၃. ဆဠဘိဇာတိသုတ္တဝဏ္ဏနာ

၅၇. တတိယေ ဆဠဘိဇာတိယောတိ ဆ ဇာတိယော. တတြိဒန္တိ တတြာယံ. လုဒ္ဒါတိ ဒါရုဏာ. ဘိက္ခူ ကဏ္ဋကဝုတ္တိကာတိ သမဏာ နာမေတေ. ဧကသာဋကာတိ ဧကေနေဝ ပိလောတိကခဏ္ဍေန ပုရတော ပဋိစ္ဆာဒနကာ. အကာမကဿ ဗိလံ ဩလဂ္ဂေယျုန္တိ သတ္ထေ ဂစ္ဆမာနေ ဂေါဏမှိ မတေ ဂေါမံသမူလံ ဥပ္ပါဒနတ္ထာယ ဝိဘဇိတွာ ခါဒမာနာ ဧကဿ ဂေါမံသံ အနိစ္ဆန္တဿေဝ ကောဋ္ဌာသံ ကတွာ ‘‘အယဉ္စ တေ ခါဒိတဗ္ဗော၊ မူလဉ္စ ဒါတဗ္ဗ’’န္တိ တံ ကောဋ္ဌာသသင်္ခါတံ ဗိလံ ဩလဂ္ဂေယျုံ၊ ဗလက္ကာရေန ဟတ္ထေ ဌပေယျုန္တိ အတ္ထော. အခေတ္တညုနာတိ အဘိဇာတိပညတ္တိယာ ခေတ္တံ အဇာနန္တေန. တံ သုဏာဟီတိ တံ မမ ပညတ္တိံ သုဏာဟိ. ကဏှာဘိဇာတိကောတိ ကာဠကဇာတိကော. ကဏှံ ဓမ္မံ အဘိဇာယတီတိ ကဏှသဘာဝေါ ဟုတွာ ဇာယတိ နိဗ္ဗတ္တတိ၊ ကဏှာဘိဇာတိယံ ဝါ ဇာယတိ. နိဗ္ဗာနံ အဘိဇာယတီတိ နိဗ္ဗာနံ ပါပုဏာတိ၊ အရိယဘူမိသင်္ခါတာယ ဝါ နိဗ္ဗာနဇာတိယာ ဇာယတိ.