော တဿ တတော ပရိမောစနဿ အယံ သဗ္ဗသာပတေယျပရိစ္စာဂေါ ဒါနပါရမိဥပါယောတိ ဇာနမာနော ဗုဇ္ဈမာနော အသေသတော ဒေယျဓမ္မဿ ပဋိဂ္ဂါဟကာနဉ္စ ဝသေန အနဝသေသတော မဟာဒါနဿ ဝသေန သတ္တာနံ အဇ္ဈာသယံ ပရိပူရေတုံ အတ္တနော စ န မယှံ ဒါနပါရမီ ပရိပုဏ္ဏာ၊ တသ္မာ ဦနမနန္တိ ပဝတ္တံ ဦနံ မနံ ပူရယိတုံ ပဝတ္တယိတုံ ဝနိဗ္ဗကေ ယာစကေ အဒါသိံ တံ ဒါနံ ဧဝရူပံ မဟာဒါနံ ဒဒါမိ၊ တဉ္စ ခေါ တသ္မိံ ဒါနဓမ္မေ တဿ စ ဖလေ နိရာလယော အနပေက္ခော အပစ္စာသော ကိဉ္စိပိ အပစ္စာသီသမာနော ကေဝလံ သမ္ဗောဓိမနုပတ္တိယာ သဗ္ဗညုတညာဏမေဝ အဓိဂန္တုံ ဒေမီတိ.

ဧဝံ မဟာသတ္တော မဟာဒါနံ ပဝတ္တေန္တော အတ္တနော ပုညာနုဘာဝနိဗ္ဗတ္တံ ဓမ္မပါသာဒံ အဘိရုယှ မဟာဗျူဟကူဋာဂါရဒွါရေ ဧဝ ကာမဝိတက္ကာဒယော နိဝတ္တေတွာ တတ္ထ သောဝဏ္ဏမယေ ရာဇပလ္လင်္ကေ နိသိန္နော ဈာနာဘိညာယော နိဗ္ဗတ္တေတွာ တတော နိက္ခမိတွာ သောဝဏ္ဏမယံ ကူဋာဂါရံ ပဝိသိတွာ တတ္ထ ရဇတမယေ ပလ္လင်္ကေ နိသိန္နော စတ္တာရော ဗြဟ္မဝိဟာရေ ဘာဝေတွာ စတုရာသီတိ ဝဿသဟဿာနိ ဈာနသမာပတ္တီဟိ ဝီတိနာမေတွာ မရဏသမယေ ဒဿနာယ ဥပဂတာနံ သုဘဒ္ဒါဒေဝီပမုခါနံ စတုရာသီတိယာ ဣတ္ထာဂါရသဟဿာနံ အမစ္စပါရိသဇ္ဇာဒီနဉ္စ –

‘‘အနိစ္စာ ဝတ သင်္ခါရာ၊ ဥပ္ပါဒဝယဓမ္မိနော၊

ဥပ္ပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါ’’တိ. (ဒီ. နိ. ၂.၂၂၁၊ ၂၇၂၊ သံ. နိ. ၁.၁၈၆၊ ၂.၁၄၃) –

ဣမာယ ဂါထာယ ဩဝဒိတွာ အာယုပရိယောသာနေ ဗြဟ္မလောကပရာယနော အဟောသိ.

တဒါ သုဘဒ္ဒါဒေဝီ ရာဟုလမာတာ အဟောသိ၊ ပရိဏာယကရတနံ ရာဟုလော၊ သေသပရိသာ ဗုဒ္ဓပရိသာ၊ မဟာသုဒဿနော ပန လောကနာထော.

ဣဓာပိ ဒသ ပါရမိယော သရူပတော လဗ္ဘန္တိ ဧဝ၊ ဒါနဇ္ဈာသယဿ ပန ဥဠာရတာယ ဒါနပါရမီ ဧဝ ပါဠိယံ အာဂတာ. သေသဓမ္မာ ဟေဋ္ဌာ ဝုတ္တနယာ ဧဝ. တထာ ဥဠာရေ သတ္တရတနသမုဇ္ဇလေ စတုဒီပိဿရိယေပိ ဌိတဿ တာဒိသံ ဘောဂသုခံ အနလင်္ကရိတွာ ကာမဝိတက္ကာဒယော ဒူရတော ဝိက္ခမ္ဘေတွာ တထာရူပေ မဟာဒါနေ ပဝတ္တေန္တဿေဝ စတုရာသီတိ ဝဿသဟဿာနိ သမာပတ္တီဟိ ဝီတိနာမေတွာ အနိစ္စတာဒိပဋိသံယုတ္တံ ဓမ္မကထံ ကတွာပိ ဝိပဿနာယ အနုဿုက္ကနံ သဗ္ဗတ္ထ အနိဿင်္ဂတာတိ ဧဝမာဒယော ဂုဏာနုဘာဝါ နိဒ္ဓါရေတဗ္ဗာတိ.

မဟာသုဒဿနစရိယာဝဏ္ဏနာ နိဋ္ဌိတာ.