၄. ဣန္ဒြိယဗဒ္ဓကထာဝဏ္ဏနာ

၇၈၆-၇၈၇. ဣဒါနိ ဣန္ဒြိယဗဒ္ဓကထာ နာမ ဟောတိ. တတ္ထ ဒုဝိဓံ ဒုက္ခံ – ဣန္ဒြိယဗဒ္ဓံ၊ အနိန္ဒြိယဗဒ္ဓဉ္စ. ဣန္ဒြိယဗဒ္ဓံ ဒုက္ခဝတ္ထုတာယ ဒုက္ခံ၊ အနိန္ဒြိယဗဒ္ဓံ ဥဒယဗ္ဗယပဋိပီဠနဋ္ဌေန ‘‘ယဒနိစ္စံ တံ ဒုက္ခ’’န္တိ သင်္ဂဟိတတ္တာ ဒုက္ခံ. ဣမံ ဝိဘာဂံ အဂ္ဂဟေတွာ ‘‘ယဿ ပရိညာယ ဘဂဝတိ ဗြဟ္မစရိယံ ဝုဿတိ၊ တံ ဣန္ဒြိယဗဒ္ဓမေဝ ဒုက္ခံ၊ န ဣတရ’’န္တိ ယေသံ လဒ္ဓိ၊ သေယျထာပိ ဟေတုဝါဒါနံ၊ တေသံ ဣတရဿာပိ ဒုက္ခဘာဝံ ဒဿေတုံ ဣန္ဒြိယဗဒ္ဓညေဝါတိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယသ္မာ ဘဂဝတာ ‘ယဒနိစ္စံ တံ ဒုက္ခ’န္တိ ဝုတ္တံ၊ တသ္မာ ဣန္ဒြိယဗဒ္ဓေနေဝ တေန အနိစ္စေန ဘဝိတဗ္ဗ’’န္တိ စောဒေတုံ ဣန္ဒြိယဗဒ္ဓညေဝ အနိစ္စန္တိအာဒိမာဟ. နနု အနိန္ဒြိယဗဒ္ဓံ အနိစ္စန္တိ နနု ပထဝီပဗ္ဗတပါသာဏာဒိ အနိန္ဒြိယဗဒ္ဓမ္ပိ အနိစ္စန္တိ အတ္ထော.

၇၈၈. န ဝတ္တဗ္ဗံ ဣန္ဒြိယဗဒ္ဓညေဝ ဒုက္ခန္တိ ပဉှေ အာမန္တာတိ ပဋိညာ သကဝါဒိဿ. အနိန္ဒြိယဗဒ္ဓဉှိ ဒုက္ခဒေါမနဿာနံ အာရမ္မဏံ ဟောတိ. ဥဏှကာလသ္မိဉှိ အဂ္ဂိ သီတကာလေ စ ဝါတော ဒုက္ခဿ အာရမ္မဏံ၊ နိစ္စမ္ပိ ဘောဂဝိနာသာဒယော ဒေါမနဿဿ. တသ္မာ ဝိနာပိ အနိစ္စဋ္ဌေန အနိန္ဒြိယဗဒ္ဓံ ဒုက္ခန္တိ ဝတ္တဗ္ဗံ. ကမ္မကိလေသေဟိ ပန အနိဗ္ဗတ္တတ္တာ ဒုက္ခံ အရိယသစ္စန္တိ န ဝတ္တဗ္ဗံ၊ တထာ မဂ္ဂေန အပရိညေယျတ္တာ. ယသ္မာ ပန တိဏကဋ္ဌာဒိနိရောဓော ဝါ ဥတုဗီဇာဒိနိရောဓော ဝါ ဒုက္ခနိရောဓံ အရိယသစ္စံ နာမ န ဟောတိ၊ တသ္မာ ဣန္ဒြိယဗဒ္ဓံ ဒုက္ခဉ္စေဝ အရိယသစ္စဉ္စ၊ ဣတရံ ပန ဒုက္ခမေဝါတိ ဣဒံ နာနတ္တံ ဒဿေတုံ ပဋိဇာနာတိ. ယထာ ဣန္ဒြိယဗဒ္ဓဿာတိအာဒိဝစနံ ဣန္ဒြိယဗဒ္ဓဿ ပရိညာယ ဗြဟ္မစရိယဝါသံ ပရိညာတဿ ပုန အနုပ္ပတ္တိံ ဒီပေတိ. တေနေဝေတ္ထ သကဝါဒိနာ ပဋိက္ခေပေါ ကတော. ‘‘ယဒနိစ္စံ တံ ဒုက္ခ’’န္တိ ဝစနေန ပန သင်္ဂဟိတဿ အနိန္ဒြိယဗဒ္ဓဿ ဒုက္ခဘာဝံ ပဋိသေဓေတုံ န သက္ကာတိ၊ တသ္မာ အသာဓကန္တိ.

ဣန္ဒြိယဗဒ္ဓကထာဝဏ္ဏနာ.