ပရိနိဗ္ဗုတကထာဝဏ္ဏနာ

၂၁၉. ဣတော ပရံ ယံ ပရိနိဗ္ဗာနပရိကမ္မံ ကတွာ ဘဂဝါ ပရိနိဗ္ဗုတော၊ တံ ဒဿေတုံ အထ ခေါ ဘဂဝါ ပဌမံ ဈာနန္တိအာဒိ ဝုတ္တံ. တတ္ထ ပရိနိဗ္ဗုတော ဘန္တေတိ နိရောဓံ သမာပန္နဿ ဘဂဝတော အဿာသပဿာသာနံ အဘာဝံ ဒိသွာ ပုစ္ဆတိ. န အာဝုသောတိ ထေရော ကထံ ဇာနာတိ? ထေရော ကိရ သတ္ထာရာ သဒ္ဓိံယေဝ တံ တံ သမာပတ္တိံ သမာပဇ္ဇန္တော ယာဝ နေဝသညာနာသညာယတနာ ဝုဋ္ဌာနံ၊ တာဝ ဂန္တွာ ဣဒါနိ ဘဂဝါ နိရောဓံ သမာပန္နော၊ အန္တောနိရောဓေ စ ကာလင်္ကိရိယာ နာမ နတ္ထီတိ ဇာနာတိ.

အထ ခေါ ဘဂဝါ သညာဝေဒယိတနိရောဓသမာပတ္တိယာ ဝုဋ္ဌဟိတွာ နေဝသညာနာသညာယတနံ သမာပဇ္ဇိ။ပေ။ တတိယဇ္ဈာနာ ဝုဋ္ဌဟိတွာ စတုတ္ထဇ္ဈာနံ သမာပဇ္ဇီတိ ဧတ္ထ ဘဂဝါ စတုဝီသတိယာ ဌာနေသု ပဌမဇ္ဈာနံ သမာပဇ္ဇိ၊ တေရသသု ဌာနေသု ဒုတိယဇ္ဈာနံ၊ တထာ တတိယဇ္ဈာနံ၊ ပန္နရသသု ဌာနေသု စတုတ္ထဇ္ဈာနံ သမာပဇ္ဇိ. ကထံ? ဒသသု အသုဘေသု၊ ဒွတ္တိံသာကာရေ အဋ္ဌသု ကသိဏေသု၊ မေတ္တာကရုဏာမုဒိတာသု၊ အာနာပါနေ၊ ပရိစ္ဆေဒါကာသေတိ ဣမေသု တာဝ စတုဝီသတိယာ ဌာနေသု ပဌမဇ္ဈာနံ သမာပဇ္ဇိ. ဌပေတွာ ပန ဒွတ္တိံသာကာရဉ္စ ဒသ အသုဘာနိ စ သေသေသု တေရသသု ဒုတိယဇ္ဈာနံ၊ တေသုယေဝ စ တတိယဇ္ဈာနံ သမာပဇ္ဇိ. အဋ္ဌသု ပန ကသိဏေသု၊ ဥပေက္ခာဗြဟ္မဝိဟာရေ၊ အာနာပါနေ၊ ပရိစ္ဆေဒါကာသေ၊ စတူသု အရူပေသူတိ ဣမေသု ပန္နရသသု ဌာနေသု စတုတ္ထဇ္ဈာနံ သမာပဇ္ဇိ. အယမ္ပိ စ သင်္ခေပကထာဝ. နိဗ္ဗာနပုရံ ပဝိသန္တော ပန ဘဂဝါ ဓမ္မဿာမီ သဗ္ဗာပိ စတုဝီသတိကောဋိသတသဟဿသင်္ချာ သမာပတ္တိယော ပဝိသိတွာ ဝိဒေသံ ဂစ္ဆန္တော ဉာတိဇနံ အာလိင်္ဂေတွာ ဝိယ သဗ္ဗသမာပတ္တိသုခံ အနုဘဝိတွာ ပဝိဋ္ဌော.

စတုတ္ထဇ္ဈာနာ ဝုဋ္ဌဟိတွာ သမနန္တရာ ဘဂဝါ ပရိနိဗ္ဗာယီတိ ဧတ္ထ ဈာနသမနန္တရံ၊ ပစ္စဝေက္ခဏာသမနန္တရန္တိ ဒွေ သမနန္တရာနိ. တတ္ထ ဈာနာ ဝုဋ္ဌာယ ဘဝင်္ဂံ ဩတိဏ္ဏဿ တတ္ထေဝ ပရိနိဗ္ဗာနံ ဈာနသမနန္တရံ နာမ. ဈာနာ ဝုဋ္ဌဟိတွာ ပုန ဈာနင်္ဂါနိ ပစ္စဝေက္ခိတွာ ဘဝင်္ဂံ ဩတိဏ္ဏဿ တတ္ထေဝ ပရိနိဗ္ဗာနံ ပစ္စဝေက္ခဏာသမနန္တရံ နာမ. ဣမာနိပိ ဒွေ သမနန္တရာနေဝ. ဘဂဝါ ပန ဈာနံ သမာပဇ္ဇိတွာ ဈာနာ ဝုဋ္ဌာယ ဈာနင်္ဂါနိ ပစ္စဝေက္ခိတွာ ဘဝင်္ဂစိတ္တေန အဗျာကတေန ဒုက္ခသစ္စေန ပရိနိဗ္ဗာယိ. ယေ ဟိ ကေစိ ဗုဒ္ဓါ ဝါ ပစ္စေကဗုဒ္ဓါ ဝါ အရိယသာဝကာ ဝါ အန္တမသော ကုန္ထကိပိလ္လိကံ ဥပါဒါယ သဗ္ဗေ ဘဝင်္ဂစိတ္တေနေဝ အဗျာကတေန ဒုက္ခသစ္စေန ကာလင်္ကရောန္တီတိ. မဟာဘူမိစာလာဒီနိ ဝုတ္တနယာနေဝါတိ.

၂၂၀. ဘူတာတိ သတ္တာ. အပ္ပဋိပုဂ္ဂလောတိ ပဋိဘာဂပုဂ္ဂလဝိရဟိတော. ဗလပ္ပတ္တောတိ ဒသဝိဓဉာဏဗလံ ပတ္တော.

၂၂၁. ဥပ္ပါဒဝယဓမ္မိနောတိ ဥပ္ပါဒဝယသဘာဝါ. တေသံ ဝူပသမောတိ တေသံ သင်္ခါရာနံ ဝူပသမော၊ အသင်္ခတံ နိဗ္ဗာနမေဝ သုခန္တိ အတ္ထော.

၂၂၂. နာဟု အဿာသပဿာသောတိ န ဇာတော အဿာသပဿာသော. အနေဇောတိ တဏှာသင်္ခါတာယ ဧဇာယ အဘာဝေန အနေဇော. သန္တိမာရဗ္ဘာတိ အနုပါဒိသေသံ နိဗ္ဗာနံ အာရဗ္ဘ ပဋိစ္စ သန္ဓာယ. ယံ ကာလမကရီတိ ယော ကာလံ အကရိ. ဣဒံ ဝုတ္တံ ဟောတိ – ‘‘အာဝုသော၊ ယော မမ သတ္ထာ ဗုဒ္ဓမုနိ သန္တိံ ဂမိဿာမီတိ၊ သန္တိံ အာရဗ္ဘ ကာလမကရိ၊ တဿ ဌိတစိတ္တဿ တာဒိနော ဣဒါနိ အဿာသပဿာသော န ဇာတော၊ နတ္ထိ၊ နပ္ပဝတ္တတီ’’တိ.

အသလ္လီနေနာတိ အလီနေန အသင်္ကုဋိတေန သုဝိကသိတေနေဝ စိတ္တေန. ဝေဒနံ အဇ္ဈဝါသယီတိ ဝေဒနံ အဓိဝါသေသိ၊ န ဝေဒနာနုဝတ္တီ ဟုတွာ ဣတော စိတော စ သမ္ပရိဝတ္တိ. ဝိမောက္ခောတိ ကေနစိ ဓမ္မေန အနာဝရဏဝိမောက္ခော သဗ္ဗသော အပညတ္တိဘာဝူပဂမော ပဇ္ဇောတနိဗ္ဗာနသဒိသော ဇာတော.

၂၂၃. တဒါသီတိ ‘‘သဟ ပရိနိဗ္ဗာနာ မဟာဘူမိစာလော’’တိ ဧဝံ ဟေဋ္ဌာ ဝုတ္တံ ဘူမိစာလမေဝ သန္ဓာယာဟ. တဉှိ လောမဟံသနဉ္စ ဘိံသနကဉ္စ အာသိ. သဗ္ဗာကာရဝရူပေတေတိ သဗ္ဗဝရကာရဏူပေတေ.

၂၂၄. အဝီတရာဂါတိ ပုထုဇ္ဇနာ စေဝ သောတာပန္နသကဒါဂါမိနော စ. တေသဉှိ ဒေါမနဿံ အပ္ပဟီနံ. တသ္မာ တေပိ ဗာဟာ ပဂ္ဂယှ ကန္ဒန္တိ. ဥဘောပိ ဟတ္ထေ သီသေ ဌပေတွာ ရောဒန္တီတိ သဗ္ဗံ ပုရိမနယေနေဝ ဝေဒိတဗ္ဗံ.

၂၂၅. ဥဇ္ဈာယန္တီတိ ‘‘အယျာ အတ္တနာပိ အဓိဝါသေတုံ န သက္ကောန္တိ၊ သေသဇနံ ကထံ သမဿာသေဿန္တီ’’တိ ဝဒန္တိယော ဥဇ္ဈာယန္တိ. ကထံဘူတာ ပန ဘန္တေ အာယသ္မာ အနုရုဒ္ဓေါ ဒေဝတာ မနသိကရောတီတိ ဒေဝတာ၊ ဘန္တေ၊ ကထံဘူတာ အာယသ္မာ အနုရုဒ္ဓေါ သလ္လက္ခေတိ၊ ကိံ တာ သတ္ထု ပရိနိဗ္ဗာနံ အဓိဝါသေန္တီတိ?

အထ တာသံ ပဝတ္တိဒဿနတ္ထံ ထေရော သန္တာဝုသောတိအာဒိမာဟ. တံ ဝုတ္တတ္ထမေဝ. ရတ္တာဝသေသန္တိ ဗလဝပစ္စူသေ ပရိနိဗ္ဗုတတ္တာ ရတ္တိယာ အဝသေသံ စုလ္လကဒ္ဓါနံ. ဓမ္မိယာ ကထာယာတိ အညာ ပါဋိယေက္ကာ ဓမ္မကထာ နာမ နတ္ထိ၊ ‘‘အာဝုသော သဒေဝကေ နာမ လောကေ အပ္ပဋိပုဂ္ဂလဿ သတ္ထုနော အယံ မစ္စုရာဇာ န လဇ္ဇတိ၊ ကိမင်္ဂံ ပန လောကိယမဟာဇနဿ လဇ္ဇိဿတီ’’တိ ဧဝရူပါယ ပန မရဏပဋိသံယုတ္တာယ ကထာယ ဝီတိနာမေသုံ. တေသဉှိ တံ ကထံ ကထေန္တာနံ မုဟုတ္တေနေဝ အရုဏံ ဥဂ္ဂစ္ဆိ.

၂၂၆. အထ ခေါတိ အရုဏုဂ္ဂံ ဒိသွာဝ ထေရော ထေရံ ဧတဒဝေါစ. တေနေဝ ကရဏီယေနာတိ ကီဒိသေန နု ခေါ ပရိနိဗ္ဗာနဋ္ဌာနေ မာလာဂန္ဓာဒိသက္ကာရေန ဘဝိတဗ္ဗံ၊ ကီဒိသေန ဘိက္ခုသံဃဿ နိသဇ္ဇဋ္ဌာနေန ဘဝိတဗ္ဗံ၊ ကီဒိသေန ခါဒနီယဘောဇနီယေန ဘဝိတဗ္ဗန္တိ၊ ဧဝံ ယံ ဘဂဝတော ပရိနိဗ္ဗုတဘာဝံ သုတွာ ကတ္တဗ္ဗံ တေနေဝ ကရဏီယေန.