၈. ဝိတက္ကဝိပ္ဖါရသဒ္ဒကထာဝဏ္ဏနာ

၅၆၃. ဣဒါနိ ဝိတက္ကဝိပ္ဖါရသဒ္ဒကထာ နာမ ဟောတိ. တတ္ထ ယသ္မာ ‘‘ဝိတက္ကဝိစာရာ ဝစီသင်္ခါရာ’’တိ ဝုတ္တာ၊ တသ္မာ သဗ္ဗသော ဝိတက္ကယတော ဝိစာရယတော အန္တမသော မနောဓာတုပဝတ္တိကာလေပိ ဝိတက္ကဝိပ္ဖါရော သဒ္ဒေါယေဝါတိ ယေသံ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ သဗ္ဗသောတိ ပုစ္ဆာ သကဝါဒိဿ ပဋိညာ ဣတရဿ. အထ နံ ယဒိ ဝိတက္ကဝိပ္ဖါရမတ္တံ သဒ္ဒေါ၊ ဖဿာဒိဝိပ္ဖါရောပိ သဒ္ဒေါ ဘဝေယျာတိ စောဒေတုံ သဗ္ဗသော ဖုသယတောတိအာဒိမာဟ. ဣတရော တာဒိသံ သုတ္တလေသံ အပဿန္တော ပဋိက္ခိပတိ. ဝိတက္ကဝိပ္ဖါရော သဒ္ဒေါ သောတဝိညေယျောတိ ဝိတက္ကဿ ဝိပ္ဖါရမတ္တမေဝ သဒ္ဒေါတိ ကတွာ ပုစ္ဆတိ၊ န ဝိတက္ကဝိပ္ဖါရသမုဋ္ဌိတံ သုတ္တပမတ္တာနံ သဒ္ဒံ၊ ဣတရော ပဋိက္ခိပတိ. နနု ဝိတက္ကဝိပ္ဖါရသဒ္ဒေါ န သောတဝိညေယျောတိ ဣဒံ တဿေဝ လဒ္ဓိယာ ဒဿေတိ. သော ဟိ ဝိတက္ကဝိပ္ဖါရမတ္တမေဝ သဒ္ဒံ ဝဒတိ၊ သော န သောတဝိညေယျောတိ. ဣတရော ပန ‘‘ဝိတက္ကဝိပ္ဖါရသဒ္ဒံ သုတွာ အာဒိသတီ’’ တိ (ဒီ. နိ. ၃.၁၄၈) ဝစနတော သောတဝိညေယျောဝါတိ ဝဒတိ.

ဝိတက္ကဝိပ္ဖါရသဒ္ဒကထာဝဏ္ဏနာ.