၅. ဌပေတွာ အရိယမဂ္ဂန္တိကထာဝဏ္ဏနာ

၇၈၉-၇၉၀. ဣဒါနိ ဌပေတွာ အရိယမဂ္ဂန္တိကထာ နာမ ဟောတိ. တတ္ထ ‘‘ယသ္မာ အရိယမဂ္ဂေါ ‘ဒုက္ခနိရောဓဂါမိနိပဋိပဒါ’တိ ဝုတ္တော၊ တသ္မာ ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာ’’တိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယဒိ ဧဝံ သမုဒယဿာပိ ဒုက္ခဘာဝေါ အာပဇ္ဇတီ’’တိ စောဒေတုံ ဒုက္ခသမုဒယောပီတိ အာဟ. ဣတရော ဟေတုလက္ခဏံ သန္ဓာယ ပဋိက္ခိပတိ. ပုန ပုဋ္ဌော ပဝတ္တပရိယာပန္နဘာဝံ သန္ဓာယ ပဋိဇာနာတိ. တီဏေဝါတိ ပဉှေသု သုတ္တဝိရောဓဘယေန ပဋိက္ခိပတိ၊ လဒ္ဓိဝသေန ပဋိဇာနာတိ. သေသမေတ္ထ ဥတ္တာနတ္ထမေဝါတိ.

ဌပေတွာ အရိယမဂ္ဂန္တိကထာဝဏ္ဏနာ.