၉. အက္ခမသုတ္တဝဏ္ဏနာ

၁၃၉. နဝမေ ဟတ္ထိကာယန္တိ ဟတ္ထိဃဋံ. သေသေသုပိ ဧသေဝ နယော. သင်္ဂါမေ အဝစရန္တီတိ သင်္ဂါမာဝစရာ. ဧကိဿာ ဝါ တိဏောဒကဒတ္တိယာ ဝိမာနိတောတိ ဧကဒိဝသံ ဧကေန တိဏောဒကဒါနေန ဝိမာနိတော၊ ဧကဒိဝသမတ္တံ အလဒ္ဓတိဏောဒကောတိ အတ္ထော. ဣတော ပရမ္ပိ ဧသေဝ နယော. န သက္ကောတိ စိတ္တံ သမာဒဟိတုန္တိ အာရမ္မဏေ စိတ္တံ သမ္မာ ဌပေတုံ န သက္ကောတိ. သေသမေတ္ထ ဥတ္တာနမေဝ. ဣမသ္မိံ ပန သုတ္တေ ဝဋ္ဋဝိဝဋ္ဋံ ကထိတန္တိ ဝေဒိတဗ္ဗံ.