၇. န ဝတ္တဗ္ဗံ သံဃော ဒက္ခိဏံ ဝိသောဓေတီတိကထာဝဏ္ဏနာ

၇၉၃-၇၉၄. ဣဒါနိ န ဝတ္တဗ္ဗံ သံဃော ဒက္ခိဏံ ဝိသောဓေတီတိကထာ နာမ ဟောတိ. တတ္ထ ‘‘မဂ္ဂဖလာနေဝ သံဃော နာမ၊ န စ တာနိ ဒက္ခိဏံ ဝိသောဓေတုံ သက္ကောန္တိ၊ တသ္မာ န ဝတ္တဗ္ဗံ သံဃော ဒက္ခိဏံ ဝိသောဓေတီ’’တိ ယေသံ လဒ္ဓိ၊ သေယျထာပိ တေသညေဝ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အာဟုနေယျောတိအာဒိ ‘‘ယဒိ သံဃော ဒက္ခိဏံ ဝိသောဓေတုံ န သက္ကုဏေယျ၊ န နံ သတ္ထာ ဧဝံ ထောမေယျာ’’တိ ဒဿနတ္ထံ ဝုတ္တံ. ဝိသောဓေတီတိ မဟပ္ဖလံ ကရောတိ. သံဃသ္မိဉှိ အပ္ပံ ဒိန္နံ ဗဟု ဟောတိ၊ ဗဟု ဒိန္နံ ဗဟုတရံ. ဒက္ခိဏေယျာတိ ဒက္ခိဏာရဟာ ဒက္ခိဏာယ အနုစ္ဆဝိကာ၊ ဒက္ခိဏံ ဝိသောဓေတုံ သမတ္ထာတိ အတ္ထော. ဒက္ခိဏံ အာရာဓေန္တီတိ သမ္ပာဒေန္တိ၊ အပ္ပမတ္တိကာယပိ ဒက္ခိဏာယ မဟန္တံ ဖလံ ပါပုဏန္တီတိ အတ္ထော. သေသံ ဟေဋ္ဌာ ဝုတ္တနယမေဝါတိ.

န ဝတ္တဗ္ဗံ သံဃော ဒက္ခိဏံ ဝိသောဓေတီတိကထာဝဏ္ဏနာ.