၃-၂. မဟာမောဂ္ဂလ္လာနတ္ထေရအပဒါနဝဏ္ဏနာ

အနောမဒဿီ ဘဂဝါတျာဒိကံ အာယသ္မတော မောဂ္ဂလ္လာနတ္ထေရဿ အပဒါနံ. အယဉ္စ ထေရော ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယာနိ ပုညာနိ ဥပစိနန္တော အနောမဒဿိဿ ဘဂဝတော ကာလေတိအာဒိ သာရိပုတ္တတ္ထေရဿ ဓမ္မသေနာပတိနော ဝတ္ထုမှိ ဝုတ္တမေဝ. ထေရော ဟိ ပဗ္ဗဇိတဒိဝသတော ပဋ္ဌာယ သတ္တမေ ဒိဝသေ မဂဓရဋ္ဌေ ကလ္လဝါလဂါမကံ ဥပနိဿာယ သမဏဓမ္မံ ကရောန္တော ထိနမိဒ္ဓေ ဩက္ကမန္တေ သတ္ထာရာ ‘‘မောဂ္ဂလ္လာန၊ မာ တုစ္ဆော တဝ ဝါယာမော’’တိအာဒိနာ သံဝေဇိတော ထိနမိဒ္ဓံ ဝိနောဒေတွာ ဘဂဝတာ ဝုစ္စမာနံ ဓာတုကမ္မဋ္ဌာနံ သုဏန္တော ဧဝ ဝိပဿနာပဋိပါဋိယာ ဥပရိမဂ္ဂတ္တယံ အဓိဂန္တွာ အဂ္ဂဖလက္ခဏေ သာဝကဉာဏဿ မတ္ထကံ ပါပုဏိ.

၃၇၅. ဧဝံ ဒုတိယသာဝကဘာဝံ ပတွာ အာယသ္မာ မဟာမောဂ္ဂလ္လာနတ္ထေရော အတ္တနော ပုဗ္ဗကမ္မံ သရိတွာ သောမနဿဝသေန ပုဗ္ဗစရိယံ အပဒါနံ ပကာသေန္တော အနောမဒဿီ ဘဂဝါတိအာဒိမာဟ. တတ္ထ န ဩမံ အလာမကံ ဒဿနံ ပဿနံ အဿာတိ အနောမဒဿီ. တဿ ဟိ ဒွတ္တိံသမဟာပုရိသလက္ခဏပဋိမဏ္ဍိတသရီရတ္တာ သကလံ ဒိဝသံ သကလံ မာသံ သကလံ သံဝစ္ဆရံ သံဝစ္ဆရသတသဟဿမ္ပိ ပဿန္တာနံ ဒေဝမနုဿာနံ အတိတ္တိကရံ ဒဿနန္တိ၊ အနောမံ အလာမကံ နိဗ္ဗာနံ ဒဿနသီလောတိ ဝါ ‘‘အနောမဒဿီ’’တိ လဒ္ဓနာမော ဘာဂျဝန္တတာဒီဟိ ကာရဏေဟိ ဘဂဝါ. လောကဇေဋ္ဌောတိ သကလသတ္တလောကဿ ဇေဋ္ဌော ပဓာနော. အာသဘသဒိသတ္တာ အာသဘော၊ နရာနံ အာသဘော နရာသဘော. သော လောကဇေဋ္ဌော နရာသဘော အနောမဒဿီ ဘဂဝါ ဒေဝသံဃပုရက္ခတော ဒေဝသမူဟေဟိ ပရိဝါရိတော. ဟိမဝန္တမှိ ဝိဟာသီတိ သမ္ဗန္ဓော.

၃၇၆. ယဒါ ဒုတိယသာဝကဘာဝါယ ဒုတိယဝါရေ ပတ္ထနံ အကာသိ၊ တဒါ နာမေန ဝရုဏော နာမ အဟံ နာဂရာဇာ ဟုတွာ နိဗ္ဗတ္တော အဟောသိန္တိ အတ္ထော. တေန ဝုတ္တံ – ‘‘ဝရုဏော နာမ နာမေန၊ နာဂရာဇာ အဟံ တဒါ’’တိ. ကာမရူပီတိ ယဒိစ္ဆိတကာမနိမ္မာနသီလော. ဝိကုဗ္ဗာမီတိ ဝိဝိဓံ ဣဒ္ဓိဝိကုဗ္ဗနံ ကရောမိ. မဟောဒဓိနိဝါသဟန္တိ မဉ္ဇေရိကာ နာဂါ၊ ဘူမိဂတာ နာဂါ၊ ပဗ္ဗတဋ္ဌာ နာဂါ၊ ဂင်္ဂါဝဟေယျာ နာဂါ၊ သာမုဒ္ဒိကာ နာဂါတိ ဣမေသံ နာဂါနံ အန္တရေ သာမုဒ္ဒိကနာဂေါ အဟံ မဟောဒဓိမှိ သမုဒ္ဒေ နိဝါသိံ၊ ဝါသံ ကပ္ပေသိန္တိ အတ္ထော.

၃၇၇. သင်္ဂဏိယံ ဂဏံ ဟိတွာတိ နိစ္စပရိဝါရဘူတံ သကပရိဝါရံ နာဂသမူဟံ ဟိတွာ ဝိနာ ဟုတွာ. တူရိယံ ပဋ္ဌပေသဟန္တိ အဟံ တူရိယံ ပဋ္ဌပေသိံ၊ ဝဇ္ဇာပေသိန္တိ အတ္ထော. သမ္ဗုဒ္ဓံ ပရိဝါရေတွာတိ အနောမဒဿိသမ္ဗုဒ္ဓံ သမန္တတော သေဝမာနာ အစ္ဆရာ နာဂမာဏဝိကာ ဝါဒေသုံ ဒိဗ္ဗဝါဒေဟိ ဂီတာ ဝါကျာဒီဟိ ဝါဒေသုံ လဒ္ဓါနုရူပတော ဝဇ္ဇေသုံ တဒါတိ အတ္ထော.

၃၇၈. ဝဇ္ဇမာနေသု တူရေသူတိ မနုဿနာဂတူရိယေသု ပဉ္စင်္ဂိကေသု ဝဇ္ဇမာနေသု. ဒေဝါ တူရာနိ ဝဇ္ဇယုန္တိ စာတုမဟာရာဇိကာ ဒေဝါ ဒိဗ္ဗတူရိယာနိ ဝဇ္ဇိံသု ဝါဒေသုန္တိ အတ္ထော. ဥဘိန္နံ သဒ္ဒံ သုတွာနာတိ ဥဘိန္နံ ဒေဝမနုဿာနံ ဘေရိသဒ္ဒံ သုတွာ. တိလောကဂရုသမာနောပိ ဗုဒ္ဓေါ သမ္ပဗုဇ္ဈထ ဇာနာတိ သုဏာတီတိ အတ္ထော.

၃၇၉. နိမန္တေတွာန သမ္ဗုဒ္ဓန္တိ သသာဝကသံဃံ သမ္ဗုဒ္ဓံ သွာတနာယ နိမန္တေတွာ ပရိဝါရေတွာ. သကဘဝနန္တိ အတ္တနော နာဂဘဝနံ ဥပါဂမိံ. ဂန္တွာ စ အာသနံ ပညပေတွာနာတိ ရတ္တိဋ္ဌာနဒိဝါဋ္ဌာနကုဋိမဏ္ဍပသယနနိသီဒနဋ္ဌာနာနိ ပညာပေတွာ သဇ္ဇေတွာတိ အတ္ထော. ကာလမာရောစယိံ အဟန္တိ ဧဝံ ကတပုဗ္ဗဝိဓာနော အဟံ ‘‘ကာလော၊ ဘန္တေ၊ နိဋ္ဌိတံ ဘတ္တ’’န္တိ ကာလံ အာရောစယိံ ဝိညာပေသိံ.

၃၈၀. ခီဏာသဝသဟဿေဟီတိ တဒါ သော ဘဂဝါ အရဟန္တသဟဿေဟိ ပရိဝုတော လောကနာယကော သဗ္ဗာ ဒိသာ ဩဘာသေန္တော မေ ဘဝနံ ဥပါဂမိ သမ္ပတ္တောတိ အတ္ထော.

၃၈၁. အတ္တနော ဘဝနံ ပဝိဋ္ဌံ ဘဂဝန္တံ ဘောဇနာကာရံ ဒဿေန္တော ဥပဝိဋ္ဌံ မဟာဝီရန္တိအာဒိမာဟ. တံ သုဝိညေယျမေဝ.

၃၈၆. ဩက္ကာကကုလသမ္ဘဝေါတိ ဩက္ကာကရညော ပရမ္ပရာဂတရာဇကုလေ ဥပ္ပန္နော သကလဇမ္ဗုဒီပေ ပါကဋရာဇကုလေ ဥပ္ပန္နော ဝါ ဂေါတ္တေန ဂေါတ္တဝသေန ဂေါတမော နာမ သတ္ထာ မနုဿလောကေ ဘဝိဿတိ.

၃၈၈. သော ပစ္ဆာ ပဗ္ဗဇိတွာနာတိ သော နာဂရာဇာ ပစ္ဆာ ပစ္ဆိမဘဝေ ကုသလမူလေန ပုညသမ္ဘာရေန စောဒိတော ဥယျောဇိတော သာသနေ ပဗ္ဗဇိတွာ ဂေါတမဿ ဘဂဝတော ဒုတိယော အဂ္ဂသာဝကော ဟေဿတီတိ ဗျာကရဏမကာသိ.

၃၈၉. အာရဒ္ဓဝီရိယောတိ ဌာနနိသဇ္ဇာဒီသု ဣရိယာပထေသု ဝီရိယဝါ. ပဟိတတ္တောတိ နိဗ္ဗာနေ ပေသိတစိတ္တော. ဣဒ္ဓိယာ ပါရမိံ ဂတောတိ ‘‘ဧတဒဂ္ဂံ၊ ဘိက္ခဝေ၊ မမ သာဝကာနံ ဘိက္ခူနံ ဣဒ္ဓိမန္တာနံ ယဒိဒံ မဟာမောဂ္ဂလ္လာနော’’တိ (အ. နိ. ၁.၁၈၀၊ ၁၉၀) အဓိဋ္ဌာနိဒ္ဓိဝိကုဗ္ဗနိဒ္ဓိကမ္မဝိပါကဇိဒ္ဓိအာဒီသု ပါရမိံ ပရိယောသာနံ ဂတော ပတ္တော. သဗ္ဗာသဝေတိ အာ သမန္တတော သဝနတော ပဝတ္တနတော ‘‘အာသဝါ’’တိ လဒ္ဓနာမေ ကာမဘဝဒိဋ္ဌိအဝိဇ္ဇာဓမ္မေ သဗ္ဗေ ပရိညာယ သမန္တတော အညာယ ဇာနိတွာ ပဇဟိတွာ အနာသဝေါ နိက္ကိလေသော. နိဗ္ဗာယိဿတီတိ ကိလေသခန္ဓပရိနိဗ္ဗာနေန နိဗ္ဗာယိဿတီတိ သမ္ဗန္ဓော.

၃၉၀. ဧဝံ ထေရော အတ္တနော ပုညဝသေန လဒ္ဓဗျာကရဏံ ဝတွာ ပုန ပါပစရိယံ ပကာသေန္တော ပါပမိတ္တောပနိဿာယာတိအာဒိမာဟ. တတ္ထ ပါပမိတ္တေ ပါပကေ လာမကေ မိတ္တေ ဥပနိဿာယ နိဿယေ ကတွာ တေဟိ သံသဂ္ဂေါ ဟုတွာတိ အတ္ထော.

တတြာယမနုပုဗ္ဗီ ကထာ – ဧကသ္မိံ သမယေ တိတ္ထိယာ သန္နိပတိတွာ မန္တေသုံ – ‘‘ဇာနာထာဝုသော၊ ကေန ကာရဏေန သမဏဿ ဂေါတမဿ လာဘသက္ကာရော မဟာ ဟုတွာ နိဗ္ဗတ္တော’’တိ? ‘‘န ဇာနာမ’’. ‘‘တုမှေ ပန န ဇာနာထာ’’တိ? ‘‘အာမ၊ ဇာနာမ’’ – မောဂ္ဂလ္လာနံ နာမ ဧကံ ဘိက္ခုံ နိဿာယ ဥပ္ပန္နော. သော ဟိ ဒေဝလောကံ ဂန္တွာ ဒေဝတာဟိ ကတကမ္မံ ပုစ္ဆိတွာ အာဂန္တွာ မနုဿာနံ ကထေသိ – ‘‘ဣဒံ နာမ ကတွာ ဧဝရူပံ သမ္ပတ္တိံ လဘန္တီ’’တိ. နိရယေ နိဗ္ဗတ္တာနမ္ပိ ကမ္မံ ပုစ္ဆိတွာ အာဂန္တွာ မနုဿာနံ ကထေသိ – ‘‘ဣဒံ နာမ ကတွာ ဧဝရူပံ ဒုက္ခံ အနုဘဝန္တီ’’တိ. မနုဿာ တဿ ကထံ သုတွာ မဟန္တံ လာဘသက္ကာရံ အဘိဟရန္တိ. သစေ တံ မာရေတုံ သက္ခိဿာမ၊ သော လာဘသက္ကာရော အမှာကံ နိဗ္ဗတ္တိဿတိ၊ အတ္ထေသော ဥပါယောတိ သဗ္ဗေ ဧကစ္ဆန္ဒာ ဟုတွာ ‘‘ယံကိဉ္စိ ကတွာ တံ မာရေဿာမာ’’တိ အတ္တနော ဥပဋ္ဌာကေ သမာဒပေတွာ ကဟာပဏသဟဿံ လဘိတွာ ပုရိသဃာတကေ စောရေ ပက္ကောသာပေတွာ ‘‘မဟာမောဂ္ဂလ္လာနတ္ထေရော နာမ သမဏဿ ဂေါတမဿ သာဝကော ကာဠသိလာယံ ဝသတိ၊ တုမှေ တတ္ထ ဂန္တွာ တံ မာရေထာ’’တိ တေသံ တံ သဟဿံ အဒံသု. စောရာ ဓနလာဘေန သမ္ပဋိစ္ဆိတွာ ‘‘ထေရံ မာရေဿာမာ’’တိ ဂန္တွာ တဿ ဝသနဋ္ဌာနံ ပရိဝါရေသုံ. ထေရော တေဟိ ပရိက္ခိတ္တဘာဝံ ဉတွာ ကုဉ္စိကစ္ဆိဒ္ဒေန နိက္ခမိတွာ ပက္ကာမိ. စောရာ တံ ဒိဝသံ ထေရံ အဒိသွာ ပုနေကဒိဝသံ တဿ ဝသနဋ္ဌာနံ ပရိက္ခိပိံသု. ထေရော ဉတွာ ကဏ္ဏိကာမဏ္ဍလံ ဘိန္ဒိတွာ အာကာသံ ပက္ခန္ဒိ. ဧဝံ တေ ပဌမမာသေပိ၊ မဇ္ဈိမမာသေပိ ထေရံ ဂဟေတုံ နာသက္ခိံသု. ပစ္ဆိမမာသေ ပန သမ္ပတ္တေ ထေရော အတ္တနာ ကတကမ္မဿ အာကဍ္ဎနဘာဝံ ဉတွာ န အပဂစ္ဆိ. စောရာ တံ ပဟရန္တာ တဏ္ဍုလကမတ္တာနိ အဋ္ဌီနိ ကရောန္တာ ဘိန္ဒိံသု. အထ နံ ‘‘မတော’’တိ သညာယ ဧကသ္မိံ ဂုမ္ဗပိဋ္ဌေ ခိပိတွာ ပက္ကမိံသု.

ထေရော၊ ‘‘သတ္ထာရံ ပဿိတွာ ဝန္ဒိတွာဝ ပရိနိဗ္ဗာယိဿာမီ’’တိ အတ္တဘာဝံ ဈာနဝေဌနေန ဝေဌေတွာ အာကာသေန သတ္ထု သန္တိကံ ဂန္တွာ သတ္ထာရံ ဝန္ဒိတွာ ‘‘ဘန္တေ၊ ပရိနိဗ္ဗာယိဿာမီ’’တိ အာဟ. ‘‘ပရိနိဗ္ဗာယိဿသိ၊ မောဂ္ဂလ္လာနာ’’တိ? ‘‘အာမ၊ ဘန္တေ’’တိ. ‘‘ကတ္ထ ဂန္တွာ ပရိနိဗ္ဗာယိဿသီ’’တိ? ‘‘ကာဠသိလာပဒေသံ၊ ဘန္တေ’’တိ. ‘‘တေန ဟိ၊ မောဂ္ဂလ္လာန၊ မယှံ ဓမ္မံ ကထေတွာ ယာဟိ. တာဒိသဿ ဟိ မေ သာဝကဿ န ဒါနိ ဒဿနံ အတ္ထီ’’တိ. သော ‘‘ဧဝံ ကရိဿာမိ၊ ဘန္တေ’’တိ သတ္ထာရံ ဝန္ဒိတွာ အာကာသံ ဥပ္ပတိတွာ သာရိပုတ္တတ္ထေရော ဝိယ ပရိနိဗ္ဗာနဒိဝသေ နာနပ္ပကာရာ ဣဒ္ဓိယော ကတွာ ဓမ္မံ ကထေတွာ သတ္ထာရံ ဝန္ဒိတွာ ကာဠသိလာပဒေသံ ဂန္တွာ ပရိနိဗ္ဗာယိ. ‘‘ထေရံ ကိရ စောရာ မာရေသု’’န္တိ အယံ ကထာ သကလဇမ္ဗုဒီပေ ပတ္ထရိ.

ရာဇာ အဇာတသတ္တု စောရေ ပရိယေသနတ္ထာယ စရပုရိသေ ပယောဇေသိ. တေသု စောရေသု သုရာပါနေ သုရံ ပိဝန္တေသု မဒ္ဒေသု ဧကော ဧကဿ ပိဋ္ဌိံ ပဟရိတွာ ပါတေသိ. သော တံ သန္တဇ္ဇေန္တော ‘‘အမ္ဘော ဒုဗ္ဗိနီတ တွံ၊ ကသ္မာ မေ ပိဋ္ဌိံ ပဟရိတွာ ပါတေသိ၊ ကိံ ပန၊ အရေ ဒုဋ္ဌစောရ၊ တယာ မဟာမောဂ္ဂလ္လာနတ္ထေရော ပဌမံ ပဟတော’’တိ အာဟ. ‘‘ကိံ ပန တွံ မယာ ပဌမံ ပဟတဘာဝံ န ဇာနာသီ’’တိ? ဧဝံ ဧတေသံ ‘‘မယာ ပဟတော၊ မယာ ပဟတော’’တိ ဝဒန္တာနံ သုတွာ တေ စရပုရိသာ သဗ္ဗေ တေ စောရေ ဂဟေတွာ ရညော အာရောစေသုံ. ရာဇာ တေ စောရေ ပက္ကောသာပေတွာ ပုစ္ဆိ – ‘‘တုမှေဟိ ထေရော မာရိတော’’တိ? ‘‘အာမ၊ ဒေဝါ’’တိ. ‘‘ကေဟိ တုမှေ ဥယျောဇိတာ’’တိ? ‘‘နဂ္ဂသမဏေဟိ၊ ဒေဝါ’’တိ. ရာဇာ ပဉ္စသတေ နဂ္ဂသမဏေ ဂါဟာပေတွာ ပဉ္စသတေဟိ စောရေဟိ သဒ္ဓိံ ရာဇင်္ဂဏေ နာဘိပမာဏေသု အာဝါဋေသု နိခဏာပေတွာ ပလာလေဟိ ပဋိစ္ဆာဒေတွာ အဂ္ဂိံ ဒါပေသိ. အထ နေသံ ဈာမဘာဝံ ဇာနိတွာ အယနင်္ဂလေဟိ ကသာပေတွာ သဗ္ဗေ ခဏ္ဍာခဏ္ဍံ ကာရာပေသိ. တဒါ ဘိက္ခူ ဓမ္မသဘာယံ ကထံ သမုဋ္ဌာပေသုံ – ‘‘မဟာမောဂ္ဂလ္လာနတ္ထေရော အတ္တနော အနနုရူပမရဏံ ပတ္တော’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမ၊ ဘန္တေ’’တိ ဝုတ္တေ ‘‘မောဂ္ဂလ္လာနဿ၊ ဘိက္ခဝေ၊ ဣမဿေဝ အတ္တဘာဝဿ အနနုရူပံ မရဏံ၊ ပုဗ္ဗေ ပန တေန ကတကမ္မဿ အနုရူပမေဝါ’’တိ ဝတွာ ‘‘ကိံ ပနဿ၊ ဘန္တေ၊ ပုဗ္ဗကမ္မ’’န္တိ ပုဋ္ဌော တံ ဝိတ္ထာရေတွာ ကထေသိ.

အတီတေ၊ ဘိက္ခဝေ၊ ဗာရာဏသိယံ ဧကော ကုလပုတ္တော သယမေဝ ကောဋ္ဋနပစနာဒီနိ ကရောန္တော မာတာပိတရော ပဋိဇဂ္ဂိ. အထဿ မာတာပိတရော ‘‘တာတ၊ တွံ ဧကကောဝ ဂေဟေ စ အရညေ စ ကမ္မံ ကရောန္တော ကိလမသိ၊ ဧကံ တေ ကုမာရိကံ အာနေဿာမာ’’တိ ဝတွာ ‘‘အမ္မတာတာ၊ ယာဝ တုမှေ ဇီဝထ၊ တာဝ ဝေါ သဟတ္ထာ ဥပဋ္ဌဟိဿာမီ’’တိ တေန ပဋိက္ခိတ္တာပိ ပုနပ္ပုနံ ယာစိတွာ ကုမာရိကံ အာနေသုံ. သာ ကတိပါဟမေဝ တေ ဥပဋ္ဌဟိတွာ ပစ္ဆာ တေသံ ဒဿနမပိ အနိစ္ဆန္တီ – ‘‘န သက္ကာ တဝ မာတာပိတူဟိ သဒ္ဓိံ ဧကဋ္ဌာနေ ဝသိတု’’န္တိ ဥဇ္ဈာယိတွာ တသ္မိံ အတ္တနော ကထံ အဂ္ဂဏှန္တေ တဿ ဗဟိဂတကာလေ မကစိဝါကခဏ္ဍာနိ စ ယာဂုဖေဏကေ စ ဂဟေတွာ တတ္ထ တတ္ထ အာကိရိတွာ တေနာဂန္တွာ ‘‘ကိံ ဣဒ’’န္တိ ပုဋ္ဌာ ‘‘ဣမေသံ မဟလ္လကအန္ဓာနံ ဧတံ ကမ္မံ၊ သဗ္ဗံ ဂေဟံ ကိလိဋ္ဌာ ကရောန္တာ ဝိစရန္တိ၊ န သက္ကာ ဧတေဟိ သဒ္ဓိံ ဧကဋ္ဌာနေ ဝသိတု’’န္တိ ဧဝံ တာယ ပုနပ္ပုနံ ကထိယမာနာယ ဧဝရူပေါပိ ပူရိတပါရမီ သတ္တော မာတာပိတူဟိ သဒ္ဓိံ ဘိဇ္ဇိ. သော ‘‘ဟောတု၊ ဇာနိဿာမိ နေသံ ကတ္တဗ္ဗကမ္မ’’န္တိ တေ ဘောဇေတွာ ‘‘အမ္မတာတာ၊ အသုကဋ္ဌာနေ နာမ တုမှာကံ ဉာတကာ အာဂမနံ ပစ္စာသီသန္တိ၊ တတ္ထ ဂမိဿာမာ’’တိ တေ ယာနကံ အာရောပေတွာ အာဒါယ ဂစ္ဆန္တော အဋဝိမဇ္ဈံ ပတ္တကာလေ ‘‘တာတ၊ ရသ္မိယော ဂဏှထ၊ ဂေါဏာ ဒဏ္ဍသညာယ ဂမိဿန္တိ၊ ဣမသ္မိံ ဌာနေ စောရာ ဝသန္တိ၊ အဟံ ဩတရိတွာ စရာမီ’’တိ ပိတု ဟတ္ထေ ရသ္မိယော ဒတွာ ဩတရိတွာ ဂစ္ဆန္တော သဒ္ဒံ ပရိဝတ္တေတွာ စောရာနံ ဥဋ္ဌိတသဒ္ဒမကာသိ. မာတာပိတရော သဒ္ဒံ သုတွာ ‘‘စောရာ ဥဋ္ဌိတာ’’တိ သညာယ ‘‘တာတ၊ စောရာ ဥဋ္ဌိတာ၊ မဟလ္လကာ မယံ၊ တွံ အတ္တာနမေဝ ရက္ခာဟီ’’တိ အာဟံသု. သော မာတာပိတရော ဝိရဝန္တေပိ စောရသဒ္ဒံ ကရောန္တော ကောဋ္ဋေတွာ မာရေတွာ အဋဝိယံ ခိပိတွာ ပစ္စာဂမိ.

သတ္ထာ ဣဒံ တဿ ပုဗ္ဗကမ္မံ ကထေတွာ ‘‘ဘိက္ခဝေ၊ မောဂ္ဂလ္လာနော ဧတ္တကံ ကမ္မံ ကတွာ အနေကဝဿသတသဟဿာနိ နိရယေ ပစ္စိတွာ တာဝ ပက္ကာဝသေသေန အတ္တဘာဝသတေ ဧဝမေဝ ကောဋ္ဋေတွာ သံစုဏ္ဏော မရဏံ ပတ္တော၊ ဧဝံ မောဂ္ဂလ္လာနေန အတ္တနော ကမ္မာနုရူပမေဝ မရဏံ လဒ္ဓံ. ပဉ္စဟိ စောရသတေဟိ သဒ္ဓိံ ပဉ္စတိတ္ထိယသတာနိပိ မမ ပုတ္တံ အပ္ပဒုဋ္ဌံ ဒုဿေတွာ အနုရူပမေဝ မရဏံ လဘိံသု. အပ္ပဒုဋ္ဌေသု ဟိ ပဒုဿန္တော ဒသဟိ ကာရဏေဟိ အနယဗျသနံ ပါပုဏာတိယေဝါ’’တိ အနုသန္ဓိံ ဃဋေတွာ ဓမ္မံ ဒေသေန္တော ဣမာ ဂါထာ အဘာသိ –

‘‘ယော ဒဏ္ဍေန အဒဏ္ဍေသု၊ အပ္ပဒုဋ္ဌေသု ဒုဿတိ၊

ဒသန္နမညတရံ ဌာနံ၊ ခိပ္ပမေဝ နိဂစ္ဆတိ.

‘‘ဝေဒနံ ဖရုသံ ဇာနိံ၊ သရီရဿ ဝ ဘေဒနံ၊

ဂရုကံ ဝါပိ အာဗာဓံ၊ စိတ္တက္ခေပံ ဝ ပါပုဏေ.

‘‘ရာဇတော ဝါ ဥပသဂ္ဂံ၊ အဗ္ဘက္ခာနံ ဝ ဒါရုဏံ၊

ပရိက္ခယံ ဝ ဉာတီနံ၊ ဘောဂါနံ ဝ ပဘင်္ဂုနံ.

‘‘အထဝဿ အဂါရာနိ၊ အဂ္ဂိ ဍဟတိ ပါဝကော၊

ကာယဿ ဘေဒါ ဒုပ္ပညော၊ နိရယံ သောပပဇ္ဇတီ’’တိ. (ဓ. ပ. ၁၃၇-၁၄၀)၊

၃၉၃. ပဝိဝေကမနုယုတ္တောတိ ပကာရေန ဝိဝေကံ ဧကီဘာဝံ အနုယုတ္တော ယောဇိတော ယုတ္တပ္ပယုတ္တော. သမာဓိဘာဝနာရတောတိ ပဌမဇ္ဈာနာဒိဘာဝနာယ ရတော အလ္လီနော စ. သဗ္ဗာသဝေ သကလကိလေသေ၊ ပရိညာယ ဇာနိတွာ ပဇဟိတွာ၊ အနာသဝေါ နိက္ကိလေသော ဝိဟရာမီတိ သမ္ဗန္ဓော.

၃၉၄. ဣဒါနိ အတ္တနော ပုညသမ္ဘာရဝသေန ပုဗ္ဗစရိတဿ ဖလံ ဒဿေန္တော ဓရဏိမ္ပိ သုဂမ္ဘီရန္တိအာဒိမာဟ.

တတြာယမနုပုဗ္ဗီကထာ – ဗုဒ္ဓေန စောဒိတောတိ သမ္မာသမ္ဗုဒ္ဓေန စောဒိတော ဥယျောဇိတော. ဘိက္ခုသံဃဿ ပေက္ခတောတိ မဟတော ဘိက္ခုသံဃဿ ပဿန္တဿ. မိဂါရမာတုပါသာဒံ၊ ပါဒင်္ဂုဋ္ဌေန ကမ္ပယီတိ ပုဗ္ဗာရာမေ ဝိသာခါယ မဟာဥပါသိကာယ ကာရိတံ သဟဿတ္ထမ္ဘပဋိမဏ္ဍိတံ မဟာပါသာဒံ အတ္တနော ပါဒင်္ဂုဋ္ဌေန ကမ္ပေသိံ. ဧကသ္မိဉှိ သမယေ ပုဗ္ဗာရာမေ ယထာဝုတ္တပါသာဒေ ဘဂဝတိ ဝိဟရန္တေ သမ္ဗဟုလာ နဝကတရာ ဘိက္ခူ ဥပရိပါသာဒေ နိသိန္နာ သတ္ထာရမ္ပိ အစိန္တေတွာ တိရစ္ဆာနကထံ ကထေတုမာရဒ္ဓါ. တံ သုတွာ ဘဂဝါ တေ သံဝေဇေတွာ အတ္တနော ဓမ္မဒေသနာယ ဘာဇနဘူတေ ကာတုကာမော အာယသ္မန္တံ မဟာမောဂ္ဂလ္လာနတ္ထေရံ အာမန္တေသိ – ‘‘ပဿသိ တွံ၊ မောဂ္ဂလ္လာန၊ နဝေ ဘိက္ခူ တိရစ္ဆာနကထမနုယုတ္တေ’’တိ တံ သုတွာ ထေရော သတ္ထု အဇ္ဈာသယံ ဉတွာ အဘိညာပါဒကံ အာပေါကသိဏာရမ္မဏံ စတုတ္ထဇ္ဈာနံ သမာပဇ္ဇိတွာ ဝုဋ္ဌာယ ‘‘ပါသာဒဿ ပတိဋ္ဌိတောကာသံ ဥဒကံ ဟောတူ’’တိ အဓိဋ္ဌာယ ပါသာဒမတ္ထကေ ထုပိကံ ပါဒင်္ဂုဋ္ဌေန ပဟရိ၊ ပါသာဒေါ ဩနမိတွာ ဧကေန ပဿေန အဋ္ဌာသိ. ပုနပိ ပဟရိ၊ အပရေနပိ ပဿေန အဋ္ဌာသိ. တေ ဘိက္ခူ ဘီတာ သံဝိဂ္ဂါ ပါသာဒဿ ပတနဘယေန တတော နိက္ခမိတွာ ဘဂဝတော သမီပေ အဋ္ဌံသု. သတ္ထာ တေသံ အဇ္ဈာသယံ ဩလောကေတွာ ဓမ္မံ ဒေသေသိ. တံ သုတွာ တေသု ကေစိ သောတာပတ္တိဖလေ ပတိဋ္ဌဟိံသု၊ ကေစိ သကဒါဂါမိဖလေ၊ ကေစိ အနာဂါမိဖလေ၊ ကေစိ အရဟတ္တဖလေ ပတိဋ္ဌဟိံသု. သွာယမတ္ထော ပါသာဒကမ္ပနသုတ္တေန ဒီပေတဗ္ဗော.

ဝေဇယန္တပါသာဒန္တိ သော ဝေဇယန္တပါသာဒေါ တာဝတိံသဘဝနေ ယောဇနသဟဿုဗ္ဗေဓော အနေကသဟဿနိယျူဟကူဋာဂါရပဋိမဏ္ဍိတော ဒေဝါသုရသင်္ဂါမေ အသုရေ ဇိနိတွာ သက္ကေ ဒေဝါနမိန္ဒေ နဂရမဇ္ဈေ ဌိတေ ဥဋ္ဌိတော ဝိဇယန္တေန နိဗ္ဗတ္တတ္တာ ‘‘ဝေဇယန္တော’’တိ လဒ္ဓနာမော ပါသာဒေါ၊ တံ သန္ဓာယာဟ – ‘‘ဝေဇယန္တပါသာဒ’’န္တိ၊ တမ္ပိ အယံ ထေရော ပါဒင်္ဂုဋ္ဌေန ကမ္ပေတိ. ဧကသ္မိဉှိ သမယေ ဘဂဝန္တံ ပုဗ္ဗာရာမေ ဝိဟရန္တံ သက္ကော ဒေဝရာဇာ ဥပသင်္ကမိတွာ တဏှာသင်္ခယဝိမုတ္တိံ ပုစ္ဆိ. တဿ ဘဂဝါ ဝိဿဇ္ဇေသိ. သော တံ သုတွာ အတ္တမနော ပမုဒိတော အဘိဝါဒေတွာ ပဒက္ခိဏံ ကတွာ အတ္တနော ဒေဝလောကမေဝ ဂတော. အထာယသ္မာ မဟာမောဂ္ဂလ္လာနော ဧဝံ စိန္တေသိ – ‘‘အယံ သက္ကော ဘဂဝန္တံ ဥပသင်္ကမိတွာ ဧဝရူပံ ဂမ္ဘီရနိဗ္ဗာနပဋိသံယုတ္တံ ပဉှံ ပုစ္ဆိ၊ ဘဂဝတာ စ ပဉှော ဝိဿဇ္ဇိတော၊ ကိံ နု ခေါ ဇာနိတွာ ဂတော၊ ဥဒါဟု အဇာနိတွာ. ယံနူနာဟံ ဒေဝလောကံ ဂန္တွာ တမတ္ထံ ဇာနေယျ’’န္တိ? သော တာဝဒေဝ တာဝတိံသဘဝနံ ဂန္တွာ သက္ကံ ဒေဝါနမိန္ဒံ တမတ္ထံ ပုစ္ဆိ. သက္ကော ဒိဗ္ဗသမ္ပတ္တိယာ ပမတ္တော ဟုတွာ ဝိက္ခေပံ အကာသိ. ထေရော တဿ သံဝေဂဇနနတ္ထံ ဝေဇယန္တပါသာဒံ ပါဒင်္ဂုဋ္ဌေန ကမ္ပေသိ. တေန ဝုတ္တံ –

‘‘ယော ဝေဇယန္တပါသာဒံ၊ ပါဒင်္ဂုဋ္ဌေန ကမ္ပယိ၊

ဣဒ္ဓိဗလေနုပတ္ထဒ္ဓေါ၊ သံဝေဇေသိ စ ဒေဝတာ’’တိ. (မ. နိ. ၁.၅၁၃)၊

အယံ ပနတ္ထော – စူဠတဏှာသင်္ခယဝိမုတ္တိသုတ္တေန (မ. နိ. ၁.၃၉၀ အာဒယော) ဒီပေတဗ္ဗော. ကမ္ပိတာကာရော ဟေဋ္ဌာ ဝုတ္တောယေဝ. ‘‘သက္ကံ သော ပရိပုစ္ဆတီ’’တိ (မ. နိ. ၁.၅၁၃) ယထာဝုတ္တမေဝ ထေရဿ တဏှာသင်္ခယဝိမုတ္တိပုစ္ဆံ သန္ဓာယ ဝုတ္တံ. တေနာဟ – ‘‘အပါဝုသော၊ ဇာနာသိ၊ တဏှက္ခယဝိမုတ္တိယော’’တိ? တဿ သက္ကော ဝိယာကာသိ. ဣဒံ ထေရေန ပါသာဒကမ္ပနေ ကတေ သံဝိဂ္ဂဟဒယေန ပမာဒံ ပဟာယ ယောနိသော မနသိ ကရိတွာ ပဉှဿ ဗျာကတဘာဝံ သန္ဓာယ ဝုတ္တံ. သတ္ထာရာ ဒေသိတနိယာမေနေဝ ဟိ သော တဒါ ကထေသိ. တေနာဟ – ‘‘ပဉှံ ပုဋ္ဌော ယထာတထ’’န္တိ (မ. နိ. ၁.၅၁၃). တတ္ထ သက္ကံ သော ပရိပုစ္ဆတီတိ သက္ကံ ဒေဝရာဇံ မဟာမောဂ္ဂလ္လာနတ္ထေရော သတ္ထာရာ ဒေသိတာယ တဏှာသင်္ခယဝိမုတ္တိယာ သမ္မဒေဝ ဂဟိတဘာဝံ ပုစ္ဆိ. အတီတတ္ထေ ဟိ ဣဒံ ဝတ္တမာနဝစနံ. အပါဝုသော၊ ဇာနာသီတိ အာဝုသော၊ အပိ ဇာနာသိ၊ ကိံ ဇာနာသိ? တဏှက္ခယဝိမုတ္တိယောတိ (မ. နိ. ၁.၅၁၃) တဏှာသင်္ခယဝိမုတ္တိယော သတ္ထာရာ တုယှံ ဒေသိတာ၊ တထာ ‘‘ကိံ ဇာနာသီ’’တိ ပုစ္ဆတိ. တဏှက္ခယဝိမုတ္တိယောတိ ဝါ တဏှာသင်္ခယဝိမုတ္တိသုတ္တဿ ဒေသနံ ပုစ္ဆတိ.

ဗြဟ္မာနန္တိ မဟာဗြဟ္မာနံ. သုဓမ္မာယာဘိတော သဘန္တိ (မ. နိ. ၁.၅၁၃) သုဓမ္မာယ သဘာယ. အယံ ပန ဗြဟ္မလောကေ သုဓမ္မာ သဘာ၊ န တာဝတိံသဘဝနေ. သုဓမ္မာသဘာဝိရဟိတော ဒေဝလောကော နာမ နတ္ထိ. ‘‘အဇ္ဇာပိ တေ၊ အာဝုသော၊ သာ ဒိဋ္ဌိ၊ ယာ တေ ဒိဋ္ဌိ ပုရေ အဟူ’’တိ ဣမံ ဗြဟ္မလောကံ ဥပဂန္တုံ သမတ္ထော နတ္ထိ ကောစိ သမဏော ဝါ ဗြာဟ္မဏော ဝါ. သတ္ထု ဣဓာဂမနတော ပုဗ္ဗေ ယာ တုယှံ ဒိဋ္ဌိ အဟောသိ၊ ကိံ အဇ္ဇာပိ ဣဒါနိပိ သာ ဒိဋ္ဌိ န ဝိဂတာတိ? ပဿသိ ဝီတိဝတ္တန္တံ ဗြဟ္မလောကေ ပဘဿရန္တိ ဗြဟ္မလောကေ ဝီတိပတန္တံ မဟာကပ္ပိနမဟာကဿပါဒီဟိ သာဝကေဟိ ပရိဝါရိတဿ တေဇောဓာတုံ သမာပဇ္ဇိတွာ နိသိန္နဿ သသာဝကဿ ဘဂဝတော ဩကာသံ ပဿသီတိ အတ္ထော. ဧကသ္မိဉှိ သမယေ ဘဂဝါ ဗြဟ္မလောကေ သုဓမ္မာယ သဘာယ သန္နိပတိတွာ သန္နိသိန္နဿ ‘‘အတ္ထိ နု ခေါ ကောစိ သမဏော ဝါ ဗြာဟ္မဏော ဝါ ဧဝံမဟိဒ္ဓိကော၊ သော ဣဓ အာဂန္တုံ သက္ကုဏေယျာ’’တိ စိန္တေန္တဿ ဗြဟ္မုနော စိတ္တမညာယ တတ္ထ ဂန္တွာ ဗြဟ္မုနော မတ္ထကေ အာကာသေ နိသိန္နော တေဇောဓာတုံ သမာပဇ္ဇိတွာ ဩဘာသံ မုဉ္စန္တော မဟာမောဂ္ဂလ္လာနာဒီနံ အာဂမနံ စိန္တေသိ. သဟ စိန္တနေန တေပိ တတ္ထ ဂန္တွာ သတ္ထာရံ ဝန္ဒိတွာ သတ္ထု အဇ္ဈာသယံ ဉတွာ တေဇောဓာတုံ သမာပဇ္ဇိတွာ ပစ္စေကဒိသာသု နိသီဒိတွာ ဩဘာသံ ဝိဿဇ္ဇေသုံ. သကလဗြဟ္မလောကော ဧကောဘာသော အဟောသိ. သတ္ထာ ဗြဟ္မုနော ကလ္လစိတ္တတံ ဉတွာ စတုသစ္စပကာသနံ ဓမ္မံ ဒေသေသိ. ဒေသနာပရိယောသာနေ အနေကာနိ ဗြဟ္မသဟဿာနိ မဂ္ဂဖလေသု ပတိဋ္ဌဟိံသု. တံ သန္ဓာယ စောဒေန္တော အဇ္ဇာပိ တေ၊ အာဝုသော၊ သာ ဒိဋ္ဌီတိ ဂါထမာဟ. အယံ ပနတ္ထော ဗကဗြဟ္မသုတ္တေန (သံ. နိ. ၁.၁၇၅) ဒီပေတဗ္ဗော. ဝုတ္တံ ဟေတံ (သံ. နိ. ၁.၁၇၆) –

‘‘ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရဿ ဗြဟ္မုနော ဧဝရူပံ ပါပကံ ဒိဋ္ဌိဂတံ ဥပ္ပန္နံ ဟောတိ – ‘နတ္ထိ သမဏော ဝါ ဗြာဟ္မဏော ဝါ ယော ဣဓ အာဂစ္ဆေယျာ’တိ. အထ ခေါ ဘဂဝါ တဿ ဗြဟ္မုနော စေတသာ စေတောပရိဝိတက္ကမညာယ သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ. အထ ခေါ ဘဂဝါ တဿ ဗြဟ္မုနော ဥပရိဝေဟာသံ ပလ္လင်္ကေန နိသီဒိ တေဇောဓာတုံ သမာပဇ္ဇိတွာ.

‘‘အထ ခေါ အာယသ္မတော မဟာမောဂ္ဂလ္လာနဿ ဧတဒဟောသိ ‘ကဟံ နု ခေါ ဘဂဝါ ဧတရဟိ ဝိဟရတီ’တိ? အဒ္ဒသ ခေါ အာယသ္မာ မဟာမောဂ္ဂလ္လာနော ဘဂဝန္တံ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန တဿ ဗြဟ္မုနော ဥပရိဝေဟာသံ ပလ္လင်္ကေန နိသိန္နံ တေဇောဓာတုံ သမာပန္နံ. ဒိသွာန သေယျထာပိ နာမ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ. အထ ခေါ အာယသ္မာ မဟာမောဂ္ဂလ္လာနော ပုရတ္ထိမံ ဒိသံ နိဿာယ တဿ ဗြဟ္မုနော ဥပရိဝေဟာသံ ပလ္လင်္ကေန နိသီဒိ တေဇောဓာတုံ သမာပဇ္ဇိတွာ နီစတရံ ဘဂဝတော.

‘‘အထ ခေါ အာယသ္မတော မဟာကဿပဿ ဧတဒဟောသိ – ‘ကဟံ နု ခေါ ဘဂဝါ ဧတရဟိ ဝိဟရတီ’တိ? အဒ္ဒသ ခေါ အာယသ္မာ မဟာကဿပေါ ဘဂဝန္တံ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန တဿ ဗြဟ္မုနော ဥပရိဝေဟာသံ ပလ္လင်္ကေန နိသိန္နံ တေဇောဓာတုံ သမာပန္နံ. ဒိသွာန သေယျထာပိ နာမ ဗလဝါ ပုရိသော။ပေ။ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ. အထ ခေါ အာယသ္မာ မဟာကဿပေါ ဒက္ခိဏံ ဒိသံ နိဿာယ တဿ ဗြဟ္မုနော ဥပရိဝေဟာသံ ပလ္လင်္ကေန နိသီဒိ တေဇောဓာတုံ သမာပဇ္ဇိတွာ နီစတရံ ဘဂဝတော.

‘‘အထ ခေါ အာယသ္မတော မဟာကပ္ပိနဿ ဧတဒဟောသိ – ‘ကဟံ နု ခေါ ဘဂဝါ ဧတရဟိ ဝိဟရတီ’တိ? အဒ္ဒသ ခေါ အာယသ္မာ မဟာကပ္ပိနော ဘဂဝန္တံ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန တဿ ဗြဟ္မုနော ဥပရိဝေဟာသံ ပလ္လင်္ကေန နိသိန္နံ တေဇောဓာတုံ သမာပန္နံ. ဒိသွာန သေယျထာပိ နာမ ဗလဝါ ပုရိသော။ပေ။ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ. အထ ခေါ အာယသ္မာ မဟာကပ္ပိနော ပစ္ဆိမံ ဒိသံ နိဿာယ တဿ ဗြဟ္မုနော ဥပရိဝေဟာသံ ပလ္လင်္ကေန နိသီဒိ တေဇောဓာတုံ သမာပဇ္ဇိတွာ နီစတရံ ဘဂဝတော.

‘‘အထ ခေါ အာယသ္မတော အနုရုဒ္ဓဿ ဧတဒဟောသိ – ‘ကဟံ နု ခေါ ဘဂဝါ ဧတရဟိ ဝိဟရတီ’တိ? အဒ္ဒသ ခေါ အာယသ္မာ အနုရုဒ္ဓေါ ဘဂဝန္တံ ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန တဿ ဗြဟ္မုနော ဥပရိဝေဟာသံ ပလ္လင်္ကေန နိသိန္နံ တေဇောဓာတုံ သမာပန္နံ. ဒိသွာန သေယျထာပိ နာမ ဗလဝါ ပုရိသော။ပေ။ ဧဝမေဝ ဇေတဝနေ အန္တရဟိတော တသ္မိံ ဗြဟ္မလောကေ ပါတုရဟောသိ. အထ ခေါ အာယသ္မာ အနုရုဒ္ဓေါ ဥတ္တရံ ဒိသံ နိဿာယ တဿ ဗြဟ္မုနော ဥပရိဝေဟာသံ ပလ္လင်္ကေန နိသီဒိ တေဇောဓာတုံ သမာပဇ္ဇိတွာ နီစတရံ ဘဂဝတော’’.

အထ ခေါ အာယသ္မာ မဟာမောဂ္ဂလ္လာနော တံ ဗြဟ္မာနံ ဂါထာယ အဇ္ဈဘာသိ –

‘‘အဇ္ဇာပိ တေ အာဝုသော သာ ဒိဋ္ဌိ၊ ယာ တေ ဒိဋ္ဌိ ပုရေ အဟု၊

ပဿသိ ဝီတိဝတ္တန္တံ၊ ဗြဟ္မလောကေ ပဘဿရ’’န္တိ.

‘‘န မေ မာရိသ သာ ဒိဋ္ဌိ၊ ယာ မေ ဒိဋ္ဌိ ပုရေ အဟု၊

ပဿာမိ ဝီတိဝတ္တန္တံ၊ ဗြဟ္မလောကေ ပဘဿရံ၊

သွာဟံ အဇ္ဇ ကထံ ဝဇ္ဇံ၊ အဟံ နိစ္စောမှိ သဿတော’’တိ.

‘‘အထ ခေါ ဘဂဝါ တံ ဗြဟ္မာနံ သံဝေဇေတွာ သေယျထာပိ နာမ ဗလဝါ ပုရိသော။ပေ။ ဧဝမေဝ တသ္မိံ ဗြဟ္မလောကေ အန္တရဟိတော ဇေတဝနေ ပါတုရဟောသိ. အထ ခေါ သော ဗြဟ္မာ အညတရံ ဗြဟ္မပါရိသဇ္ဇံ အာမန္တေသိ – ‘ဧဟိ တွံ၊ မာရိသ၊ ယေနာယသ္မာ မဟာမောဂ္ဂလ္လာနော တေနုပသင်္ကမ၊ ဥပသင်္ကမိတွာ အာယသ္မန္တံ မဟာမောဂ္ဂလ္လာနံ ဧဝံ ဝဒေဟိ – ‘‘အတ္ထိ နု ခေါ၊ မာရိသ မောဂ္ဂလ္လာန၊ အညေပိ တဿ ဘဂဝတော သာဝကာ ဧဝံမဟိဒ္ဓိကာ ဧဝံမဟာနုဘာဝါ သေယျထာပိ ဘဝံ မောဂ္ဂလ္လာနော ကဿပေါ ကပ္ပိနော အနုရုဒ္ဓေါ’’တိ? ‘ဧဝံ၊ မာရိသာ’တိ ခေါ သော ဗြဟ္မပါရိသဇ္ဇော တဿ ဗြဟ္မုနော ပဋိဿုတွာ ယေနာယသ္မာ မဟာမောဂ္ဂလ္လာနော တေနုပသင်္ကမိ၊ ဥပသင်္ကမိတွာ အာယသ္မန္တံ မဟာမောဂ္ဂလ္လာနံ ဧတဒဝေါစ – ‘အတ္ထိ နု ခေါ၊ မာရိသ မောဂ္ဂလ္လာန၊ အညေပိ တဿ ဘဂဝတော သာဝကာ ဧဝံမဟိဒ္ဓိကာ ဧဝံမဟာနုဘာဝါ သေယျထာပိ ဘဝံ မောဂ္ဂလ္လာနော ကဿပေါ ကပ္ပိနော အနုရုဒ္ဓေါ’တိ? အထ ခေါ အာယသ္မာ မဟာမောဂ္ဂလ္လာနော တံ ဗြဟ္မပါရိသဇ္ဇံ ဂါထာယ အဇ္ဈဘာသိ –

‘‘တေဝိဇ္ဇာ ဣဒ္ဓိပတ္တာ စ၊ စေတောပရိယာယကောဝိဒါ၊

ခီဏာသဝါ အရဟန္တော၊ ဗဟူ ဗုဒ္ဓဿ သာဝကာ’’တိ.

‘‘အထ ခေါ သော ဗြဟ္မပါရိသဇ္ဇော အာယသ္မတော မဟာမောဂ္ဂလ္လာနဿ ဘာသိတံ အဘိနန္ဒိတွာ အနုမောဒိတွာ ယေန သော ဗြဟ္မာ တေနုပသင်္ကမိ၊ ဥပသင်္ကမိတွာ တံ ဗြဟ္မာနံ ဧတဒဝေါစ – ‘အာယသ္မာ မာရိသ မဟာမောဂ္ဂလ္လာနော ဧဝမာဟ –

‘‘‘တေဝိဇ္ဇာ ဣဒ္ဓိပတ္တာ စ၊ စေတောပရိယာယကောဝိဒါ၊

ခီဏာသဝါ အရဟန္တော၊ ဗဟူ ဗုဒ္ဓဿ သာဝကာ’’’တိ. –

ဣဒမဝေါစ သော ဗြဟ္မပါရိသဇ္ဇော. အတ္တမနော စ သော ဗြဟ္မာ တဿ ဗြဟ္မပါရိသဇ္ဇဿ ဘာသိတံ အဘိနန္ဒီတိ (သံ. နိ. ၁.၁၇၆).

ဣဒံ သန္ဓာယ ဝုတ္တံ – ‘‘အယံ ပနတ္ထော ဗကဗြဟ္မသုတ္တေန ဒီပေတဗ္ဗော’’တိ.

မဟာနေရုနော ကူဋန္တိ (မ. နိ. ၁.၅၁၃) ကူဋသီသေန သကလမေဝ သိနေရုပဗ္ဗတရာဇံ ဝဒသိ. ဝိမောက္ခေန အပဿယီတိ (မ. နိ. ၁.၅၁၃) ဈာနဝိမောက္ခေန နိဿယေန အဘိညာယေန ပဿယီတိ အဓိပ္ပါယော. ဝနန္တိ (မ. နိ. ၁.၅၁၃) ဇမ္ဗုဒီပံ. သော ဟိ ဝနဗာဟုလ္လတာယ ‘‘ဝန’’န္တိ ဝုတ္တော. တေနာဟ ‘‘ဇမ္ဗုမဏ္ဍဿ ဣဿရော’’တိ. ပုဗ္ဗဝိဒေဟာနန္တိ (မ. နိ. ၁.၅၁၃) ပုဗ္ဗဝိဒေဟဋ္ဌာနဉ္စ ပုဗ္ဗဝိဒေဟန္တိ အတ္ထော. ယေ စ ဘူမိသယာ နရာတိ (မ. နိ. ၁.၅၁၃) ဘူမိသယာ နရာ နာမ အပရဂေါယာနဥတ္တရကုရုကာ စ မနုဿာ. တေ ဟိ ဂေဟာဘာဝတော ‘‘ဘူမိသယာ’’တိ ဝုတ္တာ. တေပိ သဗ္ဗေ အပဿယီတိ သမ္ဗန္ဓော. အယံ ပနတ္ထော နန္ဒောပနန္ဒဒမနေန ဒီပေတဗ္ဗော – ဧကသ္မိံ ကိရ သမယေ အနာထပိဏ္ဍိကော ဂဟပတိ ဘဂဝတော ဓမ္မဒေသနံ သုတွာ ‘‘သွေ၊ ဘန္တေ၊ ပဉ္စဟိ ဘိက္ခုသတေဟိ သဒ္ဓိံ မယှံ ဂေဟေ ဘိက္ခံ ဂဏှထာ’’တိ နိမန္တေတွာ ပက္ကာမိ. တံဒိဝသဉ္စ ဘဂဝတော ပစ္စူသသမယေ ဒသသဟဿိလောကဓာတုံ ဩလောကေန္တဿ နန္ဒောပနန္ဒော နာမ နာဂရာဇာ ဉာဏမုခေ အာပါထံ အာဂစ္ဆိ. ဘဂဝါ ‘‘အယံ နာဂရာဇာ မယှံ ဉာဏမုခေ အာပါထံ အာဂစ္ဆတိ၊ ကိံ နု ခေါ ဘဝိဿတီ’’တိ အာဝဇ္ဇေန္တော သရဏဂမနဿ ဥပနိဿယံ ဒိသွာ ‘‘အယံ မိစ္ဆာဒိဋ္ဌိကော တီသု ရတနေသု အပ္ပသန္နော၊ ကော နု ခေါ ဣမံ မိစ္ဆာဒိဋ္ဌိကော ဝိမောစေယျာ’’တိ အာဝဇ္ဇေန္တော မဟာမောဂ္ဂလ္လာနတ္ထေရံ အဒ္ဒသ. တတော ပဘာတာယ ရတ္တိယာ သရီရပဋိဇဂ္ဂနံ ကတွာ အာယသ္မန္တံ အာနန္ဒံ အာမန္တေသိ – ‘‘အာနန္ဒ၊ ပဉ္စန္နံ ဘိက္ခုသတာနံ အာရောစေဟိ – ‘တထာဂတော ဒေဝစာရိကံ ဂစ္ဆတီ’’’တိ. တံဒိဝသဉ္စ နန္ဒောပနန္ဒဿ အာပါနဘူမိံ သဇ္ဇယိံသု. သော ဒိဗ္ဗရတနပလ္လင်္ကေ ဒိဗ္ဗေန သေတစ္ဆတ္တေန ဓာရိယမာနော တိဝိဓနာဋကေဟိ စေဝ နာဂပရိသာယ စ ပရိဝုတော ဒိဗ္ဗဘာဇနေသု ဥပဋ္ဌာပိတအန္နပါနံ ဩလောကယမာနော နိသိန္နော ဟောတိ. အထ ခေါ ဘဂဝါ ယထာ နာဂရာဇာ ပဿတိ၊ တထာ ကတွာ တဿ ဝိမာနမတ္ထကေနေဝ ပဉ္စဟိ ဘိက္ခုသတေဟိ သဒ္ဓိံ တာဝတိံသဒေဝလောကာဘိမုခေါ ပါယာသိ.

တေန ခေါ ပန သမယေန နန္ဒောပနန္ဒဿ နာဂရာဇဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ ဟောတိ ‘‘ဣမေ ဟိ နာမ မုဏ္ဍသမဏကာ အမှာကံ ဥပရိဘဝနေန ဒေဝါနံ တာဝတိံသာနံ ဘဝနံ ပဝိသန္တိပိ နိက္ခမန္တိပိ၊ န ဒါနိ ဣတော ပဋ္ဌာယ ဣမေသံ အမှာကံ မတ္ထကေ ပါဒပံသုံ ဩကိရန္တာနံ ဂန္တုံ ဒဿာမီ’’တိ ဥဋ္ဌာယ သိနေရုပါဒံ ဂန္တွာ တံ အတ္တဘာဝံ ဝိဇဟိတွာ သိနေရုံ သတ္တက္ခတ္တုံ ဘောဂေဟိ ပရိက္ခိပိတွာ ဥပရိ ဖဏံ ကတွာ တာဝတိံသဘဝနံ အဝကုဇ္ဇေန ဖဏေန ပရိဂ္ဂဟေတွာ အဒဿနံ ဂမေသိ.

အထ ခေါ အာယသ္မာ ရဋ္ဌပါလော ဘဂဝန္တံ ဧတဒဝေါစ – ‘‘ပုဗ္ဗေ၊ ဘန္တေ၊ ဣမသ္မိံ ပဒေသေ ဌိတော သိနေရုံ ပဿာမိ၊ သိနေရုပရိဘဏ္ဍံ ပဿာမိ၊ တာဝတိံသံ ပဿာမိ၊ ဝေဇယန္တံ ပဿာမိ၊ ဝေဇယန္တဿ ပါသာဒဿ ဥပရိဓဇံ ပဿာမိ. ကော နု ခေါ၊ ဘန္တေ၊ ဟေတု ကော ပစ္စယော၊ ယံ ဧတရဟိ နေဝ သိနေရုံ ပဿာမိ။ပေ။ န ဝေဇယန္တဿ ပါသာဒဿ ဥပရိဓဇံ ပဿာမီ’’တိ. ‘‘အယံ၊ ရဋ္ဌပါလ၊ နန္ဒောပနန္ဒော နာမ နာဂရာဇာ တုမှာကံ ကုပိတော သိနေရုံ သတ္တက္ခတ္တုံ ဘောဂေဟိ ပရိက္ခိပိတွာ ဥပရိ ဖဏေန ပဋိစ္ဆာဒေတွာ အန္ဓကာရံ ကတွာ ဌိတော’’တိ. ‘‘ဒမေမိ နံ၊ ဘန္တေ’’တိ. န ဘဂဝါ နံ အနုဇာနိ. အထ ခေါ အာယသ္မာ ဘဒ္ဒိယော၊ အာယသ္မာ ရာဟုလောတိ အနုက္ကမေန သဗ္ဗေပိ ဘိက္ခူ ဥဋ္ဌဟိံသု. ဘဂဝါ အနုဇာနိ.

အဝသာနေ မဟာမောဂ္ဂလ္လာနတ္ထေရော – ‘‘အဟံ၊ ဘန္တေ၊ ဒမေမိ န’’န္တိ အာဟ. ‘‘ဒမေဟိ၊ မောဂ္ဂလ္လာနာ’’တိ ဘဂဝါ အနုဇာနိ. ထေရော အတ္တဘာဝံ ဝိဇဟိတွာ မဟန္တံ နာဂရာဇဝဏ္ဏံ အဘိနိမ္မိနိတွာ နန္ဒောပနန္ဒံ စုဒ္ဒသက္ခတ္တုံ ဘောဂေဟိ ပရိက္ခိပိတွာ တဿ ဖဏမတ္ထကေ အတ္တနော ဖဏံ ဌပေတွာ သိနေရုနာ သဒ္ဓိံ အဘိနိပ္ပီဠေသိ. နာဂရာဇာ ဓူမာယိ. ထေရောပိ ‘‘န တုယှံယေဝ သရီရေ ဓူမော အတ္ထိ၊ မယှမ္ပိ အတ္ထီ’’တိ ဓူမာယိ. နာဂရာဇဿ ဓူမော ထေရံ န ဗာဓတိ၊ ထေရဿ ပန ဓူမော နာဂရာဇံ ဗာဓတိ. တတော နာဂရာဇာ ပဇ္ဇလိ၊ ထေရောပိ ‘‘န တုယှံယေဝ သရီရေ အဂ္ဂိ အတ္ထိ၊ မယှမ္ပိ အတ္ထီ’’တိ ပဇ္ဇလိ. နာဂရာဇဿ တေဇော ထေရံ န ဗာဓတိ၊ ထေရဿ ပန တေဇော နာဂရာဇာနံ ဗာဓတိ. နာဂရာဇာ – ‘‘အယံ မံ သိနေရုနာ အဘိနိပ္ပီဠေတွာ ဓူမာယတိ စေဝ ပဇ္ဇလတိ စာ’’တိ စိန္တေတွာ ‘‘ဘော၊ တုဝံ ကောသီ’’တိ ပဋိပုစ္ဆိ. ‘‘အဟံ ခေါ၊ နန္ဒ၊ မောဂ္ဂလ္လာနော’’တိ. ‘‘ဘန္တေ၊ အတ္တနော ဘိက္ခုဘာဝေန တိဋ္ဌာဟီ’’တိ.

ထေရော တံ အတ္တဘာဝံ ဝိဇဟိတွာ တဿ ဒက္ခိဏကဏ္ဏသောတေန ပဝိသိတွာ ဝါမကဏ္ဏသောတေန နိက္ခမိ၊ ဝါမကဏ္ဏသောတေန ပဝိသိတွာ ဒက္ခိဏကဏ္ဏသောတေန နိက္ခမိ. တထာ ဒက္ခိဏနာသသောတေန ပဝိသိတွာ ဝါမနာသသောတေန နိက္ခမိ၊ ဝါမနာသသောတေန ပဝိသိတွာ ဒက္ခိဏနာသသောတေန နိက္ခမိ. တတော နာဂရာဇာ မုခံ ဝိဝရိ၊ ထေရော မုခေန ပဝိသိတွာ အန္တောကုစ္ဆိယံ ပါစီနေန စ ပစ္ဆိမေန စ စင်္ကမတိ. ဘဂဝါ – ‘‘မောဂ္ဂလ္လာန၊ မနသိ ကရောဟိ၊ မဟိဒ္ဓိကော နာဂေါ’’တိ အာဟ. ထေရော ‘‘မယှံ ခေါ၊ ဘန္တေ၊ စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ၊ တိဋ္ဌတု၊ ဘန္တေ၊ နန္ဒောပနန္ဒော၊ အဟံ နန္ဒောပနန္ဒသဒိသာနံ နာဂရာဇာနံ သတမ္ပိ သဟဿမ္ပိ ဒမေယျ’’န္တိအာဒိမာဟ.

နာဂရာဇာ စိန္တေသိ – ‘‘ပဝိသန္တော တာဝ မေ န ဒိဋ္ဌော၊ နိက္ခမနကာလေ ဒါနိ နံ ဒါဌန္တရေ ပက္ခိပိတွာ ခါဒိဿာမီ’’တိ စိန္တေတွာ ‘‘နိက္ခမထ၊ ဘန္တေ၊ မာ မံ အန္တောကုစ္ဆိယံ အပရာပရံ စင်္ကမန္တော ဗာဓယိတ္ထာ’’တိ အာဟ. ထေရော နိက္ခမိတွာ ဗဟိ အဋ္ဌာသိ. နာဂရာဇာ ‘‘အယံ သော’’တိ ဒိသွာ နာသဝါတံ ဝိဿဇ္ဇိ၊ ထေရော စတုတ္ထဇ္ဈာနံ သမာပဇ္ဇိ၊ လောမကူပမ္ပိဿ ဝါတော စာလေတုံ နာသက္ခိ. အဝသေသာ ဘိက္ခူ ကိရ အာဒိတော ပဋ္ဌာယ သဗ္ဗပါဋိဟာရိယာနိ ကာတုံ သက္ကုဏေယျုံ၊ ဣမံ ပန ဌာနံ ပတွာ ဧဝံ ခိပ္ပနိသန္တိနော ဟုတွာ သမာပဇ္ဇိတုံ န သက္ခိဿန္တီတိ နေသံ ဘဂဝါ နာဂရာဇဒမနံ နာနုဇာနိ.

နာဂရာဇာ ‘‘အဟံ ဣမဿ သမဏဿ နာသဝါတေန လောမကူပမ္ပိ စာလေတုံ နာသက္ခိ၊ မဟိဒ္ဓိကော သော သမဏော’’တိ စိန္တေသိ. ထေရော အတ္တဘာဝံ ဝိဇဟိတွာ သုပဏ္ဏရူပံ အဘိနိမ္မိနိတွာ သုပဏ္ဏဝါတံ ဒဿေန္တော နာဂရာဇာနံ အနုဗန္ဓိ. နာဂရာဇာ တံ အတ္တဘာဝံ ဝိဇဟိတွာ မာဏဝကဝဏ္ဏံ အဘိနိမ္မိနိတွာ ‘‘ဘန္တေ၊ တုမှာကံ သရဏံ ဂစ္ဆာမီ’’တိ ဝဒန္တော ထေရဿ ပါဒေ ဝန္ဒိ. ထေရော ‘‘သတ္ထာ၊ နန္ဒ၊ အာဂတော၊ ဧဟိ ဂမိဿာမာ’’တိ နာဂရာဇာနံ ဒမေတွာ နိဗ္ဗိသံ ကတွာ ဂဟေတွာ ဘဂဝတော သန္တိကံ အဂမာသိ. နာဂရာဇာ ဘဂဝန္တံ ဝန္ဒိတွာ ‘‘ဘန္တေ၊ တုမှာကံ သရဏံ ဂစ္ဆာမီ’’တိ အာဟ. ဘဂဝါ ‘‘သုခီ ဟောဟိ၊ နာဂရာဇာ’’တိ ဝတွာ ဘိက္ခုသံဃပရိဝုတော အနာထပိဏ္ဍိကဿ နိဝေသနံ အဂမာသိ.

အနာထပိဏ္ဍိကော ‘‘ကိံ၊ ဘန္တေ၊ အတိဒိဝါ အာဂတတ္ထာ’’တိ အာဟ. ‘‘မောဂ္ဂလ္လာနဿ စ နန္ဒောပနန္ဒဿ စ သင်္ဂါမော အဟောသီ’’တိ. ‘‘ကဿ ပန၊ ဘန္တေ၊ ဇယော၊ ကဿ ပရာဇယော’’တိ? ‘‘မောဂ္ဂလ္လာနဿ ဇယော၊ နန္ဒဿ ပရာဇယော’’တိ. အနာထပိဏ္ဍိကော ‘‘အဓိဝါသေတု မေ၊ ဘန္တေ၊ ဘဂဝါ သတ္တာဟံ ဧကပဋိပါဋိယာ ဘတ္တံ သတ္တာဟံ ထေရဿ သက္ကာရံ ကရိဿာမီ’’တိ ဝတွာ သတ္တာဟံ ဗုဒ္ဓပ္ပမုခါနံ ပဉ္စန္နံ ဘိက္ခုသတာနံ မဟာသက္ကာရံ အကာသိ. တေန ဝုတ္တံ – ‘‘နန္ဒောပနန္ဒဒမနေန ဒီပေတဗ္ဗော’’တိ.

ဧကသ္မိဉှိ သမယေ ပုဗ္ဗာရာမေ ဝိသာခါယ မဟာဥပါသိကာယ ကာရိတသဟဿဂဗ္ဘပဋိမဏ္ဍိတေ ပါသာဒေ ဘဂဝတိ ဝိဟရန္တေ။ပေ။ သံဝေဇေသိ စ ဒေဝတာတိ. တေန ဝုတ္တံ –

‘‘ဓရဏိမ္ပိ သုဂမ္ဘီရံ၊ ဗဟလံ ဒုပ္ပဓံသိယံ၊

ဝါမင်္ဂုဋ္ဌေန ခေါဘေယျံ၊ ဣဒ္ဓိယာ ပါရမိံ ဂတော’’တိ.

တတ္ထ ဣဒ္ဓိယာ ပါရမိံ ဂတောတိ ဝိကုဗ္ဗနိဒ္ဓိအာဒိဣဒ္ဓိယာ ပရိယောသာနံ ဂတော ပတ္တော.

၃၉၅. အသ္မိမာနန္တိ အဟမသ္မိ ပညာသီလသမာဓိသမ္ပန္နောတိအာဒိ အသ္မိမာနံ န ပဿာမိ န အက္ခာမီတိ အတ္ထော. တဒေဝ ဒီပေန္တော မာနော မယှံ န ဝိဇ္ဇတီတိ အာဟ. သာမဏေရေ ဥပါဒါယာတိ သာမဏေရေ အာဒိံ ကတွာ သကလေ ဘိက္ခုသံဃေ ဂရုစိတ္တံ ဂါရဝစိတ္တံ အာဒရဗဟုမာနံ အဟံ ကရောမီတိ အတ္ထော.

၃၉၆. အပရိမေယျေ ဣတော ကပ္ပေတိ ဣတော အမှာကံ ဥပ္ပန္နကပ္ပတော အန္တရကပ္ပါဒီဟိ အပရိမေယျေ ဧကအသင်္ချေယျဿ ဥပရိ သတသဟဿကပ္ပမတ္ထကေတိ အတ္ထော. ယံ ကမ္မမဘိနီဟရိန္တိ အဂ္ဂသာဝကဘာဝဿ ပဒံ ပုညသမ္ပတ္တိံ ပူရေသိံ. တာဟံ ဘူမိမနုပ္ပတ္တောတိ အဟံ တံ သာဝကဘူမိံ အနုပ္ပတ္တော အာသဝက္ခယသင်္ခါတံ နိဗ္ဗာနံ ပတ္တော အသ္မိ အမှီတိ အတ္ထော.

၃၉၇. အတ္ထပဋိသမ္ဘိဒါဒယော စတဿော ပဋိသမ္ဘိဒါ သောတာပတ္တိမဂ္ဂါဒယော အဋ္ဌ ဝိမောက္ခာ ဣဒ္ဓိဝိဓာဒယော ဆ အဘိညာယော မေ မယာ သစ္ဆိကတာ ပစ္စက္ခံ ကတာ. ဗုဒ္ဓဿ ဘဂဝတော ဩဝါဒါနုသာသနီသင်္ခါတံ သာသနံ မယာ ကတံ သီလပဋိပတ္တိနိပ္ဖါဒနဝသေန ပရိယောသာပိတန္တိ အတ္ထော.

ဣတ္ထန္တိ ဣမိနာ ပကာရေန ဟေဋ္ဌာ ဝုတ္တက္ကမေန. ဧဝံ သော ဧကဿေဝ အနောမဒဿီဗုဒ္ဓဿ သန္တိကေ ဒွိက္ခတ္တုံ ဗျာကရဏံ လဘိ. ကထံ? ဟေဋ္ဌာ ဝုတ္တနယေန သေဋ္ဌိ ဟုတွာ တဿ ဘဂဝတော သန္တိကေ လဒ္ဓဗျာကရဏော တတော စုတော သာမုဒ္ဒိကေ နာဂဘဝနေ နိဗ္ဗတ္တော တဿေဝ ဘဂဝတော သန္တိကေ ဒီဃာယုကဘာဝေန ဥပဟာရံ ကတွာ နိမန္တေတွာ ဘောဇေတွာ မဟာပူဇံ အကာသိ. တဒါပိ ဘဂဝါ ဗျာကရဏံ ကထေသိ. သုဒန္တိ ပဒပူရဏေ နိပါတော. အာယသ္မာတိ ပိယဝစနံ ဂရုဂါရဝါဓိဝစနံ. မဟာမောဂ္ဂလ္လာနတ္ထေရော ဣမာ အပဒါနဂါထာယော အဘာသိတ္ထ ကထေသိ. ဣတီတိ ပရိသမာပနတ္ထေ နိပါတော.

မဟာမောဂ္ဂလ္လာနတ္ထေရအပဒါနဝဏ္ဏနာ သမတ္တာ.