၃. အဒ္ဓါကထာဝဏ္ဏနာ

၇၂၀-၇၂၁. ဣဒါနိ အဒ္ဓါကထာ နာမ ဟောတိ. တတ္ထ ‘‘တီဏိမာနိ၊ ဘိက္ခဝေ၊ ကထာဝတ္ထူနီ’’တိ (အ. နိ. ၃.၆၈) သုတ္တံ နိဿာယ ကာလသင်္ခါတော အဒ္ဓါ နာမ ပရိနိပ္ဖန္နော အတ္ထီတိ ယေသံ လဒ္ဓိ၊ တေသံ ‘‘အဒ္ဓါ နာမ ကောစိ ပရိနိပ္ဖန္နော နတ္ထိ အညတြ ကာလပညတ္တိမတ္တာ. ရူပါဒယော ပန ခန္ဓာဝ ပရိနိပ္ဖန္နာ’’တိ ဝိဘာဂံ ဒဿေတုံ အဒ္ဓါ ပရိနိပ္ဖန္နောတိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘သစေ သော ပရိနိပ္ဖန္နော၊ ရူပါဒီသု အနေန အညတရေန ဘဝိတဗ္ဗ’’န္တိ စောဒေတုံ ရူပန္တိအာဒိမာဟ. ဣတရော ပဋိက္ခိပတိ. သေသံ ယထာပါဠိမေဝ နိယျာတီတိ.

အဒ္ဓါကထာဝဏ္ဏနာ.