၃. သဗ္ဗမိဒံ ကမ္မတောတိကထာဝဏ္ဏနာ

၇၈၃. ဣဒါနိ သဗ္ဗမိဒံ ကမ္မတောတိကထာ နာမ ဟောတိ. တတ္ထ ‘‘ကမ္မုနာ ဝတ္တတိ လောကော’’တိ သုတ္တံ နိဿာယ ‘‘သဗ္ဗမိဒံ ကမ္မကိလေသဝိပါကဝဋ္ဋံ ကမ္မတောဝ ဟောတီ’’တိ ယေသံ လဒ္ဓိ၊ သေယျထာပိ ရာဇဂိရိကာနဉ္စေဝ သိဒ္ဓတ္ထိကာနဉ္စ၊ တေ သန္ဓာယ သဗ္ဗမိဒန္တိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ဧဝံ သန္တေ ကမ္မမ္ပိ ကမ္မတော အာပဇ္ဇတီ’’တိ စောဒေတုံ ကမ္မမ္ပိ ကမ္မတောတိ အာဟ. ဣတရော ယဒိ ကမ္မမ္ပိ ကမ္မတောဝ နာမ တံ ကမ္မံ ဝိပါကောယေဝ သိယာတိ ပဋိက္ခိပတိ. ပုဗ္ဗေကတဟေတူတိ ‘‘ယဒိ သဗ္ဗမိဒံ ကမ္မတော၊ ပုဗ္ဗေကတဟေတုနာ တေန ဘဝိတဗ္ဗ’’န္တိ စောဒေတုံ ပုစ္ဆတိ၊ ဣတရော ပုဗ္ဗေကတဟေတုဝါဒဘယေန ပဋိက္ခိပတိ.

၇၈၄. ကမ္မဝိပါကတောတိ ‘‘ယဒိ သဗ္ဗမိဒံ ကမ္မတော၊ ယံ အတီတဘဝေ ပဝတ္တဿ ဟေတုဘူတံ ကမ္မံ၊ တမ္ပိ ပုရိမတရေ ဘဝေ ကမ္မတောတိ ကမ္မဝိပါကော သမ္ပဇ္ဇတိ၊ တေန တေ သဗ္ဗမိဒံ ကမ္မဝိပါကတော အာပဇ္ဇတီ’’တိ စောဒေတုံ ပုစ္ဆတိ. ဣတရော ဗီဇတော အံကုရဿေဝ ပစ္စုပ္ပန္နပဝတ္တဿ ကမ္မတော နိဗ္ဗတ္တိံ သန္ဓာယ ပဋိက္ခိပတိ. ဒုတိယံ ပုဋ္ဌော တဿာပိ ကမ္မဿ ဗီဇဿ ပုရိမဗီဇတော ဝိယ ပုရိမကမ္မတော ပဝတ္တတ္တာ ပဋိဇာနာတိ. ပါဏံ ဟနေယျာတိအာဒိ ‘‘ယဒိ သဗ္ဗံ ကမ္မဝိပါကတော၊ ပါဏာတိပါတာဒီနိ ကမ္မဝိပါကေနေဝ ကရေယျာ’’တိ စောဒေတုံ ဝုတ္တံ. ဣတရော ဒုဿီလျစေတနာပိ ပုရိမကမ္မနိဗ္ဗတ္တာ ဧကေန ပရိယာယေန ဝိပါကောယေဝါတိ လဒ္ဓိယာ ပဋိဇာနာတိ. အထ နံ ‘‘ယဒိ တေ ပါဏာတိပါတော ကမ္မဝိပါကတော နိဗ္ဗတ္တတိ၊ ပါဏာတိပါတော ဝိယ ဝိပါကောပိ သဖလော အာပဇ္ဇတီ’’တိ စောဒေတုံ သဖလောတိ အာဟ. ဣတရော ပါဏာတိပါတဿ နိရယသံဝတ္တနိကာဒိဘာဝတော သဖလတံ ပဿန္တော ပဋိဇာနာတိ. ကမ္မဝိပါကဿ ပန ဣဒံ နာမ ဖလန္တိ ဝုတ္တဋ္ဌာနံ အပဿန္တော ပဋိက္ခိပတိ. အဒိန္နာဒါနာဒီသုပိ ဧသေဝ နယော. ဂိလာနပစ္စယဘေသဇ္ဇပရိက္ခာရော သဖလောတိ ဒေယျဓမ္မဝသေန ဒါနဖလံ ပုစ္ဆတိ. ကမ္မုနာ ဝတ္တတီတိ သုတ္တံ ‘‘နတ္ထိ ကမ္မ’’န္တိ အကမ္မဝါဒိတံ ပဋိက္ခိပိတွာ ‘‘အတ္ထိ ကမ္မ’’န္တိ ကမ္မဝါဒိတံ ကမ္မဿကတံ ဒီပေတိ. န သဗ္ဗဿေဝ ကမ္မတော နိဗ္ဗတ္တိံ၊ တသ္မာ အသာဓကန္တိ.

သဗ္ဗမိဒံ ကမ္မတောတိကထာဝဏ္ဏနာ.