၂. ဥဿင်္ကိတသုတ္တဝဏ္ဏနာ

၁၀၂. ဒုတိယေ ဥဿင်္ကိတပရိသင်္ကိတောတိ ဥဿင်္ကိတော စ ပရိသင်္ကိတော စ. အပိ အကုပ္ပဓမ္မောပီတိ အပိ အကုပ္ပဓမ္မော ခီဏာသဝေါ သမာနောပိ ပရေဟိ ပါပဘိက္ခူဟိ ဥဿင်္ကိတပရိသင်္ကိတော ဟောတီတိ အတ္ထော. ဝေသိယာဂေါစရောတိအာဒီသု ဝေသိယာ ဝုစ္စန္တိ ရူပူပဇီဝိနိယော၊ တာ ဂေါစရော အဿာတိ ဝေသိယာဂေါစရော၊ တာသံ ဂေဟံ အဘိဏှဂမနောတိ အတ္ထော. သေသပဒေသုပိ ဧသေဝ နယော. တတ္ထ ပန ဝိဓဝါတိ မတပတိကာ. ထုလ္လကုမာရိကာတိ မဟလ္လိကကုမာရိကာယော.