.နမော တဿ ဘဂဝတော အရဟတော သမ္မာသမ္ဗုဒ္ဓဿ.

အင်္ဂုတ္တရနိကာယေ

ဆက္ကနိပါတ-အဋ္ဌကထာ

၁. ပဌမပဏ္ဏာသကံ

၁. အာဟုနေယျဝဂ္ဂေါ

၁. ပဌမအာဟုနေယျသုတ္တဝဏ္ဏနာ

၁. ဆက္ကနိပါတဿ ပဌမေ ဣဓ၊ ဘိက္ခဝေ၊ ဘိက္ခူတိ၊ ဘိက္ခဝေ၊ ဣမသ္မိံ သာသနေ ဘိက္ခု. နေဝ သုမနော ဟောတိ န ဒုမ္မနောတိ ဣဋ္ဌာရမ္မဏေ ရာဂသဟဂတေန သောမနဿေန သုမနော ဝါ အနိဋ္ဌာရမ္မဏေ ဒေါသသဟဂတေန ဒေါမနဿေန ဒုမ္မနော ဝါ န ဟောတိ. ဥပေက္ခကော ဝိဟရတိ သတော သမ္ပဇာနောတိ မဇ္ဈတ္တာရမ္မဏေ အသမပေက္ခနေန အညာဏုပေက္ခာယ ဥပေက္ခကဘာဝံ အနာပဇ္ဇိတွာ သတော သမ္ပဇာနော ဟုတွာ အာရမ္မဏေ မဇ္ဈတ္တော ဝိဟရတိ. ဣမသ္မိံ သုတ္တေ ခီဏာသဝဿ သတတဝိဟာရော ကထိတော.

၂. ဒုတိယအာဟုနေယျသုတ္တဝဏ္ဏနာ

၂-၄. ဒုတိယေ အနေကဝိဟိတံ ဣဒ္ဓိဝိဓန္တိအာဒီနိ ဝိသုဒ္ဓိမဂ္ဂေ ဝုတ္တာနေဝ. အာသဝါနံ ခယာ အနာသဝန္တိ အာသဝါနံ ခယေန အနာသဝံ၊ န စက္ခုဝိညာဏာဒီနံ ဝိယ အဘာဝေနာတိ. ဣမသ္မိံ သုတ္တေ ခီဏာသဝဿ အဘိညာ ပဋိပါဋိယာ ကထိတာ. တတိယစတုတ္ထေသု ခီဏာသဝေါ ကထိတော.

၅-၇. အာဇာနီယသုတ္တတ္တယဝဏ္ဏနာ

၅-၇. ပဉ္စမေ အင်္ဂေဟီတိ ဂုဏင်္ဂေဟိ. ခမောတိ အဓိဝါသကော. ရူပါနန္တိ ရူပါရမ္မဏာနံ. ဝဏ္ဏသမ္ပန္နောတိ သရီရဝဏ္ဏေန သမ္ပန္နော. ဆဋ္ဌေ ဗလသမ္ပန္နောတိ ကာယဗလေန သမ္ပန္နော. သတ္တမေ ဇဝသမ္ပန္နောတိ ပဒဇဝေန သမ္ပန္နော.

၈-၉. အနုတ္တရိယသုတ္တာဒိဝဏ္ဏနာ

၈-၉. အဋ္ဌမေ အနုတ္တရိယာနီတိ အညေန ဥတ္တရိတရေန ရဟိတာနိ နိရုတ္တရာနိ. ဒဿနာနုတ္တရိယန္တိ ရူပဒဿနေသု အနုတ္တရံ. ဧသ နယော သဗ္ဗပဒေသု. ဟတ္ထိရတနာဒီနဉှိ ဒဿနံ န ဒဿနာနုတ္တရိယံ၊ နိဝိဋ္ဌသဒ္ဓဿ ပန နိဝိဋ္ဌပေမဝသေန ဒသဗလဿ ဝါ ဘိက္ခုသံဃဿ ဝါ ကသိဏအသုဘနိမိတ္တာဒီနံ ဝါ အညတရဿ ဒဿနံ ဒဿနာနုတ္တရိယံ နာမ. ခတ္တိယာဒီနံ ဂုဏကထာသဝနံ န သဝနာနုတ္တရိယံ၊ နိဝိဋ္ဌသဒ္ဓဿ ပန နိဝိဋ္ဌပေမဝသေန တိဏ္ဏံ ဝါ ရတနာနံ ဂုဏကထာသဝနံ တေပိဋကဗုဒ္ဓဝစနသဝနံ ဝါ သဝနာနုတ္တရိယံ နာမ. မဏိရတနာဒီနံ လာဘော န လာဘာနုတ္တရိယံ၊ သတ္တဝိဓအရိယဓနလာဘော ပန လာဘာနုတ္တရိယံ နာမ. ဟတ္ထိသိပ္ပါဒိသိက္ခနံ န သိက္ခာနုတ္တရိယံ၊ သိက္ခာတ္တယဿ ပူရဏံ ပန သိက္ခာနုတ္တရိယံ နာမ. ခတ္တိယာဒီနံ ပါရိစရိယာ န ပါရိစရိယာနုတ္တရိယံ၊ တိဏ္ဏံ ပန ရတနာနံ ပါရိစရိယာ ပါရိစရိယာနုတ္တရိယံ နာမ. ခတ္တိယာဒီနံ ဂုဏာနုဿရဏံ န အနုဿတာနုတ္တရိယံ၊ တိဏ္ဏံ ပန ရတနာနံ ဂုဏာနုဿရဏံ အနုဿတာနုတ္တရိယံ နာမ. ဣတိ ဣမာနိ ဆ အနုတ္တရိယာနိ လောကိယလောကုတ္တရာနိ ကထိတာနိ. နဝမေ ဗုဒ္ဓါနုဿတီတိ ဗုဒ္ဓဂုဏာရမ္မဏာ သတိ. သေသပဒေသုပိ ဧသေဝ နယော.

၁၀. မဟာနာမသုတ္တဝဏ္ဏနာ

၁၀. ဒသမေ မဟာနာမောတိ ဒသဗလဿ စူဠပိတု ပုတ္တော ဧကော သကျရာဇာ. ယေန ဘဂဝါ တေနုပသင်္ကမီတိ ဘုတ္တပါတရာသော ဟုတွာ ဒါသပရိဇနပရိဝုတော ဂန္ဓမာလာဒီနိ ဂါဟာပေတွာ ယတ္ထ သတ္ထာ၊ တတ္ထ အဂမာသိ. အရိယဖလံ အဿ အာဂတန္တိ အာဂတဖလော. သိက္ခာတ္တယသာသနံ ဧတေန ဝိညာတန္တိ ဝိညာတသာသနော. ဣတိ အယံ ရာဇာ ‘‘သောတာပန္နဿ နိဿယဝိဟာရံ ပုစ္ဆာမီ’’တိ ပုစ္ဆန္တော ဧဝမာဟ.

နေဝဿ ရာဂပရိယုဋ္ဌိတန္တိ န ဥပ္ပဇ္ဇမာနေန ရာဂေန ဥဋ္ဌဟိတွာ ဂဟိတံ. ဥဇုဂတန္တိ ဗုဒ္ဓါနုဿတိကမ္မဋ္ဌာနေ ဥဇုကမေဝ ဂတံ. တထာဂတံ အာရဗ္ဘာတိ တထာဂတဂုဏေ အာရဗ္ဘ. အတ္ထဝေဒန္တိ အဋ္ဌကထံ နိဿာယ ဥပ္ပန္နံ ပီတိပါမောဇ္ဇံ. ဓမ္မဝေဒန္တိ ပါဠိံ နိဿာယ ဥပ္ပန္နံ ပီတိပါမောဇ္ဇံ. ဓမ္မူပသဉှိတန္တိ ပါဠိဉ္စ အဋ္ဌကထဉ္စ နိဿာယ ဥပ္ပန္နံ. ပမုဒိတဿာတိ ဒုဝိဓေန ပါမောဇ္ဇေန ပမုဒိတဿ. ပီတိ ဇာယတီတိ ပဉ္စဝိဓာ ပီတိ နိဗ္ဗတ္တတိ. ကာယော ပဿမ္ဘတီတိ နာမကာယော စ ကရဇကာယော စ ဒရထပဋိပ္ပဿဒ္ဓိယာ ပဋိပ္ပဿမ္ဘတိ. သုခန္တိ ကာယိကစေတသိကသုခံ. သမာဓိယတီတိ အာရမ္မဏေ သမ္မာ ဌပိတံ ဟောတိ. ဝိသမဂတာယ ပဇာယာတိ ရာဂဒေါသမောဟဝိသမဂတေသု သတ္တေသု. သမပ္ပတ္တောတိ သမံ ဥပသမံ ပတ္တော ဟုတွာ. သဗျာပဇ္ဈာယာတိ သဒုက္ခာယ. ဓမ္မသောတံ သမာပန္နောတိ ဝိပဿနာသင်္ခါတံ ဓမ္မသောတံ သမာပန္နော. ဗုဒ္ဓါနုဿတိံ ဘာဝေတီတိ ဗုဒ္ဓါနုဿတိကမ္မဋ္ဌာနံ ဗြူဟေတိ ဝဍ္ဎေတိ. ဣမိနာ နယေန သဗ္ဗတ္ထ အတ္ထော ဝေဒိတဗ္ဗော. ဣတိ မဟာနာမော သောတာပန္နဿ နိဿယဝိဟာရံ ပုစ္ဆိ. သတ္ထာပိဿ တမေဝ ကထေသိ. ဧဝံ ဣမသ္မိံ သုတ္တေ သောတာပန္နောဝ ကထိတောတိ.

အာဟုနေယျဝဂ္ဂေါ ပဌမော.

၂. သာရဏီယဝဂ္ဂေါ

၁. ပဌမသာရဏီယသုတ္တဝဏ္ဏနာ

၁၁. ဒုတိယဿ ပဌမေ သာရဏီယာတိ သရိတဗ္ဗယုတ္တကာ. မေတ္တံ ကာယကမ္မန္တိ မေတ္တေန စိတ္တေန ကာတဗ္ဗံ ကာယကမ္မံ. ဝစီကမ္မမနောကမ္မေသုပိ ဧသေဝ နယော. ဣမာနိ စ ပန ဘိက္ခူနံ ဝသေန အာဂတာနိ၊ ဂိဟီသုပိ လဗ္ဘန္တိ. ဘိက္ခူနဉှိ မေတ္တေန စိတ္တေန အာဘိသမာစာရိကဓမ္မပူရဏံ မေတ္တံ ကာယကမ္မံ နာမ. ဂိဟီနံ စေတိယဝန္ဒနတ္ထာယ ဗောဓိဝန္ဒနတ္ထာယ သံဃနိမန္တနတ္ထာယ ဂမနံ၊ ဂါမံ ပိဏ္ဍာယ ပဝိဋ္ဌေ ဘိက္ခူ ဒိသွာ ပစ္စုဂ္ဂမနံ၊ ပတ္တပဋိဂ္ဂဟဏံ၊ အာသနပညာပနံ၊ အနုဂမနန္တိ ဧဝမာဒိကံ မေတ္တံ ကာယကမ္မံ နာမ.

ဘိက္ခူနံ မေတ္တေန စိတ္တေန အာစာရပဏ္ဏတ္တိသိက္ခာပနံ၊ ကမ္မဋ္ဌာနကထနံ၊ ဓမ္မဒေသနာ၊ တေပိဋကမ္ပိ ဗုဒ္ဓဝစနံ မေတ္တံ ဝစီကမ္မံ နာမ. ဂိဟီနံ ‘‘စေတိယဝန္ဒနာယ ဂစ္ဆာမ၊ ဗောဓိဝန္ဒနာယ ဂစ္ဆာမ၊ ဓမ္မဿဝနံ ကရိဿာမ၊ ဒီပမာလာပုပ္ဖပူဇံ ကရိဿာမ၊ တီဏိ သုစရိတာနိ သမာဒါယ ဝတ္တိဿာမ၊ သလာကဘတ္တာဒီနိ ဒဿာမ၊ ဝဿာဝါသိကံ ဒဿာမ၊ အဇ္ဇ သံဃဿ စတ္တာရော ပစ္စယေ ဒဿာမ၊ သံဃံ နိမန္တေတွာ ခါဒနီယာဒီနိ သံဝိဒဟထ၊ အာသနာနိ ပညာပေထ၊ ပါနီယံ ဥပဋ္ဌာပေထ၊ သံဃံ ပစ္စုဂ္ဂန္တွာ အာနေထ၊ ပညတ္တာသနေ နိသီဒါပေတွာ ဥဿာဟဇာတာ ဝေယျာဝစ္စံ ကရောထာ’’တိအာဒိဝစနကာလေ မေတ္တံ ဝစီကမ္မံ နာမ.

ဘိက္ခူနံ ပါတောဝ ဥဋ္ဌာယ သရီရပဋိဇဂ္ဂနံ စေတိယင်္ဂဏဝတ္တာဒီနိ စ ကတွာ ဝိဝိတ္တာသနေ နိသီဒိတွာ ‘‘ဣမသ္မိံ ဝိဟာရေ ဘိက္ခူ သုခီ ဟောန္တု အဝေရာ အဗျာပဇ္ဈာ’’တိ စိန္တနံ မေတ္တံ မနောကမ္မံ နာမ. ဂိဟီနံ ‘‘အယျာ သုခီ ဟောန္တု အဝေရာ အဗျာပဇ္ဈာ’’တိ စိန္တနံ မေတ္တံ မနောကမ္မံ နာမ.

အာဝိ စေဝ ရဟော စာတိ သမ္မုခါ စ ပရမ္မုခါ စ. တတ္ထ နဝကာနံ စီဝရကမ္မာဒီသု သဟာယဘာဝဂမနံ သမ္မုခါ မေတ္တံ ကာယကမ္မံ နာမ၊ ထေရာနံ ပန ပါဒဓောဝနဒါနာဒိဘေဒံ သဗ္ဗမ္ပိ သာမီစိကမ္မံ သမ္မုခါ မေတ္တံ ကာယကမ္မံ နာမ. ဥဘယေဟိပိ ဒုန္နိက္ခိတ္တာနံ ဒါရုဘဏ္ဍာဒီနံ တေသု အဝညံ အကတွာ အတ္တနာ ဒုန္နိက္ခိတ္တာနံ ဝိယ ပဋိသာမနံ ပရမ္မုခါ မေတ္တံ ကာယကမ္မံ နာမ. ‘‘ဒေဝတ္ထေရော တိဿတ္ထေရော’’တိ ဧဝံ ပဂ္ဂယှ ဝစနံ သမ္မုခါ မေတ္တံ ဝစီကမ္မံ နာမ. ဝိဟာရေ အသန္တံ ပန ပဋိပုစ္ဆန္တဿ ‘‘ကဟံ အမှာကံ ဒေဝတ္ထေရော၊ ကဟံ အမှာကံ တိဿတ္ထေရော၊ ကဒါ နု ခေါ အာဂမိဿတီ’’တိ ဧဝံ မမာယနဝစနံ ပရမ္မုခါ မေတ္တံ ဝစီကမ္မံ နာမ. မေတ္တာသိနေဟသိနိဒ္ဓါနိ ပန နယနာနိ ဥမ္မီလေတွာ ပသန္နေန မုခေန ဩလောကနံ သမ္မုခါ မေတ္တံ မနောကမ္မံ နာမ. ‘‘ဒေဝတ္ထေရော တိဿတ္ထေရော အရောဂေါ ဟောတု အပ္ပါဗာဓော’’တိ သမန္နာဟရဏံ ပရမ္မုခါ မေတ္တံ မနောကမ္မံ နာမ.

လာဘာတိ စီဝရာဒယော လဒ္ဓပစ္စယာ. ဓမ္မိကာတိ ကုဟနာဒိဘေဒံ မိစ္ဆာဇီဝံ ဝဇ္ဇေတွာ ဓမ္မေန သမေန ဘိက္ခာစရိယဝတ္တေန ဥပ္ပန္နာ. အန္တမသော ပတ္တပရိယာပန္နမတ္တမ္ပီတိ ပစ္ဆိမကောဋိယာ ပတ္တပရိယာပန္နံ ပတ္တဿ အန္တောဂတံ ဒွတ္တိကဋစ္ဆုဘိက္ခာမတ္တမ္ပိ. အပ္ပဋိဝိဘတ္တဘောဂီတိ ဧတ္ထ ဒွေ ပဋိဝိဘတ္တာနိ နာမ အာမိသပဋိဝိဘတ္တံ ပန ပုဂ္ဂလပဋိဝိဘတ္တဉ္စ. တတ္ထ ‘‘ဧတ္တကံ ဒဿာမိ၊ ဧတ္တကံ န ဒဿာမီ’’တိ ဧဝံ စိတ္တေန ပဋိဝိဘဇနံ အာမိသပဋိဝိဘတ္တံ နာမ. ‘‘အသုကဿ ဒဿာမိ၊ အသုကဿ န ဒဿာမီ’’တိ ဧဝံ စိတ္တေန ဝိဘဇနံ ပန ပုဂ္ဂလပဋိဝိဘတ္တံ နာမ. တဒုဘယမ္ပိ အကတွာ ယော အပ္ပဋိဝိဘတ္တံ ဘုဉ္ဇတိ၊ အယံ အပ္ပဋိဝိဘတ္တဘောဂီ နာမ. သီလဝန္တေဟိ သဗြဟ္မစာရီဟိ သာဓာရဏဘောဂီတိ ဧတ္ထ သာဓာရဏဘောဂိနော ဣဒံ လက္ခဏံ – ယံ ယံ ပဏီတံ လဘတိ၊ တံ တံ နေဝ လာဘေနလာဘံ-နိဇိဂီသနတာမုခေန ဂိဟီနံ ဒေတိ၊ န အတ္တနာ ပရိဘုဉ္ဇတိ၊ ပဋိဂ္ဂဏှန္တော စ ‘‘သံဃေန သာဓာရဏံ ဟောတူ’’တိ ဂဟေတွာ ဃဏ္ဋိံ ပဟရိတွာ ပရိဘုဉ္ဇိတဗ္ဗံ သံဃသန္တကံ ဝိယ ပဿတိ.

ဣမံ ပန သာရဏီယဓမ္မံ ကော ပူရေတိ၊ ကော န ပူရေတိ? ဒုဿီလော တာဝ န ပူရေတိ. န ဟိ တဿ သန္တကံ သီလဝန္တာ ဂဏှန္တိ. ပရိသုဒ္ဓသီလော ပန ဝတ္တံ အခဏ္ဍေန္တော ပူရေတိ. တတြိဒံ ဝတ္တံ – ယော ဟိ ဩဒိဿကံ ကတွာ မာတု ဝါ ပိတု ဝါ အာစရိယုပဇ္ဈာယာဒီနံ ဝါ ဒေတိ၊ သော ဒါတဗ္ဗံ ဒေတိ. သာရဏီယဓမ္မော ပနဿ န ဟောတိ၊ ပလိဗောဓဇဂ္ဂနံ နာမ ဟောတိ. သာရဏီယဓမ္မော ဟိ မုတ္တပလိဗောဓဿ ဝဋ္ဋတိ. တေန ပန ဩဒိဿကံ ဒေန္တေန ဂိလာနဂိလာနုပဋ္ဌာကအာဂန္တုကဂမိကာနဉ္စေဝ နဝပဗ္ဗဇိတဿ စ သင်္ဃာဋိပတ္တဂ္ဂဟဏံ အဇာနန္တဿ ဒါတဗ္ဗံ. ဧတေသံ ဒတွာ အဝသေသံ ထေရာသနတော ပဋ္ဌာယ ထောကံ ထောကံ အဒတွာ ယော ယတ္တကံ ဂဏှာတိ၊ တဿ တတ္တကံ ဒါတဗ္ဗံ. အဝသိဋ္ဌေ အသတိ ပုန ပိဏ္ဍာယ စရိတွာ ထေရာသနတော ပဋ္ဌာယ ယံ ယံ ပဏီတံ၊ တံ တံ ဒတွာ သေသံ ဘုဉ္ဇိတဗ္ဗံ. ‘‘သီလဝန္တေဟီ’’တိ ဝစနတော ဒုဿီလဿ အဒါတုမ္ပိ ဝဋ္ဋတိ.

အယံ ပန သာရဏီယဓမ္မော သုသိက္ခိတာယ ပရိသာယ သုပူရော ဟောတိ၊ သုသိက္ခိတာယ ဟိ ပရိသာယ ယော အညတော လဘတိ၊ သော န ဂဏှာတိ. အညတော အလဘန္တောပိ ပမာဏယုတ္တမေဝ ဂဏှတိ၊ န အတိရေကံ. အယံ ပန သာရဏီယဓမ္မော ဧဝံ ပုနပ္ပုနံ ပိဏ္ဍာယ စရိတွာ လဒ္ဓံ လဒ္ဓံ ဒေန္တဿာပိ ဒွါဒသဟိ ဝဿေဟိ ပူရေတိ၊ န တတော ဩရံ. သစေ ဟိ ဒွါဒသမေ ဝဿေ သာရဏီယဓမ္မပူရကော ပိဏ္ဍပါတပူရံ ပတ္တံ အာသနသာလာယံ ဌပေတွာ နှာယိတုံ ဂစ္ဆတိ၊ သင်္ဃတ္ထေရော စ ‘‘ကဿေသော ပတ္တော’’တိ ဝတွာ ‘‘သာရဏီယဓမ္မပူရကဿာ’’တိ ဝုတ္တေ ‘‘အာဟရထ န’’န္တိ သဗ္ဗံ ပိဏ္ဍပါတံ ဝိစာရေတွာဝ ဘုဉ္ဇိတွာ ရိတ္တပတ္တံ ဌပေတိ. အထ ခေါ သော ဘိက္ခု ရိတ္တပတ္တံ ဒိသွာ ‘‘မယှံ အသေသေတွာဝ ပရိဘုဉ္ဇိံသူ’’တိ ဒေါမနဿံ ဥပ္ပါဒေတိ၊ သာရဏီယဓမ္မော ဘိဇ္ဇတိ၊ ပုန ဒွါဒသ ဝဿာနိ ပူရေတဗ္ဗော ဟောတိ. တိတ္ထိယပရိဝါသသဒိသော ဟေသ၊ သကိံ ခဏ္ဍေ ဇာတေ ပုန ပူရေတဗ္ဗောဝ. ယော ပန ‘‘လာဘာ ဝတ မေ၊ သုလဒ္ဓံ ဝတ မေ၊ ယဿ မေ ပတ္တဂတံ အနာပုစ္ဆာဝ သဗြဟ္မစာရီ ပရိဘုဉ္ဇန္တီ’’တိ သောမနဿံ ဇနေတိ၊ တဿ ပုဏ္ဏော နာမ ဟောတိ.

ဧဝံ ပူရိတသာရဏီယဓမ္မဿ ပန နေဝ ဣဿာ န မစ္ဆရိယံ ဟောတိ၊ မနုဿာနံ ပိယော ဟောတိ၊ အမနုဿာနံ ပိယော ဟောတိ၊ သုလဘပစ္စယော. ပတ္တဂတမဿ ဒိယျမာနမ္ပိ န ခီယတိ၊ ဘာဇနီယဘဏ္ဍဋ္ဌာနေ အဂ္ဂဘဏ္ဍံ လဘတိ၊ ဘယေ ဝါ ဆာတကေ ဝါ ပတ္တေ ဒေဝတာ ဥဿုက္ကံ အာပဇ္ဇန္တိ.

တတြိမာနိ ဝတ္ထူနိ – သေနဂိရိဝါသီ တိဿတ္ထေရော ကိရ မဟာဂိရိဂါမံ ဥပနိဿာယ ဝသတိ၊ ပညာသ မဟာထေရာ နာဂဒီပံ စေတိယဝန္ဒနတ္ထာယ ဂစ္ဆန္တာ ဂိရိဂါမေ ပိဏ္ဍာယ စရိတွာ ကိဉ္စိ အလဒ္ဓါ နိက္ခမိံသု. ထေရော ပဝိသန္တော တေ ဒိသွာ ပုစ္ဆိ – ‘‘လဒ္ဓံ၊ ဘန္တေ’’တိ? ဝိစရိမှာ၊ အာဝုသောတိ. သော အလဒ္ဓဘာဝံ ဉတွာ အာဟ – ‘‘ဘန္တေ၊ ယာဝါဟံ အာဂစ္ဆာမိ၊ တာဝ ဣဓေဝ ဟောထာ’’တိ. မယံ၊ အာဝုသော၊ ပညာသ ဇနာ ပတ္တတေမနမတ္တမ္ပိ န လဘိမှာတိ. ဘန္တေ၊ နေဝါသိကာ နာမ ပဋိဗလာ ဟောန္တိ၊ အလဘန္တာပိ ဘိက္ခာစာရမဂ္ဂသဘာဂံ ဇာနန္တီတိ. ထေရာ အာဂမေသုံ. ထေရော ဂါမံ ပါဝိသိ. ဓုရဂေဟေယေဝ မဟာဥပါသိကာ ခီရဘတ္တံ သဇ္ဇေတွာ ထေရံ ဩလောကယမာနာ ဌိတာ ထေရဿ ဒွါရံ သမ္ပတ္တဿေဝ ပတ္တံ ပူရေတွာ အဒါသိ. သော တံ အာဒါယ ထေရာနံ သန္တိကံ ဂန္တွာ ‘‘ဂဏှထ၊ ဘန္တေ’’တိ သင်္ဃတ္ထေရံ အာဟ. ထေရော ‘‘အမှေဟိ ဧတ္တကေဟိ ကိဉ္စိ န လဒ္ဓံ၊ အယံ သီဃမေဝ ဂဟေတွာ အာဂတော၊ ကိံ နု ခေါ’’တိ သေသာနံ မုခံ ဩလောကေသိ. ထေရော ဩလောကနာကာရေနေဝ ဉတွာ၊ ‘‘ဘန္တေ၊ ဓမ္မေန သမေန လဒ္ဓေါ၊ နိက္ကုက္ကုစ္စာ ဂဏှထာ’’တိ အာဒိတော ပဋ္ဌာယ သဗ္ဗေသံ ယာဝဒတ္ထံ ဒတွာ အတ္တနာပိ ယာဝဒတ္ထံ ဘုဉ္ဇိ.

အထ နံ ဘတ္တကိစ္စာဝသာနေ ထေရာ ပုစ္ဆိံသု – ‘‘ကဒါ၊ အာဝုသော၊ လောကုတ္တရဓမ္မံ ပဋိဝိဇ္ဈီ’’တိ? နတ္ထိ မေ၊ ဘန္တေ၊ လောကုတ္တရဓမ္မောတိ. ဈာနလာဘီသိ၊ အာဝုသောတိ. ဧတမ္ပိ၊ ဘန္တေ၊ နတ္ထီတိ? နနု၊ အာဝုသော၊ ပါဋိဟာရိယန္တိ. သာရဏီယဓမ္မော မေ၊ ဘန္တေ၊ ပူရိတော၊ တဿ မေ ပူရိတကာလတော ပဋ္ဌာယ သစေပိ ဘိက္ခုသတသဟဿံ ဟောတိ၊ ပတ္တဂတံ န ခီယတီတိ. သာဓု သာဓု၊ သပ္ပုရိသ၊ အနုစ္ဆဝိကမိဒံ တုယှန္တိ. ဣဒံ တာဝ ပတ္တဂတံ န ခီယတီတိ ဧတ္ထ ဝတ္ထု.

အယမေဝ ပန ထေရော စေတိယပဗ္ဗတေ ဂိရိဘဏ္ဍမဟာပူဇာယ ဒါနဋ္ဌာနံ ဂန္တွာ ‘‘ဣမသ္မိံ ဒါနေ ကိံ ဝရဘဏ္ဍ’’န္တိ ပုစ္ဆိ. ဒွေ သာဋကာ၊ ဘန္တေတိ. ဧတေ မယှံ ပါပုဏိဿန္တီတိ? တံ သုတွာ အမစ္စော ရညော အာရောစေသိ – ‘‘ဧကော ဒဟရော ဧဝံ ဝဒတီ’’တိ. ‘‘ဒဟရဿ ဧဝံ စိတ္တံ၊ မဟာထေရာနံ ပန သုခုမသာဋကာ ဝဋ္ဋန္တီ’’တိ ဝတွာ ‘‘မဟာထေရာနံ ဒဿာမီ’’တိ ဌပေသိ. တဿ ဘိက္ခုသံဃေ ပဋိပါဋိယာ ဌိတေ ဒေန္တဿ မတ္ထကေ ဌပိတာပိ တေ သာဋကာ ဟတ္ထံ နာရောဟန္တိ၊ အညေဝ အာရောဟန္တိ. ဒဟရဿ ဒါနကာလေ ပန ဟတ္ထံ အာရုဠှာ. သော တဿ ဟတ္ထေ ဌပေတွာ အမစ္စဿ မုခံ ဩလောကေတွာ ဒဟရံ နိသီဒါပေတွာ ဒါနံ ဒတွာ သံဃံ ဝိဿဇ္ဇေတွာ ဒဟရဿ သန္တိကေ နိသီဒိတွာ ‘‘ကဒါ၊ ဘန္တေ၊ ဣမံ ဓမ္မံ ပဋိဝိဇ္ဈိတ္ထာ’’တိ အာဟ. သော ပရိယာယေနပိ အသန္တံ အဝဒန္တော ‘‘နတ္ထိ မယှံ၊ မဟာရာဇ၊ လောကုတ္တရဓမ္မော’’တိ အာဟ. နနု၊ ဘန္တေ၊ ပုဗ္ဗေဝ အဝစုတ္ထာတိ. အာမ၊ မဟာရာဇ၊ သာရဏီယဓမ္မပူရကော အဟံ၊ တဿ မေ ဓမ္မဿ ပူရိတကာလတော ပဋ္ဌာယ ဘာဇနီယဘဏ္ဍဋ္ဌာနေ အဂ္ဂဘဏ္ဍံ ပါပုဏာတီတိ. ‘‘သာဓု သာဓု၊ ဘန္တေ၊ အနုစ္ဆဝိကမိဒံ တုမှာက’’န္တိ ဝတွာ ပက္ကာမိ. ဣဒံ ဘာဇနီယဘဏ္ဍဋ္ဌာနေ အဂ္ဂဘဏ္ဍံ ပါပုဏာတီတိ ဧတ္ထ ဝတ္ထု.

ဗြာဟ္မဏတိဿဘယေ ပန ဘာတရဂါမဝါသိနော နာဂတ္ထေရိယာ အနာရောစေတွာဝ ပလာယိံသု. ထေရီ ပစ္စူသသမယေ ‘‘အတိဝိယ အပ္ပနိဂ္ဃေါသော ဂါမော၊ ဥပဓာရေထ တာဝါ’’တိ ဒဟရဘိက္ခုနိယော အာဟ. တာ ဂန္တွာ သဗ္ဗေသံ ဂတဘာဝံ ဉတွာ အာဂမ္မ ထေရိယာ အာရောစေသုံ. သာ သုတွာ ‘‘မာ တုမှေ တေသံ ဂတဘာဝံ စိန္တယိတ္ထ၊ အတ္တနော ဥဒ္ဒေသပရိပုစ္ဆာယောနိသောမနသိကာရေသုယေဝ ယောဂံ ကရောထာ’’တိ ဝတွာ ဘိက္ခာစာရဝေလာယံ ပါရုပိတွာ အတ္တဒွါဒသမာ ဂါမဒွါရေ နိဂြောဓရုက္ခမူလေ အဋ္ဌာသိ. ရုက္ခေ အဓိဝတ္ထာ ဒေဝတာ ဒွါဒသန္နမ္ပိ ဘိက္ခုနီနံ ပိဏ္ဍပါတံ ဒတွာ၊ ‘‘အယျေ၊ အညတ္ထ မာ ဂစ္ဆထ၊ နိစ္စံ ဣဓေဝ အာဂစ္ဆေယျာထာ’’တိ အာဟ. ထေရိယာ ပန ကနိဋ္ဌဘာတာ နာဂတ္ထေရော နာမ အတ္ထိ. သော ‘‘မဟန္တံ ဘယံ၊ န သက္ကာ ယာပေတုံ၊ ပရတီရံ ဂမိဿာမီ’’တိ အတ္တဒွါဒသမောဝ အတ္တနော ဝသနဋ္ဌာနာ နိက္ခန္တော ‘‘ထေရိံ ဒိသွာ ဂမိဿာမီ’’တိ ဘာတရဂါမံ အာဂတော. ထေရီ ‘‘ထေရာ အာဂတာ’’တိ သုတွာ တေသံ သန္တိကံ ဂန္တွာ ‘‘ကိံ အယျာ’’တိ ပုစ္ဆိ. သော တံ ပဝတ္တိံ အာရောစေသိ. သာ ‘‘အဇ္ဇ ဧကဒိဝသံ ဝိဟာရေဝ ဝသိတွာ သွေ ဂမိဿထာ’’တိ အာဟ. ထေရာ ဝိဟာရံ အဂမိံသု.

ထေရီ ပုနဒိဝသေ ရုက္ခမူလေ ပိဏ္ဍာယ စရိတွာ ထေရံ ဥပသင်္ကမိတွာ ‘‘ဣမံ ပိဏ္ဍပါတံ ပရိဘုဉ္ဇထာ’’တိ အာဟ. ထေရော ‘‘ဝဋ္ဋိဿတိ ထေရီ’’တိ ဝတွာ တုဏှီ အဋ္ဌာသိ. ဓမ္မိကော၊ တာတ၊ ပိဏ္ဍပါတော၊ ကုက္ကုစ္စံ အကတွာ ပရိဘုဉ္ဇထာတိ. ဝဋ္ဋိဿတိ ထေရီတိ? သာ ပတ္တံ ဂဟေတွာ အာကာသေ ခိပိ၊ ပတ္တော အာကာသေ အဋ္ဌာသိ. ထေရော ‘‘သတ္တတာလမတ္တေ ဌိတမ္ပိ ဘိက္ခုနီဘတ္တမေဝ ထေရီ’’တိ ဝတွာ ‘‘ဘယံ နာမ သဗ္ဗကာလံ န ဟောတိ၊ ဘယေ ဝူပသန္တေ အရိယဝံသံ ကထယမာနော၊ ‘ဘော ပိဏ္ဍပါတိက၊ ဘိက္ခုနီဘတ္တံ ဘုဉ္ဇိတွာ ဝီတိနာမယိတ္ထာ’တိ စိတ္တေန အနုဝဒိယမာနော သန္ထမ္ဘိတုံ န သက္ခိဿာမိ၊ အပ္ပမတ္တာ ဟောထ ထေရိယော’’တိ မဂ္ဂံ ပဋိပဇ္ဇိ.

ရုက္ခဒေဝတာပိ ‘‘သစေ ထေရော ထေရိယာ ဟတ္ထတော ပိဏ္ဍပါတံ ပရိဘုဉ္ဇိဿတိ၊ န တံ နိဝတ္တေဿာမိ. သစေ န ပရိဘုဉ္ဇိဿတိ၊ နိဝတ္တေဿာမီ’’တိ စိန္တယမာနာ ဌတွာ ထေရဿ ဂမနံ ဒိသွာ ရုက္ခာ ဩရုယှ ‘‘ပတ္တံ၊ ဘန္တေ၊ ဒေထာ’’တိ ဝတွာ ပတ္တံ ဂဟေတွာ ထေရံ ရုက္ခမူလံယေဝ အာနေတွာ အာသနံ ပညာပေတွာ ပိဏ္ဍပါတံ ဒတွာ ကတဘတ္တကိစ္စံ ပဋိညံ ကာရေတွာ ဒွါဒသ ဘိက္ခုနိယော ဒွါဒသ စ ဘိက္ခူ သတ္တ ဝဿာနိ ဥပဋ္ဌဟိ. ဣဒံ ဒေဝတာ ဥဿုက္ကံ အာပဇ္ဇန္တီတိ ဧတ္ထ ဝတ္ထု. တတြ ဟိ ထေရီ သာရဏီယဓမ္မပူရိကာ အဟောသိ.

အခဏ္ဍာနီတိအာဒီသု ယဿ သတ္တသု အာပတ္တိက္ခန္ဓေသု အာဒိမှိ ဝါ အန္တေ ဝါ သိက္ခာပဒံ ဘိန္နံ ဟောတိ၊ တဿ သီလံ ပရိယန္တေ ဆိန္နသာဋကော ဝိယ ခဏ္ဍံ နာမ. ယဿ ပန ဝေမဇ္ဈေ ဘိန္နံ၊ တဿ ဆိဒ္ဒသာဋကော ဝိယ ဆိဒ္ဒံ နာမ ဟောတိ. ယဿ ပဋိပါဋိယာ ဒွေ တီဏိ ဘိန္နာနိ၊ တဿ ပိဋ္ဌိယံ ဝါ ကုစ္ဆိယံ ဝါ ဥဋ္ဌိတေန ဝိသဘာဂဝဏ္ဏေန ကာဠရတ္တာဒီနံ အညတရဝဏ္ဏာ ဂါဝီ ဝိယ သဗလံ နာမ ဟောတိ. ယဿ အန္တရန္တရာ ဘိန္နာနိ၊ တဿ အန္တရန္တရာ ဝိသဘာဂဗိန္ဒုဝိစိတြာ ဂါဝီ ဝိယ ကမ္မာသံ နာမ ဟောတိ. ယဿ ပန သဗ္ဗေန သဗ္ဗံ အဘိန္နာနိ၊ တဿ တာနိ သီလာနိ အခဏ္ဍာနိ အစ္ဆိဒ္ဒါနိ အသဗလာနိ အကမ္မာသာနိ နာမ ဟောန္တိ. တာနိ ပနေတာနိ တဏှာဒါသဗျတော မောစေတွာ ဘုဇိဿဘာဝကရဏတော ဘုဇိဿာနိ၊ ဗုဒ္ဓါဒီဟိ ဝိညူဟိ ပသတ္ထတ္တာ ဝိညုပ္ပသတ္ထာနိ၊ တဏှာဒိဋ္ဌီဟိ အပရာမဋ္ဌတ္တာ ‘‘ဣဒံ နာမ တွံ အာပန္နပုဗ္ဗော’’တိ ကေနစိ ပရာမဋ္ဌုံ အသက္ကုဏေယျတ္တာ စ အပရာမဋ္ဌာနိ၊ ဥပစာရသမာဓိံ အပ္ပနာသမာဓိံ ဝါ သံဝတ္တယန္တီတိ သမာဓိသံဝတ္တနိကာနီတိ ဝုစ္စန္တိ.

သီလသာမညဂတော ဝိဟရတီတိ တေသု တေသု ဒိသာဘာဂေသု ဝိဟရန္တေဟိ ဘိက္ခူဟိ သဒ္ဓိံ သမာနဘာဝူပဂတသီလော ဝိဟရတိ. သောတာပန္နာဒီနဉှိ သီလံ သမုဒ္ဒန္တရေပိ ဒေဝလောကေပိ ဝသန္တာနံ အညေသံ သောတာပန္နာဒီနံ သီလေန သမာနမေဝ ဟောတိ၊ နတ္ထိ မဂ္ဂသီလေ နာနတ္တံ. တံ သန္ဓာယေတံ ဝုတ္တံ.

ယာယံ ဒိဋ္ဌီတိ မဂ္ဂသမ္ပယုတ္တာ သမ္မာဒိဋ္ဌိ. အရိယာတိ နိဒ္ဒေါသာ. နိယျာတီတိ နိယျာနိကာ. တက္ကရဿာတိ ယော တထာကာရီ ဟောတိ. ဒုက္ခက္ခယာယာတိ သဗ္ဗဒုက္ခက္ခယတ္ထံ. ဒိဋ္ဌိသာမညဂတောတိ သမာနဒိဋ္ဌိဘာဝံ ဥပဂတော ဟုတွာ ဝိဟရတီတိ.

၂. ဒုတိယသာရဏီယသုတ္တဝဏ္ဏနာ

၁၂. ဒုတိယေ ယော တေ ဓမ္မေ ပူရေတိ၊ တံ သဗြဟ္မစာရီနံ ပိယံ ကရောန္တီတိ ပိယကရဏာ. ဂရုံ ကရောန္တီတိ ဂရုကရဏာ. သင်္ဂဟာယာတိ သင်္ဂဏှနတ္ထာယ. အဝိဝါဒါယာတိ အဝိဝဒနတ္ထာယ. သာမဂ္ဂိယာတိ သမဂ္ဂဘာဝတ္ထာယ. ဧကီဘာဝါယာတိ ဧကဘာဝတ္ထာယ နိန္နာနာကရဏာယ. သံဝတ္တန္တီတိ ဝတ္တန္တိ ပဝတ္တန္တိ.

၃. နိဿာရဏီယသုတ္တဝဏ္ဏနာ

၁၃. တတိယေ နိဿာရဏီယာ ဓာတုယောတိ နိဿရဏဓာတုယောဝ. မေတ္တာ ဟိ ခေါ မေ စေတောဝိမုတ္တီတိ ဧတ္ထ ပစ္စနီကဓမ္မေဟိ ဝိမုတ္တတ္တာ တိကစတုက္ကဇ္ဈာနိကာ မေတ္တာဝ မေတ္တာစေတောဝိမုတ္တိ နာမ. ဘာဝိတာတိ ဝဍ္ဎိတာ. ဗဟုလီကတာတိ ပုနပ္ပုနံ ကတာ. ယာနီကတာတိ ယုတ္တယာနသဒိသာ ကတာ. ဝတ္ထုကတာတိ ပတိဋ္ဌာ ကတာ. အနုဋ္ဌိတာတိ အဓိဋ္ဌိတာ. ပရိစိတာတိ သမန္တတော စိတာ အာစိတာ ဥပစိတာ. သုသမာရဒ္ဓါတိ သုပ္ပဂုဏကရဏေန သုဋ္ဌု သမာရဒ္ဓါ. ပရိယာဒါယ တိဋ္ဌတီတိ ပရိယာဒိယိတွာ ဂဟေတွာ တိဋ္ဌတိ. မာ ဟေဝန္တိဿ ဝစနီယောတိ ယသ္မာ အဘူတဗျာကရဏံ ဗျာကရောတိ၊ တသ္မာ ‘‘မာ ဧဝံ ဘဏီ’’တိ ဝတ္တဗ္ဗော. ယဒိဒံ မေတ္တာစေတောဝိမုတ္တီတိ ယာ အယံ မေတ္တာစေတောဝိမုတ္တိ၊ ဣဒံ နိဿရဏံ ဗျာပါဒဿ၊ ဗျာပါဒတော နိဿဋာတိ အတ္ထော. ယော ပန မေတ္တာယ တိကစတုက္ကဇ္ဈာနတော ဝုဋ္ဌိတော သင်္ခါရေ သမ္မသိတွာ တတိယမဂ္ဂံ ပတွာ ‘‘ပုန ဗျာပါဒေါ နတ္ထီ’’တိ တတိယဖလေန နိဗ္ဗာနံ ပဿတိ၊ တဿ စိတ္တံ အစ္စန္တနိဿရဏံ ဗျာပါဒဿ. ဧတေနုပါယေန သဗ္ဗတ္ထ အတ္ထော ဝေဒိတဗ္ဗော.

အနိမိတ္တာစေတောဝိမုတ္တီတိ ဗလဝဝိပဿနာ. ဒီဃဘာဏကာ ပန အရဟတ္တဖလသမာပတ္တီတိ ဝဒန္တိ. သာ ဟိ ရာဂနိမိတ္တာဒီနဉ္စေဝ ရူပနိမိတ္တာဒီနဉ္စ နိစ္စနိမိတ္တာဒီနဉ္စ အဘာဝါ အနိမိတ္တာတိ ဝုတ္တာ. နိမိတ္တာနုသာရီတိ ဝုတ္တပ္ပဘေဒံ နိမိတ္တံ အနုသရဏသဘာဝံ.

အသ္မီတိ အသ္မိမာနော. အယမဟမသ္မီတိ ပဉ္စသု ခန္ဓေသု အယံ နာမ အဟံ အသ္မီတိ. ဧတ္တာဝတာ အရဟတ္တံ ဗျာကတံ ဟောတိ. ဝိစိကိစ္ဆာကထံကထာသလ္လန္တိ ဝိစိကိစ္ဆာဘူတံ ကထံကထာသလ္လံ. မာ ဟေဝန္တိဿ ဝစနီယောတိ သစေ တေ ပဌမမဂ္ဂဝဇ္ဈာ ဝိစိကိစ္ဆာ ဥပ္ပဇ္ဇတိ၊ အရဟတ္တဗျာကရဏံ မိစ္ဆာ ဟောတိ၊ တသ္မာ ‘‘မာ အဘူတံ ဂဏှီ’’တိ ဝါရေတဗ္ဗော. အသ္မီတိ မာနသမုဂ္ဃါတောတိ အရဟတ္တမဂ္ဂေါ. အရဟတ္တမဂ္ဂဖလဝသေန ဟိ နိဗ္ဗာနေ ဒိဋ္ဌေ ပုန အသ္မိမာနော နတ္ထီတိ အရဟတ္တမဂ္ဂေါ ‘‘အသ္မီတိ မာနသမုဂ္ဃါတော’’တိ ဝုတ္တော. ဣတိ ဣမသ္မိံ သုတ္တေ အဘူတဗျာကရဏံ နာမ ကထိတံ.

၄. ဘဒ္ဒကသုတ္တဝဏ္ဏနာ

၁၄. စတုတ္ထေ န ဘဒ္ဒကန္တိ န လဒ္ဓကံ. တတ္ထ ယော ဟိ ဘီတဘီတော မရတိ၊ တဿ န ဘဒ္ဒကံ မရဏံ ဟောတိ. ယော အပါယေ ပဋိသန္ဓိံ ဂဏှာတိ၊ တဿ န ဘဒ္ဒိကာ ကာလကိရိယာ ဟောတိ. ကမ္မာရာမောတိအာဒီသု အာရမဏံ အာရာမော၊ အဘိရတီတိ အတ္ထော. ဝိဟာရကရဏာဒိမှိ နဝကမ္မေ အာရာမော အဿာတိ ကမ္မာရာမော. တသ္မိံယေဝ ကမ္မေ ရတောတိ ကမ္မရတော. တဒေဝ ကမ္မာရာမတံ ပုနပ္ပုနံ ယုတ္တောတိ အနုယုတ္တော. ဧသ နယော သဗ္ဗတ္ထ. ဧတ္ထ စ ဘဿန္တိ အာလာပသလ္လာပေါ. နိဒ္ဒါတိ သောပ္ပံ. သင်္ဂဏိကာတိ ဂဏသင်္ဂဏိကာ. သာ ‘‘ဧကဿ ဒုတိယော ဟောတိ၊ ဒွိန္နံ ဟောတိ တတိယကော’’တိအာဒိနာ နယေန ဝေဒိတဗ္ဗာ. သံသဂ္ဂေါတိ ဒဿနသဝနသမုလ္လာပသမ္ဘောဂကာယသံသဂ္ဂဝသေန ပဝတ္တော သံသဋ္ဌဘာဝေါ. ပပဉ္စောတိ တဏှာဒိဋ္ဌိမာနဝသေန ပဝတ္တော မဒနာကာရသဏ္ဌိတော ကိလေသပပဉ္စော. သက္ကာယန္တိ တေဘူမကဝဋ္ဋံ. သမ္မာ ဒုက္ခဿ အန္တကိရိယာယာတိ ဟေတုနာ နယေန သကလဝဋ္ဋဒုက္ခဿ ပရိဝဋုမပရိစ္ဆေဒကရဏတ္ထံ. မဂေါတိ မဂသဒိသော. နိပ္ပပဉ္စပဒေတိ နိဗ္ဗာနပဒေ. အာရာဓယီတိ ပရိပူရယိ တံ သမ္ပာဒေသီတိ.

၅. အနုတပ္ပိယသုတ္တဝဏ္ဏနာ

၁၅. ပဉ္စမေ အနုတပ္ပါတိ အနုသောစိတဗ္ဗာ အနုတာပကာရီ. ဣမေသု ဒွီသုပိ သုတ္တေသု ဂါထာသု စ ဝဋ္ဋဝိဝဋ္ဋံ ကထိတံ.

၆. နကုလပိတုသုတ္တဝဏ္ဏနာ

၁၆. ဆဋ္ဌေ ဗာဠှဂိလာနောတိ အဓိမတ္တဂိလာနော. ဧတဒဝေါစာတိ သာမိကဿ ဘေသဇ္ဇံ ကတွာ ဗျာဓိံ ဝူပသမေတုံ အသက္ကောန္တီ ဣဒါနိ သီဟနာဒံ နဒိတွာ သစ္စကိရိယာယ ဗျာဓိံ ဝူပသမေတုံ သန္တိကေ နိသီဒိတွာ ဧတံ ‘‘မာ ခေါ တွ’’န္တိအာဒိဝစနံ အဝေါစ. သာပေက္ခောတိ သတဏှော. န နကုလမာတာတိ ဧတ္ထ န-ကာရော န သက္ခတီတိ ဧဝံ ပရပဒေန ယောဇေတဗ္ဗော. သန္ထရိတုန္တိ နိစ္ဆိဒ္ဒံ ကာတုံ၊ သဏ္ဌပေတုန္တိ အတ္ထော. ဝေဏိံ ဩလိခိတုန္တိ ဧဠကလောမာနိ ကပ္ပေတွာ ဝိဇဋေတွာ ဝေဏိံ ကာတုံ.

အညံ ဃရံ ဂမိဿတီတိ အညံ သာမိကံ ဂဏှိဿတိ. သောဠသ ဝဿာနိ ဂဟဋ္ဌကံ ဗြဟ္မစရိယံ သမာစိဏ္ဏန္တိ ဣတော သောဠသဝဿမတ္ထကေ ဂဟဋ္ဌဗြဟ္မစရိယဝါသော သမာစိဏ္ဏော. ဒဿနကာမတရာတိ အတိရေကေန ဒဿနကာမာ. ဣမေဟိ တီဟိ အင်္ဂေဟိ သီဟနာဒံ နဒိတွာ ‘‘ဣမိနာ သစ္စေန တဝ သရီရေ ဗျာဓိ ဖာသု ဟောတူ’’တိ သစ္စကိရိယံ အကာသိ.

ဣဒါနိ ဘဂဝန္တံ သက္ခိံ ကတွာ အတ္တနော သီလာဒိဂုဏေဟိပိ သစ္စကိရိယံ ကာတုံ သိယာ ခေါ ပန တေတိအာဒိမာဟ. တတ္ထ ပရိပူရကာရိနီတိ သမတ္တကာရိနီ. စေတောသမထဿာတိ သမာဓိကမ္မဋ္ဌာနဿ. ဩဂါဓပ္ပတ္တာတိ ဩဂါဓံ အနုပ္ပဝေသံ ပတ္တာ. ပတိဂါဓပ္ပတ္တာတိ ပတိဂါဓံ ပတိဋ္ဌံ ပတ္တာ. အဿာသပ္ပတ္တာတိ အဿာသံ အဝဿယံ ပတ္တာ. ဝေသာရဇ္ဇပ္ပတ္တာတိ သောမနဿဉာဏံ ပတ္တာ. အပရပ္ပစ္စယာတိ ပရပ္ပစ္စယော ဝုစ္စတိ ပရသဒ္ဓါ ပရပတ္တိယာယနာ၊ တာယ ဝိရဟိတာတိ အတ္ထော. ဣမေဟိ တီဟိ အင်္ဂေဟိ အတ္တနော ဂုဏေ အာရဗ္ဘ သစ္စကိရိယံ အကာသိ. ဂိလာနာ ဝုဋ္ဌိတောတိ ဂိလာနော ဟုတွာ ဝုဋ္ဌိတော. ယာဝတာတိ ယတ္တိကာယော. တာသံ အညတရာတိ တာသံ အန္တရေ ဧကာ. အနုကမ္ပိကာတိ ဟိတာနုကမ္ပိကာ. ဩဝါဒိကာတိ ဩဝါဒဒါယိကာ. အနုသာသိကာတိ အနုသိဋ္ဌိဒါယိကာ.

၇. သောပ္ပသုတ္တဝဏ္ဏနာ

၁၇. သတ္တမေ ပဋိသလ္လာနာ ဝုဋ္ဌိတောတိ ဧကီဘာဝါယ ဓမ္မနိဇ္ဈာနက္ခန္တိတော ဖလသမာပတ္တိဝိဟာရတော ဝုဋ္ဌိတော. ယထာဝိဟာရန္တိ အတ္တနော အတ္တနော ဝသနဝိဟာရံ. နဝါတိ ပဗ္ဗဇ္ဇာယ နဝကာ. တေ ပဉ္စသတမတ္တာ အဟေသုံ. ကာကစ္ဆမာနာတိ ကာကသဒ္ဒံ ကရောန္တာ ဒန္တေ ခါဒန္တာ. ထေရာတိ ထိရဘာဝံ ပတ္တာ. တေန နောတိ တေန နု. သေယျသုခါဒီနိ ဟေဋ္ဌာ ဝုတ္တတ္ထာနေဝ. ရဋ္ဌိကောတိ ယော ရဋ္ဌံ ဘုဉ္ဇတိ. ပေတ္တဏိကောတိ ယော ပိတရာ ဘုတ္တာနုဘုတ္တံ ဘုဉ္ဇတိ. သေနာပတိကောတိ သေနာယ ဇေဋ္ဌကော. ဂါမဂါမဏိကောတိ ဂါမဘောဇကော. ပူဂဂါမဏိကောတိ ဂဏဇေဋ္ဌကော. အဝိပဿကော ကုသလာနံ ဓမ္မာနန္တိ ကုသလာနံ ဓမ္မာနံ အနေသကော အဂဝေသကော ဟုတွာ. ဗောဓိပက္ခိယာနံ ဓမ္မာနန္တိ သတ္တတိံသာယ ဗောဓိပက္ခိယဓမ္မာနံ.

၈. မစ္ဆဗန္ဓသုတ္တဝဏ္ဏနာ

၁၈. အဋ္ဌမေ မစ္ဆိကန္တိ မစ္ဆဃာတကံ. ဟတ္ထိနာ ယာတီတိ ဟတ္ထိယာယီ. ပရတောပိ ဧသေဝ နယော. ဝဇ္ဈေတိ ဝဓိတဗ္ဗေ. ဝဓာယနီတေတိ ဝဓာယ ဥပနီတေ. ပါပကေန မနသာတိ လာမကေန ဝဓကစိတ္တေန. ပါဠိယံ ပန ဝဓာယုပနီတေတိ လိခန္တိ. မာဂဝိကောတိ မိဂဃာတကော. ကော ပန ဝါဒေါ မနုဿဘူတန္တိ ယော မနုဿဘူတံ ပါပကေန မနသာ အနုပေက္ခတိ၊ တဿ သမ္ပတ္တိယာ အဘာဝေ ကိမေဝ ဝတ္တဗ္ဗံ. ဣဒံ ပါပကဿ ကမ္မုနော အနိဋ္ဌဖလဘာဝံ ဒဿေတုံ ဝုတ္တံ. ယေသံ ပန တာဒိသံ ကမ္မံ ကရောန္တာနမ္ပိ ယသပဋိလာဘော ဟောတိ၊ တေသံ တံ အကုသလံ နိဿာယ ကုသလံ ဝိပစ္စတီတိ ဝေဒိတဗ္ဗံ. တေန ပနဿ အကုသလကမ္မေန ဥပဟတတ္တာ ဝိပါကော န စိရဋ္ဌိတိကော ဟောတိ. ဣမသ္မိံ သုတ္တေ အကုသလပက္ခောဝ ကထိတော.

၉. ပဌမမရဏဿတိသုတ္တဝဏ္ဏနာ

၁၉. နဝမေ နာတိကေတိ ဧဝံနာမကေ ဂါမေ. ဂိဉ္ဇကာဝသထေတိ ဣဋ္ဌကာမယေ ပါသာဒေ. အမတောဂဓာတိ နိဗ္ဗာနောဂဓာ၊ နိဗ္ဗာနပတိဋ္ဌာတိ အတ္ထော. ဘာဝေထ နောတိ ဘာဝေထ နု. မရဏဿတိန္တိ မရဏဿတိကမ္မဋ္ဌာနံ. အဟော ဝတာတိ ပတ္ထနတ္ထေ နိပါတော. ဗဟုံ ဝတ မေ ကတံ အဿာတိ တုမှာကံ သာသနေ မမ ကိစ္စံ ဗဟု ကတံ အဿ. တဒန္တရန္တိ တံ အန္တရံ ခဏံ ဩကာသံ. အဿသိတွာ ဝါ ပဿသာမီတိ ဧတ္ထ အဿာသော ဝုစ္စတိ အန္တော ပဝိသနဝါတော၊ ပဿာသော ဗဟိ နိက္ခမနဝါတော. ဣတိ အယံ ဘိက္ခု ယာဝ အန္တော ပဝိဋ္ဌဝါတော ဗဟိ နိက္ခမတိ၊ ဗဟိ နိက္ခန္တော ဝါတော အန္တော ပဝိသတိ၊ တာဝ ဇီဝိတံ ပတ္ထေန္တော ဧဝမာဟ. ဒန္ဓန္တိ မန္ဒံ ဂရုကံ အသီဃပ္ပဝတ္တံ. အာသဝါနံ ခယာယာတိ အရဟတ္တဖလတ္ထာယ. ဣမသ္မိံ သုတ္တေ မရဏဿတိ အရဟတ္တံ ပါပေတွာ ကထိတာတိ.

၁၀. ဒုတိယမရဏဿတိသုတ္တဝဏ္ဏနာ

၂၀. ဒသမေ ပတိဂတာယာတိ ပဋိပန္နာယ. ဣတိ ပဋိသဉ္စိက္ခတီတိ ဧဝံ ပစ္စဝေက္ခတိ. သော မမဿ အန္တရာယောတိ ဧတ္ထ တိဝိဓော အန္တရာယော ဇီဝိတန္တရာယော၊ သမဏဓမ္မန္တရာယော၊ ပုထုဇ္ဇနကာလကိရိယံ ကရောန္တဿ သဂ္ဂန္တရာယော စေဝ မဂ္ဂန္တရာယော စာတိ. တံ သဗ္ဗမ္ပိ သန္ဓာယေဝမာဟ. ဗျာပဇ္ဇေယျာတိ အဇိဏ္ဏကာဒိဝသေန ဝိပဇ္ဇေယျ. အဓိမတ္တောတိ ဗလဝါ. ဆန္ဒောတိ ကတ္တုကမျတာဆန္ဒော. ဝါယာမောတိ ပယောဂဝီရိယံ. ဥဿာဟောတိ ဥဿာပနဝီရိယံ. ဥဿောဠှီတိ သမ္ပာဒနဝီရိယံ. အပ္ပဋိဝါနီတိ အနုက္ကဏ္ဌနာ အပ္ပဋိသင်္ဃရဏာ. သေသံ သဗ္ဗတ္ထ ဥတ္တာနတ္ထမေဝါတိ.

သာရဏီယဝဂ္ဂေါ ဒုတိယော.

၃. အနုတ္တရိယဝဂ္ဂေါ

၁-၂. သာမကသုတ္တာဒိဝဏ္ဏနာ

၂၁-၂၂. တတိယဿ ပဌမေ သာမဂါမကေတိ သာမကာနံ ဥဿန္နတ္တာ ဧဝံလဒ္ဓနာမေ ဂါမကေ. ပေါက္ခရဏိယာယန္တိ ပေါက္ခရဏိယာနာမကေ ဝိဟာရေ. အဘိက္ကန္တာယ ရတ္တိယာတိ ရတ္တိယာ ပဌမယာမံ အတိက္ကမ္မ မဇ္ဈိမယာမေ သမ္ပတ္တေ. အဘိက္ကန္တဝဏ္ဏာတိ အဘိက္ကန္တအတိမနာပဝဏ္ဏာ. ကေဝလကပ္ပန္တိ သကလကပ္ပံ. ပေါက္ခရဏိယံ ဩဘာသေတွာတိ ပေါက္ခရဏိယာနာမကံ မဟာဝိဟာရံ အတ္တနော ဩဘာသေန ဖရိတွာ. သမနုညောတိ သမာနအနုညော သမာနစိတ္တော. ဒေါဝစဿတာတိ ဒုဗ္ဗစဘာဝေါ. ပါပမိတ္တတာတိ လာမကမိတ္တတာ. ဣမသ္မိံ သုတ္တေ ပရိဟာနိယဓမ္မာဝ ကထိတာ. ဒုတိယေ အပရိဟာနိယဓမ္မာ လောကုတ္တရမိဿကာ ကထိတာ.

၃. ဘယသုတ္တဝဏ္ဏနာ

၂၃. တတိယေ ကာမရာဂရတ္တာယန္တိ ကာမရာဂရတ္တော အယံ. ဆန္ဒရာဂဝိနိဗဒ္ဓေါတိ ဆန္ဒရာဂေန ဝိနိဗဒ္ဓေါ. ဘယာတိ စိတ္တုတြာသဘယာ. ပင်္ကာတိ ကိလေသပင်္ကတော. သင်္ဂေါ ပင်္ကော စ ဥဘယန္တိ သင်္ဂေါ စ ပင်္ကော စ ဣဒမ္ပိ ဥဘယံ. ဧတေ ကာမာ ပဝုစ္စန္တိ၊ ယတ္ထ သတ္တော ပုထုဇ္ဇနောတိ ယသ္မိံ သင်္ဂေ စ ပင်္ကေ စ ပုထုဇ္ဇနော သတ္တော လဂ္ဂေါ လဂ္ဂိတော ပလိဗုဒ္ဓေါ. ဥပါဒါနေတိ စတုဗ္ဗိဓေ ဥပါဒါနေ. ဇာတိမရဏသမ္ဘဝေတိ ဇာတိယာ စ မရဏဿ စ သမ္ဘဝေ ပစ္စယဘူတေ. အနုပါဒါ ဝိမုစ္စန္တီတိ အနုပါဒိယိတွာ ဝိမုစ္စန္တိ. ဇာတိမရဏသင်္ခယေတိ ဇာတိမရဏာနံ သင်္ခယသင်္ခါတေ နိဗ္ဗာနေ၊ နိဗ္ဗာနာရမ္မဏာယ ဝိမုတ္တိယာ ဝိမုစ္စန္တီတိ အတ္ထော. ဣမသ္မိံ ဌာနေ ဝိဝဋ္ဋေတွာ အရဟတ္တမေဝ ပတ္တော ဧသ ဘိက္ခု. ဣဒါနိ တံ ခီဏာသဝံ ထောမေန္တော တေ ခေမပ္ပတ္တာတိအာဒိမာဟ. တတ္ထ ခေမပ္ပတ္တာတိ ခေမဘာဝံ ပတ္တာ. သုခိနောတိ လောကုတ္တရသုခေန သုခိတာ. ဒိဋ္ဌဓမ္မာဘိနိဗ္ဗုတာတိ အဗ္ဘန္တရေ ကိလေသာဘာဝေန ဒိဋ္ဌဓမ္မေယေဝ အဘိနိဗ္ဗုတာ. ဣမသ္မိံ သုတ္တေ ဝဋ္ဋမေဝ ကထေတွာ ဂါထာသု ဝဋ္ဋဝိဝဋံ ကထိတံ.

၄. ဟိမဝန္တသုတ္တဝဏ္ဏနာ

၂၄. စတုတ္ထေ ပဒါလေယျာတိ ဘိန္ဒေယျ. ဆဝါယာတိ လာမိကာယ. သမာဓိဿ သမာပတ္တိကုသလော ဟောတီတိ အာဟာရသပ္ပါယဥတုသပ္ပါယာနိ ပရိဂ္ဂဟေတွာ သမာဓိံ သမာပဇ္ဇိတုံ ကုသလော ဟောတိ ဆေကော သမတ္ထော ပဋိဗလော. သမာဓိဿ ဌိတိကုသလောတိ သမာဓိဿ ဌိတိယံ ကုသလော၊ သမာဓိံ ဌပေတုံ သက္ကောတီတိ အတ္ထော. သမာဓိဿ ဝုဋ္ဌာနကုသလောတိ သမာဓိဿ ဝုဋ္ဌာနေ ကုသလော၊ ယထာပရိစ္ဆေဒေန ဝုဋ္ဌာတုံ သက္ကောတီတိ အတ္ထော. သမာဓိဿ ကလ္လိတကုသလောတိ သမာဓိဿ ကလ္လတာယ ကုသလော၊ သမာဓိစိတ္တံ ဟာသေတုံ ကလ္လံ ကာတုံ သက္ကောတီတိ အတ္ထော. သမာဓိဿ ဂေါစရကုသလောတိ သမာဓိဿ အသပ္ပါယေ အနုပကာရကေ ဓမ္မေ ဝဇ္ဇေတွာ သပ္ပါယေ ဥပကာရကေ သေဝန္တောပိ၊ ‘‘အယံ သမာဓိနိမိတ္တာရမ္မဏော အယံ လက္ခဏာရမ္မဏော’’တိ ဇာနန္တောပိ သမာဓိဿ ဂေါစရကုသလော နာမ ဟောတိ. သမာဓိဿ အဘိနီဟာရကုသလောတိ ဥပရိဥပရိသမာပတ္တိသမာပဇ္ဇနတ္ထာယ ပဌမဇ္ဈာနာဒိသမာဓိံ အဘိနီဟရိတုံ သက္ကောန္တော သမာဓိဿ အဘိနီဟာရကုသလော နာမ ဟောတိ. သော ပဌမဇ္ဈာနာ ဝုဋ္ဌာယ ဒုတိယံ သမာပဇ္ဇတိ၊ ဒုတိယဇ္ဈာနာ။ပေ။ တတိယဇ္ဈာနာ ဝုဋ္ဌာယ စတုတ္ထံ သမာပဇ္ဇတီတိ.

၅. အနုဿတိဋ္ဌာနသုတ္တဝဏ္ဏနာ

၂၅. ပဉ္စမေ အနုဿတိဋ္ဌာနာနီတိ အနုဿတိကာရဏာနိ. ဣတိပိ သော ဘဂဝါတိအာဒီနိ ဝိသုဒ္ဓိမဂ္ဂေ (ဝိသုဒ္ဓိ. ၁.၁၂၃ အာဒယော) ဝိတ္ထာရိတာနေဝ. ဣဒမ္ပိ ခေါ၊ ဘိက္ခဝေ၊ အာရမ္မဏံ ကရိတွာတိ ဣဒံ ဗုဒ္ဓါနုဿတိကမ္မဋ္ဌာနံ အာရမ္မဏံ ကရိတွာ. ဝိသုဇ္ဈန္တီတိ ပရမဝိသုဒ္ဓိံ နိဗ္ဗာနံ ပါပုဏန္တိ. သေသံ သဗ္ဗတ္ထ ဥတ္တာနတ္ထမေဝ. ဣမသ္မိံ ပန သုတ္တေ ဆ အနုဿတိဋ္ဌာနာနိ မိဿကာနိ ကထိတာနီတိ ဝေဒိတဗ္ဗာနိ.

၆. မဟာကစ္စာနသုတ္တဝဏ္ဏနာ

၂၆. ဆဋ္ဌေ သမ္ဗာဓေတိ ပဉ္စကာမဂုဏသမ္ဗာဓေ. ဩကာသာဓိဂမောတိ ဧတ္ထ ဩကာသာ ဝုစ္စန္တိ ဆ အနုဿတိဋ္ဌာနာနိ၊ တေသံ အဓိဂမော. ဝိသုဒ္ဓိယာတိ ဝိသုဇ္ဈနတ္ထာယ. သောကပရိဒေဝါနံ သမတိက္ကမာယာတိ သောကာနဉ္စ ပရိဒေဝါနဉ္စ သမတိက္ကမတ္ထာယ. အတ္ထင်္ဂမာယာတိ အတ္ထံ ဂမနတ္ထာယ. ဉာယဿ အဓိဂမာယာတိ သဟဝိပဿနကဿ မဂ္ဂဿ အဓိဂမနတ္ထာယ. နိဗ္ဗာနဿ သစ္ဆိကိရိယာယာတိ အပစ္စယပရိနိဗ္ဗာနဿ ပစ္စက္ခကိရိယတ္ထာယ.

သဗ္ဗသောတိ သဗ္ဗာကာရေန. အာကာသသမေနာတိ အလဂ္ဂနဋ္ဌေန စေဝ အပလိဗုဒ္ဓဋ္ဌေန စ အာကာသသဒိသေန. ဝိပုလေနာတိ န ပရိတ္တကေန. မဟဂ္ဂတေနာတိ မဟန္တဘာဝံ ဂတေန၊ မဟန္တေဟိ ဝါ အရိယသာဝကေဟိ ဂတေန၊ ပဋိပန္နေနာတိ အတ္ထော. အပ္ပမာဏေနာတိ ဖရဏအပ္ပမာဏတာယ အပ္ပမာဏေန. အဝေရေနာတိ အကုသလဝေရပုဂ္ဂလဝေရရဟိတေန. အဗျာပဇ္ဈေနာတိ ကောဓဒုက္ခဝဇ္ဇိတေန. သဗ္ဗမေတံ ဗုဒ္ဓါနုဿတိစိတ္တမေဝ သန္ဓာယ ဝုတ္တံ. ပရတောပိ ဧသေဝ နယော. ဝိသုဒ္ဓိဓမ္မာတိ ဝိသုဇ္ဈနသဘာဝါ. ဣမသ္မိမ္ပိ သုတ္တေ ဆ အနုဿတိဋ္ဌာနာနိ မိဿကာနေဝ ကထိတာနီတိ.

၇. ပဌမသမယသုတ္တဝဏ္ဏနာ

၂၇. သတ္တမေ မနောဘာဝနီယဿာတိ ဧတ္ထ မနံ ဘာဝေတိ ဝဍ္ဎေတီတိ မနောဘာဝနီယော. ဒဿနာယာတိ ဒဿနတ္ထံ. နိဿရဏန္တိ နိဂ္ဂမနံ ဝူပသမနံ. ဓမ္မံ ဒေသေတီတိ ကာမရာဂပ္ပဇဟနတ္ထာယ အသုဘကမ္မဋ္ဌာနံ ကထေတိ. ဒုတိယဝါရာဒီသု ဗျာပါဒပ္ပဟာနာယ မေတ္တာကမ္မဋ္ဌာနံ၊ ထိနမိဒ္ဓပ္ပဟာနာယ ထိနမိဒ္ဓဝိနောဒနကမ္မဋ္ဌာနံ၊ အာလောကသညံ ဝါ ဝီရိယာရမ္ဘဝတ္ထုအာဒီနံ ဝါ အညတရံ၊ ဥဒ္ဓစ္စကုက္ကုစ္စပ္ပဟာနာယ သမထကမ္မဋ္ဌာနံ၊ ဝိစိကိစ္ဆာပဟာနာယ တိဏ္ဏံ ရတနာနံ ဂုဏကထံ ကထေန္တော ဓမ္မံ ဒေသေတီတိ ဝေဒိတဗ္ဗော. အာဂမ္မာတိ အာရဗ္ဘ. မနသိကရောတောတိ အာရမ္မဏဝသေန စိတ္တေ ကရောန္တဿ. အနန္တရာ အာသဝါနံ ခယော ဟောတီတိ အနန္တရာယေန အာသဝါနံ ခယော ဟောတိ.

၈. ဒုတိယသမယသုတ္တဝဏ္ဏနာ

၂၈. အဋ္ဌမေ မဏ္ဍလမာဠေတိ ဘောဇနသာလာယ. စာရိတ္တကိလမထောတိ ပိဏ္ဍပါတစရိယာယ ဥပ္ပန္နကိလမထော. ဘတ္တကိလမထောတိ ဘတ္တဒရထော. ဝိဟာရပစ္ဆာယာယန္တိ ဝိဟာရပစ္စန္တေ ဆာယာယ. ယဒေဝဿ ဒိဝါ သမာဓိနိမိတ္တံ မနသိကတံ ဟောတီတိ ယံ ဧဝ တဿ တတော ပုရိမဒိဝသဘာဂေ သမထနိမိတ္တံ စိတ္တေ ကတံ ဟောတိ. တဒေဝဿ တသ္မိံ သမယေ သမုဒါစရတီတိ တံယေဝ ဧတဿ တသ္မိံ သမယေ ဒိဝါဝိဟာရေ နိသိန္နဿ မနောဒွါရေ သဉ္စရတိ. ဩဇဋ္ဌာယီတိ ဩဇာယ ဌိတော ပတိဋ္ဌိတော. ဖာသုကဿ ဟောတီတိ ဖာသုကံ အဿ ဟောတိ. သမ္မုခါတိ ကထေန္တဿ သမ္မုခဋ္ဌာနေ. သုတန္တိ သောတေန သုတံ. ပဋိဂ္ဂဟိတန္တိ စိတ္တေန ပဋိဂ္ဂဟိတံ.

၉. ဥဒါယီသုတ္တဝဏ္ဏနာ

၂၉. နဝမေ ဥဒါယိန္တိ လာဠုဒါယိတ္ထေရံ. သုဏောမဟံ၊ အာဝုသောတိ၊ အာဝုသော၊ နာဟံ ဗဓိရော၊ သုဏာမိ ဘဂဝတော ဝစနံ၊ ပဉှံ ပန ဥပပရိက္ခာမီတိ. အဓိစိတ္တန္တိ သမာဓိဝိပဿနာစိတ္တံ. ဣဒံ၊ ဘန္တေ၊ အနုဿတိဋ္ဌာနန္တိ ဣဒံ ဈာနတ္တယသင်္ခါတံ အနုဿတိကာရဏံ. ဒိဋ္ဌဓမ္မသုခဝိဟာရာယ သံဝတ္တတီတိ ဣမသ္မိံယေဝ အတ္တဘာဝေ သုခဝိဟာရတ္ထာယ ပဝတ္တတိ. အာလောကသညန္တိ အာလောကနိမိတ္တေ ဥပ္ပန္နသညံ. ဒိဝါ သညံ အဓိဋ္ဌာတီတိ ဒိဝါတိ သညံ ဌပေတိ. ယထာ ဒိဝါ တထာ ရတ္တိန္တိ ယထာနေန ဒိဝါ အာလောကသညာ မနသိကတာ၊ ရတ္တိမ္ပိ တထေဝ တံ မနသိ ကရောတိ. ယထာ ရတ္တိံ တထာ ဒိဝါတိ ယထာ ဝါနေန ရတ္တိံ အာလောကသညာ မနသိကတာ၊ ဒိဝါပိ တံ တထေဝ မနသိ ကရောတိ. ဝိဝဋေနာတိ ပါကဋေန. အပရိယောနဒ္ဓေနာတိ နီဝရဏေဟိ အနောနဒ္ဓေန. သပ္ပဘာသံ စိတ္တံ ဘာဝေတီတိ ဒိဗ္ဗစက္ခုဉာဏတ္ထာယ သဟောဘာသကံ စိတ္တံ ဗြူဟေတိ ဝဍ္ဎေတိ. ယံ ပန ‘‘အာလောကသညံ မနသိ ကရောတီ’’တိ ဝုတ္တံ၊ တံ ထိနမိဒ္ဓဝိနောဒနာလောကသညံ သန္ဓာယ ဝုတ္တံ၊ န ဒိဗ္ဗစက္ခုဉာဏာလောကန္တိ ဝေဒိတဗ္ဗံ. ဉာဏဒဿနပ္ပဋိလာဘာယာတိ ဒိဗ္ဗစက္ခုသင်္ခါတဿ ဉာဏဒဿနဿ ပဋိလာဘာယ.

ဣမမေဝ ကာယန္တိအာဒီသု ယံ ဝတ္တဗ္ဗံ သိယာ၊ တံ သဗ္ဗံ သဗ္ဗာကာရေန ဝိတ္ထာရတော ဝိသုဒ္ဓိမဂ္ဂေ ကာယဂတာသတိကမ္မဋ္ဌာနေ ဝုတ္တံ. ကာမရာဂပ္ပဟာနာယာတိ ပဉ္စကာမဂုဏိကဿ ရာဂဿ ပဟာနတ္ထာယ. သေယျထာပိ ပဿေယျာတိ ယထာ ပဿေယျ. သရီရန္တိ မတသရီရံ. သိဝထိကာယ ဆဍ္ဍိတန္တိ သုသာနေ အပဝိဒ္ဓံ. ဧကာဟံ မတဿ အဿာတိ ဧကာဟမတံ. ဒွီဟံ မတဿ အဿာတိ ဒွီဟမတံ. တီဟံ မတဿ အဿာတိ တီဟမတံ. ဘသ္တာ ဝိယ ဝါယုနာ ဥဒ္ဓံ ဇီဝိတပရိယာဒါနာ ယထာနုက္ကမံ သမုဂ္ဂတေန သူနဘာဝေန ဓုမာတတ္တာ ဥဒ္ဓုမာတံ၊ ဥဒ္ဓုမာတမေဝ ဥဒ္ဓုမာတကံ. ပဋိကူလတ္တာ ဝါ ကုစ္ဆိတံ ဥဒ္ဓုမာတန္တိ ဥဒ္ဓုမာတကံ. ဝိနီလံ ဝုစ္စတိ ဝိပရိဘိန္နဝဏ္ဏံ၊ ဝိနီလမေဝ ဝိနီလကံ. ပဋိကူလတ္တာ ဝါ ကုစ္ဆိတံ ဝိနီလန္တိ ဝိနီလကံ. မံသုဿဒဋ္ဌာနေသု ရတ္တဝဏ္ဏဿ ပုဗ္ဗသန္နိစယဋ္ဌာနေသု သေတဝဏ္ဏဿ ယေဘုယျေန စ နီလဝဏ္ဏဿ နီလဋ္ဌာနေ နီလသာဋကပါရုတဿေဝ ဆဝသရီရဿေတံ အဓိဝစနံ. ပရိဘိန္နဋ္ဌာနေဟိ နဝဟိ ဝါ ဝဏမုခေဟိ ဝိဿန္ဒမာနံ ပုဗ္ဗံ ဝိပုဗ္ဗံ၊ ဝိပုဗ္ဗမေဝ ဝိပုဗ္ဗကံ. ပဋိကူလတ္တာ ဝါ ကုစ္ဆိတံ ဝိပုဗ္ဗန္တိ ဝိပုဗ္ဗကံ. ဝိပုဗ္ဗကံ ဇာတံ တထာဘာဝံ ဂတန္တိ ဝိပုဗ္ဗကဇာတံ.

သော ဣမမေဝ ကာယန္တိ သော ဘိက္ခု ဣမံ အတ္တနော ကာယံ တေန ကာယေန သဒ္ဓိံ ဉာဏေန ဥပသံဟရတိ ဥပနေတိ. ကထံ? အယမ္ပိ ခေါ ကာယော ဧဝံဓမ္မော ဧဝံဘာဝီ ဧဝံအနတီတောတိ. ဣဒံ ဝုတ္တံ ဟောတိ – အာယု ဥသ္မာ ဝိညာဏန္တိ ဣမေသံ တိဏ္ဏံ ဓမ္မာနံ အတ္ထိတာယ အယံ ကာယော ဌာနဂမနာဒိခမော ဟောတိ၊ ဣမေသံ ပန ဝိဂမာ အယမ္ပိ ဧဝံဓမ္မော ဧဝံပူတိကသဘာဝေါယေဝါတိ. ဧဝံဘာဝီတိ ဧဝမေဝံ ဥဒ္ဓုမာတာဒိဘေဒေါ ဘဝိဿတိ. ဧဝံ အနတီတောတိ ဧဝံ ဥဒ္ဓုမာတာဒိဘာဝံ အနတိက္ကန္တော.

ခဇ္ဇမာနန္တိ ဥဒရာဒီသု နိသီဒိတွာ ဥဒရမံသဩဋ္ဌမံသအက္ခိကမံသာဒီနိ လုဉ္စိတွာ လုဉ္စိတွာ ခါဒိယမာနံ. သမံသလောဟိတန္တိ သေသာဝသေသမံသလောဟိတယုတ္တံ. နိမ္မံသလောဟိတမက္ခိတန္တိ မံသေ ခီဏေပိ လောဟိတံ န သုဿတိ၊ တံ သန္ဓာယ ဝုတ္တံ – ‘‘နိမ္မံသလောဟိတမက္ခိတ’’န္တိ. အညေနာတိ အညေန ဒိသာဘာဂေန. ဟတ္ထဋ္ဌိကန္တိ စတုသဋ္ဌိဘေဒမ္ပိ ဟတ္ထဋ္ဌိကံ ပါဋိယေက္ကံ ပါဋိယေက္ကံ ဝိပ္ပကိဏ္ဏံ. ပါဒဋ္ဌိကာဒီသုပိ ဧသေဝ နယော. တေရောဝဿိကာနီတိ အတိက္ကန္တသံဝစ္ဆရာနိ. ပူတီနီတိ အဗ္ဘောကာသေ ဌိတာနိ ဝါတာတပဝုဋ္ဌိသမ္ဖဿေန တေရောဝဿိကာနေဝ ပူတီနိ ဟောန္တိ၊ အန္တောဘူမိဂတာနိ ပန စိရတရံ တိဋ္ဌန္တိ. စုဏ္ဏကဇာတာနီတိ စုဏ္ဏဝိစုဏ္ဏံ ဟုတွာ ဝိပ္ပကိဏ္ဏာနိ. သဗ္ဗတ္ထ သော ဣမမေဝါတိ ဝုတ္တနယေန ခဇ္ဇမာနာဒီနံ ဝသေန ယောဇနာ ကာတဗ္ဗာ. အသ္မိမာနသမုဂ္ဃါတာယာတိ အသ္မီတိ ပဝတ္တဿ နဝဝိဓဿ မာနဿ သမုဂ္ဃါတတ္ထာယ. အနေကဓာတုပဋိဝေဓာယာတိ အနေကဓာတူနံ ပဋိဝိဇ္ဈနတ္ထာယ. သတောဝ အဘိက္ကမတီတိ ဂစ္ဆန္တော သတိပညာဟိ သမန္နာဂတောဝ ဂစ္ဆတိ. သတောဝ ပဋိက္ကမတီတိ ပဋိနိဝတ္တန္တောပိ သတိပညာဟိ သမန္နာဂတောဝ နိဝတ္တတိ. သေသပဒေသုပိ ဧသေဝ နယော. သတိသမ္ပဇညာယာတိ သတိယာ စ ဉာဏဿ စ အတ္ထာယ. ဣတိ ဣမသ္မိံ သုတ္တေ သတိဉာဏာနိ မိဿကာနိ ကထိတာနီတိ.

၁၀. အနုတ္တရိယသုတ္တဝဏ္ဏနာ

၃၀. ဒသမေ ဥစ္စာဝစန္တိ ယံ ကိဉ္စိ မဟန္တခုဒ္ဒကံ၊ ဥစ္စနီစံ ဝါ. ဟီနန္တိ နိဟီနံ. ဂမ္မန္တိ ဂါမဝါသိကာနံ ဒဿနံ. ပေါထုဇ္ဇနိကန္တိ ပုထုဇ္ဇနာနံ သန္တကံ. အနရိယန္တိ န အရိယံ န ဥတ္တမံ န ပရိသုဒ္ဓံ. အနတ္ထသံဟိတန္တိ န အတ္ထသန္နိဿိတံ. န နိဗ္ဗိဒါယာတိ န ဝဋ္ဋေ နိဗ္ဗိန္ဒနတ္ထာယ. န ဝိရာဂါယာတိ န ရာဂါဒီနံ ဝိရဇ္ဇနတ္ထာယ. န နိရောဓာယာတိ န ရာဂါဒီနံ အပ္ပဝတ္တိနိရောဓာယ. န ဥပသမာယာတိ န ရာဂါဒီနံ ဝူပသမနတ္ထာယ. န အဘိညာယာတိ န အဘိဇာနနတ္ထာယ. န သမ္ဗောဓာယာတိ န သမ္ဗောဓိသင်္ခါတဿ စတုမဂ္ဂဉာဏဿ ပဋိဝိဇ္ဈနတ္ထာယ. န နိဗ္ဗာနာယာတိ န နိဗ္ဗာနဿ သစ္ဆိကိရိယာယ.

နိဝိဋ္ဌသဒ္ဓေါတိ ပတိဋ္ဌိတသဒ္ဓေါ. နိဝိဋ္ဌပေမောတိ ပတိဋ္ဌိတပေမော. ဧကန္တဂတောတိ ဧကန္တံ ဂတော၊ အစလပ္ပတ္တောတိ အတ္ထော. အဘိပ္ပသန္နောတိ အတိဝိယ ပသန္နော. ဧတဒါနုတ္တရိယန္တိ ဧတံ အနုတ္တရံ. ဟတ္ထိသ္မိမ္ပိ သိက္ခတီတိ ဟတ္ထိနိမိတ္တံ သိက္ခိတဗ္ဗံ ဟတ္ထိသိပ္ပံ သိက္ခတိ. သေသပဒေသုပိ ဧသေဝ နယော. ဥစ္စာဝစန္တိ မဟန္တခုဒ္ဒကံ သိပ္ပံ သိက္ခတိ.

ဥပဋ္ဌိတာ ပါရိစရိယေတိ ပါရိစရိယာယ ပစ္စုပဋ္ဌိတာ. ဘာဝယန္တိ အနုဿတိန္တိ အနုတ္တရံ အနုဿတိံ ဘာဝေန္တိ. ဝိဝေကပ္ပဋိသံယုတ္တန္တိ နိဗ္ဗာနနိဿိတံ ကတွာ. ခေမန္တိ နိရုပဒ္ဒဝံ. အမတဂါမိနန္တိ နိဗ္ဗာနဂါမိနံ၊ အရိယမဂ္ဂံ ဘာဝေန္တီတိ အတ္ထော. အပ္ပမာဒေ ပမောဒိတာတိ သတိယာ အဝိပ္ပဝါသသင်္ခါတေ အပ္ပမာဒေ အာမောဒိတာ ပမောဒိတာ. နိပကာတိ နေပက္ကေန သမန္နာဂတာ. သီလသံဝုတာတိ သီလေန သံဝုတာ ပိဟိတာ. တေ ဝေ ကာလေန ပစ္စေန္တီတိ တေ ဝေ ယုတ္တပ္ပယုတ္တကာလေ ဇာနန္တိ. ယတ္ထ ဒုက္ခံ နိရုဇ္ဈတီတိ ယသ္မိံ ဌာနေ သကလံ ဝဋ္ဋဒုက္ခံ နိရုဇ္ဈတိ၊ တံ အမတံ မဟာနိဗ္ဗာနံ တေ ဘိက္ခူ ဇာနန္တီတိ. ဣမသ္မိံ သုတ္တေ ဆ အနုတ္တရိယာနိ မိဿကာနိ ကထိတာနီတိ.

အနုတ္တရိယဝဂ္ဂေါ တတိယော.

၄. ဒေဝတာဝဂ္ဂေါ

၁. သေခသုတ္တဝဏ္ဏနာ

၃၁. စတုတ္ထဿ ပဌမေ သေခဿာတိ သတ္တဝိဓဿ သေခဿ. ပုထုဇ္ဇနေ ပန ဝတ္တဗ္ဗမေဝ နတ္ထိ. ပရိဟာနာယာတိ ဥပရူပရိဂုဏပရိဟာနာယ.

၂-၃. အပရိဟာနသုတ္တဒွယဝဏ္ဏနာ

၃၂-၃၃. ဒုတိယေ သတ္ထုဂါရဝတာတိ သတ္ထရိ ဂရုဘာဝေါ. ဓမ္မဂါရဝတာတိ နဝဝိဓေ လောကုတ္တရဓမ္မေ ဂရုဘာဝေါ. သံဃဂါရဝတာတိ သံဃေ ဂရုဘာဝေါ. သိက္ခာဂါရဝတာတိ တီသု သိက္ခာသု ဂရုဘာဝေါ. အပ္ပမာဒဂါရဝတာတိ အပ္ပမာဒေ ဂရုဘာဝေါ. ပဋိသန္ထာရဂါရဝတာတိ ဓမ္မာမိသဝသေန ဒုဝိဓေ ပဋိသန္ထာရေ ဂရုဘာဝေါ. သတ္ထာ ဂရု အဿာတိ သတ္ထုဂရု. ဓမ္မော ဂရု အဿာတိ ဓမ္မဂရု. တိဗ္ဗဂါရဝေါတိ ဗဟလဂါရဝေါ. ပဋိသန္ထာရေ ဂါရဝေါ အဿာတိ ပဋိသန္ထာရဂါရဝေါ. တတိယေ သပ္ပတိဿောတိ သဇေဋ္ဌကော သဂါရဝေါ. ဟိရောတ္တပ္ပံ ပနေတ္ထ မိဿကံ ကထိတံ.

၄. မဟာမောဂ္ဂလ္လာနသုတ္တဝဏ္ဏနာ

၃၄. စတုတ္ထေ တိဿော နာမ ဘိက္ခူတိ ထေရဿေဝ သဒ္ဓိဝိဟာရိကော. မဟိဒ္ဓိကော မဟာနုဘာဝေါတိ ဣဇ္ဈနဋ္ဌေန မဟတီ ဣဒ္ဓိ အဿာတိ မဟိဒ္ဓိကော. အနုဖရဏဋ္ဌေန မဟာ အာနုဘာဝေါ အဿာတိ မဟာနုဘာဝေါ. စိရဿံ ခေါ၊ မာရိသ မောဂ္ဂလ္လာန၊ ဣမံ ပရိယာယမကာသီတိ ဧဝရူပံ လောကေ ပကတိယာ ပိယသမုဒါဟာရဝစနံ ဟောတိ. လောကိယာ ဟိ စိရဿံ အာဂတမ္ပိ အနာဂတပုဗ္ဗမ္ပိ မနာပဇာတိယံ အာဂတံ ဒိသွာ ‘‘ကုတော ဘဝံ အာဂတော၊ စိရဿံ ဘဝံ အာဂတော၊ ကထံ တေ ဣဓာဂမနမဂ္ဂေါ ဉာတော၊ ကိံ မဂ္ဂမူဠှောသီ’’တိအာဒီနိ ဝဒန္တိ. အယံ ပန အာဂတပုဗ္ဗတ္တာယေဝ ဧဝမာဟ. ထေရော ဟိ ကာလေန ကာလံ ဗြဟ္မလောကံ ဂစ္ဆတိယေဝ. တတ္ထ ပရိယာယမကာသီတိ ဝါရံ အကာသိ. ယဒိဒံ ဣဓာဂမနာယာတိ ယော အယံ ဣဓာဂမနာယ ဝါရော၊ တံ စိရဿံ အကာသီတိ ဝုတ္တံ ဟောတိ. ဣဒမာသနံ ပညတ္တန္တိ မဟာရဟံ ဗြဟ္မပလ္လင်္ကံ ပညာပေတွာ ဧဝမာဟ. အဝေစ္စပ္ပသာဒေနာတိ အဓိဂတေန အစလေန မဂ္ဂပ္ပသာဒေန. ဣမသ္မိံ သုတ္တေ သောတာပတ္တိမဂ္ဂဉာဏံ ကထိတံ.

၅. ဝိဇ္ဇာဘာဂိယသုတ္တဝဏ္ဏနာ

၃၅. ပဉ္စမေ ဝိဇ္ဇာဘာဂိယာတိ ဝိဇ္ဇာကောဋ္ဌာသိကာ. အနိစ္စသညာတိ အနိစ္စာနုပဿနာဉာဏေ ဥပ္ပန္နသညာ. အနိစ္စေ ဒုက္ခသညာတိ ဒုက္ခာနုပဿနာဉာဏေ ဥပ္ပန္နသညာ. ဒုက္ခေ အနတ္တသညာတိ အနတ္တာနုပဿနာဉာဏေ ဥပ္ပန္နသညာ. ပဟာနသညာတိ ပဟာနာနုပဿနာဉာဏေ ဥပ္ပန္နသညာ. ဝိရာဂသညာတိ ဝိရာဂါနုပဿနာဉာဏေ ဥပ္ပန္နသညာ. နိရောဓသညာတိ နိရောဓာနုပဿနာဉာဏေ ဥပ္ပန္နသညာ.

၆. ဝိဝါဒမူလသုတ္တဝဏ္ဏနာ

၃၆. ဆဋ္ဌေ ဝိဝါဒမူလာနီတိ ဝိဝါဒဿ မူလာနိ. ကောဓနောတိ ကုဇ္ဈနလက္ခဏေန ကောဓေန သမန္နာဂတော. ဥပနာဟီတိ ဝေရအပ္ပဋိနိဿဂ္ဂလက္ခဏေန ဥပနာဟေန သမန္နာဂတော. အဟိတာယ ဒုက္ခာယ ဒေဝမနုဿာနန္တိ ဒွိန္နံ ဘိက္ခူနံ ဝိဝါဒေါ ကထံ ဒေဝမနုဿာနံ အဟိတာယ ဒုက္ခာယ သံဝတ္တတိ? ကောသမ္ဗကက္ခန္ဓကေ ဝိယ ဒွီသု ဘိက္ခူသု ဝိဝါဒံ အာပန္နေသု တသ္မိံ ဝိဟာရေ တေသံ အန္တေဝါသိကာ ဝိဝဒန္တိ၊ တေသံ ဩဝါဒံ ဂဏှန္တော ဘိက္ခုနိသံဃော ဝိဝဒတိ. တတော တေသံ ဥပဋ္ဌာကာ ဝိဝဒန္တိ၊ အထ မနုဿာနံ အာရက္ခဒေဝတာ ဒွေ ကောဋ္ဌာသာ ဟောန္တိ. တထာ ဓမ္မဝါဒီနံ အာရက္ခဒေဝတာ ဓမ္မဝါဒိနိယော ဟောန္တိ၊ အဓမ္မဝါဒီနံ အဓမ္မဝါဒိနိယော. တတော အာရက္ခဒေဝတာနံ မိတ္တာ ဘုမ္မဒေဝတာ ဘိဇ္ဇန္တိ. ဧဝံ ပရမ္ပရာယ ယာဝ ဗြဟ္မလောကာ ဌပေတွာ အရိယသာဝကေ သဗ္ဗေ ဒေဝမနုဿာ ဒွေ ကောဋ္ဌာသာ ဟောန္တိ. ဓမ္မဝါဒီဟိ ပန အဓမ္မဝါဒိနောဝ ဗဟုတရာ ဟောန္တိ. တတော ယံ ဗဟုကေဟိ ဂဟိတံ၊ တံ ဂစ္ဆန္တိ. ဓမ္မံ ဝိဿဇ္ဇေတွာ ဗဟုတရာဝ အဓမ္မံ ဂဏှန္တိ. တေ အဓမ္မံ ပုရက္ခတွာ ဝိဟရန္တာ အပါယေ နိဗ္ဗတ္တန္တိ. ဧဝံ ဒွိန္နံ ဘိက္ခူနံ ဝိဝါဒေါ ဒေဝမနုဿာနံ အဟိတာယ ဒုက္ခာယ ဟောတိ. အဇ္ဈတ္တံ ဝါတိ တုမှာကံ အဗ္ဘန္တရပရိသာယ. ဗဟိဒ္ဓါတိ ပရေသံ ပရိသာယ.

မက္ခီတိ ပရေသံ ဂုဏမက္ခနလက္ခဏေန မက္ခေန သမန္နာဂတော. ပဠာသီတိ ယုဂဂ္ဂါဟလက္ခဏေန ပဠာသေန သမန္နာဂတော. ဣဿုကီတိ ပရဿ သက္ကာရာဒီနိ ဣဿာယနလက္ခဏာယ ဣဿာယ သမန္နာဂတော. မစ္ဆရီတိ အာဝါသမစ္ဆရိယာဒီဟိ သမန္နာဂတော. သဌောတိ ကေရာဋိကော. မာယာဝီတိ ကတပဋိစ္ဆာဒကော. ပါပိစ္ဆောတိ အသန္တသမ္ဘာဝနိစ္ဆကော ဒုဿီလော. မိစ္ဆာဒိဋ္ဌီတိ နတ္ထိကဝါဒီ၊ အဟေတုဝါဒီ၊ အကိရိယဝါဒီ. သန္ဒိဋ္ဌိပရာမာသီတိ သယံ ဒိဋ္ဌမေဝ ပရာမသတိ. အာဓာနဂ္ဂါဟီတိ ဒဠှဂ္ဂါဟီ. ဒုပ္ပဋိနိဿဂ္ဂီတိ န သက္ကာ ဟောတိ ဂဟိတံ ဝိဿဇ္ဇာပေတုံ. ဣမသ္မိံ သုတ္တေ ဝဋ္ဋမေဝ ကထိတံ.

၇. ဒါနသုတ္တဝဏ္ဏနာ

၃၇. သတ္တမေ ဝေဠုကဏ္ဍကီတိ ဝေဠုကဏ္ဍကနဂရဝါသိနီ. ဆဠင်္ဂသမန္နာဂတန္တိ ဆဟိ ဂုဏင်္ဂေဟိ သမန္နာဂတံ. ဒက္ခိဏံ ပတိဋ္ဌာပေတီတိ ဒါနံ ဒေတိ. ပုဗ္ဗေဝ ဒါနာ သုမနောတိ ဒါနံ ဒဿာမီတိ မာသဍ္ဎမာသတော ပဋ္ဌာယ သောမနဿပ္ပတ္တော ဟောတိ. ဧတ္ထ ဟိ ပုဗ္ဗေစေတနာ ဒဿာမီတိ စိတ္တုပ္ပါဒကာလတော ပဋ္ဌာယ ‘‘ဣတော ဥဋ္ဌိတေန ဒါနံ ဒဿာမီ’’တိ ခေတ္တဂ္ဂဟဏံ အာဒိံ ကတွာ စိန္တေန္တဿ လဗ္ဘတိ. ဒဒံ စိတ္တံ ပသာဒေတီတိ ဧဝံ ဝုတ္တာ မုဉ္စစေတနာ ပန ဒါနကာလေယေဝ လဗ္ဘတိ. ဒတွာ အတ္တမနော ဟောတီတိ အယံ ပန အပရစေတနာ အပရာပရံ အနုဿရန္တဿ လဗ္ဘတိ. ဝီတရာဂါတိ ဝိဂတရာဂါ ခီဏာသဝါ. ရာဂဝိနယာယ ဝါ ပဋိပန္နာတိ ရာဂဝိနယပဋိပဒံ ပဋိပန္နာ. ဥက္ကဋ္ဌဒေသနာ စေသာ၊ န ကေဝလံ ပန ခီဏာသဝါနံ၊ အနာဂါမိ-သကဒါဂါမိ-သောတာပန္နာနမ္ပိ အန္တမသော တဒဟုပဗ္ဗဇိတဿ ဘဏ္ဍဂါဟကသာမဏေရဿာပိ ဒိန္နာ ဒက္ခိဏာ ဆဠင်္ဂသမန္နာဂတာဝ ဟောတိ. သောပိ ဟိ သောတာပတ္တိမဂ္ဂတ္ထမေဝ ပဗ္ဗဇိတော.

ယညဿ သမ္ပဒါတိ ဒါနဿ ပရိပုဏ္ဏတာ. သညတာတိ သီလသညမေန သညတာ. သယံ အာစမယိတွာနာတိ အတ္တနာဝ ဟတ္ထပါဒေ ဓောဝိတွာ မုခံ ဝိက္ခာလေတွာ. သကေဟိ ပါဏိဘီတိ အတ္တနော ဟတ္ထေဟိ. သယေဟီတိပိ ပါဌော. သဒ္ဓေါတိ ရတနတ္တယဂုဏေ သဒ္ဒဟန္တော. မုတ္တေန စေတသာတိ လာဘမစ္ဆရိယာဒီဟိ ဝိမုတ္တေန စိတ္တေန. အဗျာပဇ္ဈံ သုခံ လောကန္တိ နိဒ္ဒုက္ခံ ဥဠာရသုခသောမနဿံ ဒေဝလောကံ.

၈. အတ္တကာရီသုတ္တဝဏ္ဏနာ

၃၈. အဋ္ဌမေ အဒ္ဒသံ ဝါ အဿောသိံ ဝါတိ အက္ခီနိ ဥမ္မီလေတွာ မာ အဒ္ဒသံ၊ အသုကသ္မိံ နာမ ဌာနေ ဝသတီတိ မာ အဿောသိံ၊ ကထေန္တဿ ဝါ ဝစနံ မာ အဿောသိံ. ကထဉှိ နာမာတိ ကေန နာမ ကာရဏေန. အာရမ္ဘဓာတူတိ အာရဘနဝသေန ပဝတ္တဝီရိယံ. နိက္ကမဓာတူတိ ကောသဇ္ဇတော နိက္ခမနသဘာဝံ ဝီရိယံ. ပရက္ကမဓာတူတိ ပရက္ကမသဘာဝေါ. ထာမဓာတူတိ ထာမသဘာဝေါ. ဌိတိဓာတူတိ ဌိတိသဘာဝေါ. ဥပက္ကမဓာတူတိ ဥပက္ကမသဘာဝေါ. သဗ္ဗံ စေတံ တေန တေနာကာရေန ပဝတ္တဿ ဝီရိယဿေဝ နာမံ.

၉-၁၀. နိဒါနသုတ္တာဒိဝဏ္ဏနာ

၃၉-၄၀. နဝမေ ကမ္မာနန္တိ ဝဋ္ဋဂါမိကမ္မာနံ. သမုဒယာယာတိ ပိဏ္ဍကရဏတ္ထာယ. နိဒါနန္တိ ပစ္စယော. လောဘဇေနာတိ လောဘတော ဇာတေန. န ပညာယန္တီတိ ‘‘ဧဝရူပေန ကမ္မေန နိဗ္ဗတ္တာ’’တိ န ဒိဿန္တိ. သုက္ကပက္ခေ ကမ္မာနန္တိ ဝိဝဋ္ဋဂါမိကမ္မာနံ. ဣတိ ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ. ဒသမေ နိစုလဝနေတိ မဟာမုစလိန္ဒဝနေ. သဒ္ဓမ္မောတိ သာသနသဒ္ဓမ္မော.

၁၁. ဒါရုက္ခန္ဓသုတ္တဝဏ္ဏနာ

၄၁. ဧကာဒသမေ စေတောဝသိပ္ပတ္တောတိ စိတ္တဝသိဘာဝံ ပတ္တော. ပထဝီတွေဝ အဓိမုစ္စေယျာတိ ထဒ္ဓါကာရံ ပထဝီဓာတူတိ သလ္လက္ခေယျ. ယံ နိဿာယာတိ ယံ ဝိဇ္ဇမာနံ ထဒ္ဓါကာရံ ပထဝီဓာတုံ နိဿာယ အမုံ ဒါရုက္ခန္ဓံ ပထဝီတွေဝ အဓိမုစ္စေယျ၊ သာ ဧတ္ထ ပထဝီဓာတု အတ္ထီတိ. ဣမိနာ နယေန သေသပဒါနိပိ ဝေဒိတဗ္ဗာနိ. ယထေဝ ဟိ တသ္မိံ ထဒ္ဓါကာရာ ပထဝီဓာတု အတ္ထိ၊ ဧဝံ ယူသာကာရာ အာပေါဓာတု၊ ဥဏှာကာရာ တေဇောဓာတု၊ ဝိတ္ထမ္ဘနာကာရာ ဝါယောဓာတု၊ ရတ္တဝဏ္ဏမှိ သာရေ ပဒုမပုပ္ဖဝဏ္ဏာ သုဘဓာတု၊ ပူတိဘူတေ စုဏ္ဏေ စေဝ ဖေဂ္ဂုပပဋိကာသု စ အမနုညဝဏ္ဏာ အသုဘဓာတု၊ တံ နိဿာယ အမုံ ဒါရုက္ခန္ဓံ အသုဘန္တွေဝ အဓိမုစ္စေယျ သလ္လက္ခေယျာတိ. ဣမသ္မိံ သုတ္တေ မိဿကဝိဟာရော နာမ ကထိတော.

၁၂. နာဂိတသုတ္တဝဏ္ဏနာ

၄၂. ဒွါဒသမေ ဂါမန္တဝိဟာရိန္တိ ဂါမန္တသေနာသနဝါသိံ. သမာဟိတံ နိသိန္နန္တိ တသ္မိံ ဂါမန္တသေနာသနေ သမာဓိံ အပ္ပေတွာ နိသိန္နံ. ဣဒါနိမန္တိ ဣဒါနိ ဣမံ. သမာဓိမှာ စာဝေဿတီတိ သမာဓိတော ဥဋ္ဌာပေဿတိ. န အတ္တမနော ဟောမီတိ န သကမနော ဟောမိ. ပစလာယမာနန္တိ နိဒ္ဒါယမာနံ. ဧကတ္တန္တိ ဧကသဘာဝံ၊ ဧကဂ္ဂတာဘူတံ အရညသညံယေဝ စိတ္တေ ကရိဿတီတိ အတ္ထော. အနုရက္ခိဿတီတိ အနုဂ္ဂဏှိဿတိ. အဝိမုတ္တံ ဝါ စိတ္တံ ဝိမောစေဿတီတိ အညသ္မိံ ကာလေ အဝိမုတ္တံ စိတ္တံ ဣဒါနိ ပဉ္စဟိ ဝိမုတ္တီဟိ ဝိမောစယိဿတိ. ရိဉ္စတီတိ ဝဇ္ဇေတိ ဝိဿဇ္ဇေတိ. ပဋိပဏာမေတွာတိ ပနုဒိတွာ ဝိဿဇ္ဇေတွာ. ဥစ္စာရပဿာဝကမ္မာယာတိ ဥစ္စာရပဿာဝကရဏတ္ထာယ. ဣမိနာ ဧတ္တကေန ဌာနေန သတ္ထာရာ အရညသေနာသနဿ ဝဏ္ဏော ကထိတော. သုတ္တဿ ပန ပဌမကောဋ္ဌာသေ ယံ ဝတ္တဗ္ဗံ၊ တံ ဟေဋ္ဌာ ဝုတ္တမေဝါတိ.

ဒေဝတာဝဂ္ဂေါ စတုတ္ထော.

၅. ဓမ္မိကဝဂ္ဂေါ

၁. နာဂသုတ္တဝဏ္ဏနာ

၄၃. ပဉ္စမဿ ပဌမေ အာယသ္မတာ အာနန္ဒေန သဒ္ဓိန္တိ ဣဒံ ‘‘အာယာမာနန္ဒာ’’တိ ထေရံ အာမန္တေတွာ ဂတတ္တာ ဝုတ္တံ၊ သတ္ထာ ပန အနူနေဟိ ပဉ္စဟိ ဘိက္ခုသတေဟိ ပရိဝုတော တတ္ထ အဂမာသီတိ ဝေဒိတဗ္ဗော. တေနုပသင်္ကမီတိ တေဟေဝ ပဉ္စဟိ ဘိက္ခုသတေဟိ ပရိဝုတော ဥပသင်္ကမိ. ပရိသိဉ္စိတွာတိ ဝေါဟာရဝစနမေတံ၊ နှာယိတွာတိ အတ္ထော. ပုဗ္ဗာပယမာနောတိ ရတ္တဒုပဋ္ဋံ နိဝါသေတွာ ဥတ္တရာသင်္ဂစီဝရံ ဒွီဟိ ဟတ္ထေဟိ ဂဟေတွာ ပစ္ဆိမလောကဓာတုံ ပိဋ္ဌိတော ကတွာ ပုရတ္ထိမလောကဓာတုံ အဘိမုခေါ ဝေါဒကဘာဝေန ဂတ္တာနိ ပုဗ္ဗသဒိသာနိ ကုရုမာနော အဋ္ဌာသီတိ အတ္ထော. ဘိက္ခုသံဃောပိ တေန တေန ဌာနေန ဩတရိတွာ နှတွာ ပစ္စုတ္တရိတွာ သတ္ထာရံယေဝ ပရိဝါရေတွာ အဋ္ဌာသိ. ဣတိ တသ္မိံ သမယေ အာကာသတော ပတမာနံ ရတ္တသုဝဏ္ဏကုဏ္ဍလံ ဝိယ သူရိယော ပစ္ဆိမလောကဓာတုံ ပဋိပဇ္ဇိ၊ ပရိသုဒ္ဓရဇတမဏ္ဍလော ဝိယ ပါစီနလောကဓာတုတော စန္ဒော အဗ္ဘုဂ္ဂဉ္ဆိ၊ မဇ္ဈဋ္ဌာနေပိ ပဉ္စဘိက္ခုသတပရိဝါရော သမ္မာသမ္ဗုဒ္ဓေါ ဆဗ္ဗဏ္ဏဗုဒ္ဓရသ္မိယော ဝိဿဇ္ဇေတွာ ပုဗ္ဗကောဋ္ဌကနဒီတီရေ လောကံ အလင်္ကုရုမာနော အဋ္ဌာသိ.

တေန ခေါ ပန သမယေန။ပေ။ သေတော နာမ နာဂေါတိ သေတဝဏ္ဏတာယ ဧဝံ လဒ္ဓနာမော ဟတ္ထိနာဂေါ. မဟာတူရိယတာဠိတဝါဒိတေနာတိ မဟန္တေန တူရိယတာဠိတဝါဒိတေန. တတ္ထ ပဌမံ သင်္ဃဋ္ဋနံ တာဠိတံ နာမ ဟောတိ၊ တတော ပရံ ဝါဒိတံ. ဇနောတိ ဟတ္ထိဒဿနတ္ထံ သန္နိပတိတမဟာဇနော. ဒိသွာ ဧဝမာဟာတိ အင်္ဂပစ္စင်္ဂါနိ ဃံသိတွာ နှာပေတွာ ဥတ္တာရေတွာ ဗဟိတီရေ ဌပေတွာ ဂတ္တာနိ ဝေါဒကာနိ ကတွာ ဟတ္ထာလင်္ကာရေန အလင်္ကတံ တံ မဟာနာဂံ ဒိသွာ ဣဒံ ‘‘အဘိရူပေါ ဝတ၊ ဘော’’တိ ပသံသာဝစနမာဟ. ကာယုပပန္နောတိ သရီရသမ္ပတ္တိယာ ဥပပန္နော၊ ပရိပုဏ္ဏင်္ဂပစ္စင်္ဂေါတိ အတ္ထော. အာယသ္မာ ဥဒါယီတိ ပဋိသမ္ဘိဒါပ္ပတ္တော ကာဠုဒါယိတ္ထေရော. ဧတဒဝေါစာတိ တံ မဟာဇနံ ဟတ္ထိဿ ဝဏ္ဏံ ဘဏန္တံ ဒိသွာ ‘‘အယံ ဇနော အဟေတုကပဋိသန္ဓိယံ နိဗ္ဗတ္တဟတ္ထိနော ဝဏ္ဏံ ကထေတိ၊ န ဗုဒ္ဓဟတ္ထိဿ. အဟံ ဒါနိ ဣမိနာ ဟတ္ထိနာဂေန ဥပမံ ကတွာ ဗုဒ္ဓနာဂဿ ဝဏ္ဏံ ကထေဿာမီ’’တိ စိန္တေတွာ ဧတံ ‘‘ဟတ္ထိမေဝ နု ခေါ၊ ဘန္တေ’’တိအာဒိဝစနံ အဝေါစ. တတ္ထ မဟန္တန္တိ အာရောဟသမ္ပန္နံ. ဗြဟန္တန္တိ ပရိဏာဟသမ္ပန္နံ. ဧဝမာဟာတိ ဧဝံ ဝဒတိ. အထ ဘဂဝါ ယသ္မာ အယံ နာဂသဒ္ဒေါ ဟတ္ထိမှိစေဝ အဿဂေါဏဥရဂရုက္ခမနုဿေသု စာပိ ပဝတ္တတိ၊ တသ္မာ ဟတ္ထိမ္ပိ ခေါတိအာဒိမာဟ.

အာဂုန္တိ ပါပကံ လာမကံ အကုသလဓမ္မံ. တမဟံ နာဂေါတိ ဗြူမီတိ တံ အဟံ ဣမေဟိ တီဟိ ဒွါရေဟိ ဒသန္နံ အကုသလကမ္မပထာနံ ဒွါဒသန္နဉ္စ အကုသလစိတ္တာနံ အကရဏတော နာဂေါတိ ဝဒါမိ. အယဉှိ န အာဂုံ ကရောတီတိ ဣမိနာ အတ္ထေန နာဂေါ. ဣမာဟိ ဂါထာဟိ အနုမောဒါမီတိ ဣမာဟိ စတုသဋ္ဌိပဒါဟိ သောဠသဟိ ဂါထာဟိ အနုမောဒါမိ အဘိနန္ဒာမိ.

မနုဿဘူတန္တိ ဒေဝါဒိဘာဝံ အနုပဂန္တွာ မနုဿမေဝ ဘူတံ. အတ္တဒန္တန္တိ အတ္တနာယေဝ ဒန္တံ၊ န အညေဟိ ဒမထံ ဥပနီတံ. ဘဂဝါ ဟိ အတ္တနာ ဥပ္ပါဒိတေနေဝ မဂ္ဂဒမထေန စက္ခုတောပိ ဒန္တော၊ သောတတောပိ၊ ဃာနတောပိ၊ ဇိဝှါတောပိ၊ ကာယတောပိ၊ မနတောပီတိ ဣမေသု ဆသု ဌာနေသု ဒန္တော သန္တော နိဗ္ဗုတော ပရိနိဗ္ဗုတော. တေနာဟ – ‘‘အတ္တဒန္တ’’န္တိ. သမာဟိတန္တိ ဒုဝိဓေနာပိ သမာဓိနာ သမာဟိတံ. ဣရိယမာနန္တိ ဝိဟရမာနံ. ဗြဟ္မပထေတိ သေဋ္ဌပထေ၊ အမတပထေ၊ နိဗ္ဗာနပထေ. စိတ္တဿူပသမေ ရတန္တိ ပဌမဇ္ဈာနေန ပဉ္စ နီဝရဏာနိ ဝူပသမေတွာ၊ ဒုတိယဇ္ဈာနေန ဝိတက္ကဝိစာရေ၊ တတိယဇ္ဈာနေန ပီတိံ၊ စတုတ္ထဇ္ဈာနေန သုခဒုက္ခံ ဝူပသမေတွာ တသ္မိံ စိတ္တဿူပသမေ ရတံ အဘိရတံ.

နမဿန္တီတိ ကာယေန နမဿန္တိ၊ ဝါစာယ နမဿန္တိ၊ မနသာ နမဿန္တိ၊ ဓမ္မာနုဓမ္မပဋိပတ္တိယာ နမဿန္တိ၊ သက္ကရောန္တိ ဂရုံ ကရောန္တိ. သဗ္ဗဓမ္မာနပါရဂုန္တိ သဗ္ဗေသံ ခန္ဓာယတနဓာတုဓမ္မာနံ အဘိညာပါရဂူ၊ ပရိညာပါရဂူ၊ ပဟာနပါရဂူ၊ ဘာဝနာပါရဂူ၊ သစ္ဆိကိရိယာပါရဂူ၊ သမာပတ္တိပါရဂူတိ ဆဗ္ဗိဓေန ပါရဂမနေန ပါရဂတံ ပါရပ္ပတ္တံ မတ္ထကပ္ပတ္တံ. ဒေဝါပိ တံ နမဿန္တီတိ ဒုက္ခပ္ပတ္တာ သုဗြဟ္မဒေဝပုတ္တာဒယော သုခပ္ပတ္တာ စ သဗ္ဗေဝ ဒသသဟဿစက္ကဝါဠဝါသိနော ဒေဝါပိ တုမှေ နမဿန္တိ. ဣတိ မေ အရဟတော သုတန္တိ ဣတိ မယာ စတူဟိ ကာရဏေဟိ အရဟာတိ လဒ္ဓဝေါဟာရာနံ တုမှာကံယေဝ သန္တိကေ သုတန္တိ ဒီပေတိ.

သဗ္ဗသံယောဇနာတီတန္တိ သဗ္ဗာနိ ဒသဝိဓသံယောဇနာနိ အတိက္ကန္တံ. ဝနာ နိဗ္ဗနမာဂတန္တိ ကိလေသဝနတော နိဗ္ဗနံ ကိလေသဝနရဟိတံ နိဗ္ဗာနံ အာဂတံ သမ္ပတ္တံ. ကာမေဟိ နေက္ခမ္မရတန္တိ ဒုဝိဓေဟိ ကာမေဟိ နိက္ခန္တတ္တာ ပဗ္ဗဇ္ဇာ အဋ္ဌ သမာပတ္တိယော စတ္တာရော စ အရိယမဂ္ဂါ ကာမေဟိ နေက္ခမ္မံ နာမ၊ တတ္ထ ရတံ အဘိရတံ. မုတ္တံ သေလာဝ ကဉ္စနန္တိ သေလဓာတုတော မုတ္တံ ကဉ္စနသဒိသံ.

သဗ္ဗေ အစ္စရုစီတိ သဗ္ဗသတ္တေ အတိက္ကမိတွာ ပဝတ္တရုစိ. အဋ္ဌမကဉှိ အတိက္ကမိတွာ ပဝတ္တရုစိတာယ သောတာပန္နော အစ္စရုစိ နာမ၊ သောတာပန္နံ အတိက္ကမိတွာ ပဝတ္တရုစိတာယ သကဒါဂါမီ။ပေ။ ခီဏာသဝံ အတိက္ကမိတွာ ပဝတ္တရုစိတာယ ပစ္စေကသမ္ဗုဒ္ဓေါ၊ ပစ္စေကသမ္ဗုဒ္ဓံ အတိက္ကမိတွာ ပဝတ္တရုစိတာယ သမ္မာသမ္ဗုဒ္ဓေါ အစ္စရုစိ နာမ. ဟိမဝါဝညေ သိလုစ္စယေတိ ယထာ ဟိမဝါ ပဗ္ဗတရာဇာ အညေ ပဗ္ဗတေ အတိရောစတိ၊ ဧဝံ အတိရောစတီတိ အတ္ထော. သစ္စနာမောတိ တစ္ဆနာမော ဘူတနာမော အာဂုံ အကရဏေနေဝ နာဂေါတိ ဧဝံ အဝိတထနာမော.

သောရစ္စန္တိ သုစိသီလံ. အဝိဟိံသာတိ ကရုဏာ စ ကရုဏာပုဗ္ဗဘာဂေါ စ. ပါဒါ နာဂဿ တေ ဒုဝေတိ တေ ဗုဒ္ဓနာဂဿ ဒုဝေ ပုရိမပါဒါ.

တပေါတိ ဓုတသမာဒါနံ. ဗြဟ္မစရိယန္တိ အရိယမဂ္ဂသီလံ. စရဏာ နာဂဿ တျာပရေတိ တေ ဗုဒ္ဓနာဂဿ အပရေ ဒွေ ပစ္ဆိမပါဒါ. သဒ္ဓါဟတ္ထောတိ သဒ္ဓါမယာယ သောဏ္ဍာယ သမန္နာဂတော. ဥပေက္ခာသေတဒန္တဝါတိ ဆဠင်္ဂုပေက္ခာမယေဟိ သေတဒန္တေဟိ သမန္နာဂတော.

သတိ ဂီဝါတိ ယထာ နာဂဿ အင်္ဂပစ္စင်္ဂသ္မိံ သိရာဇာလာနံ ဂီဝါ ပတိဋ္ဌာ၊ ဧဝံ ဗုဒ္ဓနာဂဿ သောရစ္စာဒီနံ ဓမ္မာနံ သတိ. တေန ဝုတ္တံ – ‘‘သတိ ဂီဝါ’’တိ. သိရော ပညာတိ ယထာ ဟတ္ထိနာဂဿ သိရော ဥတ္တမင်္ဂေါ၊ ဧဝံ ဗုဒ္ဓနာဂဿ သဗ္ဗညုတဉာဏံ. တေန ဟိ သော သဗ္ဗဓမ္မေ ဇာနာတိ. တေန ဝုတ္တံ – ‘‘သိရော ပညာ’’တိ. ဝီမံသာ ဓမ္မစိန္တနာတိ ယထာ ဟတ္ထိနာဂဿ အဂ္ဂသောဏ္ဍော ဝီမံသာ နာမ ဟောတိ. သော တာယ ထဒ္ဓမုဒုကံ ခါဒိတဗ္ဗာခါဒိတဗ္ဗဉ္စ ဝီမံသတိ၊ တတော ပဟာတဗ္ဗံ ပဇဟတိ၊ အာဒါတဗ္ဗံ အာဒိယတိ၊ ဧဝမေဝ ဗုဒ္ဓနာဂဿ ဓမ္မကောဋ္ဌာသပရိစ္ဆေဒကဉာဏသင်္ခါတာ ဓမ္မစိန္တနာ ဝီမံသာ. တေန ဟိ ဉာဏေန သော ဘဗ္ဗာဘဗ္ဗေ ဇာနာတိ. တေန ဝုတ္တံ – ‘‘ဝီမံသာ ဓမ္မစိန္တနာ’’တိ. ဓမ္မကုစ္ဆိသမာတပေါတိ ဓမ္မော ဝုစ္စတိ စတုတ္ထဇ္ဈာနသမာဓိ၊ ကုစ္ဆိယေဝ သမာတပေါ ကုစ္ဆိသမာတပေါ. သမာတပေါ နာမ သမာတပနဋ္ဌာနံ. ဓမ္မော ကုစ္ဆိသမာတပေါ အဿာတိ ဓမ္မကုစ္ဆိသမာတပေါ. စတုတ္ထဇ္ဈာနသမာဓိသ္မိံ ဌိတဿ ဟိ တေ တေ ဣဒ္ဓိဝိဓာဒိဓမ္မာ ဣဇ္ဈန္တိ၊ တသ္မာ သော ကုစ္ဆိသမာတပေါတိ ဝုတ္တော. ဝိဝေကောတိ ကာယစိတ္တဥပဓိဝိဝေကော. ယထာ နာဂဿ ဝါလဓိ မက္ခိကာ ဝါရေတိ၊ ဧဝံ တထာဂတဿ ဝိဝေကော ဂဟဋ္ဌပဗ္ဗဇိတေ ဝါရေတိ. တသ္မာ သော ဝါလဓီတိ ဝုတ္တော.

ဈာယီတိ ဒုဝိဓေန ဈာနေန ဈာယီ. အဿာသရတောတိ နာဂဿ ဟိ အဿာသပဿာသာ ဝိယ ဗုဒ္ဓနာဂဿ ဖလသမာပတ္တိ၊ တတ္ထ ရတော၊ အဿာသပဿာသေဟိ ဝိယ တာယ ဝိနာ န ဝတ္တတီတိ အတ္ထော. သဗ္ဗတ္ထ သံဝုတောတိ သဗ္ဗဒွါရေသု သံဝုတော. အနဝဇ္ဇာနီတိ သမ္မာအာဇီဝေန ဥပ္ပန္နဘောဇနာနိ. သာဝဇ္ဇာနီတိ ပဉ္စဝိဓမိစ္ဆာဇီဝဝသေန ဥပ္ပန္နဘောဇနာနိ.

အဏုံထူလန္တိ ခုဒ္ဒကဉ္စ မဟန္တဉ္စ. သဗ္ဗံ ဆေတွာန ဗန္ဓနန္တိ သဗ္ဗံ ဒသဝိဓမ္ပိ သံယောဇနံ ဆိန္ဒိတွာန. နုပလိပ္ပတိ လောကေနာတိ လောကေန သဒ္ဓိံ တဏှာမာနဒိဋ္ဌိလေပေဟိ န လိပ္ပတိ. မဟာဂိနီတိ မဟာအဂ္ဂိ. ဝိညူဟိ ဒေသိတာတိ ဣဓ ပဋိသမ္ဘိဒါပ္ပတ္တော ကာဠုဒါယိတ္ထေရောဝ ဝိညူ ပဏ္ဍိတော၊ တေန ဒေသိတာတိ အတ္ထော. ဝိညဿန္တိ မဟာနာဂါ၊ နာဂံ နာဂေန ဒေသိတန္တိ ဥဒါယိတ္ထေရနာဂေန ဒေသိတံ ဗုဒ္ဓနာဂံ ဣတရေ ခီဏာသဝါ နာဂါ ဝိဇာနိဿန္တိ.

သရီရံ ဝိဇဟံ နာဂေါ၊ ပရိနိဗ္ဗိဿတီတိ ဗောဓိပလ္လင်္ကေ ကိလေသပရိနိဗ္ဗာနေန ပရိနိဗ္ဗုတော၊ ယမကသာလန္တရေ အနုပါဒိသေသာယ နိဗ္ဗာနဓာတုယာ ပရိနိဗ္ဗာယိဿတိ. ဧဝံ ပဋိသမ္ဘိဒါပ္ပတ္တော ဥဒါယိတ္ထေရော သောဠသဟိ ဂါထာဟိ စတုသဋ္ဌိယာ ပဒေဟိ ဒသဗလဿ ဝဏ္ဏံ ကထေန္တော ဒေသနံ နိဋ္ဌာပေသိ. ဘဂဝါ အနုမောဒိ. ဒေသနာဝသာနေ စတုရာသီတိပါဏသဟဿာနိ အမတပါနံ ပိဝိံသူတိ.

၂. မိဂသာလာသုတ္တဝဏ္ဏနာ

၄၄. ဒုတိယေ ကထံ ကထံ နာမာတိ ကေန ကေန ကာရဏေန. အညေယျောတိ အာဇာနိတဗ္ဗော. ယတြ ဟိ နာမာတိ ယသ္မိံ နာမ ဓမ္မေ. သမသမဂတိကာတိ သမဘာဝေနေဝ သမဂတိကာ. ဘဝိဿန္တီတိ ဇာတာ. သကဒါဂါမိပတ္တော တုသိတံ ကာယံ ဥပပန္နောတိ သကဒါဂါမိပုဂ္ဂလော ဟုတွာ တုသိတဘဝနေယေဝ နိဗ္ဗတ္တော. ကထံ ကထံ နာမာတိ ကေန ကေန နု ခေါ ကာရဏေန၊ ကိံ နု ခေါ ဇာနိတွာ ဒေသိတော၊ ဥဒါဟု အဇာနိတွာတိ. ထေရော ကာရဏံ အဇာနန္တော ဧဝံ ခေါ ပနေတံ ဘဂိနိ ဘဂဝတာ ဗျာကတန္တိ အာဟ.

အမ္မကာ အမ္မကပညာတိ ဣတ္ထီ ဟုတွာ ဣတ္ထိသညာယ ဧဝ သမန္နာဂတာ. ကေ စ ပုရိသပုဂ္ဂလပရောပရိယဉာဏေတိ ဧတ္ထ ပုရိသပုဂ္ဂလပရောပရိယဉာဏံ ဝုစ္စတိ ပုရိသပုဂ္ဂလာနံ တိက္ခမုဒုဝသေန ဣန္ဒြိယပရောပရိယဉာဏံ. တသ္မာ ကာ စ ဗာလာ မိဂသာလာ၊ ကေ စ ပုရိသပုဂ္ဂလာနံ ဣန္ဒြိယပရောပရိယဉာဏေ အပ္ပဋိဟတဝိသယာ သမ္မာသမ္ဗုဒ္ဓါ၊ ဥဘယမေတံ ဒူရေ သုဝိဒူရေတိ အယမေတ္ထ သင်္ခေပေါ.

ဣဒါနိ မိဂသာလာယ အတ္တနော ဒူရဘာဝံ ဒဿေန္တော ဆယိမေ၊ အာနန္ဒာတိအာဒိမာဟ. သောရတော ဟောတီတိ ပါပတော သုဋ္ဌု ဩရတော ဝိရတော ဟောတိ. သုရတောတိပိ ပါဌော. အဘိနန္ဒန္တိ သဗြဟ္မစာရီ ဧကတ္တဝါသေနာတိ တေန သဒ္ဓိံ ဧကတောဝါသေန သဗြဟ္မစာရီ အဘိနန္ဒန္တိ တုဿန္တိ. ဧကန္တဝါသေနာတိပိ ပါဌော၊ သတတဝါသေနာတိ အတ္ထော. သဝနေနပိ အကတံ ဟောတီတိ သောတဗ္ဗယုတ္တကံ အသုတံ ဟောတိ. ဗာဟုသစ္စေနပိ အကတံ ဟောတီတိ ဧတ္ထ ဗာဟုသစ္စံ ဝုစ္စတိ ဝီရိယံ၊ ဝီရိယေန ကတ္တဗ္ဗယုတ္တကံ အကတံ ဟောတီတိ အတ္ထော. ဒိဋ္ဌိယာပိ အပ္ပဋိဝိဒ္ဓံ ဟောတီတိ ဒိဋ္ဌိယာ ပဋိဝိဇ္ဈိတဗ္ဗံ အပ္ပဋိဝိဒ္ဓံ ဟောတိ. သာမာယိကမ္ပိ ဝိမုတ္တိံ န လဘတီတိ ကာလာနုကာလံ ဓမ္မဿဝနံ နိဿာယ ပီတိပါမောဇ္ဇံ န လဘတိ. ဟာနဂါမီယေဝ ဟောတီတိ ပရိဟာနိမေဝ ဂစ္ဆတိ.

ပမာဏိကာတိ ပုဂ္ဂလေသု ပမာဏဂ္ဂါဟကာ. ပမိနန္တီတိ ပမေတုံ တုလေတုံ အာရဘန္တိ. ဧကော ဟီနောတိ ဧကော ဂုဏေဟိ ဟီနော. ဧကော ပဏီတောတိ ဧကော ဂုဏေဟိ ပဏီတော. တံ ဟီတိ တံ ပမာဏကရဏံ.

အဘိက္ကန္တတရောတိ သုန္ဒရတရော. ပဏီတတရောတိ ဥတ္တမတရော. ဓမ္မသောတော နိဗ္ဗဟတီတိ သူရံ ဟုတွာ ပဝတ္တမာနဝိပဿနာဉာဏံ နိဗ္ဗဟတိ၊ အရိယဘူမိံ သမ္ပာပေတိ. တဒန္တရံ ကော ဇာနေယျာတိ တံ အန္တရံ တံ ကာရဏံ အညတြ တထာဂတေန ကော ဇာနေယျာတိ အတ္ထော.

ကောဓမာနောတိ ကောဓော စ မာနော စ. လောဘဓမ္မာတိ လောဘောယေဝ. ဝစီသင်္ခါရာတိ အာလာပသလ္လာပဝသေန ဝစနာနေဝ. ယော ဝါ ပနဿ မာဒိသောတိ ယော ဝါ ပန အညောပိ မယာ သဒိသော သမ္မာသမ္ဗုဒ္ဓေါယေဝ အဿ၊ သော ပုဂ္ဂလေသု ပမာဏံ ဂဏှေယျာတိ အတ္ထော. ခညတီတိ ဂုဏခဏနံ ပါပုဏာတိ. ဣမေ ခေါ၊ အာနန္ဒ၊ ဆ ပုဂ္ဂလာတိ ဒွေ သောရတာ၊ ဒွေ အဓိဂတကောဓမာနလောဘဓမ္မာ၊ ဒွေ အဓိဂတကောဓမာနဝစီသင်္ခါရာတိ ဣမေ ဆ ပုဂ္ဂလာ. ဂတိန္တိ ဉာဏဂတိံ. ဧကင်္ဂဟီနာတိ ဧကေကေန ဂုဏင်္ဂေန ဟီနာ. ပူရဏော သီလေန ဝိသေသီ အဟောသိ၊ ဣသိဒတ္တော ပညာယ. ပူရဏဿ သီလံ ဣသိဒတ္တဿ ပညာဌာနေ ဌိတံ၊ ဣသိဒတ္တဿ ပညာ ပူရဏဿ သီလဋ္ဌာနေ ဌိတာတိ.

၃. ဣဏသုတ္တဝဏ္ဏနာ

၄၅. တတိယေ ဒါလိဒ္ဒိယန္တိ ဒလိဒ္ဒဘာဝေါ. ကာမဘောဂိနောတိ ကာမေ ဘုဉ္ဇနကသတ္တဿ. အဿကောတိ အတ္တနော သန္တကေန ရဟိတော. အနာဠှိကောတိ န အဍ္ဎော. ဣဏံ အာဒိယတီတိ ဇီဝိတုံ အသက္ကောန္တော ဣဏံ အာဒိယတိ. ဝဍ္ဎိံ ပဋိဿုဏာတီတိ ဒါတုံ အသက္ကောန္တော ဝဍ္ဎိံ ဒဿာမီတိ ပဋိဇာနာတိ. အနုစရန္တိပိ နန္တိ ပရိသမဇ္ဈဂဏမဇ္ဈာဒီသု အာတပဌပနပံသုဩကိရဏာဒီဟိ ဝိပ္ပကာရံ ပါပေန္တော ပစ္ဆတော ပစ္ဆတော အနုဗန္ဓန္တိ. သဒ္ဓါ နတ္ထီတိ ဩကပ္ပနကသဒ္ဓါမတ္တကမ္ပိ နတ္ထိ. ဟိရီ နတ္ထီတိ ဟိရီယနာကာရမတ္တကမ္ပိ နတ္ထိ. ဩတ္တပ္ပံ နတ္ထီတိ ဘာယနာကာရမတ္တကမ္ပိ နတ္ထိ. ဝီရိယံ နတ္ထီတိ ကာယိကဝီရိယမတ္တကမ္ပိ နတ္ထိ. ပညာ နတ္ထီတိ ကမ္မဿကတပညာမတ္တကမ္ပိ နတ္ထိ. ဣဏာဒါနသ္မိံ ဝဒါမီတိ ဣဏဂ္ဂဟဏံ ဝဒါမိ. မာ မံ ဇညူတိ မာ မံ ဇာနာတု.

ဒါလိဒ္ဒိယံ ဒုက္ခန္တိ ဓနဒလိဒ္ဒဘာဝေါ ဒုက္ခံ. ကာမလာဘာဘိဇပ္ပိနန္တိ ကာမလာဘံ ပတ္ထေန္တာနံ. ပါပကမ္မဝိနိဗ္ဗယောတိ ပါပကမ္မဝဍ္ဎကော. သံသပ္ပတီတိ ပရိပ္ဖန္ဒတိ. ဇာနန္တိ ဇာနန္တော. ယဿ ဝိပ္ပဋိသာရဇာတိ ယေ အဿ ဝိပ္ပဋိသာရတော ဇာတာ. ယောနိမညတရန္တိ ဧကံ တိရစ္ဆာနယောနိံ. ဒဒံ စိတ္တံ ပသာဒယန္တိ စိတ္တံ ပသာဒေန္တော ဒဒမာနော.

ကဋဂ္ဂါဟောတိ ဇယဂ္ဂါဟော၊ အနပရာဓဂ္ဂါဟော ဟောတိ. ဃရမေသိနောတိ ဃရာဝါသံ ပရိယေသန္တဿ ဝသမာနဿ ဝါ. စာဂေါ ပုညံ ပဝဍ္ဎတီတိ စာဂေါတိ သင်္ခံ ဂတံ ပုညံ ဝဍ္ဎတိ. စာဂါ ပုညန္တိ ဝါ ပါဌော. ပတိဋ္ဌိတာတိ ပတိဋ္ဌိတသဒ္ဓါ နာမ သောတာပန္နဿ သဒ္ဓါ. ဟိရိမနောတိ ဟိရိသမ္ပယုတ္တစိတ္တော. နိရာမိသံ သုခန္တိ တီဏိ ဈာနာနိ နိဿာယ ဥပ္ပဇ္ဇနကသုခံ. ဥပေက္ခန္တိ စတုတ္ထဇ္ဈာနုပေက္ခံ. အာရဒ္ဓဝီရိယောတိ ပရိပုဏ္ဏပဂ္ဂဟိတဝီရိယော. ဈာနာနိ ဥပသမ္ပဇ္ဇာတိ စတ္တာရိ ဈာနာနိ ပတွာ. ဧကောဒိ နိပကော သတောတိ ဧကဂ္ဂစိတ္တော ကမ္မဿကတဉာဏသတီဟိ စ သမန္နာဂတော.

ဧဝံ ဉတွာ ယထာဘူတန္တိ ဧဝံ ဧတ္တကံ ကာရဏံ ယထာသဘာဝံ ဇာနိတွာ. သဗ္ဗသံယောဇနက္ခယေတိ နိဗ္ဗာနေ. သဗ္ဗသောတိ သဗ္ဗာကာရေန. အနုပါဒါယာတိ အဂ္ဂဟေတွာ. သမ္မာ စိတ္တံ ဝိမုစ္စတီတိ ဣဒံ ဝုတ္တံ ဟောတိ – သဗ္ဗသံယောဇနက္ခယသင်္ခါတေ နိဗ္ဗာနေ သဗ္ဗသော အနုပါဒိယိတွာ သမ္မာ ဟေတုနာ နယေန မဂ္ဂစိတ္တံ ဝိမုစ္စတိ. ‘‘ဧတံ ဉတွာ ယထာဘူတံ၊ သဗ္ဗသံယောဇနက္ခယ’’န္တိပိ ပါဠိယံ လိခိတံ၊ တဿ ဧတံ သဗ္ဗသံယောဇနက္ခယသင်္ခါတံ နိဗ္ဗာနံ ယထာဘူတံ ဉတွာတိ အတ္ထော. ပုရိမပစ္ဆိမေဟိ ပန သဒ္ဓိံ န ဃဋီယတိ.

တဿ သမ္မာ ဝိမုတ္တဿာတိ တဿ သမ္မာ ဝိမုတ္တဿ ခီဏာသဝဿ. ဉာဏံ ဟောတီတိ ပစ္စဝေက္ခဏဉာဏံ ဟောတိ. တာဒိနောတိ တံသဏ္ဌိတဿ. အကုပ္ပါတိ အကုပ္ပါရမ္မဏတ္တာ ကုပ္ပကာရဏာနံ ကိလေသာနဉ္စ အဘာဝေန အကုပ္ပါ. ဝိမုတ္တီတိ မဂ္ဂဝိမုတ္တိပိ ဖလဝိမုတ္တိပိ. ဘဝသံယောဇနက္ခယေတိ ဘဝသံယောဇနက္ခယသင်္ခါတေ နိဗ္ဗာနေ ဘဝသံယောဇနာနဉ္စ ခယန္တေ ဥပ္ပန္နာ. ဧတံ ခေါ ပရမံ ဉာဏန္တိ ဧတံ မဂ္ဂဖလဉာဏံ ပရမဉာဏံ နာမ. သုခမနုတ္တရန္တိ ဧတဒေဝ မဂ္ဂဖလသုခံ အနုတ္တရံ သုခံ နာမ. အာဏဏျမုတ္တမန္တိ သဗ္ဗေသံ အဏဏာနံ ခီဏာသဝေါ ဥတ္တမအဏဏော၊ တသ္မာ အရဟတ္တဖလံ အာဏဏျမုတ္တမန္တိ အရဟတ္တဖလေန ဒေသနာယ ကူဋံ ဂဏှိ. ဣမသ္မိဉ္စ သုတ္တေ ဝဋ္ဋမေဝ ကထေတွာ ဂါထာသု ဝဋ္ဋဝိဝဋ္ဋံ ကထိတန္တိ.

၄. မဟာစုန္ဒသုတ္တဝဏ္ဏနာ

၄၆. စတုတ္ထေ စေတီသူတိ စေတိရဋ္ဌေ. သယံဇာတိယန္တိ ဧဝံနာမကေ နိဂမေ. မဟာစုန္ဒောတိ ဓမ္မသေနာပတိဿ ကနိဋ္ဌဘာတိကော. ဓမ္မေ ယောဂေါ အနုယောဂေါ ဧတေသန္တိ ဓမ္မယောဂါ. ဓမ္မကထိကာနံ ဧတံ နာမံ. ဈာယန္တီတိ ဈာယီ. အပသာဒေန္တီတိ ဃဋ္ဋေန္တိ ဟိံသန္တိ. ဈာယန္တီတိ စိန္တေန္တိ. ပဇ္ဈာယန္တီတိအာဒီနိ ဥပသဂ္ဂဝသေန ဝဍ္ဎိတာနိ. ကိမိမေ ဈာယန္တီတိ ကိံ နာမ ဣမေ ဈာယန္တိ. ကိန္တိမေ ဈာယန္တီတိ ကိမတ္ထံ ဣမေ ဈာယန္တိ. ကထံ ဣမေ ဈာယန္တီတိ ကေန ကာရဏေန ဣမေ ဈာယန္တိ. အမတံ ဓာတုံ ကာယေန ဖုသိတွာ ဝိဟရန္တီတိ မရဏဝိရဟိတံ နိဗ္ဗာနဓာတုံ သန္ဓာယ ကမ္မဋ္ဌာနံ ဂဟေတွာ ဝိဟရန္တာ အနုက္ကမေန တံ နာမကာယေန ဖုသိတွာ ဝိဟရန္တိ. ဂမ္ဘီရံ အတ္ထပဒန္တိ ဂုဠှံ ပဋိစ္ဆန္နံ ခန္ဓဓာတုအာယတနာဒိအတ္ထံ. ပညာယ အတိဝိဇ္ဈ ပဿန္တီတိ သဟဝိပဿနာယ မဂ္ဂပညာယ ပဋိဝိဇ္ဈိတွာ ပဿန္တိ. ဣမသ္မိံ ပနတ္ထေ သမ္မသနပဋိဝေဓပညာပိ ဥဂ္ဂဟပရိပုစ္ဆာပညာပိ ဝဋ္ဋတိယေဝါတိ.

၅-၆. သန္ဒိဋ္ဌိကသုတ္တဒွယဝဏ္ဏနာ

၄၇-၄၈. ပဉ္စမေ သန္တံ ဝါ အဇ္ဈတ္တန္တိ နိယကဇ္ဈတ္တေ ဝိဇ္ဇမာနံ. လောဘောတိအာဒီဟိ တီဏိ အကုသလမူလာနိ ဒဿိတာနိ. လောဘဓမ္မာတိအာဒီဟိ တံသမ္ပယုတ္တကာ ဓမ္မာ. ဆဋ္ဌေ ကာယသန္ဒောသန္တိ ကာယဒွါရဿ ဒုဿနာကာရံ. သေသဒွယေပိ ဧသေဝ နယော. ဣမေသု ဒွီသု သုတ္တေသု ပစ္စဝေက္ခဏာဝ ကထိတာ.

၇. ခေမသုတ္တဝဏ္ဏနာ

၄၉. သတ္တမေ ဝုသိတဝါတိ ဝုတ္ထဗြဟ္မစရိယဝါသော. ကတကရဏီယောတိ စတူဟိ မဂ္ဂေဟိ ကတ္တဗ္ဗံ ကတွာ ဌိတော. ဩဟိတဘာရောတိ ခန္ဓဘာရံ ကိလေသဘာရံ အဘိသင်္ခါရဘာရဉ္စ ဩတာရေတွာ ဌိတော. အနုပ္ပတ္တသဒတ္ထောတိ သဒတ္ထော ဝုစ္စတိ အရဟတ္တံ၊ တံ ပတ္တောတိ အတ္ထော. ပရိက္ခီဏဘဝသံယောဇနောတိ ခီဏဘဝဗန္ဓနော. သမ္မဒညာ ဝိမုတ္တောတိ သမ္မာ ဟေတုနာ ကာရဏေန ဇာနိတွာ ဝိမုတ္တော. တဿ န ဧဝံ ဟောတိ အတ္ထိ မေ သေယျောတိ ဝါတိအာဒီဟိ သေယျဿ သေယျောဟမသ္မီတိ မာနာဒယော တယော မာနာ ပဋိက္ခိတ္တာ. န ဟိ ခီဏာသဝဿ ‘‘အတ္ထိ မယှံ သေယျော၊ အတ္ထိ သဒိသော၊ အတ္ထိ ဟီနော’’တိ မာနော ဟောတိ. နတ္ထိ မေ သေယျောတိအာဒီဟိပိ တေယေဝ ပဋိက္ခိတ္တာ. န ဟိ ခီဏာသဝဿ ‘‘အဟမေဝ သေယျော၊ အဟံ သဒိသော၊ အဟံ ဟီနော၊ အညေ သေယျာဒယော နတ္ထီ’’တိ ဧဝံ မာနော ဟောတိ.

အစိရပက္ကန္တေသူတိ အရဟတ္တံ ဗျာကရိတွာ အစိရံယေဝ ပက္ကန္တေသု. အညံ ဗျာကရောန္တီတိ အရဟတ္တံ ကထေန္တိ. ဟသမာနကာ မညေ အညံ ဗျာကရောန္တီတိ ဟသမာနာ ဝိယ ကထေန္တိ. ဝိဃာတံ အာပဇ္ဇန္တီတိ ဒုက္ခံ အာပဇ္ဇန္တိ.

န ဥဿေသု န ဩမေသု၊ သမတ္တေ နောပနီယရေတိ ဧတ္ထ ဥဿာတိ ဥဿိတတာ သေယျပုဂ္ဂလာ. ဩမာတိ ဟီနာ. သမတ္တောတိ သဒိသော. ဣတိ ဣမေသု တီသုပိ သေယျဟီနသဒိသေသု ခီဏာသဝါ မာနေန န ဥပနီယရေ၊ န ဥပနေန္တိ၊ န ဥပဂစ္ဆန္တီတိ အတ္ထော. ခီဏာ ဇာတီတိ ခီဏာ တေသံ ဇာတိ. ဝုသိတံ ဗြဟ္မစရိယန္တိ ဝုတ္ထံ မဂ္ဂဗြဟ္မစရိယံ. စရန္တိ သံယောဇနဝိပ္ပမုတ္တာတိ သဗ္ဗသံယောဇနေဟိ ဝိမုတ္တာ ဟုတွာ စရန္တိ. သုတ္တေပိ ဂါထာယမ္ပိ ခီဏာသဝေါ ကထိတော.

၈. ဣန္ဒြိယသံဝရသုတ္တဝဏ္ဏနာ

၅၀. အဋ္ဌမေ ဟတူပနိသံ ဟောတီတိ ဟတူပနိဿယံ ဟောတိ. သီလဝိပန္နဿာတိ ဝိပန္နသီလဿ. ယထာဘူတဉာဏဒဿနန္တိ တရုဏဝိပဿနာဉာဏံ. နိဗ္ဗိဒါဝိရာဂေါတိ ဧတ္ထ နိဗ္ဗိဒါ ဗလဝဝိပဿနာ၊ ဝိရာဂေါ အရိယမဂ္ဂေါ. ဝိမုတ္တိဉာဏဒဿနန္တိ ဧတ္ထ ဝိမုတ္တီတိ အရဟတ္တဖလံ၊ ဉာဏဒဿနန္တိ ပစ္စဝေက္ခဏဉာဏံ. ဥပနိဿယသမ္ပန္နံ ဟောတီတိ သမ္ပန္နဥပနိဿယံ ဟောတိ. ဣမသ္မိံ သုတ္တေ သီလာနုရက္ခဏဣန္ဒြိယသံဝရော ကထိတော.

၉. အာနန္ဒသုတ္တဝဏ္ဏနာ

၅၁. နဝမေ ကိတ္တာဝတာတိ ကိတ္တကေန. အဿုတဉ္စေဝါတိ အညသ္မိံ ကာလေ အဿုတပုဗ္ဗံ. န သမ္မောသံ ဂစ္ဆန္တီတိ ဝိနာသံ န ဂစ္ဆန္တိ. စေတသော သမ္ဖုဋ္ဌပုဗ္ဗာတိ စိတ္တေန ဖုသိတပုဗ္ဗာ. သမုဒါစရန္တီတိ မနောဒွါရေ စရန္တိ. အဝိညာတဉ္စ ဝိဇာနာတီတိ အညသ္မိံ ကာလေ အဝိညာတကာရဏံ ဇာနာတိ. ပရိယာပုဏာတီတိ ဝဠဉ္ဇေတိ ကထေတိ. ဒေသေတီတိ ပကာသေတိ. ပရံ ဝါစေတီတိ ပရံ ဥဂ္ဂဏှာပေတိ.

အာဂတာဂမာတိ ဒီဃာဒီသု ယော ကောစိ အာဂမော အာဂတော ဧတေသန္တိ အာဂတာဂမာ. ဓမ္မဓရာတိ သုတ္တန္တပိဋကဓရာ. ဝိနယဓရာတိ ဝိနယပိဋကဓရာ. မာတိကာဓရာတိ ဒွေပါတိမောက္ခဓရာ. ပရိပုစ္ဆတီတိ အနုသန္ဓိပုဗ္ဗာပရံ ပုစ္ဆတိ. ပရိပဉှတီတိ ဣဒဉ္စိဒဉ္စ ပုစ္ဆိဿာမီတိ ပရိတုလတိ ပရိစ္ဆိန္ဒတိ. ဣဒံ၊ ဘန္တေ၊ ကထန္တိ၊ ဘန္တေ၊ ဣဒံ အနုသန္ဓိပုဗ္ဗာပရံ ကထံ ဟောတီတိ ပုစ္ဆတိ. ဣမဿ ကွတ္ထောတိ ဣမဿ ဘာသိတဿ ကော အတ္ထောတိ ပုစ္ဆတိ. အဝိဝဋန္တိ အဝိဝရိတံ. ဝိဝရန္တီတိ ပါကဋံ ကရောန္တိ. ကင်္ခါဌာနိယေသူတိ ကင်္ခါယ ကာရဏဘူတေသု. တတ္ထ ယသ္မိံ ဓမ္မေ ကင်္ခါ ဥပ္ပဇ္ဇတိ၊ သွေဝ ကင်္ခါဌာနိယော နာမာတိ ဝေဒိတဗ္ဗော.