သတ္တကဝဏ္ဏနာ

၃၃၀. ဣတိ ဆက္ကဝသေန သာမဂ္ဂိရသံ ဒဿေတွာ ဣဒါနိ သတ္တကဝသေန ဒဿေတုံ ပုန ဒေသနံ အာရဘိ.

တတ္ထ သမ္ပတ္တိပဋိလာဘဋ္ဌေန သဒ္ဓါဝ ဓနံ သဒ္ဓါဓနံ. ဧသ နယော သဗ္ဗတ္ထ. ပညာဓနံ ပနေတ္ထ သဗ္ဗသေဋ္ဌံ. ပညာယ ဟိ ဌတွာ တီဏိ သုစရိတာနိ ပဉ္စသီလာနိ ဒသသီလာနိ ပူရေတွာ သဂ္ဂူပဂါ ဟောန္တိ၊ သာဝကပါရမီဉာဏံ၊ ပစ္စေကဗောဓိဉာဏံ၊ သဗ္ဗညုတညာဏဉ္စ ပဋိဝိဇ္ဈန္တိ. ဣမာသံ သမ္ပတ္တီနံ ပဋိလာဘကာရဏတော ပညာ ‘‘ဓန’’န္တိ ဝုတ္တာ. သတ္တပိ စေတာနိ လောကိယလောကုတ္တရမိဿကာနေဝ ကထိတာနိ. ဗောဇ္ဈင်္ဂကထာ ကထိတာဝ.

သမာဓိပရိက္ခာရာတိ သမာဓိပရိဝါရာ. သမ္မာဒိဋ္ဌာဒီနိ ဝုတ္တတ္ထာနေဝ. ဣမေပိ သတ္တ ပရိက္ခာရာ လောကိယလောကုတ္တရာဝ ကထိတာ.

အသတံ ဓမ္မာ အသန္တာ ဝါ ဓမ္မာ လာမကာ ဓမ္မာတိ အသဒ္ဓမ္မာ. ဝိပရိယာယေန သဒ္ဓမ္မာ ဝေဒိတဗ္ဗာ. သေသမေတ္ထ ဥတ္တာနတ္ထမေဝ. သဒ္ဓမ္မေသု ပန သဒ္ဓါဒယော သဗ္ဗေပိ ဝိပဿကဿေဝ ကထိတာ. တေသုပိ ပညာ လောကိယလောကုတ္တရာ. အယံ ဝိသေသော.

သပ္ပုရိသာနံ ဓမ္မာတိ သပ္ပုရိသဓမ္မာ. တတ္ထ သုတ္တဂေယျာဒိကံ ဓမ္မံ ဇာနာတီတိ ဓမ္မညူ. တဿ တဿေဝ ဘာသိတဿ အတ္ထံ ဇာနာတီတိ အတ္ထညူ. ‘‘ဧတ္တကောမှိ သီလေန သမာဓိနာ ပညာယာ’’တိ ဧဝံ အတ္တာနံ ဇာနာတီတိ အတ္တညူ. ပဋိဂ္ဂဟဏပရိဘောဂေသု မတ္တံ ဇာနာတီတိ မတ္တညူ. အယံ ကာလော ဥဒ္ဒေသဿ၊ အယံ ကာလော ပရိပုစ္ဆာယ၊ အယံ ကာလော ယောဂဿ အဓိဂမာယာတိ ဧဝံ ကာလံ ဇာနာတီတိ ကာလညူ. ဧတ္ထ စ ပဉ္စ ဝဿာနိ ဥဒ္ဒေသဿ ကာလော. ဒသ ပရိပုစ္ဆာယ. ဣဒံ အတိသမ္ဗာဓံ. ဒသ ဝဿာနိ ပန ဥဒ္ဒေသဿ ကာလော. ဝီသတိ ပရိပုစ္ဆာယ. တတော ပရံ ယောဂေ ကမ္မံ ကာတဗ္ဗံ. အဋ္ဌဝိဓံ ပရိသံ ဇာနာတီတိ ပရိသညူ. သေဝိတဗ္ဗာသေဝိတဗ္ဗံ ပုဂ္ဂလံ ဇာနာတီတိ ပုဂ္ဂလညူ.

၃၃၁. နိဒ္ဒသဝတ္ထူနီတိ နိဒ္ဒသာဒိဝတ္ထူနိ. နိဒ္ဒသော ဘိက္ခု၊ နိဗ္ဗီသော၊ နိတ္တိံသော၊ နိစ္စတ္တာလီသော၊ နိပ္ပညာသော ဘိက္ခူတိ ဧဝံ ဝစနကာရဏာနိ. အယံ ကိရ ပဉှော တိတ္ထိယသမယေ ဥပ္ပန္နော. တိတ္ထိယာ ဟိ ဒသဝဿကာလေ မတံ နိဂဏ္ဌံ နိဒ္ဒသောတိ ဝဒန္တိ. သော ကိရ ပုန ဒသဝဿော န ဟောတိ. န ကေဝလဉ္စ ဒသဝဿောဝ. နဝဝဿောပိ။ပေ။ ဧကဝဿောပိ န ဟောတိ. ဧတေနေဝ နယေန ဝီသတိဝဿာဒိကာလေပိ မတံ နိဗ္ဗီသော၊ နိတ္တိံသော၊ နိစ္စတ္တာလီသော၊ နိပ္ပညာသောတိ ဝဒန္တိ. အာယသ္မာ အာနန္ဒော ဂါမေ ဝိစရန္တော တံ ကထံ သုတွာ ဝိဟာရံ ဂန္တွာ ဘဂဝတော အာရောစေသိ. ဘဂဝါ အာဟ –

‘‘န ဣဒံ၊ အာနန္ဒ၊ တိတ္ထိယာနံ အဓိဝစနံ မမ သာသနေ ခီဏာသဝဿေတံ အဓိဝစနံ. ခီဏာသဝေါ ဟိ ဒသဝဿကာလေ ပရိနိဗ္ဗုတော ပုန ဒသဝဿော န ဟောတိ. န ကေဝလဉ္စ ဒသဝဿောဝ၊ နဝဝဿောပိ။ပေ။ ဧကဝဿောပိ. န ကေဝလဉ္စ ဧကဝဿောဝ၊ ဒသမာသိကောပိ။ပေ။ ဧကမာသိကောပိ. ဧကဒိဝသိကောပိ. ဧကမုဟုတ္တောပိ န ဟောတိ ဧဝ. ကသ္မာ? ပုန ပဋိသန္ဓိယာ အဘာဝါ. နိဗ္ဗီသာဒီသုပိ ဧသေဝ နယော. ဣတိ ဘဂဝါ မမ သာသနေ ခီဏာသဝဿေတံ အဓိဝစန’’န္တိ –

ဝတွာ ယေဟိ ကာရဏေဟိ သော နိဒ္ဒသော ဟောတိ၊ တာနိ ဒဿေတုံ သတ္တ နိဒ္ဒသဝတ္ထူနိ ဒေသေတိ. ထေရောပိ တမေဝ ဒေသနံ ဥဒ္ဓရိတွာ သတ္တ နိဒ္ဒသဝတ္ထူနိ ဣဓာဝုသော၊ ဘိက္ခု၊ သိက္ခာသမာဒါနေတိအာဒိမာဟ. တတ္ထ ဣဓာတိ ဣမသ္မိံ သာသနေ. သိက္ခာသမာဒါနေ တိဗ္ဗစ္ဆန္ဒော ဟောတီတိ သိက္ခတ္တယပူရဏေ ဗဟလစ္ဆန္ဒော ဟောတိ. အာယတိဉ္စ သိက္ခာသမာဒါနေ အဝိဂတပေမောတိ အနာဂတေ ပုနဒိဝသာဒီသုပိ သိက္ခာပူရဏေ အဝိဂတပေမေန သမန္နာဂတော ဟောတိ. ဓမ္မနိသန္တိယာတိ ဓမ္မနိသာမနာယ. ဝိပဿနာယေတံ အဓိဝစနံ. ဣစ္ဆာဝိနယေတိ တဏှာဝိနယနေ. ပဋိသလ္လာနေတိ ဧကီဘာဝေ. ဝီရိယာရမ္ဘေတိ ကာယိကစေတသိကဿ ဝီရိယဿ ပူရဏေ. သတိနေပက္ကေတိ သတိယဉ္စေဝ နေပက္ကဘာဝေ စ. ဒိဋ္ဌိပဋိဝေဓေတိ မဂ္ဂဒဿနေ. သေသံ သဗ္ဗတ္ထ ဝုတ္တနယေနေဝ ဝေဒိတဗ္ဗံ.

သညာသု အသုဘာနုပဿနာဉာဏေ သညာ အသုဘသညာ. အာဒီနဝါနုပဿနာဉာဏေ သညာ အာဒီနဝသညာ နာမ. သေသာ ဟေဋ္ဌာ ဝုတ္တာ ဧဝ. ဗလသတ္တကဝိညာဏဋ္ဌိတိသတ္တကပုဂ္ဂလသတ္တကာနိ ဝုတ္တနယာနေဝ. အပ္ပဟီနဋ္ဌေန အနုသယန္တီတိ အနုသယာ. ထာမဂတော ကာမရာဂေါ ကာမရာဂါနုသယော. ဧသ နယော သဗ္ဗတ္ထ. သံယောဇနသတ္တကံ ဥတ္တာနတ္ထမေဝ.