၂. ကုသလစိတ္တကထာဝဏ္ဏနာ

၈၉၄-၈၉၅. ဣဒါနိ ကုသလစိတ္တကထာ နာမ ဟောတိ. တတ္ထ ယသ္မာ အရဟာ သတိဝေပုလ္လပ္ပတ္တော ပရိနိဗ္ဗာယန္တောပိ သတော သမ္ပဇာနောဝ ပရိနိဗ္ဗာတိ၊ တသ္မာ ကုသလစိတ္တော ပရိနိဗ္ဗာယတီတိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ယသ္မာ ကုသလစိတ္တော နာမ ပုညာဘိသင်္ခါရာဘိသင်္ခရဏာဒိဝသေန ဟောတိ၊ တသ္မာ တေနတ္ထေန စောဒေတုံ အရဟာ ပုညာဘိသင်္ခါရန္တိအာဒိမာဟ. သေသမေတ္ထ ယထာပါဠိမေဝ နိယျာတိ. သတော သမ္ပဇာနောတိ ဣဒံ ဇဝနက္ခဏေ ကိရိယသတိသမ္ပဇညာနံ ဝသေန အသမ္မောဟမရဏဒီပနတ္ထံ ဝုတ္တံ၊ န ကုသလစိတ္တဒီပနတ္ထံ. တသ္မာ အသာဓကန္တိ.

ကုသလစိတ္တကထာဝဏ္ဏနာ.