ပဉှသမောဓာနဝဏ္ဏနာ

၃၄၉. ဣဓ ပန ဌတွာ ပဉှာ သမောဓာနေတဗ္ဗာ. ဣမသ္မိဉှိ သုတ္တေ ဧကကဝသေန ဒွေ ပဉှာ ကထိတာ. ဒုကဝသေန သတ္တတိ. တိကဝသေန အသီတိသတံ. စတုက္ကဝသေန ဒွေသတာနိ. ပဉ္စကဝသေန တိံသသတံ. ဆက္ကဝသေန ဗာတ္တိံသသတံ. သတ္တကဝသေန အဋ္ဌနဝုတိ. အဋ္ဌကဝသေန အဋ္ဌာသီတိ. နဝကဝသေန စတုပဏ္ဏာသ. ဒသကဝသေန သမသဋ္ဌီတိ ဧဝံ သဟဿံ စုဒ္ဒသ ပဉှာ ကထိတာ.

ဣမဉှိ သုတ္တန္တံ ဌပေတွာ တေပိဋကေ ဗုဒ္ဓဝစနေ အညော သုတ္တန္တော ဧဝံ ဗဟုပဉှပဋိမဏ္ဍိတော နတ္ထိ. ဘဂဝါ ဣမံ သုတ္တန္တံ အာဒိတော ပဋ္ဌာယ သကလံ သုတွာ စိန္တေသိ – ‘‘ဓမ္မသေနာပတိ သာရိပုတ္တော ဗုဒ္ဓဗလံ ဒီပေတွာ အပ္ပဋိဝတ္တိယံ သီဟနာဒံ နဒတိ. သာဝကဘာသိတောတိ ဝုတ္တေ ဩကပ္ပနာ န ဟောတိ၊ ဇိနဘာသိတောတိ ဝုတ္တေ ဟောတိ၊ တသ္မာ ဇိနဘာသိတံ ကတွာ ဒေဝမနုဿာနံ ဩကပ္ပနံ ဣမသ္မိံ သုတ္တန္တေ ဥပ္ပါဒေဿာမီ’’တိ. တတော ဝုဋ္ဌာယ သာဓုကာရံ အဒါသိ. တေန ဝုတ္တံ ‘‘အထ ခေါ ဘဂဝါ ဝုဋ္ဌဟိတွာ အာယသ္မန္တံ သာရိပုတ္တံ အာမန္တေသိ၊ သာဓု၊ သာဓု၊ သာရိပုတ္တ၊ သာဓု ခေါ တွံ သာရိပုတ္တ၊ ဘိက္ခူနံ သင်္ဂီတိပရိယာယံ အဘာသီ’’တိ.

တတ္ထ သင်္ဂီတိပရိယာယန္တိ သာမဂ္ဂိယာ ကာရဏံ. ဣဒံ ဝုတ္တံ ဟောတိ – ‘‘သာဓု၊ ခေါ တွံ၊ သာရိပုတ္တ၊ မမ သဗ္ဗညုတညာဏေန သံသန္ဒိတွာ ဘိက္ခူနံ သာမဂ္ဂိရသံ အဘာသီ’’တိ. သမနုညော သတ္ထာ အဟောသီတိ အနုမောဒနေန သမနုညော အဟောသိ. ဧတ္တကေန အယံ သုတ္တန္တော ဇိနဘာသိတော နာမ ဇာတော. ဒေသနာပရိယောသာနေ ဣမံ သုတ္တန္တံ မနသိကရောန္တာ တေ ဘိက္ခူ အရဟတ္တံ ပါပုဏိံသူတိ.

သုမင်္ဂလဝိလာသိနိယာ ဒီဃနိကာယဋ္ဌကထာယ

သင်္ဂီတိသုတ္တဝဏ္ဏနာ နိဋ္ဌိတာ.