၃. အာနေဉ္ဇကထာဝဏ္ဏနာ

၈၉၆. ဣဒါနိ အာနေဉ္ဇကထာ နာမ ဟောတိ. တတ္ထ ဘဂဝါ စတုတ္ထဇ္ဈာနေ ဌိတော ပရိနိဗ္ဗာယီတိ သလ္လက္ခေတွာ ‘‘အရဟာ အာနေဉ္ဇေ ဌိတော ပရိနိဗ္ဗာယတီ’’တိ ယေသံ လဒ္ဓိ၊ သေယျထာပိ ဧကစ္စာနံ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. ပကတိစိတ္တေတိ ဘဝင်္ဂစိတ္တေ. သဗ္ဗေ ဟိ သညိနော သတ္တာ ဘဝင်္ဂစိတ္တေ ဌတွာ ဘဝင်္ဂပရိယောသာနေန စုတိစိတ္တေန ကာလံ ကရောန္တိ. ဣတိ နံ ဣမိနာ အတ္ထေန စောဒေတုံ ဧဝမာဟ. တတ္ထ ကိဉ္စာပိ စတုဝေါကာရဘဝေ အရဟတော ပကတိစိတ္တမ္ပိ အာနေဉ္ဇံ ဟောတိ၊ အယံ ပန ပဉှော ပဉ္စဝေါကာရဘဝဝသေန ဥဒ္ဓဋော. တသ္မာ နော စ ဝတ ရေ ဝတ္တဗ္ဗေတိ အာဟ. သေသမေတ္ထ ဥတ္တာနတ္ထမေဝါတိ.

အာနေဉ္ဇကထာဝဏ္ဏနာ.