တထာဂတပစ္ဆိမဝါစာဝဏ္ဏနာ

၂၁၆. ဣဒါနိ ဘိက္ခုသံဃဿ ဩဝါဒံ အာရဘိ၊ တံ ဒဿေတုံ အထ ခေါ ဘဂဝါတိအာဒိ ဝုတ္တံ. တတ္ထ ဒေသိတော ပညတ္တောတိ ဓမ္မောပိ ဒေသိတော စေဝ ပညတ္တော စ၊ ဝိနယောပိ ဒေသိတော စေဝ ပညတ္တော စ. ပညတ္တော စ နာမ ဌပိတော ပဋ္ဌပိတောတိ အတ္ထော. သော ဝေါ မမစ္စယေနာတိ သော ဓမ္မဝိနယော တုမှာကံ မမစ္စယေန သတ္ထာ. မယာ ဟိ ဝေါ ဌိတေနေဝ – ‘‘ဣဒံ လဟုကံ၊ ဣဒံ ဂရုကံ၊ ဣဒံ သတေကိစ္ဆံ၊ ဣဒံ အတေကိစ္ဆံ၊ ဣဒံ လောကဝဇ္ဇံ၊ ဣဒံ ပဏ္ဏတ္တိဝဇ္ဇံ၊ အယံ အာပတ္တိ ပုဂ္ဂလဿ သန္တိကေ ဝုဋ္ဌာတိ၊ အယံ အာပတ္တိ ဂဏဿ သန္တိကေ ဝုဋ္ဌာတိ၊ အယံ သံဃဿ သန္တိကေ ဝုဋ္ဌာတီ’’တိ သတ္တာပတ္တိက္ခန္ဓဝသေန ဩတိဏ္ဏေ ဝတ္ထုသ္မိံ သခန္ဓကပရိဝါရော ဥဘတောဝိဘင်္ဂေါ ဝိနယော နာမ ဒေသိတော၊ တံ သကလမ္ပိ ဝိနယပိဋကံ မယိ ပရိနိဗ္ဗုတေ တုမှာကံ သတ္ထုကိစ္စံ သာဓေဿတိ.

ဌိတေနေဝ စ မယာ – ‘‘ဣမေ စတ္တာရော သတိပဋ္ဌာနာ၊ စတ္တာရော သမ္မပ္ပဓာနာ၊ စတ္တာရော ဣဒ္ဓိပါဒါ၊ ပဉ္စ ဣန္ဒြိယာနိ၊ ပဉ္စ ဗလာနိ၊ သတ္တ ဗောဇ္ဈင်္ဂါ၊ အရိယော အဋ္ဌင်္ဂိကော မဂ္ဂေါ’’တိ တေန တေနာကာရေန ဣမေ ဓမ္မေ ဝိဘဇိတွာ ဝိဘဇိတွာ သုတ္တန္တပိဋကံ ဒေသိတံ၊ တံ သကလမ္ပိ သုတ္တန္တပိဋကံ မယိ ပရိနိဗ္ဗုတေ တုမှာကံ သတ္ထုကိစ္စံ သာဓေဿတိ. ဌိတေနေဝ စ မယာ – ‘‘ဣမေ ပဉ္စက္ခန္ဓာ၊ ဒွါဒသာယတနာနိ၊ အဋ္ဌာရသ ဓာတုယော၊ စတ္တာရိ သစ္စာနိ၊ ဗာဝီသတိန္ဒြိယာနိ၊ နဝ ဟေတူ၊ စတ္တာရော အာဟာရာ၊ သတ္တ ဖဿာ၊ သတ္တ ဝေဒနာ၊ သတ္တ သညာ၊ သတ္တ သဉ္စေတနာ၊ သတ္တ စိတ္တာနိ. တတြာပိ ‘ဧတ္တကာ ဓမ္မာ ကာမာဝစရာ၊ ဧတ္တကာ ရူပါဝစရာ၊ ဧတ္တကာ အရူပါဝစရာ၊ ဧတ္တကာ ပရိယာပန္နာ၊ ဧတ္တကာ အပရိယာပန္နာ၊ ဧတ္တကာ လောကိယာ၊ ဧတ္တကာ လောကုတ္တရာ’တိ’’ ဣမေ ဓမ္မေ ဝိဘဇိတွာ ဝိဘဇိတွာ စတုဝီသတိသမန္တပဋ္ဌာနအနန္တနယမဟာပဋ္ဌာနပဋိမဏ္ဍိတံ အဘိဓမ္မပိဋကံ ဒေသိတံ၊ တံ သကလမ္ပိ အဘိဓမ္မပိဋကံ မယိ ပရိနိဗ္ဗုတေ တုမှာကံ သတ္ထုကိစ္စံ သာဓေဿတိ.

ဣတိ သဗ္ဗမ္ပေတံ အဘိသမ္ဗောဓိတော ယာဝ ပရိနိဗ္ဗာနာ ပဉ္စစတ္တာလီသဝဿာနိ ဘာသိတံ လပိတံ – ‘‘တီဏိ ပိဋကာနိ၊ ပဉ္စ နိကာယာ၊ နဝင်္ဂါနိ၊ စတုရာသီတိ ဓမ္မက္ခန္ဓသဟဿာနီ’’တိ ဧဝံ မဟာပဘေဒံ ဟောတိ. ဣတိ ဣမာနိ စတုရာသီတိ ဓမ္မက္ခန္ဓသဟဿာနိ တိဋ္ဌန္တိ၊ အဟံ ဧကောဝ ပရိနိဗ္ဗာယာမိ. အဟဉ္စ ခေါ ပန ဒါနိ ဧကကောဝ ဩဝဒါမိ အနုသာသာမိ၊ မယိ ပရိနိဗ္ဗုတေ ဣမာနိ စတုရာသီတိ ဓမ္မက္ခန္ဓသဟဿာနိ တုမှေ ဩဝဒိဿန္တိ အနုသာသိဿန္တီတိ ဧဝံ ဘဂဝါ ဗဟူနိ ကာရဏာနိ ဒဿေန္တော – ‘‘သော ဝေါ မမစ္စယေန သတ္ထာ’’တိ ဩဝဒိတွာ ပုန အနာဂတေ စာရိတ္တံ ဒဿေန္တော ယထာ ခေါ ပနာတိအာဒိမာဟ.

တတ္ထ သမုဒါစရန္တီတိ ကထေန္တိ ဝေါဟရန္တိ. နာမေန ဝါ ဂေါတ္တေန ဝါတိ နဝကာတိ အဝတွာ ‘‘တိဿ၊ နာဂါ’’တိ ဧဝံ နာမေန ဝါ၊ ‘‘ကဿပ၊ ဂေါတမာ’’တိ ဧဝံ ဂေါတ္တေန ဝါ၊ ‘‘အာဝုသော တိဿ၊ အာဝုသော ကဿပါ’’တိ ဧဝံ အာဝုသောဝါဒေန ဝါ သမုဒါစရိတဗ္ဗော. ဘန္တေတိ ဝါ အာယသ္မာတိ ဝါတိ ဘန္တေ တိဿ၊ အာယသ္မာ တိဿာတိ ဧဝံ သမုဒါစရိတဗ္ဗော. သမူဟနတူတိ အာကင်္ခမာနော သမူဟနတု၊ ယဒိ ဣစ္ဆတိ သမူဟနေယျာတိ အတ္ထော. ကသ္မာ ပန သမူဟနထာတိ ဧကံသေနေဝ အဝတွာ ဝိကပ္ပဝစနေနေဝ ဌပေသီတိ? မဟာကဿပဿ ဗလံ ဒိဋ္ဌတ္တာ. ပဿတိ ဟိ ဘဂဝါ – ‘‘သမူဟနထာတိ ဝုတ္တေပိ သင်္ဂီတိကာလေ ကဿပေါ န သမူဟနိဿတီ’’တိ. တသ္မာ ဝိကပ္ပေနေဝ ဌပေသိ.

တတ္ထ – ‘‘ဧကစ္စေ ထေရာ ဧဝမာဟံသု – စတ္တာရိ ပါရာဇိကာနိ ဌပေတွာ အဝသေသာနိ ခုဒ္ဒါနုခုဒ္ဒကာနီ’’တိအာဒိနာ နယေန ပဉ္စသတိကသင်္ဂီတိယံ ခုဒ္ဒါနုခုဒ္ဒကကထာ အာဂတာဝ ဝိနိစ္ဆယော ပေတ္ထ သမန္တပါသာဒိကာယံ ဝုတ္တော. ကေစိ ပနာဟု – ‘‘ဘန္တေ၊ နာဂသေန၊ ကတမံ ခုဒ္ဒကံ၊ ကတမံ အနုခုဒ္ဒက’’န္တိ မိလိန္ဒေန ရညာ ပုစ္ဆိတော. ‘‘ဒုက္ကဋံ၊ မဟာရာဇ၊ ခုဒ္ဒကံ၊ ဒုဗ္ဘာသိတံ အနုခုဒ္ဒက’’န္တိ ဝုတ္တတ္တာ နာဂသေနတ္ထေရော ခုဒ္ဒါနုခုဒ္ဒကံ ဇာနာတိ. မဟာကဿပေါ ပန တံ အဇာနန္တော –

‘‘သုဏာတု မေ၊ အာဝုသော၊ သံဃော သန္တမှာကံ သိက္ခာပဒါနိ ဂိဟိဂတာနိ၊ ဂိဟိနောပိ ဇာနန္တိ – ‘‘ဣဒံ ဝေါ သမဏာနံ သကျပုတ္တိယာနံ ကပ္ပတိ၊ ဣဒံ ဝေါ န ကပ္ပတီ’’တိ. သစေ မယံ ခုဒ္ဒါနုခုဒ္ဒကာနိ သိက္ခာပဒါနိ သမူဟနိဿာမ၊ ဘဝိဿန္တိ ဝတ္တာရော – ‘‘ဓူမကာလိကံ သမဏေန ဂေါတမေန သာဝကာနံ သိက္ခာပဒံ ပညတ္တံ၊ ယာဝ နေသံ သတ္ထာ အဋ္ဌာသိ၊ တာဝိမေ သိက္ခာပဒေသု သိက္ခိံသု၊ ယတော ဣမေသံ သတ္ထာ ပရိနိဗ္ဗုတော၊ န ဒါနိမေ သိက္ခာပဒေသု သိက္ခန္တီ’’တိ. ယဒိ သံဃဿ ပတ္တကလ္လံ၊ သံဃော အပညတ္တံ န ပညပေယျ၊ ပညတ္တံ န သမုစ္ဆိန္ဒေယျ၊ ယထာပညတ္တေသု သိက္ခာပဒေသု သမာဒါယ ဝတ္တေယျ. ဧသာ ဉတ္တီတိ –

ကမ္မဝါစံ သာဝေသီတိ. န တံ ဧဝံ ဂဟေတဗ္ဗံ. နာဂသေနတ္ထေရော ဟိ – ‘‘ပရဝါဒိနော ဩကာသော မာ အဟောသီ’’တိ ဧဝမာဟ. မဟာကဿပတ္ထေရော ‘‘ခုဒ္ဒါနုခုဒ္ဒကာပတ္တိံ န သမူဟနိဿာမီ’’တိ ကမ္မဝါစံ သာဝေသိ.

ဗြဟ္မဒဏ္ဍကထာပိ သင်္ဂီတိယံ အာဂတတ္တာသမန္တပါသာဒိကာယံ ဝိနိစ္ဆိတာ.

ကင်္ခါတိ ဒွေဠှကံ. ဝိမတီတိ ဝိနိစ္ဆိတုံ အသမတ္ထတာ၊ ဗုဒ္ဓေါ နု ခေါ၊ န ဗုဒ္ဓေါ နု ခေါ၊ ဓမ္မော နု ခေါ၊ န ဓမ္မော နု ခေါ၊ သံဃော နု ခေါ၊ န သံဃော နု ခေါ၊ မဂ္ဂေါ နု ခေါ၊ န မဂ္ဂေါ နု ခေါ၊ ပဋိပဒါ နု ခေါ၊ န ပဋိပဒါ နု ခေါတိ ယဿ သံသယော ဥပ္ပဇ္ဇေယျ၊ တံ ဝေါ ဝဒါမိ ‘‘ပုစ္ဆထ ဘိက္ခဝေ’’တိ အယမေတ္ထ သင်္ခေပတ္ထော. သတ္ထုဂါရဝေနာပိ န ပုစ္ဆေယျာထာတိ မယံ သတ္ထုသန္တိကေ ပဗ္ဗဇိမှ၊ စတ္တာရော ပစ္စယာပိ နော သတ္ထု သန္တကာဝ၊ တေ မယံ ဧတ္တကံ ကာလံ ကင်္ခံ အကတွာ န အရဟာမ အဇ္ဇ ပစ္ဆိမကာလေ ကင်္ခံ ကာတုန္တိ သစေ ဧဝံ သတ္ထရိ ဂါရဝေန န ပုစ္ဆထ. သဟာယကောပိ ဘိက္ခဝေ သဟာယကဿ အာရောစေတူတိ တုမှာကံ ယော ယဿ ဘိက္ခုနော သန္ဒိဋ္ဌော သမ္ဘတ္တော၊ သော တဿ အာရောစေတု၊ အဟံ ဧတဿ ဘိက္ခုဿ ကထေဿာမိ၊ တဿ ကထံ သုတွာ သဗ္ဗေ နိက္ကင်္ခါ ဘဝိဿထာတိ ဒဿေတိ.

ဧဝံ ပသန္နောတိ ဧဝံ သဒ္ဒဟာမိ အဟန္တိ အတ္ထော. ဉာဏမေဝါတိ နိက္ကင်္ခဘာဝပစ္စက္ခကရဏဉာဏံယေဝ၊ ဧတ္ထ တထာဂတဿ န သဒ္ဓါမတ္တန္တိ အတ္ထော. ဣမေသဉှိ၊ အာနန္ဒာတိ ဣမေသံ အန္တောသာဏိယံ နိသိန္နာနံ ပဉ္စန္နံ ဘိက္ခုသတာနံ. ယော ပစ္ဆိမကောတိ ယော ဂုဏဝသေန ပစ္ဆိမကော. အာနန္ဒတ္ထေရံယေဝ သန္ဓာယာဟ.

၂၁၈. အပ္ပမာဒေန သမ္ပာဒေထာတိ သတိအဝိပ္ပဝါသေန သဗ္ဗကိစ္စာနိ သမ္ပာဒေယျာထ. ဣတိ ဘဂဝါ ပရိနိဗ္ဗာနမဉ္စေ နိပန္နော ပဉ္စစတ္တာလီသ ဝဿာနိ ဒိန္နံ ဩဝါဒံ သဗ္ဗံ ဧကသ္မိံ အပ္ပမာဒပဒေယေဝ ပက္ခိပိတွာ အဒါသိ. အယံ တထာဂတဿ ပစ္ဆိမာ ဝါစာတိ ဣဒံ ပန သင်္ဂီတိကာရကာနံ ဝစနံ.