၈. န ဝတ္တဗ္ဗံ သံဃော ဘုဉ္ဇတီတိကထာဝဏ္ဏနာ

၇၉၅-၇၉၆. ဣဒါနိ န ဝတ္တဗ္ဗံ သံဃော ဘုဉ္ဇတီတိကထာ နာမ ဟောတိ. တတြာပိ ‘‘မဂ္ဂဖလာနေဝ သံဃော နာမ၊ န စ တာနိ ကိဉ္စိ ဘုဉ္ဇန္တိ၊ တသ္မာ န ဝတ္တဗ္ဗံ သံဃော ဘုဉ္ဇတိ၊ ပိဝတိ၊ ခါဒတိ၊ သာယတီ’’တိ ယေသံ လဒ္ဓိ၊ သေယျထာပိ တေသံယေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယဒိ သံဃော န ဘုဉ္ဇေယျ၊ သံဃဘတ္တာဒိကရဏံ နိရတ္ထကံ ဘဝေယျာ’’တိ စောဒေတုံ နနု အတ္ထိ ကေစိ သံဃဘတ္တာနိ ကရောန္တီတိအာဒိမာဟ. ဂဏဘောဇနန္တိအာဒိ ‘‘ယဒိ သံဃော န ဘုဉ္ဇေယျ၊ ကဿ ဂဏဘောဇနာဒီနိ သိယု’’န္တိ စောဒနတ္ထံ ဝုတ္တံ. အဋ္ဌ ပါနာနီတိ ဣဒမ္ပိ ‘‘ယဒိ သံဃော န ပိဝေယျ၊ ကဿေတာနိ ပါနာနိ သတ္ထာ အနုဇာနေယျာ’’တိ စောဒနတ္ထံ ဝုတ္တံ. သေသမိဓာပိ ဟေဋ္ဌာ ဝုတ္တနယေနေဝ ဝေဒိတဗ္ဗန္တိ.

န ဝတ္တဗ္ဗံ သံဃော ဘုဉ္ဇတီတိကထာဝဏ္ဏနာ.