ဗုဒ္ဓသရီရပူဇာဝဏ္ဏနာ

၂၂၇. သဗ္ဗဉ္စ တာဠာဝစရန္တိ သဗ္ဗံ တူရိယဘဏ္ဍံ. သန္နိပါတေထာတိ ဘေရိံ စရာပေတွာ သမာဟရထ. တေ တထေဝ အကံသု. မဏ္ဍလမာဠေတိ ဒုဿမဏ္ဍလမာဠေ. ပဋိယာဒေန္တာတိ သဇ္ဇေန္တာ.

ဒက္ခိဏေန ဒက္ခိဏန္တိ နဂရဿ ဒက္ခိဏဒိသာဘာဂေနေဝ ဒက္ခိဏဒိသာဘာဂံ. ဗာဟိရေန ဗာဟိရန္တိ အန္တောနဂရံ အပ္ပဝေသေတွာ ဗာဟိရေနေဝ နဂရဿ ဗာဟိရပဿံ ဟရိတွာ. ဒက္ခိဏတော နဂရဿာတိ အနုရာဓပုရဿ ဒက္ခိဏဒွါရသဒိသေ ဌာနေ ဌပေတွာ သက္ကာရသမ္မာနံ ကတွာ ဇေတဝနသဒိသေ ဌာနေ ဈာပေဿာမာတိ အတ္ထော.

၂၂၈. အဋ္ဌ မလ္လပါမောက္ခာတိ မဇ္ဈိမဝယာ ထာမသမ္ပန္နာ အဋ္ဌမလ္လရာဇာနော. သီသံ နှာတာတိ သီသံ ဓောဝိတွာ နဟာတာ. အာယသ္မန္တံ အနုရုဒ္ဓန္တိ ထေရောဝ ဒိဗ္ဗစက္ခုကောတိ ပါကဋော၊ တသ္မာ တေ သန္တေသုပိ အညေသု မဟာထေရေသု – ‘‘အယံ နော ပါကဋံ ကတွာ ကထေဿတီ’’တိ ထေရံ ပုစ္ဆိံသု. ကထံ ပန၊ ဘန္တေ၊ ဒေဝတာနံ အဓိပ္ပါယောတိ ဘန္တေ၊ အမှာကံ တာဝ အဓိပ္ပါယံ ဇာနာမ. ဒေဝတာနံ ကထံ အဓိပ္ပါယောတိ ပုစ္ဆန္တိ. ထေရော ပဌမံ တေသံ အဓိပ္ပါယံ ဒဿေန္တော တုမှာကံ ခေါတိအာဒိမာဟ. မကုဋဗန္ဓနံ နာမ မလ္လာနံ စေတိယန္တိ မလ္လရာဇူနံ ပသာဓနမင်္ဂလသာလာယ ဧတံ နာမံ. စိတ္တီကတဋ္ဌေန ပနေသာ ‘‘စေတိယ’’န္တိ ဝုစ္စတိ.

၂၂၉. ယာဝ သန္ဓိသမလသင်္ကဋီရာတိ ဧတ္ထ သန္ဓိ နာမ ဃရသန္ဓိ. သမလံ နာမ ဂူထရာသိနိဒ္ဓမနပနာဠိ. သင်္ကဋီရံ နာမ သင်္ကာရဋ္ဌာနံ. ဒိဗ္ဗေဟိ စ မာနုသကေဟိ စ နစ္စေဟီတိ ဥပရိ ဒေဝတာနံ နစ္စာနိ ဟောန္တိ၊ ဟေဋ္ဌာ မနုဿာနံ. ဧသ နယော ဂီတာဒီသု. အပိစ ဒေဝတာနံ အန္တရေ မနုဿာ၊ မနုဿာနံ အန္တရေ ဒေဝတာတိ ဧဝမ္ပိ သက္ကရောန္တာ ပူဇေန္တာ အဂမံသု. မဇ္ဈေန မဇ္ဈံ နဂရဿ ဟရိတွာတိ ဧဝံ ဟရိယမာနေ ဘဂဝတော သရီရေ ဗန္ဓုလမလ္လသေနာပတိဘရိယာ မလ္လိကာ နာမ – ‘‘ဘဂဝတော သရီရံ အာဟရန္တီ’’တိ သုတွာ အတ္တနော သာမိကဿ ကာလံ ကိရိယတော ပဋ္ဌာယ အပရိဘုဉ္ဇိတွာ ဌပိတံ ဝိသာခါယ ပသာဓနသဒိသံ မဟာလတာပသာဓနံ နီဟရာပေတွာ – ‘‘ဣမိနာ သတ္ထာရံ ပူဇေဿာမီ’’တိ တံ မဇ္ဇာပေတွာ ဂန္ဓောဒကေန ဓောဝိတွာ ဒွါရေ ဌိတာ.

တံ ကိရ ပသာဓနံ တာသဉ္စ ဒွိန္နံ ဣတ္ထီနံ၊ ဒေဝဒါနိယစောရဿ ဂေဟေတိ တီသုယေဝ ဌာနေသု အဟောသိ. သာ စ သတ္ထု သရီရေ ဒွါရံ သမ္ပတ္တေ – ‘‘ဩတာရေထ၊ တာတာ၊ သတ္ထုသရီရ’’န္တိ ဝတွာ တံ ပသာဓနံ သတ္ထုသရီရေ ပဋိမုဉ္စိ. တံ သီသတော ပဋ္ဌာယ ပဋိမုက္ကံ ယာဝပါဒတလာဂတံ. သုဝဏ္ဏဝဏ္ဏံ ဘဂဝတော သရီရံ သတ္တရတနမယေန မဟာပသာဓနေန ပသာဓိတံ အတိဝိယ ဝိရောစိတ္ထ. တံ သာ ဒိသွာ ပသန္နစိတ္တာ ပတ္ထနံ အကာသိ – ‘‘ဘဂဝါ ယာဝ ဝဋ္ဋေ သံသရိဿာမိ၊ တာဝ မေ ပါဋိယေက္ကံ ပသာဓနကိစ္စံ မာ ဟောတု၊ နိစ္စံ ပဋိမုက္ကပသာဓနသဒိသမေဝ သရီရံ ဟောတူ’’တိ.

အထ ဘဂဝန္တံ သတ္တရတနမယေန မဟာပသာဓနေန ဥက္ခိပိတွာ ပုရတ္ထိမေန ဒွါရေန နီဟရိတွာ ပုရတ္ထိမေန နဂရဿ မကုဋဗန္ဓနံ မလ္လာနံ စေတိယံ၊ ဧတ္ထ ဘဂဝတော သရီရံ နိက္ခိပိံသု.