၁. သမ္မုတိပေယျာလာဒိဝဏ္ဏနာ

၂၇၂. ဘတ္တုဒ္ဒေသကာဒီနံ ဝိနိစ္ဆယကထာ သမန္တပါသာဒိကာယ ဝိနယဋ္ဌကထာယံ (စူဠဝ. အဋ္ဌ. ၃၂၅) ဝုတ္တနယေန ဝေဒိတဗ္ဗာတိ. သမ္မတော န ပေသေတဗ္ဗောတိ ပကတိယာ သမ္မတော ‘‘ဂစ္ဆ ဘတ္တာနိ ဥဒ္ဒိသာဟီ’’တိ န ပေသေတဗ္ဗော.

၂၇၃-၂၈၅. သာဋိယဂ္ဂါဟာပကောတိ ဝဿိကသာဋိကာယ ဂါဟာပကော. ပတ္တဂ္ဂါဟာပကောတိ ‘‘ယော စ တဿာ ဘိက္ခုပရိသာယ ပတ္တပရိယန္တော၊ သော တဿ ဘိက္ခုနော ပဒါတဗ္ဗော’’တိ ဧတ္ထ ဝုတ္တပတ္တဂ္ဂါဟာပကော.

၂၉၃-၃၀၂. အာဇီဝကောတိ နဂ္ဂပရိဗ္ဗာဇကော. နိဂဏ္ဌောတိ ပုရိမဘာဂပ္ပဋိစ္ဆန္နော. မုဏ္ဍသာဝကောတိ နိဂဏ္ဌသာဝကော. ဇဋိလကောတိ တာပသော. ပရိဗ္ဗာဇကောတိ ဆန္နပရိဗ္ဗာဇကော. မာဂဏ္ဍိကာဒယောပိ တိတ္ထိယာ ဧဝ. ဧတေသံ ပန သီလေသု ပရိပူရကာရိတာယ အဘာဝေန သုက္ကပက္ခော န ဂဟိတော. သေသမေတ္ထ ဥတ္တာနမေဝါတိ.

မနောရထပူရဏိယာ အင်္ဂုတ္တရနိကာယ-အဋ္ဌကထာယ