၂. ပစ္ဆာသမဏသုတ္တဝဏ္ဏနာ

၁၁၂. ဒုတိယေ ပတ္တပရိယာပန္နံ န ဂဏှာတီတိ ဥပဇ္ဈာယေ နိဝတ္တိတွာ ဌိတေ အတ္တနော တုစ္ဆပတ္တံ ဒတွာ တဿ ပတ္တံ န ဂဏှာတိ၊ တတော ဝါ ဒီယမာနံ န ဂဏှာတိ. န နိဝါရေတီတိ ဣဒံ ဝစနံ အာပတ္တိဝီတိက္ကမဝစနံ နာမာတိ န ဇာနာတိ. ဉတွာ ဝါပိ၊ ‘‘ဘန္တေ၊ ဧဝရူပံ နာမ ဝတ္တုံ န ဝဋ္ဋတီ’’တိ န နိဝါရေတိ. ကထံ ဩပါတေတီတိ တဿ ကထံ ဘိန္ဒိတွာ အတ္တနော ကထံ ပဝေသေတိ. ဇဠောတိ ဇဍော. ဧဠမူဂေါတိ ပဂ္ဃရိတခေဠမုခေါ. တတိယံ ဥတ္တာနမေဝ.