၇. လက္ခဏကထာဝဏ္ဏနာ

၄၀၀. ဣဒါနိ လက္ခဏကထာ နာမ ဟောတိ. တတ္ထ ‘‘ယေဟိ သမန္နာဂတဿ မဟာပုရိသဿ ဒွေဝ ဂတိယော ဘဝန္တီ’’တိ (ဒီ. နိ. ၁.၂၅၈) ဣမံ သုတ္တံ အယောနိသော ဂဟေတွာ လက္ခဏသမန္နာဂတော ဗောဓိသတ္တောဝ ဟောတီတိ ယေသံ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ.

စက္ကဝတ္တိသတ္တောတိ ပဉှေသု ယသ္မာ စက္ကဝတ္တီ သတ္တောပိ စ ဗောဓိသတ္တောပိ၊ တသ္မာ အဗောဓိသတ္တံ သန္ဓာယ ပဋိက္ခိပတိ. ဗောဓိသတ္တံ သန္ဓာယ ပဋိဇာနာတိ.

၄၀၂. ဒွတ္တိံသိမာနီတိသုတ္တံ ဗောဓိသတ္တမေဝ သန္ဓာယ ဝုတ္တံ. သော ဟိ ပစ္ဆိမေ ဘဝေ ဗုဒ္ဓေါ ဟောတိ၊ ဣတရေသု စက္ကဝတ္တီ၊ တသ္မာ အာဘတမ္ပိ အနာဘတသဒိသမေဝါတိ.

လက္ခဏကထာဝဏ္ဏနာ.