၅. အညော အနုသယောတိကထာဝဏ္ဏနာ

၇၀၀-၇၀၁. ဣဒါနိ အညော အနုသယောတိကထာ နာမ ဟောတိ. တတ္ထ ယသ္မာ ပုထုဇ္ဇနော ကုသလာဗျာကတေ စိတ္တေ ဝတ္တမာနေ သာနုသယောတိ ဝတ္တဗ္ဗော၊ န ပရိယုဋ္ဌိတောတိ တသ္မာ အညော အနုသယော၊ အညံ ပရိယုဋ္ဌာနန္တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ အညော ကာမရာဂါနုသယောတိ ပုစ္ဆာ သကဝါဒိဿ ပဋိညာ ဣတရဿ. သေသံ ဟေဋ္ဌာ အနုသယကထာယံ ဝုတ္တနယေနေဝ ဝေဒိတဗ္ဗံ. သာနုသယောတိအာဒိ ပန တသ္မိံ သမယေ အနုသယဿ အပ္ပဟီနတ္တာ သာနုသယောတိ ဝတ္တဗ္ဗတံ၊ အနုပ္ပန္နတ္တာ စ ပရိယုဋ္ဌိတောတိ အဝတ္တဗ္ဗတံ ဒီပေတိ၊ န အနုသယပရိယုဋ္ဌာနာနံ အညတ္တံ၊ တသ္မာ အသာဓကန္တိ.

အညော အနုသယောတိကထာဝဏ္ဏနာ.