၂. အညမညပစ္စယကထာဝဏ္ဏနာ

၇၁၈-၇၁၉. ဣဒါနိ အညမညပစ္စယကထာ နာမ ဟောတိ. တတ္ထ ယေသံ သမယေ ‘‘အဝိဇ္ဇာပစ္စယာ သင်္ခါရာ’’တိ အယမေဝ တန္တိ၊ ‘‘သင်္ခါရပစ္စယာပိ အဝိဇ္ဇာ’’တိ အယံ နတ္ထိ၊ တသ္မာ အဝိဇ္ဇာဝ သင်္ခါရာနံ ပစ္စယော၊ န ပန သင်္ခါရာ အဝိဇ္ဇာယာတိ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ အဝိဇ္ဇာသင်္ခါရာဒီနံ အညမညပစ္စယတာပိ အတ္ထီတိ ဒဿေတုံ ပုစ္ဆာ သကဝါဒိဿ၊ ပဋိညာ ဣတရဿ. အဝိဇ္ဇာ သင်္ခါရေနာတိ ဧတ္ထ အပုညာဘိသင်္ခါရောဝ ဂဟိတော. တသ္မာ သင်္ခါရပစ္စယာပိ အဝိဇ္ဇာတိ ဧတ္ထ သဟဇာတအညမညအတ္ထိအဝိဂတသမ္ပယုတ္တဝသေန ပစ္စယတာ ဝေဒိတဗ္ဗာ. ဥပါဒါနပစ္စယာပိ တဏှာတိ ဧတ္ထ ဌပေတွာ ကာမုပါဒါနံ သေသာနိ တီဏိ ဥပါဒါနာနိ အဝိဇ္ဇာယ သင်္ခါရာ ဝိယ တဏှာယ ပစ္စယာ ဟောန္တီတိ ဝေဒိတဗ္ဗာနိ. သေသံ ယထာပါဠိမေဝ နိယျာတိ. ဇရာမရဏပစ္စယာတိ ပုစ္ဆာ ပရဝါဒိဿ၊ နာမရူပံ ဝိညာဏပစ္စယာတိ သကဝါဒိဿာတိ.

အညမညပစ္စယကထာဝဏ္ဏနာ.