၉. နယထာစိတ္တဿ ဝါစာတိကထာဝဏ္ဏနာ

၅၆၄. ဣဒါနိ နယထာစိတ္တဿ ဝါစာတိကထာ နာမ ဟောတိ. တတ္ထ ယသ္မာ ကောစိ အညံ ဘဏိဿာမီတိ အညံ ဘဏတိ၊ တသ္မာ နယထာစိတ္တဿ ဝါစာ စိတ္တာနုရူပါ စိတ္တာနုဂတိကာ န ဟောတိ၊ ဝိနာပိ စိတ္တေန ပဝတ္တတီတိ ယေသံ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ယဒိ တံသမုဋ္ဌာပကံ စိတ္တံ န သိယာ၊ ဖဿာဒယောပိ တသ္မိံ ခဏေ န သိယု’’န္တိ စောဒေတုံ အဖဿကဿာတိအာဒိမာဟ. န ဘဏိတုကာမောတိအာဒီသု ယသ္မာ အညံ ဘဏိဿာမီတိ အညံ ဘဏန္တောပိ ဘဏိတုကာမောယေဝ နာမ ဟောတိ၊ တသ္မာ န ဟေဝါတိ ပဋိက္ခိပတိ.

၅၆၅. နနု အတ္ထိ ကောစိ အညံ ဘဏိဿာမီတိအာဒီသု စီဝရန္တိ ဘဏိတုကာမော စီရန္တိ ဘဏေယျ. တတ္ထ အညံ ဘဏိတုကာမတာစိတ္တံ၊ အညံ ဘဏနစိတ္တံ၊ ဣတိ ပုဗ္ဗဘာဂေန စိတ္တေန အသဒိသတ္တာ အယထာစိတ္တော နာမ ဟောတိ၊ တေနဿ ကေဝလံ အနာပတ္တိ နာမ ဟောတိ၊ န ပန စီရန္တိ ဝစနသမုဋ္ဌာပကစိတ္တံ နတ္ထိ၊ ဣတိ အစိတ္တကာ သာ ဝါစာတိ အတ္ထံ သန္ဓာယ ဣမိနာ ဥဒါဟရဏေန ‘‘နယထာစိတ္တဿ ဝါစာ’’တိ ပတိဋ္ဌာပိတာပိ အပ္ပတိဋ္ဌာပိတာဝ ဟောတီတိ.

နယထာစိတ္တဿ ဝါစာတိကထာဝဏ္ဏနာ.