၁. ပဌမသမ္မတ္တနိယာမသုတ္တဝဏ္ဏနာ

၁၅၁. စတုတ္ထဿ ပဌမေ အဘဗ္ဗော နိယာမံ ဩက္ကမိတုံ ကုသလေသု ဓမ္မေသု သမ္မတ္တန္တိ ကုသလေသု ဓမ္မေသု သမ္မတ္တဘူတံ မဂ္ဂနိယာမံ ဩက္ကမိတုံ အဘဗ္ဗော အဘာဇနံ. ကထံ ပရိဘောတီတိအာဒီသု ‘‘ကိံ ကထာ နာမ ဧသာ’’တိ ဝဒန္တော ကထံ ပရိဘောတိ နာမ. ‘‘ကိံ နာမေသ ကထေတိ၊ ကိံ အယံ ဇာနာတီ’’တိ ဝဒန္တော ကထိကံ ပရိဘောတိ နာမ. ‘‘မယံ ကိံ ဇာနာမ၊ ကုတော အမှာကံ ဧတံ သောတုံ ဗလ’’န္တိ ဝဒန္တော အတ္တာနံ ပရိဘောတိ နာမ. ဝိပရိယာယေန သုက္ကပက္ခော ဝေဒိတဗ္ဗော.