၁၀. သသပဏ္ဍိတစရိယာဝဏ္ဏနာ

၁၂၅-၆. ဒသမေ ယဒါ ဟောမိ၊ သသကောတိ အဟံ၊ သာရိပုတ္တ၊ ဗောဓိပရိယေသနံ စရမာနော ယဒါ သသပဏ္ဍိတော ဟောမိ. ဗောဓိသတ္တာ ဟိ ကမ္မဝသိပ္ပတ္တာပိ တာဒိသာနံ တိရစ္ဆာနာနံ အနုဂ္ဂဏှနတ္ထံ တိရစ္ဆာနယောနိယံ နိဗ္ဗတ္တန္တိ. ပဝနစာရကောတိ မဟာဝနစာရီ. ဒဗ္ဗာဒိတိဏာနိ ရုက္ခဂစ္ဆေသု ပဏ္ဏာနိ ယံကိဉ္စိ သာကံ ရုက္ခတော ပတိတဖလာနိ စ ဘက္ခော ဧတဿာတိ တိဏပဏ္ဏသာကဖလဘက္ခော. ပရဟေဌနဝိဝဇ္ဇိတောတိ ပရပီဠာဝိရဟိတော. သုတ္တပေါတော စာတိ ဥဒ္ဒပေါတော စ. အဟံ တဒါတိ ယဒါဟံ သသကော ဟောမိ၊ တဒါ ဧတေ မက္ကဋာဒယော တယော သဟာယေ ဩဝဒါမိ.

၁၂၇. ကိရိယေ ကလျာဏပါပကေတိ ကုသလေ စေဝ အကုသလေ စ ကမ္မေ. ပါပါနီတိ အနုသာသနာကာရဒဿနံ. တတ္ထ ပါပါနိ ပရိဝဇ္ဇေထာတိ ပါဏာတိပါတော။ပေ။ မိစ္ဆာဒိဋ္ဌီတိ ဣမာနိ ပါပါနိ ပရိဝဇ္ဇေထ. ကလျာဏေ အဘိနိဝိဿထာတိ ဒါနံ သီလံ။ပေ။ ဒိဋ္ဌုဇုကမ္မန္တိ ဣဒံ ကလျာဏံ၊ ဣမသ္မိံ ကလျာဏေ အတ္တနော ကာယဝါစာစိတ္တာနိ အဘိမုခဘာဝေန နိဝိဿထ၊ ဣမံ ကလျာဏပဋိပတ္တိံ ပဋိပဇ္ဇထာတိ အတ္ထော.

ဧဝံ မဟာသတ္တော တိရစ္ဆာနယောနိယံ နိဗ္ဗတ္တောပိ ဉာဏသမ္ပန္နတာယ ကလျာဏမိတ္တော ဟုတွာ တေသံ တိဏ္ဏံ ဇနာနံ ကာလေန ကာလံ ဥပဂတာနံ ဩဝါဒဝသေန ဓမ္မံ ဒေသေသိ. တေ တဿ ဩဝါဒံ သမ္ပဋိစ္ဆိတွာ အတ္တနော ဝသနဋ္ဌာနံ ပဝိသိတွာ ဝသန္တိ. ဧဝံ ကာလေ ဂစ္ဆန္တေ ဗောဓိသတ္တော အာကာသံ ဩလောကေတွာ စန္ဒပါရိပူရိံ ဒိသွာ ‘‘ဥပေါသထကမ္မံ ကရောထာ’’တိ ဩဝဒိ. တေနာဟ –

၁၂၈. ‘‘ဥပေါသထမှိ ဒိဝသေ၊ စန္ဒံ ဒိသွာန ပူရိတံ၊

ဧတေသံ တတ္ထ အာစိက္ခိံ၊ ဒိဝသော အဇ္ဇုပေါသထော.

၁၂၉. ‘‘ဒါနာနိ ပဋိယာဒေထ၊ ဒက္ခိဏေယျဿ ဒါတဝေ၊

ဒတွာ ဒါနံ ဒက္ခိဏေယျေ၊ ဥပဝဿထုပေါသထ’’န္တိ.

တတ္ထ စန္ဒံ ဒိသွာ န ပူရိတန္တိ ဇုဏှပက္ခစာတုဒ္ဒသိယံ ဤသကံ အပရိပုဏ္ဏဘာဝေန စန္ဒံ န ပရိပူရိတံ ဒိသွာ တတော ဝိဘာတာယ ရတ္တိယာ အရုဏုဂ္ဂမနဝေလာယမေဝ ဥပေါသထမှိ ဒိဝသေ ပန္နရသေ ဧတေသံ မက္ကဋာဒီနံ မယှံ သဟာယာနံ ဒိဝသော အဇ္ဇုပေါသထော. တသ္မာ ‘‘ဒါနာနိ ပဋိယာဒေထာ’’တိအာဒိနာ တတ္ထ ဥပေါသထဒိဝသေ ပဋိပတ္တိဝိဓာနံ အာစိက္ခိန္တိ ယောဇေတဗ္ဗံ. တတ္ထ ဒါနာနီတိ ဒေယျဓမ္မေ. ပဋိယာဒေထာတိ ယထာသတ္တိ ယထာဗလံ သဇ္ဇေထ. ဒါတဝေတိ ဒါတုံ. ဥပဝဿထာတိ ဥပေါသထကမ္မံ ကရောထ၊ ဥပေါသထသီလာနိ ရက္ခထ၊ သီလေ ပတိဋ္ဌာယ ဒိန္နဒါနံ မဟပ္ဖလံ ဟောတိ၊ တသ္မာ ယာစကေ သမ္ပတ္တေ တုမှေဟိ ခါဒိတဗ္ဗာဟာရတော ဒတွာ ခါဒေယျာထာတိ ဒဿေတိ.

တေ ‘‘သာဓူ’’တိ ဗောဓိသတ္တဿ ဩဝါဒံ သိရသာ သမ္ပဋိစ္ဆိတွာ ဥပေါသထင်္ဂါနိ အဓိဋ္ဌဟိံသု. တေသု ဥဒ္ဒပေါတော ပါတောဝ ‘‘ဂေါစရံ ပရိယေသိဿာမီ’’တိ နဒီတီရံ ဂတော. အထေကော ဗာဠိသိကော သတ္တ ရောဟိတမစ္ဆေ ဥဒ္ဓရိတွာ ဝလ္လိယာ အာဝုဏိတွာ နဒီတီရေ ဝါလုကာယ ပဋိစ္ဆာဒေတွာ မစ္ဆေ ဂဏှန္တော နဒိယာ အဓော သောတံ ဘဿိ. ဥဒ္ဒေါ မစ္ဆဂန္ဓံ ဃာယိတွာ ဝါလုကံ ဝိယူဟိတွာ မစ္ဆေ ဒိသွာ နီဟရိတွာ ‘‘အတ္ထိ နု ခေါ ဧတေသံ သာမိကော’’တိ တိက္ခတ္တုံ ဃောသေတွာ သာမိကံ အပဿန္တော ဝလ္လိယံ ဍံသိတွာ အတ္တနော ဝသနဂုမ္ဗေ ဌပေတွာ ‘‘ဝေလာယမေဝ ခါဒိဿာမီ’’တိ အတ္တနော သီလံ အာဝဇ္ဇေန္တော နိပဇ္ဇိ. သိင်္ဂါလောပိ ဂေါစရံ ပရိယေသန္တော ဧကဿ ခေတ္တဂေါပကဿ ကုဋိယံ ဒွေ မံသသူလာနိ ဧကံ ဂေါဓံ ဧကဉ္စ ဒဓိဝါရကံ ဒိသွာ ‘‘အတ္ထိ နု ခေါ ဧတေသံ သာမိကော’’တိ တိက္ခတ္တုံ ဃောသေတွာ သာမိကံ အဒိသွာ ဒဓိဝါရကဿ ဥဂ္ဂဟဏရဇ္ဇုကံ ဂီဝါယံ ပဝေသေတွာ မံသသူလေ စ ဂေါဓဉ္စ မုခေန ဍံသိတွာ အတ္တနော ဝသနဂုမ္ဗေ ဌပေတွာ ‘‘ဝေလာယမေဝ ခါဒိဿာမီ’’တိ အတ္တနော သီလံ အာဝဇ္ဇေန္တော နိပဇ္ဇိ. မက္ကဋောပိ ဝနသဏ္ဍံ ပဝိသိတွာ အမ္ဗပိဏ္ဍံ အာဟရိတွာ အတ္တနော ဝသနဂုမ္ဗေ ဌပေတွာ ‘‘ဝေလာယမေဝ ခါဒိဿာမီ’’တိ အတ္တနော သီလံ အာဝဇ္ဇေန္တော နိပဇ္ဇိ. တိဏ္ဏမ္ပိ ‘‘အဟော ဣဓ နူန ယာစကော အာဂစ္ဆေယျာ’’တိ စိတ္တံ ဥပ္ပဇ္ဇိ. တေန ဝုတ္တံ –

၁၃၀. ‘‘တေ မေ သာဓူတိ ဝတွာန၊ ယထာသတ္တိ ယထာဗလံ၊

ဒါနာနိ ပဋိယာဒေတွာ၊ ဒက္ခိဏေယျံ ဂဝေသိသု’’န္တိ.

ဗောဓိသတ္တော ပန ‘‘ဝေလာယမေဝ နိက္ခမိတွာ ဒဗ္ဗာဒိတိဏာနိ ခါဒိဿာမီ’’တိ အတ္တနော ဝသနဂုမ္ဗေယေဝ နိသိန္နော စိန္တေသိ – ‘‘မမ သန္တိကံ အာဂတာနံ ယာစကာနံ တိဏာနိ ခါဒိတုံ န သက္ကာ၊ တိလတဏ္ဍုလာဒယောပိ မယှံ နတ္ထိ၊ သစေ မေ သန္တိကံ ယာစကော အာဂမိဿတိ၊ အဟံ တိဏေန ယာပေမိ၊ အတ္တနော သရီရမံသံ ဒဿာမီ’’တိ. တေနာဟ ဘဂဝါ –

၁၃၁. ‘‘အဟံ နိသဇ္ဇ စိန္တေသိံ၊ ဒါနံ ဒက္ခိဏနုစ္ဆဝံ၊

ယဒိဟံ လဘေ ဒက္ခိဏေယျံ၊ ကိံ မေ ဒါနံ ဘဝိဿတိ.

၁၃၂. ‘‘န မေ အတ္ထိ တိလာ မုဂ္ဂါ၊ မာသာ ဝါ တဏ္ဍုလာ ဃတံ၊

အဟံ တိဏေန ယာပေမိ၊ န သက္ကာ တိဏ ဒါတဝေ.

၁၃၃. ‘‘ယဒိ ကောစိ ဧတိ ဒက္ခိဏေယျော၊ ဘိက္ခာယ မမ သန္တိကေ၊

ဒဇ္ဇာဟံ သကမတ္တာနံ၊ န သော တုစ္ဆော ဂမိဿတီ’’တိ.

တတ္ထ ဒါနံ ဒက္ခိဏနုစ္ဆဝန္တိ ဒက္ခိဏာဘာဝေန အနုစ္ဆဝိကံ ဒါနံ ဒက္ခိဏေယျဿ ဒါတဗ္ဗံ ဒေယျဓမ္မံ စိန္တေသိံ. ယဒိဟံ လဘေတိ ယဒိ အဟံ ကိဉ္စိ ဒက္ခိဏေယျံ အဇ္ဇ လဘေယျံ. ကိံ မေ ဒါနံ ဘဝိဿတီတိ ကိံ မမ ဒါတဗ္ဗံ ဘဝိဿတိ. န သက္ကာ တိဏ ဒါတဝေတိ ယဒိ ဒက္ခိဏေယျဿ ဒါတုံ တိလမုဂ္ဂါဒိကံ မယှံ နတ္ထိ၊ ယံ ပန မမ အာဟာရဘူတံ၊ တံ န သက္ကာ တိဏံ ဒက္ခိဏေယျဿ ဒါတုံ. ဒဇ္ဇာဟံ သကမတ္တာနန္တိ ကိံ ဝါ မယှံ ဧတာယ ဒေယျဓမ္မစိန္တာယ၊ နနု ဣဒမေဝ မယှံ အနဝဇ္ဇံ အပရာဓီနတာယ သုလဘံ ပရေသဉ္စ ပရိဘောဂါရဟံ သရီရံ သစေ ကောစိ ဒက္ခိဏေယျော မမ သန္တိကံ အာဂစ္ဆတိ၊ တယိဒံ သကမတ္တာနံ တဿ ဒဇ္ဇာမဟံ. ဧဝံ သန္တေ န သော တုစ္ဆော မမ သန္တိကံ အာဂတော အရိတ္တဟတ္ထော ဟုတွာ ဂမိဿတီတိ.

ဧဝံ မဟာပုရိသဿ ယထာဘူတသဘာဝံ ပရိဝိတက္ကေန္တဿ ပရိဝိတက္ကာနုဘာဝေန သက္ကဿ ပဏ္ဍုကမ္ဗလသိလာသနံ ဥဏှာကာရံ ဒဿေသိ. သော အာဝဇ္ဇေန္တော ဣမံ ကာရဏံ ဒိသွာ ‘‘သသရာဇံ ဝီမံသိဿာမီ’’တိ ပဌမံ ဥဒ္ဒဿ ဝသနဋ္ဌာနံ ဂန္တွာ ဗြာဟ္မဏဝေသေန အဋ္ဌာသိ. တေန ‘‘ကိမတ္ထံ၊ ဗြာဟ္မဏ၊ ဌိတောသီ’’တိ စ ဝုတ္တေ သစေ ကဉ္စိ အာဟာရံ လဘေယျံ၊ ဥပေါသထိကော ဟုတွာ သမဏဓမ္မံ ကရေယျန္တိ. သော ‘‘သာဓူတိ တေ အာဟာရံ ဒဿာမီ’’တိ အာဟ. တေန ဝုတ္တံ –

‘‘သတ္တ မေ ရောဟိတာ မစ္ဆာ၊ ဥဒကာ ထလမုဗ္ဘတာ၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသာ’’တိ. (ဇာ. ၁.၄.၆၁)၊

ဗြာဟ္မဏော ‘‘ပဂေဝ တာဝ ဟောတု၊ ပစ္ဆာ ဇာနိဿာမီ’’တိ တထေဝ သိင်္ဂါလဿ မက္ကဋဿ စ သန္တိကံ ဂန္တွာ တေဟိပိ အတ္တနော ဝိဇ္ဇမာနေဟိ ဒေယျဓမ္မေဟိ နိမန္တိတော ‘‘ပဂေဝ တာဝ ဟောတု၊ ပစ္ဆာ ဇာနိဿာမီ’’တိ အာဟ. တေန ဝုတ္တံ –

‘‘ဒုဿ မေ ခေတ္တပါလဿ၊ ရတ္တိဘတ္တံ အပါဘတံ၊

မံသသူလာ စ ဒွေ ဂေါဓာ၊ ဧကဉ္စ ဒဓိဝါရကံ၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသာ’’တိ.

‘‘အမ္ဗပက္ကံ ဒကံ သီတံ၊ သီတစ္ဆာယာ မနောရမာ၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသာ’’တိ. (ဇာ. ၁.၄.၆၂-၆၃)၊

တတ္ထ ဒုဿာတိ အမုဿ. ရတ္တိဘတ္တံ အပါဘတန္တိ ရတ္တိဘောဇနတော အပနီတံ. မံသသူလာ စ ဒွေ ဂေါဓာတိ အင်္ဂါရပက္ကာနိ ဒွေ မံသသူလာနိ ဧကာ စ ဂေါဓာ. ဒဓိဝါရကန္တိ ဒဓိဝါရကော.

၁၃၄. အထ ဗြာဟ္မဏော သသပဏ္ဍိတဿ သန္တိကံ ဂတော. တေနာပိ ‘‘ကိမတ္ထမာဂတောသီ’’တိ ဝုတ္တေ တထေဝါဟ. တေန ဝုတ္တံ ‘‘မမ သင်္ကပ္ပမညာယာ’’တိအာဒိ.

တတ္ထ မမ သင်္ကပ္ပမညာယာတိ ပုဗ္ဗေ ဝုတ္တပ္ပကာရံ ပရိဝိတက္ကံ ဇာနိတွာ. ဗြာဟ္မဏဝဏ္ဏိနာတိ ဗြာဟ္မဏရူပဝတာ အတ္တဘာဝေန. အာသယန္တိ ဝသနဂုမ္ဗံ.

၁၃၅-၇. သန္တုဋ္ဌောတိ သမံ သဗ္ဗဘာဂေနေဝ တုဋ္ဌော. ဃာသဟေတူတိ အာဟာရဟေတု. အဒိန္နပုဗ္ဗန္တိ ယေဟိ ကေဟိစိ အဗောဓိသတ္တေဟိ အဒိန္နပုဗ္ဗံ. ဒါနဝရန္တိ ဥတ္တမဒါနံ. ‘‘အဇ္ဇ ဒဿာမိ တေ အဟ’’န္တိ ဝတွာ တုဝံ သီလဂုဏူပေတော၊ အယုတ္တံ တေ ပရဟေဌနန္တိ တံ ပါဏာတိပါတတော အပနေတွာ ဣဒါနိ တဿ ပရိဘောဂယောဂ္ဂံ အတ္တာနံ ကတွာ ဒါတုံ ‘‘ဧဟိ အဂ္ဂိံ ပဒီပေဟီ’’တိအာဒိမာဟ.

တတ္ထ အဟံ ပစိဿမတ္တာနန္တိ တယာ ကတေ အင်္ဂါရဂဗ္ဘေ အဟမေဝ ပတိတွာ အတ္တာနံ ပစိဿံ. ပက္ကံ တွံ ဘက္ခယိဿသီတိ တထာ ပန ပက္ကံ တွံ ခါဒိဿသိ.

၁၃၈-၉. နာနာကဋ္ဌေ သမာနယီတိ သော ဗြာဟ္မဏဝေသဓာရီ သက္ကော နာနာဒါရူနိ သမာနေန္တော ဝိယ အဟောသိ. မဟန္တံ အကာသိ စိတကံ၊ ကတွာ အင်္ဂါရဂဗ္ဘကန္တိ ဝီတစ္စိကံ ဝိဂတဓူမံ အင်္ဂါရဘရိတဗ္ဘန္တရံ သမန္တတော ဇလမာနံ မမ သရီရဿ နိမုဇ္ဇနပ္ပဟောနကံ တင်္ခဏညေဝ မဟန္တံ စိတကံ အကာသိ၊ သဟသာ ဣဒ္ဓိယာ အဘိနိမ္မိနီတိ အဓိပ္ပါယော. တေနာဟ ‘‘အဂ္ဂိံ တတ္ထ ပဒီပေသိ၊ ယထာ သော ခိပ္ပံ မဟာဘဝေ’’တိ.

တတ္ထ သောတိ သော အဂ္ဂိက္ခန္ဓော သီဃံ မဟန္တော ယထာ ဘဝေယျ၊ တထာ ပဒီပေသိ. ဖောဋေတွာ ရဇဂတေ ဂတ္တေတိ ‘‘သစေ လောမန္တရေသု ပါဏကာ အတ္ထိ၊ တေ မာ မရိံသူ’’တိ ပံသုဂတေ မမ ဂတ္တေ တိက္ခတ္တုံ ဝိဓုနိတွာ. ဧကမန္တံ ဥပါဝိသိန္တိ န တာဝ ကဋ္ဌာနိ အာဒိတ္တာနီတိ တေသံ အာဒီပနံ ဥဒိက္ခန္တော ထောကံ ဧကမန္တံ နိသီဒိံ.

၁၄၀. ယဒါ မဟာကဋ္ဌပုဉ္ဇော၊ အာဒိတ္တော ဓမဓမာယတီတိ ယဒါ ပန သော ဒါရုရာသိ သမန္တတော အာဒိတ္တော ဝါယုဝေဂသမုဒ္ဓဋာနံ ဇာလသိခါနံ ဝသေန ‘‘ဓမဓမာ’’တိ ဧဝံ ကရောတိ. တဒုပ္ပတိတွာ ပတတိ၊ မဇ္ဈေ ဇာလသိခန္တရေတိ တဒါ တသ္မိံ ကာလေ ‘‘မမ သရီရဿ ဈာပနသမတ္ထော အယံ အင်္ဂါရရာသီ’’တိ စိန္တေတွာ ဥပ္ပတိတွာ ဥလ္လင်္ဃိတွာ ဇာလသိခါနံ အဗ္ဘန္တရဘူတေ တဿ အင်္ဂါရရာသိဿ မဇ္ဈေ ပဒုမပုဉ္ဇေ ရာဇဟံသော ဝိယ ပမုဒိတစိတ္တော သကလသရီရံ ဒါနမုခေ ဒတွာ ပတတိ.

၁၄၁-၂. ပဝိဋ္ဌံ ယဿ ကဿစီတိ ယထာ ဃမ္မကာလေ သီတလံ ဥဒကံ ယေန ကေနစိ ပဝိဋ္ဌံ တဿ ဒရထပရိဠာဟံ ဝူပသမေတိ၊ အဿာဒံ ပီတိဉ္စ ဥပ္ပါဒေတိ. တထေဝ ဇလိတံ အဂ္ဂိန္တိ ဧဝံ တထာ ပဇ္ဇလိတံ အင်္ဂါရရာသိ တဒါ မမ ပဝိဋ္ဌဿ ဥသုမမတ္တမ္ပိ နာဟောသိ. အညဒတ္ထု ဒါနပီတိယာ သဗ္ဗဒရထပရိဠာဟဝူပသမော ဧဝ အဟောသိ. စိရဿံ ဝတ မေ ဆဝိစမ္မာဒိကော သဗ္ဗော သရီရာဝယဝေါ ဒါနမုခေ ဇုဟိတဗ္ဗတံ ဥပဂတော အဘိပတ္ထိတော မနောရထော မတ္ထကံ ပတ္တောတိ. တေန ဝုတ္တံ –

၁၄၃. ‘‘ဆဝိံ စမ္မံ မံသံ နှာရုံ၊ အဋ္ဌိံ ဟဒယဗန္ဓနံ၊

ကေဝလံ သကလံ ကာယံ၊ ဗြာဟ္မဏဿ အဒါသဟ’’န္တိ.

တတ္ထ ဟဒယဗန္ဓနန္တိ ဟဒယမံသပေသိ. တဉှိ ဟဒယဝတ္ထုံ ဗန္ဓိတွာ ဝိယ ဌိတတ္တာ ‘‘ဟဒယဗန္ဓန’’န္တိ ဝုတ္တံ. အထ ဝါ ဟဒယဗန္ဓနန္တိ ဟဒယဉ္စ ဗန္ဓနဉ္စ၊ ဟဒယမံသဉ္စေဝ တံ ဗန္ဓိတွာ ဝိယ ဌိတယကနမံသဉ္စာတိ အတ္ထော. ကေဝလံ သကလံ ကာယန္တိ အနဝသေသံ သဗ္ဗံ သရီရံ.

ဧဝံ တသ္မိံ အဂ္ဂိမှိ အတ္တနော သရီရေ လောမကူပမတ္တမ္ပိ ဥဏှံ ကာတုံ အသက္ကောန္တော ဗောဓိသတ္တောပိ ဟိမဂဗ္ဘံ ပဝိဋ္ဌော ဝိယ ဟုတွာ ဗြာဟ္မဏရူပဓရံ သက္ကံ ဧဝမာဟ – ‘‘ဗြာဟ္မဏ၊ တယာ ကတော အဂ္ဂိ အတိသီတလော၊ ကိံ နာမေတ’’န္တိ? ပဏ္ဍိတ၊ နာဟံ ဗြာဟ္မဏော၊ သက္ကောဟမသ္မိ၊ တဝ ဝီမံသနတ္ထံ အာဂတော ဧဝမကာသိန္တိ. ‘‘သက္က၊ တွံ တာဝ တိဋ္ဌတု၊ သကလောပိ စေ လောကော မံ ဒါနေန ဝီမံသေယျ၊ နေဝ မေ အဒါတုကာမတံ ကထဉ္စိပိ ဥပ္ပါဒေယျ ပဿေထ န’’န္တိ ဗောဓိသတ္တော သီဟနာဒံ နဒိ.

အထ နံ သက္ကော ‘‘သသပဏ္ဍိတ၊ တဝ ဂုဏာ သကလကပ္ပမ္ပိ ပါကဋာ ဟောန္တူ’’တိ ပဗ္ဗတံ ပီဠေတွာ ပဗ္ဗတရသံ အာဒါယ စန္ဒမဏ္ဍလေ သသလက္ခဏံ အာလိခိတွာ ဗောဓိသတ္တံ တသ္မိံ ဝနသဏ္ဍေ တတ္ထေဝ ဝနဂုမ္ဗေ တရုဏဒဗ္ဗတိဏပီဌေ နိပဇ္ဇာပေတွာ အတ္တနော ဒေဝလောကမေဝ ဂတော. တေပိ စတ္တာရော ပဏ္ဍိတာ သမဂ္ဂါ သမ္မောဒမာနာ နိစ္စသီလံ ဥပေါသထသီလဉ္စ ပူရေတွာ ယထာရဟံ ပုညာနိ ကတွာ ယထာကမ္မံ ဂတာ.

တဒါ ဥဒ္ဒေါ အာယသ္မာ အာနန္ဒော အဟောသိ၊ သိင်္ဂါလော မဟာမောဂ္ဂလ္လာနော၊ မက္ကဋော သာရိပုတ္တော၊ သသပဏ္ဍိတော ပန လောကနာထော.

တဿ ဣဓာပိ သီလာဒိပါရမိယော ဟေဋ္ဌာ ဝုတ္တနယေနေဝ ယထာရဟံ နိဒ္ဓါရေတဗ္ဗာ. တထာ သတိပိ တိရစ္ဆာနုပပတ္တိယံ ကုသလာဒိဓမ္မေ ကုသလာဒိတော ယထာဘူတာဝဗောဓော၊ တေသု အဏုမတ္တမ္ပိ ဝဇ္ဇံ ဘယတော ဒိသွာ သုဋ္ဌု အကုသလတော ဩရမဏံ၊ သမ္မဒေဝ စ ကုသလဓမ္မေသု အတ္တနော ပတိဋ္ဌာပနံ၊ ပရေသဉ္စ ‘‘ဣမေ နာမ ပါပဓမ္မာ တေ ဧဝံ ဂဟိတာ ဧဝံ ပရာမဋ္ဌာ ဧဝံဂတိကာ ဘဝန္တိ ဧဝံအဘိသမ္ပရာယာ’’တိ အာဒီနဝံ ဒဿေတွာ တတော ဝိရမဏေ နိယောဇနံ၊ ဣဒံ ဒါနံ နာမ၊ ဣဒံ သီလံ နာမ၊ ဣဒံ ဥပေါသထကမ္မံ နာမ၊ ဧတ္ထ ပတိဋ္ဌိတာနံ ဒေဝမနုဿသမ္ပတ္တိယော ဟတ္ထဂတာ ဧဝါတိအာဒိနာ ပုညကမ္မေသု အာနိသံသံ ဒဿေတွာ ပတိဋ္ဌာပနံ၊ အတ္တနော သရီရဇီဝိတနိရပေက္ခံ၊ ပရေသံ သတ္တာနံ အနုဂ္ဂဏှနံ၊ ဥဠာရော စ ဒါနဇ္ဈာသယောတိ ဧဝမာဒယော ဣဓ ဗောဓိသတ္တဿ ဂုဏာနုဘာဝါ ဝိဘာဝေတဗ္ဗာ. တေနေတံ ဝုစ္စတိ – ‘‘ဧဝံ အစ္ဆရိယာ ဟေတေ။ပေ။ ဓမ္မဿ အနုဓမ္မတော’’တိ.

သသပဏ္ဍိတစရိယာဝဏ္ဏနာ နိဋ္ဌိတာ.

ဣဒါနိ ‘‘အကိတ္တိဗြာဟ္မဏော’’တိအာဒိနာ ယထာဝုတ္တေ ဒသပိ စရိယာဝိသေသေ ဥဒါနေတွာ နိဂမေတိ. တတ္ထ အဟမေဝ တဒါ အာသိံ၊ ယော တေ ဒါနဝရေ အဒါတိ ယော တာနိ ဥတ္တမဒါနာနိ အဒါသိ၊ သော အကိတ္တိဗြာဟဏာဒိကော အဟမေဝ တဒါ တသ္မိံ ကာလေ အဟောသိံ၊ န အညောတိ. ဣတိ တေသု အတ္တဘာဝေသု သတိပိ သီလာဒိပါရမီနံ ယထာရဟံ ပူရိတဘာဝေ အတ္တနော ပန တဒါ ဒါနဇ္ဈာသယဿ အတိဝိယ ဥဠာရဘာဝံ သန္ဓာယ ဒါနပါရမိဝသေနေဝ ဒေသနံ အာရောပေသိ. ဧတေ ဒါနပရိက္ခာရာ၊ ဧတေ ဒါနဿ ပါရမီတိ ယေ ဣမေ အကိတ္တိဇာတကာဒီသု (ဇာ. ၁.၁၃.၈၃ အာဒယော) အနေကာကာရဝေါကာရာ မယာ ပဝတ္တိတာ ဒေယျဓမ္မပရိစ္စာဂါ မမ သရီရာဝယဝပုတ္တဒါရပရိစ္စာဂါ ပရမကောဋိကာ၊ ကိဉ္စာပိ တေ ကရုဏူပါယကောသလ္လပရိဂ္ဂဟိတတ္တာ သဗ္ဗညုတညာဏမေဝ ဥဒ္ဒိဿ ပဝတ္တိတတ္တာ ဒါနဿ ပရမုက္ကံသဂမနေန ဒါနပါရမီ ဧဝ၊ တထာပိ မမ ဒါနဿ ပရမတ္ထပါရမိဘူတဿ ပရိက္ခရဏတောသန္တာနဿ ပရိဘာဝနာဝသေန အဘိသင်္ခရဏတော ဧတေ ဒါနပရိက္ခာရာ နာမ. ယဿ ပနေတေ ပရိက္ခာရာ၊ တံ ဒဿေတုံ ‘‘ဇီဝိတံ ယာစကေ ဒတွာ၊ ဣမံ ပါရမိ ပူရယိ’’န္တိ ဝုတ္တံ. ဧတ္ထ ဟိ ဌပေတွာ သသပဏ္ဍိတစရိယံ သေသာသု နဝသု စရိယာသု ယထာရဟံ ဒါနပါရမိဒါနဥပပါရမိယော ဝေဒိတဗ္ဗာ၊ သသပဏ္ဍိတစရိယေ (စရိယာ. ၁.၁၂၅ အာဒယော) ပန ဒါနပရမတ္ထပါရမီ. တေန ဝုတ္တံ –

‘‘ဘိက္ခာယ ဥပဂတံ ဒိသွာ၊ သကတ္တာနံ ပရိစ္စဇိံ၊

ဒါနေန မေ သမော နတ္ထိ၊ ဧသာ မေ ဒါနပါရမီ’’တိ. (စရိယာ. ၁.တဿုဒ္ဒါန)၊

ကိဉ္စာပိ ဟိ မဟာပုရိသဿ ယထာဝုတ္တေ အကိတ္တိဗြာဟ္မဏာဒိကာလေ အညသ္မိဉ္စ မဟာဇနကမဟာသုတသောမာဒိကာလေ ဒါနပါရမိယာ ပူရိတတ္တဘာဝါနံ ပရိမာဏံ နာမ နတ္ထိ၊ တထာပိ ဧကန္တေနေဝ သသပဏ္ဍိတကာလေ ဒါနပါရမိယာ ပရမတ္ထပါရမိဘာဝေါ ဝိဘာဝေတဗ္ဗောတိ.

ပရမတ္ထဒီပနိယာ စရိယာပိဋကသံဝဏ္ဏနာယ

ဒသဝိဓစရိယာသင်္ဂဟဿ ဝိသေသတော

ဒါနပါရမိဝိဘာဝနဿ

ပဌမဝဂ္ဂဿ အတ္ထဝဏ္ဏနာ နိဋ္ဌိတာ.