၆. န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတီတိကထာဝဏ္ဏနာ

၇၉၁-၇၉၂. ဣဒါနိ န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတီတိကထာ နာမ ဟောတိ. တတ္ထ ‘‘ပရမတ္ထတော မဂ္ဂဖလာနေဝ သံဃော၊ မဂ္ဂဖလေဟိ အညော သံဃော နာမ နတ္ထိ၊ မဂ္ဂဖလာနိ စ န ကိဉ္စိ ပဋိဂ္ဂဏှန္တိ၊ တသ္မာ န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတီ’’တိ ယေသံ လဒ္ဓိ၊ သေယျထာပိ ဧတရဟိ မဟာပုညဝါဒီသင်္ခါတာနံ ဝေတုလ္လကာနံ၊ တေ သန္ဓာယ န ဝတ္တဗ္ဗန္တိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယဒိ သံဃော န ပဋိဂ္ဂဏှေယျ၊ န နံ သတ္ထာ အာဟုနေယျာတိအာဒီဟိ ထောမေယျာ’’တိ စောဒေတုံ နနု သံဃော အာဟုနေယျောတိအာဒိမာဟ. သံဃဿ ဒါနံ ဒေန္တီတိ ‘‘ယေ တေ သံဃဿ ဒေန္တိ၊ တေ ပဋိဂ္ဂါဟကေသု အသတိ ကဿ ဒဒေယျု’’န္တိ စောဒနတ္ထံ ဝုတ္တံ. အာဟုတိံ ဇာတဝေဒေါ ဝါတိ သုတ္တံ ပရသမယတော အာဂတံ. တတ္ထ မဟာမေဃန္တိ မေဃဝုဋ္ဌိံ သန္ဓာယ ဝုတ္တံ. ဝုဋ္ဌိဉှိ မေဒနီ ပဋိဂ္ဂဏှာတိ၊ န မေဃမေဝ. မဂ္ဂေါ ပဋိဂ္ဂဏှာတီတိ ‘‘မဂ္ဂဖလာနိ သံဃော’’တိ လဒ္ဓိယာ ဝဒတိ၊ န စ မဂ္ဂဖလာနေဝ သံဃော. မဂ္ဂဖလပါတုဘာဝပရိသုဒ္ဓေ ပန ခန္ဓေ ဥပါဒါယ ပညတ္တာ အဋ္ဌ ပုဂ္ဂလာ သံဃော၊ တသ္မာ အသာဓကမေတန္တိ.

န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတီတိကထာဝဏ္ဏနာ.