၆. ဗောဓိယာဗုဒ္ဓေါတိကထာဝဏ္ဏနာ

၃၉၈. ဣဒါနိ ဗောဓိယာ ဗုဒ္ဓေါတိကထာ နာမ ဟောတိ. တတ္ထ ဗောဓီတိ စတုမဂ္ဂဉာဏဿာပိ သဗ္ဗညုတညာဏဿာပိ အဓိဝစနံ. တသ္မာ ယေသံ ယထာ ဩဒါတေန ဝဏ္ဏေန ဩဒါတော၊ သာမေန ဝဏ္ဏေန သာမော၊ ဧဝံ ဗောဓိယာ ဗုဒ္ဓေါတိ လဒ္ဓိ၊ သေယျထာပိ ဧတရဟိ ဥတ္တရာပထကာနံယေဝ၊ တေ သန္ဓာယ ပုစ္ဆာ စ အနုယောဂေါ စ သကဝါဒိဿ၊ ပဋိညာ စ ပဋိက္ခေပေါ စ ဣတရဿ.

အတီတာယာတိ ပဉှေ တသ္မိံ ခဏေ အဘာဝတော ပဋိက္ခိပတိ. ဒုတိယံ ပုဋ္ဌော ပဋိလာဘံ သန္ဓာယ ပဋိဇာနာတိ. ပုန ကိစ္စဝသေန ပုဋ္ဌော ကိစ္စာဘာဝတော ပဋိက္ခိပတိ. ဒုတိယံ ပုဋ္ဌော ယံ တေန တာယ ကရဏီယံ ကတံ၊ တတ္ထ သမ္မောဟာဘာဝံ ပဋိဇာနာတိ. လေသောကာသံ ပန အဒတွာ ဒုက္ခံ ပရိဇာနာတီတိအာဒိနာ နယေန ပုဋ္ဌော တဿ ကိစ္စဿ အဘာဝါ ပဋိက္ခိပတိ.

အနာဂတပဉှေ တသ္မိံ ခဏေ မဂ္ဂဉာဏဿ အဘာဝါ ပဋိက္ခိပတိ. ဒုတိယံ ပုဋ္ဌော ‘‘အဂမာ ရာဇဂဟံ ဗုဒ္ဓေါ’’တိ (သု. နိ. ၄၁၀) အနာဂတာယ ဗောဓိယာ ဗုဒ္ဓဘာဝံ မညမာနော ပဋိဇာနာတိ. ဗောဓိကရဏီယံ ကရောတီတိ ပုဋ္ဌော တသ္မိံ ခဏေ ကိစ္စာဘာဝေန ပဋိက္ခိပတိ. ဒုတိယံ ပုဋ္ဌော ယဒိ န ကရေယျ၊ ဗုဒ္ဓေါတိ န ဝုစ္စေယျ. ယသ္မာ အဝဿံ ကရိဿတိ၊ တသ္မာ ကရောတိယေဝ နာမာတိ ပဋိဇာနာတိ. ပုန လေသောကာသံ အဒတွာ ပုဋ္ဌော ပဋိက္ခိပတိ. ပစ္စုပ္ပန္နပဉှော သဒ္ဓိံ သံသန္ဒနာယ ဥတ္တာနတ္ထောဝ.

၃၉၉. တိဿော ဗောဓိယော ဧကတော ကတွာ ပုဋ္ဌော သဗ္ဗညုတညာဏံ သန္ဓာယ တီဟိပိ ဗုဒ္ဓေါတိ ဝတ္တဗ္ဗဘာဝတော ပဋိဇာနာတိ. ပုန တီဟိတိ ပုဋ္ဌော သဗ္ဗာသံ ဧကက္ခဏေ အဘာဝါ ပဋိက္ခိပတိ. ဒုတိယံ ပုဋ္ဌော အတီတာနာဂတပစ္စုပ္ပန္နဿ သဗ္ဗညုတညာဏဿ ဝသေန ပဋိဇာနာတိ. ပုန လေသောကာသံ အဒတွာ သတတံ သမိတန္တိ ပုဋ္ဌော ပဋိက္ခိပတိ.

န ဗတ္တဗ္ဗံ ဗောဓိယာတိ ပုစ္ဆာ ပရဝါဒိဿ၊ ဗောဓိယာ အဘာဝက္ခဏေ အဗုဒ္ဓဘာဝါပတ္တိတော ပဋိညာ သကဝါဒိဿ. နနု ဗောဓိပဋိလာဘာတိ ပဉှေ ပန ယသ္မိံ သန္တာနေ ဗောဓိသင်္ခါတံ မဂ္ဂဉာဏံ ဥပ္ပန္နံ၊ တတ္ထ ဗုဒ္ဓေါတိ သမ္မုတိသဗ္ဘာဝတော ပဋိညာ တဿေဝ. တဿ အဓိပ္ပါယံ အဇာနိတွာ ဟဉ္စီတိ လဒ္ဓိဋ္ဌပနာ ပရဝါဒိဿ. ဣဒါနိဿ အသလ္လက္ခဏံ ပါကဋံ ကာတုံ ဗောဓိပဋိလာဘာ ဗုဒ္ဓေါတိ ဗောဓိယာ ဗုဒ္ဓေါတိ ပုစ္ဆာ သကဝါဒိဿ. တဿတ္ထော – ‘‘ကိံ တေ ယသ္မာ ဗောဓိပဋိလာဘာ ဗုဒ္ဓေါ၊ တသ္မာ ဗောဓိယာ ဗုဒ္ဓေါ’’တိ. ဣတရော ‘‘ဗောဓိပဋိလာဘော နာမ ဗောဓိယာ ဥပ္ပဇ္ဇိတွာ နိရုဒ္ဓါယပိ သန္တာနေ ဥပ္ပန္နဘာဝေါယေဝ. ဗောဓိ နာမ မဂ္ဂက္ခဏေ ဉာဏ’’န္တိ ဣမံ ဝိဘာဂံ အသလ္လက္ခေန္တောဝ ပုန ပဋိဇာနာတိ. တတော သကဝါဒိနာ ဗောဓိပဋိလာဘာ ဗောဓီတိ ပုဋ္ဌော ဝစနောကာသံ အလဘန္တော ပဋိက္ခိပတီတိ.

ဗောဓိယာဗုဒ္ဓေါတိကထာဝဏ္ဏနာ.

ဣတိ ဣမာ တိဿောပိ ကထာ ဥတ္တရာပထကာနံယေဝ.