သုဘဒ္ဒပရိဗ္ဗာဇကဝတ္ထုဝဏ္ဏနာ

၂၁၂. သုဘဒ္ဒေါ နာမ ပရိဗ္ဗာဇကောတိ ဥဒိစ္စဗြာဟ္မဏမဟာသာလကုလာ ပဗ္ဗဇိတော ဆန္နပရိဗ္ဗာဇကော. ကင်္ခါဓမ္မောတိ ဝိမတိဓမ္မော. ကသ္မာ ပနဿ အဇ္ဇ ဧဝံ အဟောသီတိ? တထာဝိဓဥပနိဿယတ္တာ. ပုဗ္ဗေ ကိရ ပုညကရဏကာလေ ဒွေ ဘာတရော အဟေသုံ. တေ ဧကတောဝ သဿံ အကံသု. တတ္ထ ဇေဋ္ဌကဿ – ‘‘ဧကသ္မိံ သဿေ နဝဝါရေ အဂ္ဂသဿဒါနံ မယာ ဒါတဗ္ဗ’’န္တိ အဟောသိ. သော ဝပ္ပကာလေ ဗီဇဂ္ဂံ နာမ ဒတွာ ဂဗ္ဘကာလေ ကနိဋ္ဌေန သဒ္ဓိံ မန္တေသိ – ‘‘ဂဗ္ဘကာလေ ဂဗ္ဘံ ဖာလေတွာ ဒဿာမာ’’တိ ကနိဋ္ဌော – ‘‘တရုဏသဿံ နာသေတုကာမောသီ’’တိ အာဟ. ဇေဋ္ဌော ကနိဋ္ဌဿ အနနုဝတ္တနဘာဝံ ဉတွာ ခေတ္တံ ဝိဘဇိတွာ အတ္တနော ကောဋ္ဌာသတော ဂဗ္ဘံ ဖာလေတွာ ခီရံ နီဟရိတွာ သပ္ပိနဝနီတေန သံယောဇေတွာ အဒါသိ၊ ပုထုကကာလေ ပုထုကံ ကာရေတွာ အဒါသိ၊ လာယနကာလေ လာယနဂ္ဂံ၊ ဝေဏိကရဏေ ဝေဏဂ္ဂံ၊ ကလာပါဒီသု ကလာပဂ္ဂံ၊ ခလဂ္ဂံ၊ ခလဘဏ္ဍဂ္ဂံ၊ ကောဋ္ဌဂ္ဂန္တိ ဧဝံ ဧကသဿေ နဝဝါရေ အဂ္ဂဒါနံ အဒါသိ. ကနိဋ္ဌော ပန ဥဒ္ဓရိတွာ အဒါသိ.

တေသု ဇေဋ္ဌကော အညာသိကောဏ္ဍညတ္ထေရော ဇာတော. ဘဂဝါ – ‘‘ကဿ နု ခေါ အဟံ ပဌမံ ဓမ္မံ ဒေသေယျ’’န္တိ ဩလောကေန္တော ‘‘အညာသိကောဏ္ဍညော ဧကသ္မိံ သဿေ နဝ အဂ္ဂဒါနာနိ အဒါသိ၊ ဣမံ အဂ္ဂဓမ္မံ တဿ ဒေသေဿာမီ’’တိ သဗ္ဗပဌမံ ဓမ္မံ ဒေသေသိ. သော အဋ္ဌာရသဟိ ဗြဟ္မကောဋီဟိ သဒ္ဓိံ သောတာပတ္တိဖလေ ပတိဋ္ဌာသိ. ကနိဋ္ဌော ပန ဩဟီယိတွာ ပစ္ဆာ ဒါနဿ ဒိန္နတ္တာ သတ္ထု ပရိနိဗ္ဗာနကာလေ ဧဝံ စိန္တေတွာ သတ္ထာရံ ဒဋ္ဌုကာမော အဟောသိ.

မာ တထာဂတံ ဝိဟေဌေသီတိ ထေရော ကိရ – ‘‘ဧတေ အညတိတ္ထိယာ နာမ အတ္တနော ဂဟဏမေဝ ဂဏှန္တိ၊ တဿ ဝိဿဇ္ဇာပနတ္ထာယ ဘဂဝတော ဗဟုံ ဘာသမာနဿ ကာယဝါစာဝိဟေသာ ဘဝိဿတိ၊ ပကတိယာပိ စ ကိလန္တောယေဝ ဘဂဝါ’’တိ မညမာနော ဧဝမာဟ. ပရိဗ္ဗာဇကော – ‘‘န မေ အယံ ဘိက္ခု ဩကာသံ ကရောတိ၊ အတ္ထိကေန ပန အနုဝတ္တိတွာ ကာရေတဗ္ဗော’’တိ ထေရံ အနုဝတ္တန္တော ဒုတိယမ္ပိ တတိယမ္ပိ အာဟ.

၂၁၃. အဿောသိ ခေါတိ သာဏိဒွါရေ ဌိတဿ ဘာသတော ပကတိသောတေနေဝ အဿောသိ၊ သုတွာ စ ပန သုဘဒ္ဒဿေဝ အတ္ထာယ မဟတာ ဥဿာဟေန အာဂတတ္တာ အလံ အာနန္ဒာတိအာဒိမာဟ. တတ္ထ အလန္တိ ပဋိက္ခေပတ္ထေ နိပါတော. အညာပေက္ခောဝါတိ အညာတုကာမောဝ ဟုတွာ. အဗ္ဘညိံသူတိ ယထာ တေသံ ပဋိညာ၊ တထေဝ ဇာနိံသု. ဣဒံ ဝုတ္တံ ဟောတိ – သစေ နေသံ သာ ပဋိညာ နိယျာနိကာ၊ သဗ္ဗေ အဗ္ဘညံသု၊ နော စေ၊ န အဗ္ဘညံသု. တသ္မာ ကိံ တေသံ ပဋိညာ နိယျာနိကာ၊ အနိယျာနိကာတိ အယမေဝ တဿ ပဉှဿ အတ္ထော. အထ ဘဂဝါ တေသံ အနိယျာနိကဘာဝကထနေန အတ္ထာဘာဝတော စေဝ ဩကာသာဘာဝတော စ ‘‘အလ’’န္တိ ပဋိက္ခိပိတွာ ဓမ္မမေဝ ဒေသေသိ. ပဌမယာမသ္မိဉှိ မလ္လာနံ ဓမ္မံ ဒေသေတွာ မဇ္ဈိမယာမေ သုဘဒ္ဒဿ၊ ပစ္ဆိမယာမေ ဘိက္ခုသံဃံ ဩဝဒိတွာ ဗလဝပစ္စူသသမယေ ပရိနိဗ္ဗာယိဿာမိစ္စေဝ ဘဂဝါ အာဂတော.

၂၁၄. သမဏောပိ တတ္ထ န ဥပလဗ္ဘတီတိ ပဌမော သောတာပန္နသမဏောပိ တတ္ထ နတ္ထိ၊ ဒုတိယော သကဒါဂါမိသမဏောပိ၊ တတိယော အနာဂါမိသမဏောပိ၊ စတုတ္ထော အရဟတ္တသမဏောပိ တတ္ထ နတ္ထီတိ အတ္ထော. ‘‘ဣမသ္မိံ ခေါ’’တိ ပုရိမဒေသနာယ အနိယမတော ဝတွာ ဣဒါနိ အတ္တနော သာသနံ နိယမေန္တော အာဟ. သုညာ ပရပ္ပဝါဒါ သမဏေဘီတိ စတုန္နံ မဂ္ဂါနံ အတ္ထာယ အာရဒ္ဓဝိပဿကေဟိ စတူဟိ၊ မဂ္ဂဋ္ဌေဟိ စတူဟိ၊ ဖလဋ္ဌေဟိ စတူဟီတိ ဒွါဒသဟိ သမဏေဟိ သုညာ ပရပ္ပဝါဒါ တုစ္ဆာ ရိတ္တကာ. ဣမေ စ သုဘဒ္ဒါတိ ဣမေ ဒွါဒသ ဘိက္ခူ. သမ္မာ ဝိဟရေယျုန္တိ ဧတ္ထ သောတာပန္နော အတ္တနော အဓိဂတဋ္ဌာနံ အညဿ ကထေတွာ တံ သောတာပန္နံ ကရောန္တော သမ္မာ ဝိဟရတိ နာမ. ဧသ နယော သကဒါဂါမိအာဒီသု. သောတာပတ္တိမဂ္ဂဋ္ဌော အညမ္ပိ သောတာပတ္တိမဂ္ဂဋ္ဌံ ကရောန္တော သမ္မာ ဝိဟရတိ နာမ. ဧသ နယော သေသမဂ္ဂဋ္ဌေသု. သောတာပတ္တိမဂ္ဂတ္ထာယ အာရဒ္ဓဝိပဿကော အတ္တနော ပဂုဏံ ကမ္မဋ္ဌာနံ ကထေတွာ အညမ္ပိ သောတာပတ္တိမဂ္ဂတ္ထာယ အာရဒ္ဓဝိပဿကံ ကရောန္တော သမ္မာ ဝိဟရတိ နာမ. ဧသ နယော သေသမဂ္ဂတ္ထာယ အာရဒ္ဓဝိပဿကေသု. ဣဒံ သန္ဓာယာဟ – ‘‘သမ္မာ ဝိဟရေယျု’’န္တိ. အသုညော လောကော အရဟန္တေဟိ အဿာတိ နဠဝနံ သရဝနံ ဝိယ နိရန္တရော အဿ.

ဧကူနတိံသော ဝယသာတိ ဝယေန ဧကူနတိံသဝဿော ဟုတွာ. ယံ ပဗ္ဗဇိန္တိ ဧတ္ထ ယန္တိ နိပါတမတ္တံ. ကိံ ကုသလာနုဧသီတိ ‘‘ကိံ ကုသလ’’န္တိ အနုဧသန္တော ပရိယေသန္တော. တတ္ထ – ‘‘ကိံ ကုသလ’’န္တိ သဗ္ဗညုတညာဏံ အဓိပ္ပေတံ၊ တံ ဂဝေသန္တောတိ အတ္ထော. ယတော အဟန္တိ ယတော ပဋ္ဌာယ အဟံ ပဗ္ဗဇိတော၊ ဧတ္ထန္တရေ သမဓိကာနိ ပညာသ ဝဿာနိ ဟောန္တီတိ ဒဿေတိ. ဉာယဿ ဓမ္မဿာတိ အရိယမဂ္ဂဓမ္မဿ. ပဒေသဝတ္တီတိ ပဒေသေ ဝိပဿနာမဂ္ဂေ ပဝတ္တန္တော. ဣတော ဗဟိဒ္ဓါတိ မမ သာသနတော ဗဟိဒ္ဓါ. သမဏောပိ နတ္ထီတိ ပဒေသဝတ္တိဝိပဿကောပိ နတ္ထိ၊ ပဌမသမဏော သောတာပန္နောပိ နတ္ထီတိ ဝုတ္တံ ဟောတိ.

ယေ ဧတ္ထာတိ ယေ တုမှေ ဧတ္ထ သာသနေ သတ္ထာရာ သမ္မုခါ အန္တေဝါသိကာဘိသေကေန အဘိသိတ္တာ၊ တေသံ ဝေါ လာဘာ တေသံ ဝေါ သုလဒ္ဓန္တိ. ဗာဟိရသမယေ ကိရ ယံ အန္တေဝါသိကံ အာစရိယော – ‘‘ဣမံ ပဗ္ဗာဇေဟိ၊ ဣမံ ဩဝဒ၊ ဣမံ အနုသာသာ’’တိ ဝဒတိ၊ သော တေန အတ္တနော ဌာနေ ဌပိတော ဟောတိ၊ တသ္မာ တဿ – ‘‘ဣမံ ပဗ္ဗဇေဟိ၊ ဣမံ ဩဝဒ၊ ဣမံ အနုသာသာ’’တိ ဣမေ လာဘာ ဟောန္တိ. ထေရမ္ပိ သုဘဒ္ဒေါ တမေဝ ဗာဟိရသမယံ ဂဟေတွာ ဧဝမာဟ.

အလတ္ထ ခေါတိ ကထံ အလတ္ထ? ထေရော ကိရ နံ ဧကမန္တံ နေတွာ ဥဒကတုမ္ဗတော ပါနီယေန သီသံ တေမေတွာ တစပဉ္စကကမ္မဋ္ဌာနံ ကထေတွာ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒါပေတွာ သရဏာနိ ဒတွာ ဘဂဝတော သန္တိကံ အာနေသိ. ဘဂဝါ ဥပသမ္ပာဒေတွာ ကမ္မဋ္ဌာနံ အာစိက္ခိ. သော တံ ဂဟေတွာ ဥယျာနဿ ဧကမန္တေ စင်္ကမံ အဓိဋ္ဌာယ ဃဋေန္တော ဝါယမန္တော ဝိပဿနံ ဝဍ္ဎေန္တော သဟ ပဋိသမ္ဘိဒါဟိ အရဟတ္တံ ပတွာ အာဂမ္မ ဘဂဝန္တံ ဝန္ဒိတွာ နိသီဒိ. တံ သန္ဓာယ – ‘‘အစိရူပသမ္ပန္နော ခေါ ပနာ’’တိအာဒိ ဝုတ္တံ.

သော စ ဘဂဝတော ပစ္ဆိမော သက္ခိသာဝကော အဟောသီတိ သင်္ဂီတိကာရကာနံ ဝစနံ. တတ္ထ ယော ဘဂဝတိ ဓရမာနေ ပဗ္ဗဇိတွာ အပရဘာဂေ ဥပသမ္ပဒံ လဘိတွာ ကမ္မဋ္ဌာနံ ဂဟေတွာ အရဟတ္တံ ပါပုဏာတိ၊ ဥပသမ္ပဒမ္ပိ ဝါ ဓရမာနေယေဝ လဘိတွာ အပရဘာဂေ ကမ္မဋ္ဌာနံ ဂဟေတွာ အရဟတ္တံ ပါပုဏာတိ၊ ကမ္မဋ္ဌာနမ္ပိ ဝါ ဓရမာနေယေဝ ဂဟေတွာ အပရဘာဂေ အရဟတ္တမေဝ ပါပုဏာတိ၊ သဗ္ဗောပိ သော ပစ္ဆိမော သက္ခိသာဝကော. အယံ ပန ဓရမာနေယေဝ ဘဂဝတိ ပဗ္ဗဇိတော စ ဥပသမ္ပန္နော စ ကမ္မဋ္ဌာနဉ္စ ဂဟေတွာ အရဟတ္တံ ပတ္တောတိ.

ပဉ္စမဘာဏဝါရဝဏ္ဏနာ နိဋ္ဌိတာ.