၄. အရိယရူပကထာဝဏ္ဏနာ

၆၉၈-၆၉၉. ဣဒါနိ အရိယရူပကထာ နာမ ဟောတိ. တတ္ထ သမ္မာဝါစာကမ္မန္တာ ရူပံ၊ တဉ္စ ခေါ ‘‘သဗ္ဗံ ရူပံ စတ္တာရိ စ မဟာဘူတာနိ စတုန္နဉ္စ မဟာဘူတာနံ ဥပါဒါယရူပ’’န္တိ (မ. နိ. ၃.၆၇) ဝစနတော ဥပါဒါယရူပန္တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ အရိယရူပံ မဟာဘူတာနံ ဥပါဒါယာတိ ပုစ္ဆာ သကဝါဒိဿ. တတ္ထ အရိယာနံ ရူပံ၊ အရိယံ ဝါ ရူပန္တိ အရိယရူပံ. အာမန္တာတိ လဒ္ဓိယံ ဌတွာ ပဋိညာ ဣတရဿ. ကုသလန္တိ ပုဋ္ဌော လဒ္ဓိဝသေနေဝ ပဋိဇာနာတိ. အနာသဝပုစ္ဆာဒီသုပိ ဧသေဝ နယော. ယံ ကိဉ္စိ ရူပန္တိ သုတ္တံ ဌပေတွာ ဘူတာနိ သေသရူပဿ ဥပါဒါဘာဝံ ဒီပေတိ၊ န သမ္မာဝါစာကမ္မန္တာနံ. တေသဉှိ ရူပမတ္တညေဝ အသိဒ္ဓံ၊ ကုတော ဥပါဒါရူပတာ၊ တသ္မာ အသာဓကန္တိ.

အရိယရူပကထာဝဏ္ဏနာ.