၆. ကုသလကထာဝဏ္ဏနာ

၈၄၄-၈၄၆. ဣဒါနိ ကုသလကထာ နာမ ဟောတိ. တတ္ထ အနဝဇ္ဇမ္ပိ ကုသလံ ဣဋ္ဌပါကမ္ပိ. အနဝဇ္ဇံ နာမ ကိလေသဝိပ္ပယုတ္တံ. အယံ နယော ဌပေတွာ အကုသလံ သဗ္ဗဓမ္မေ ဘဇတိ. ဣဋ္ဌဝိပါကံ နာမ အာယတိံ ဥပပတ္တိပဝတ္တေသု ဣဋ္ဌဖလနိပ္ဖါဒကံ ပုညံ. အယံ နယော ကုသလတ္တိကေ အာဒိပဒမေဝ ဘဇတိ. ယေသံ ပန ဣမံ ဝိဘာဂံ အဂ္ဂဟေတွာ အနဝဇ္ဇဘာဝမတ္တေနေဝ နိဗ္ဗာနံ ကုသလန္တိ လဒ္ဓိ၊ သေယျထာပိ အန္ဓကာနံ၊ တေသံ ဣဋ္ဌဝိပါကဋ္ဌေန နိဗ္ဗာနဿ ကုသလတာဘာဝံ ဒီပေတုံ ပုစ္ဆာ သကဝါဒိဿ၊ အတ္တနော လဒ္ဓိဝသေန ပဋိညာ ဣတရဿ. သေသမိဓာပိ ဟေဋ္ဌာ ဝုတ္တနယတ္တာ ဥတ္တာနတ္ထမေဝါတိ.

ကုသလကထာဝဏ္ဏနာ.