၇. ရူပံ ကုသလာကုသလန္တိကထာဝဏ္ဏနာ

၇၆၀-၇၆၄. ဣဒါနိ ရူပံ ကုသလာကုသလန္တိကထာ နာမ ဟောတိ. တတ္ထ ‘‘ကာယကမ္မံ ဝစီကမ္မံ ကုသလမ္ပိ အကုသလမ္ပီ’’တိဝစနံ နိဿာယ ကာယဝစီကမ္မသင်္ခါတံ ကာယဝိညတ္တိဝစီဝိညတ္တိရူပံ ကုသလမ္ပိ အကုသလမ္ပီတိ ယေသံ လဒ္ဓိ၊ သေယျထာပိ မဟိသာသကာနဉ္စေဝ သမ္မိတိယာနဉ္စ၊ တေ သန္ဓာယ ရူပံ ကုသလန္တိ ပုစ္ဆာ သကဝါဒိဿ ပဋိညာ ဣတရဿ. အထ နံ ‘‘ယဒိ တေ ရူပံ ကုသလံ၊ ဧဝံဝိဓေန အနေန ဘဝိတဗ္ဗ’’န္တိ စောဒေတုံ သာရမ္မဏန္တိ အာဒိမာဟ. ပရတော အကုသလပဉှေပိ ဧသေဝ နယော. သေသမေတ္ထ ဥတ္တာနတ္ထမေဝါတိ.

ရူပံ ကုသလာကုသလန္တိကထာဝဏ္ဏနာ.