၃. အနန္တရပစ္စယကထာဝဏ္ဏနာ

၆၉၃-၆၉၇. ဣဒါနိ အနန္တရပစ္စယကထာ နာမ ဟောတိ. တတ္ထ နစ္စဂီတာဒီသု ရူပဒဿနသဒ္ဒသဝနာဒီနံ လဟုပရိဝတ္တိတံ ဒိသွာ ‘‘ဣမာနိ ဝိညာဏာနိ အညမညဿ အနန္တရာ ဥပ္ပဇ္ဇန္တီ’’တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ စက္ခုဝိညာဏဿာတိ ပုစ္ဆာ သကဝါဒိဿ၊ ပဋိညာ ဣတရဿ. သောတဝိညာဏံ ရူပါရမ္မဏံယေဝါတိ ယဒိ စက္ခုဝိညာဏဿ အနန္တရာ ဥပ္ပဇ္ဇေယျ၊ ဝိပါကမနောဓာတု ဝိယ ရူပါရမ္မဏံ သိယာတိ စောဒေတုံ ဝုတ္တံ. စက္ခုဉ္စ ပဋိစ္စ ရူပေ စ ဥပ္ပဇ္ဇတိ သောတဝိညာဏန္တိ ပဉှေသု သုတ္တာဘာဝေန ပဋိက္ခိပိတွာ အနန္တရုပ္ပတ္တိံ သလ္လက္ခေန္တော လဒ္ဓိဝသေန ပဋိဇာနာတိ. တညေဝ စက္ခုဝိညာဏံ တံ သောတဝိညာဏန္တိ ယထာ ပဌမဇဝနာနန္တရံ ဒုတိယဇဝနံ မနောဝိညာဏဘာဝေန တညေဝ ဟောတိ၊ ကိံ တေ တထာ ဧတမ္ပိ ဒွယံ ဧကမေဝါတိ ပုစ္ဆတိ. ဣမိနာ နယေန သဗ္ဗဝါရေသု အတ္ထော ဝေဒိတဗ္ဗော. နစ္စတိ ဂါယတီတိအာဒိဝစနံ အာရမ္မဏသမောဓာနေ လဟုပရိဝတ္တိတာယ ဝေါကိဏ္ဏဘာဝံ ဒီပေတိ၊ န အနန္တရပစ္စယတံ၊ တသ္မာ အသာဓကန္တိ.

အနန္တရပစ္စယကထာဝဏ္ဏနာ.