၄. ဓမ္မာဘိသမယကထာဝဏ္ဏနာ

၈၉၇. ဣဒါနိ ဓမ္မာဘိသမယကထာ နာမ ဟောတိ. တတ္ထ အတီတဘဝေ သောတာပန္နံ မာတုကုစ္ဆိယံ ဝသိတွာ နိက္ခန္တံ ဒိသွာ ‘‘အတ္ထိ ဂဗ္ဘသေယျာယ ဓမ္မာဘိသမယော’’တိ ယေသံ လဒ္ဓိ၊ သေယျထာပိ ဧကစ္စာနံ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယဒိ တတ္ထ ဓမ္မာဘိသမယော အတ္ထိ၊ ဓမ္မာဘိသမယဿ ကာရဏေဟိ ဓမ္မဒေသနာဒီဟိ ဘဝိတဗ္ဗ’’န္တိ စောဒေတုံ အတ္ထိ ဂဗ္ဘသေယျာယ ဓမ္မဒေသနာတိအာဒိမာဟ. သုတ္တဿာတိအာဒိ ဘဝင်္ဂဝါရံ သန္ဓာယ ဝုတ္တံ. ဂဗ္ဘသေယျာယ ဟိ ယေဘုယျေန ဘဝင်္ဂမေဝ ပဝတ္တတိ. တေနေဝ သတ္တော ကိရိယမယပ္ပဝတ္တာဘာဝါ သုတ္တော၊ ဘာဝနာနုယောဂဿ အဘာဝါ ပမတ္တော၊ ကမ္မဋ္ဌာနပရိဂ္ဂါဟကာနံ သတိသမ္ပဇညာနံ အဘာဝါ မုဋ္ဌဿတိ အသမ္ပဇာနော နာမ ဟောတိ၊ တထာရူပဿ ကုတော ဓမ္မာဘိသမယောတိ?

ဓမ္မာဘိသမယကထာဝဏ္ဏနာ.