၁၀. န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာဝဏ္ဏနာ

၇၉၉. ဣဒါနိ န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာ နာမ ဟောတိ. တတ္ထ ‘‘ဗုဒ္ဓေါ ဘဂဝါ န ကိဉ္စိ ပရိဘုဉ္ဇတိ၊ လောကာနုဝတ္တနတ္ထံ ပန ပရိဘုဉ္ဇမာနံ ဝိယ အတ္တာနံ ဒဿေတိ၊ တသ္မာ နိရုပကာရတ္တာ န ဝတ္တဗ္ဗံ တသ္မိံ ဒိန္နံ မဟပ္ဖလ’’န္တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. ဒွိပဒါနံ အဂ္ဂေါတိအာဒိ ‘‘မနုဿဒုဿီလေပိ ဒါနံ သဟဿဂုဏံ ဟောတိ၊ ကိမင်္ဂံ ပန ဧဝရူပေ အဂ္ဂပုဂ္ဂလေ’’တိ ဒဿနတ္ထံ ဝုတ္တံ. သေသမေတ္ထ ယထာပါဠိမေဝ နိယျာတီတိ.

န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာဝဏ္ဏနာ.