၉. န ဝတ္တဗ္ဗံ သံဃဿ ဒိန္နံ မဟပ္ဖလန္တိကထာဝဏ္ဏနာ

၇၉၇-၇၉၈. ဣဒါနိ န ဝတ္တဗ္ဗံ သံဃဿ ဒိန္နံ မဟပ္ဖလန္တိကထာ နာမ ဟောတိ. တတြာပိ ‘‘မဂ္ဂဖလာနေဝ သံဃော နာမ၊ န စ သက္ကာ တေသံ ကိဉ္စိ ဒါတုံ၊ န စ တေဟိ ပဋိဂ္ဂဏှိတုံ၊ နာပိ တေသံ ဒါနေန ကောစိ ဥပကာရော ဣဇ္ဈတိ၊ တသ္မာ န ဝတ္တဗ္ဗံ သံဃဿ ဒိန္နံ မဟပ္ဖလ’’န္တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အာဟုနေယျောတိအာဒိ ‘‘ယဒိ သံဃဿ ဒိန္နံ မဟပ္ဖလံ န ဘဝေယျ၊ န နံ သတ္ထာ ဧဝံ ထောမေယျာ’’တိ ဒဿနတ္ထံ ဝုတ္တံ. သေသံ ယထာပါဠိမေဝ နိယျာတီတိ.

န ဝတ္တဗ္ဗံ သံဃဿ ဒိန္နံ မဟပ္ဖလန္တိကထာဝဏ္ဏနာ.