၁. နသုတ္တသာဓနကထာဝဏ္ဏနာ

၂၉၇. ဣဒါနိ ‘‘အတီတံ ခန္ဓာ’’တိအာဒိကထာ ဟောတိ. တတ္ထ ခန္ဓာဒိဘာဝါဝိဇဟနတော အတီတာနာဂတာနံ အတ္ထိတံ ဣစ္ဆန္တဿ အတီတံ ခန္ဓာတိ ပုစ္ဆာ ပရဝါဒိဿ၊ အတီတဿ ခန္ဓသင်္ဂဟိတတ္တာ အာမန္တာတိ ပဋိညာ သကဝါဒိဿ. ပုန အတီတံ နတ္ထီတိ ပုစ္ဆာ ပရဝါဒိဿ၊ တဿ နိရုတ္တိပထသုတ္တေန အတ္ထိတာယ ဝါရိတတ္တာ ပဋိက္ခေပေါ သကဝါဒိဿ. အာယတနဓာတုပုစ္ဆာသုပိ အနာဂတပဉှေသုပိ ပစ္စုပ္ပန္နေန သဒ္ဓိံ သံသန္ဒိတွာ အနုလောမပဋိလောမတော အာဂတပဉှေသုပိ ‘‘အတီတံ ရူပ’’န္တိအာဒိပဉှေသုပိ ဣမိနာဝုပါယေန အတ္ထော ဝေဒိတဗ္ဗော.