၂. ဒုတိယပဏ္ဏာသကံ

(၆) ၁. နီဝရဏဝဂ္ဂေါ

၁. အာဝရဏသုတ္တဝဏ္ဏနာ

၅၁. ဒုတိယဿ ပဌမေ အာဝရဏဝသေန အာဝရဏာ. နီဝရဏဝသေန နီဝရဏာ. စေတော အဇ္ဈာရုဟန္တီတိ စေတသော အဇ္ဈာရုဟာ. ဝိပဿနာပညဉ္စ မဂ္ဂပညဉ္စ ဥပ္ပတ္တိနိဝါရဏဋ္ဌေန ဒုဗ္ဗလံ ကရောန္တီတိ ပညာယ ဒုဗ္ဗလီကရဏာ. ယာ ဝါ ဧတေဟိ သဒ္ဓိံ ဝေါကိဏ္ဏာ ပညာ ဥပ္ပဇ္ဇတိ၊ တံ ဒုဗ္ဗလံ ကရောန္တီတိပိ ပညာယ ဒုဗ္ဗလီကရဏာ. အဗလာယာတိ ပဉ္စနီဝရဏပရိယောနဒ္ဓတ္တာ အပဂတဗလာယ. ဥတ္တရိ ဝါ မနုဿဓမ္မာ အလမရိယဉာဏဒဿနဝိသေသန္တိ ဒသကုသလကမ္မပထသင်္ခါတာ မနုဿဓမ္မာ ဥတ္တရိ အရိယဘာဝံ ကာတုံ သမတ္ထံ ဉာဏဒဿနဝိသေသံ. ဟာရဟာရိနီတိ ဟရိတဗ္ဗံ ဟရိတုံ သမတ္ထာ. နင်္ဂလမုခါနီတိ မာတိကာမုခါနိ. တာနိ ဟိ နင်္ဂလသရိက္ခကတ္တာ နင်္ဂလေဟိ စ ခတတ္တာ နင်္ဂလမုခါနီတိ ဝုစ္စန္တိ.

ဧဝမေဝ ခေါတိ ဧတ္ထ သောတံ ဝိယ ဝိပဿနာဉာဏံ ဒဋ္ဌဗ္ဗံ၊ ဥဘတော နင်္ဂလမုခါနံ ဝိဝရဏကာလော ဝိယ ဆသု ဒွါရေသု သံဝရဿ ဝိဿဋ္ဌကာလော၊ မဇ္ဈေနဒိယာ ရုက္ခပါဒေ ကောဋ္ဋေတွာ ပလာလတိဏမတ္တိကာဟိ အာဝရဏေ ကတေ ဥဒကဿ ဝိက္ခိတ္တဝိသဋဗျာဒိဏ္ဏကာလော ဝိယ ပဉ္စဟိ နီဝရဏေဟိ ပရိယောနဒ္ဓကာလော၊ ဧဝံ အာဝရဏေ ကတေ ဝိဟတဝေဂဿ ဥဒကဿ တိဏပလာလာဒီနိ ပရိကဍ္ဎိတွာ သမုဒ္ဒံ ပါပုဏိတုံ အသမတ္ထကာလော ဝိယ ဝိပဿနာဉာဏေန သဗ္ဗာကုသလေ ဝိဒ္ဓံသေတွာ နိဗ္ဗာနသာဂရံ ပါပုဏိတုံ အသမတ္ထကာလော ဝေဒိတဗ္ဗော. သုက္ကပက္ခေ ဝုတ္တဝိပလ္လာသေန ယောဇနာ ကာတဗ္ဗာ. ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ. ဒုတိယံ ဥတ္တာနတ္ထမေဝ.

၃. ပဓာနိယင်္ဂသုတ္တဝဏ္ဏနာ

၅၃. တတိယေ ပဓာနိယင်္ဂါနီတိ ပဓာနံ ဝုစ္စတိ ပဒဟနဘာဝေါ၊ ပဓာနမဿ အတ္ထီတိ ပဓာနိယော၊ ပဓာနိယဿ ဘိက္ခုနော အင်္ဂါနီတိ ပဓာနိယင်္ဂါနိ. သဒ္ဓေါတိ သဒ္ဓါယ သမန္နာဂတော. သဒ္ဓါ ပနေသာ အာဂမသဒ္ဓါ အဓိဂမသဒ္ဓါ ဩကပ္ပနသဒ္ဓါ ပသာဒသဒ္ဓါတိ စတုဗ္ဗိဓာ. တတ္ထ သဗ္ဗညုဗောဓိသတ္တာနံ သဒ္ဓါ၊ အဘိနီဟာရတော ပဋ္ဌာယ အာဂတတ္တာ အာဂမသဒ္ဓါ နာမ. အရိယသာဝကာနံ ပဋိဝေဓေန အဓိဂတတ္တာ အဓိဂမသဒ္ဓါ နာမ. ဗုဒ္ဓေါ ဓမ္မော သံဃောတိ ဝုတ္တေ အစလဘာဝေန ဩကပ္ပနံ ဩကပ္ပနသဒ္ဓါ နာမ. ပသာဒုပ္ပတ္တိ ပသာဒသဒ္ဓါ နာမ. ဣဓ ဩကပ္ပနသဒ္ဓါ အဓိပ္ပေတာ. ဗောဓိန္တိ စတုမဂ္ဂဉာဏံ. တံ သုပ္ပဋိဝိဒ္ဓံ တထာဂတေနာတိ သဒ္ဒဟတိ. ဒေသနာသီသမေဝ စေတံ၊ ဣမိနာ ပန အင်္ဂေန တီသုပိ ရတနေသု သဒ္ဓါ အဓိပ္ပေတာ. ယဿ ဟိ ဗုဒ္ဓါဒီသု ပသာဒေါ ဗလဝါ၊ တဿ ပဓာနဝီရိယံ ဣဇ္ဈတိ.

အပ္ပါဗာဓောတိ အရောဂေါ. အပ္ပါတင်္ကောတိ နိဒ္ဒုက္ခော. သမဝေပါကိနိယာတိ သမဝိပါကိနိယာ. ဂဟဏိယာတိ ကမ္မဇတေဇောဓာတုယာ. နာတိသီတာယ နာစ္စုဏှာယာတိ အတိသီတလဂ္ဂဟဏိကော ဟိ သီတဘီရုကော ဟောတိ၊ အစ္စုဏှဂ္ဂဟဏိကော ဥဏှဘီရုကော၊ တေသံ ပဓာနံ န ဣဇ္ဈတိ၊ မဇ္ဈိမဂ္ဂဟဏိကဿ ဣဇ္ဈတိ. တေနာဟ – မဇ္ဈိမာယ ပဓာနက္ခမာယာတိ. ယထာဘူတံ အတ္တာနံ အာဝိကတ္တာတိ ယထာဘူတံ အတ္တနော အဂုဏံ ပကာသေတာ. ဥဒယတ္ထဂါမိနိယာတိ ဥဒယဉ္စ အတ္ထဉ္စ ဂန္တုံ ပရိစ္ဆိန္ဒိတုံ သမတ္ထာယ. ဧတေန ပညာသလက္ခဏပရိဂ္ဂါဟကံ ဥဒယဗ္ဗယဉာဏံ ဝုတ္တံ. အရိယာယာတိ ပရိသုဒ္ဓါယ. နိဗ္ဗေဓိကာယာတိ အနိဗ္ဗိဒ္ဓပုဗ္ဗေ လောဘက္ခန္ဓာဒယော နိဗ္ဗိဇ္ဈိတုံ သမတ္ထာယ. သမ္မာ ဒုက္ခက္ခယဂါမိနိယာတိ တဒင်္ဂဝသေန ကိလေသာနံ ပဟီနတ္တာ ယံ ဒုက္ခံ ခီယတိ၊ တဿ ဒုက္ခဿ ခယဂါမိနိယာ. ဣတိ သဗ္ဗေဟိပိ ဣမေဟိ ပဒေဟိ ဝိပဿနာပညာဝ ကထိတာ. ဒုပ္ပညဿ ဟိ ပဓာနံ န ဣဇ္ဈတိ.

၄. သမယသုတ္တဝဏ္ဏနာ

၅၄. စတုတ္ထေ ပဓာနာယာတိ ဝီရိယကရဏတ္ထာယ. န သုကရံ ဥဉ္ဆေန ပဂ္ဂဟေန ယာပေတုန္တိ န သက္ကာ ဟောတိ ပတ္တံ ဂဟေတွာ ဥဉ္ဆာစရိယာယ ယာပေတုံ. ဣမသ္မိမ္ပိ သုတ္တေ ဝဋ္ဋဝိဝဋ္ဋမေဝ ကထိတံ.

၅. မာတာပုတ္တသုတ္တဝဏ္ဏနာ

၅၅. ပဉ္စမေ ပရိယာဒါယ တိဋ္ဌတီတိ ပရိယာဒိယိတွာ ဂဟေတွာ ခေပေတွာ တိဋ္ဌတိ. ဥဂ္ဃါတိတာတိ ဥဒ္ဓုမာတာ.

အသိဟတ္ထေနာတိ သီသစ္ဆေဒနတ္ထာယ အသိံ အာဒါယ အာဂတေနာပိ. ပိသာစေနာတိ ခါဒိတုံ အာဂတယက္ခေနာပိ. အာသီဒေတိ ဃဋ္ဋေယျ. မဉ္ဇုနာတိ မုဒုကေန. ကာမောဃဝုဠှာနန္တိ ကာမောဃေန ဝုဠှာနံ ကဍ္ဎိတာနံ. ကာလံ ဂတိ ဘဝါဘဝန္တိ ဝဋ္ဋကာလံ ဂတိဉ္စ ပုနပ္ပုနဗ္ဘဝေ စ. ပုရက္ခတာတိ ပုရေစာရိကာ ပုရတော ဂတာယေဝ. ယေ စ ကာမေ ပရိညာယာတိ ယေ ပဏ္ဍိတာ ဒုဝိဓေပိ ကာမေ တီဟိ ပရိညာဟိ ပရိဇာနိတွာ. စရန္တိ အကုတောဘယာတိ ခီဏာသဝါနံ ကုတောစိ ဘယံ နာမ နတ္ထိ၊ တသ္မာ တေ အကုတောဘယာ ဟုတွာ စရန္တိ. ပါရင်္ဂတာတိ ပါရံ ဝုစ္စတိ နိဗ္ဗာနံ၊ တံ ဥပဂတာ၊ သစ္ဆိကတွာ ဌိတာတိ အတ္ထော. အာသဝက္ခယန္တိ အရဟတ္တံ. ဣမသ္မိံ သုတ္တေ ဝဋ္ဋမေဝ ကထေတွာ ဂါထာသု ဝဋ္ဋဝိဝဋ္ဋံ ကထိတံ.

၆. ဥပဇ္ဈာယသုတ္တဝဏ္ဏနာ

၅၆. ဆဋ္ဌေ မဓုရကဇာတောတိ သဉ္ဇာတဂရုဘာဝေါ. ဒိသာ စ မေ န ပက္ခာယန္တီတိ စတဿော ဒိသာ စ အနုဒိသာ စ မယှံ န ဥပဋ္ဌဟန္တီတိ ဝဒတိ. ဓမ္မာ စ မံ နပ္ပဋိဘန္တီတိ သမထဝိပဿနာဓမ္မာပိ မေ န ဥပဋ္ဌဟန္တိ. အနဘိရတော စ ဗြဟ္မစရိယံ စရာမီတိ ဥက္ကဏ္ဌိတော ဟုတွာ ဗြဟ္မစရိယဝါသံ ဝသာမိ. ယေန ဘဂဝါ တေနုပသင်္ကမီတိ တဿ ကထံ သုတွာ ‘‘ဗုဒ္ဓဝေနေယျပုဂ္ဂလော အယ’’န္တိ တံ ကာရဏံ ဘဂဝတော အာရောစေတုံ ဥပသင်္ကမိ. အဝိပဿကဿ ကုသလာနံ ဓမ္မာနန္တိ ကုသလဓမ္မေ အဝိပဿန္တဿ၊ အနေသန္တဿ အဂဝေသန္တဿာတိ အတ္ထော. ဗောဓိပက္ခိယာနံ ဓမ္မာနန္တိ သတိပဋ္ဌာနာဒီနံ သတ္တတိံသဓမ္မာနံ.

၇. အဘိဏှပစ္စဝေက္ခိတဗ္ဗဌာနသုတ္တဝဏ္ဏနာ

၅၇. သတ္တမေ ဇရာဓမ္မောမှီတိ ဇရာသဘာဝေါ အမှိ. ဇရံ အနတီတောတိ ဇရံ အနတိက္ကန္တော၊ အန္တောဇရာယ ဧဝ စရာမိ. သေသပဒေသုပိ ဧသေဝ နယော. ကမ္မဿကောတိအာဒီသု ကမ္မံ မယှံ သကံ အတ္တနော သန္တကန္တိ ကမ္မဿကော အမှိ. ကမ္မဿ ဒါယာဒေါတိ ကမ္မဒါယာဒေါ၊ ကမ္မံ မယှံ ဒါယဇ္ဇံ သန္တကန္တိ အတ္ထော. ကမ္မံ မယှံ ယောနိ ကာရဏန္တိ ကမ္မယောနိ. ကမ္မံ မယှံ ဗန္ဓူတိ ကမ္မဗန္ဓု၊ ကမ္မဉာတကောတိ အတ္ထော. ကမ္မံ မယှံ ပဋိသရဏံ ပတိဋ္ဌာတိ ကမ္မပဋိသရဏော. တဿ ဒါယာဒေါ ဘဝိဿာမီတိ တဿ ကမ္မဿ ဒါယာဒေါ တေန ဒိန္နဖလပဋိဂ္ဂါဟကော ဘဝိဿာမီတိ အတ္ထော. ယောဗ္ဗနမဒေါတိ ယောဗ္ဗနံ အာရဗ္ဘ ဥပ္ပန္နမဒေါ. သေသေသုပိ ဧသေဝ နယော. မဂ္ဂေါ သဉ္ဇာယတီတိ လောကုတ္တရမဂ္ဂေါ သဉ္ဇာယတိ. သံယောဇနာနိ သဗ္ဗသော ပဟီယန္တီတိ ဒသ သံယောဇနာနိ သဗ္ဗသော ပဟီယန္တိ. အနုသယာ ဗျန္တီဟောန္တီတိ သတ္တ အနုသယာ ဝိဂတန္တာ ပရိစ္ဆိန္နာ ပရိဝဋုမာ ဟောန္တိ. ဧဝမေတ္ထ ဟေဋ္ဌာ ပဉ္စသု ဌာနေသု ဝိပဿနာ ကထိတာ၊ ဣမေသု ပဉ္စသု လောကုတ္တရမဂ္ဂေါ.

ဣဒါနိ ဂါထာဟိ ကူဋံ ဂဏှန္တော ဗျာဓိဓမ္မာတိအာဒိမာဟ. တတ္ထ ဉတွာ ဓမ္မံ နိရူပဓိန္တိ ဥပဓိရဟိတံ အရဟတ္တမဂ္ဂံ ဉတွာ. သဗ္ဗေ မဒေ အဘိဘောသ္မီတိ သဗ္ဗေ ဣမေ တယောပိ မဒေ အဓိဘဝိံ၊ အတိက္ကမ္မ ဌိတောသ္မီတိ အတ္ထော. နေက္ခမ္မံ ဒဋ္ဌု ခေမတောတိ ပဗ္ဗဇ္ဇံ ခေမတော ဒိသွာ. တဿ မေ အဟု ဥဿာဟော၊ နိဗ္ဗာနံ အဘိပဿတောတိ တဿ မယှံ နိဗ္ဗာနံ အဘိပဿန္တဿ ဝါယာမော အဟောသိ. အနိဝတ္တိ ဘဝိဿာမီတိ ပဗ္ဗဇ္ဇတော အနိဝတ္တိကော ဘဝိဿာမိ၊ ဗြဟ္မစရိယဝါသတော အနိဝတ္တိကော၊ သဗ္ဗညုတညာဏတော အနိဝတ္တိကော ဘဝိဿာမိ. ဗြဟ္မစရိယပရာယဏောတိ မဂ္ဂဗြဟ္မစရိယပရာယဏော. ဣမိနာ လောကုတ္တရော အဋ္ဌင်္ဂိကော မဂ္ဂေါ ကထိတောတိ.

၈. လိစ္ဆဝိကုမာရကသုတ္တဝဏ္ဏနာ

၅၈. အဋ္ဌမေ သဇ္ဇာနိ ဓနူနီတိ သဇိယာနိ အာရောပိတဓနူနိ. အဒ္ဒသူတိ အဒ္ဒသံသု. ဘဝိဿန္တိ ဝဇ္ဇီတိ ဝဍ္ဎိဿန္တိ ဝဇ္ဇိရာဇာနော. အပါနုဘာတိ အဝဍ္ဎိနိဿိတာ မာနထဒ္ဓါ. ပစ္ဆာလိယံ ခိပန္တီတိ ပစ္ဆတော ဂန္တွာ ပိဋ္ဌိံ ပါဒေန ပဟရန္တိ. ရဋ္ဌိကဿာတိအာဒီသု ရဋ္ဌံ ဘုဉ္ဇတီတိ ရဋ္ဌိကော. ပိတရာ ဒတ္တံ သာပတေယျံ ဘုဉ္ဇတီတိ ပေတ္တနိကော. သေနာယ ပတိ ဇေဋ္ဌကောတိ သေနာပတိကော. ဂါမဂါမဏိကဿာတိ ဂါမာနံ ဂါမဏိကဿ၊ ဂါမသာမိကဿာတိ အတ္ထော. ပူဂဂါမဏိကဿာတိ ဂဏဇေဋ္ဌကဿ. ကုလေသူတိ တေသု တေသု ကုလေသု. ပစ္စေကာဓိပစ္စံ ကာရေန္တီတိ ပစ္စေကံ ဇေဋ္ဌကဋ္ဌာနံ ကာရေန္တိ. ကလျာဏေန မနသာ အနုကမ္ပန္တီတိ သုန္ဒရေန စိတ္တေန အနုဂ္ဂဏှန္တိ. ခေတ္တကမ္မန္တသာမန္တသဗျောဟာရေတိ ယေ စ အတ္တနော ခေတ္တကမ္မန္တာနံ သာမန္တာ အနန္တရက္ခေတ္တသာမိနော၊ တေ စ ရဇ္ဇုဒဏ္ဍေဟိ ဘူမိပ္ပမာဏဂ္ဂါဟကေ သဗ္ဗောဟာရေ စ. ဗလိပဋိဂ္ဂါဟိကာ ဒေဝတာတိ ကုလပ္ပဝေဏိယာ အာဂတာ အာရက္ခဒေဝတာ. သက္ကရောတီတိ တာ ဒေဝတာ အဂ္ဂယာဂုဘတ္တာဒီဟိ သက္ကရောတိ.

ကိစ္စကရောတိ ဥပ္ပန္နာနံ ကိစ္စာနံ ကာရကော. ယေ စဿ အနုဇီဝိနောတိ ယေ စ ဧတံ ဥပနိဿာယ ဇီဝန္တိ. ဥဘိန္နဉ္စေဝ အတ္ထာယာတိ ဥဘိန္နမ္ပိ ဟိတတ္ထာယ ပဋိပန္နော ဟောတီတိ အတ္ထော. ပုဗ္ဗပေတာနန္တိ ပရလောကဂတာနံ. ဒိဋ္ဌေ ဓမ္မေ စ ဇီဝတန္တိ ယေ စ ဒိဋ္ဌေ ဓမ္မေ ဇီဝန္တိ. ဣတိ ပဒဒွယေနာပိ အတီတပစ္စုပ္ပန္နေ ဉာတယော ဒဿေတိ. ဝိတ္တိသဉ္ဇနနောတိ တုဋ္ဌိဇနနော. ဃရမာဝသန္တိ ဃရာဝါသံ ဝသန္တော. ပုဇ္ဇော ဟောတိ ပသံသိယောတိ ပူဇေတဗ္ဗော စ ပသံသိတဗ္ဗော စ ဟောတီတိ.

၉-၁၀. ဝုဍ္ဎပဗ္ဗဇိတသုတ္တဒွယဝဏ္ဏနာ

၅၉-၆၀. နဝမေ နိပုဏောတိ သဏှော သုခုမကာရဏညူ. အာကပ္ပသမ္ပန္နောတိ သမဏာကပ္ပေန သမ္ပန္နော. ဒသမေ ပဒက္ခိဏဂ္ဂါဟီတိ ဒိန္နောဝါဒံ ပဒက္ခိဏတော ဂဏှန္တော. သေသံ သဗ္ဗတ္ထ ဥတ္တာနမေဝါတိ.

နီဝရဏဝဂ္ဂေါ ပဌမော.

(၇) ၂. သညာဝဂ္ဂေါ

၁-၂. သညာသုတ္တဒွယဝဏ္ဏနာ

၆၁-၆၂. ဒုတိယဿ ပဌမေ မဟပ္ဖလာတိ ဝိပါကဖလေန မဟပ္ဖလာ. ဝိပါကာနိသံသေနေဝ မဟာနိသံသာ. အမတောဂဓာတိ နိဗ္ဗာနပတိဋ္ဌာ. သဗ္ဗလောကေ အနဘိရတိသညာတိ သဗ္ဗသ္မိံ တေဓာတုသန္နိဝေသေ လောကေ ဥက္ကဏ္ဌိတဿ ဥပ္ပဇ္ဇနကသညာ. ဒုတိယံ ဥတ္တာနတ္ထမေဝ.

၃-၄. ဝဍ္ဎသုတ္တဒွယဝဏ္ဏနာ

၆၃-၆၄. တတိယေ ဝရာဒါယီတိ ဥတ္တမဿ ဝရဿ အာဒါယကော. သေသမေတ္ထ စတုတ္ထေ စ ဥတ္တာနတ္ထမေဝါတိ.

၅. သာကစ္ဆသုတ္တဝဏ္ဏနာ

၆၅. ပဉ္စမေ အလံသာကစ္ဆောတိ သာကစ္ဆာယ ယုတ္တော. အာဂတံ ပဉှန္တိ ပုစ္ဆိတံ ပဉှံ. ဗျာကတ္တာ ဟောတီတိ ဝိဿဇ္ဇိတာ ဟောတိ.

၆. သာဇီဝသုတ္တဝဏ္ဏနာ

၆၆. ဆဋ္ဌေ အလံသာဇီဝေါတိ သာဇီဝါယ ယုတ္တော. သာဇီဝေါတိ ပဉှပုစ္ဆနဉ္စေဝ ပဉှဝိဿဇ္ဇနဉ္စ. သဗ္ဗေပိ ဟိ သဗြဟ္မစာရိနော ပဉှံ ဥပဇီဝန္တိ၊ တေနေတံ ပဉှပုစ္ဆနဝိဿဇ္ဇနံ သမာနာဇီဝတာယ သာဇီဝေါတိ ဝုတ္တံ. ကတံ ပဉှန္တိ အဘိသင်္ခတံ ပဉှံ.

၇-၁၀. ပဌမဣဒ္ဓိပါဒသုတ္တာဒိဝဏ္ဏနာ

၆၇-၇၀. သတ္တမေ ဥဿောဠှီတိ အဓိမတ္တဝီရိယံ. အဋ္ဌမေ အတ္တနော ဗောဓိမဏ္ဍေ ပဋိဝိဒ္ဓေ အာဂမနဣဒ္ဓိပါဒေ ကထေတွာ ဥပရိ အတ္တနောဝ ဆ အဘိညာ ကထေသီတိ. နဝမဒသမေသု ဝိပဿနာ ကထိတာ. သေသံ သဗ္ဗတ္ထ ဥတ္တာနမေဝါတိ.

သညာဝဂ္ဂေါ ဒုတိယော.

(၈) ၃. ယောဓာဇီဝဝဂ္ဂေါ

၁. ပဌမစေတောဝိမုတ္တိဖလသုတ္တဝဏ္ဏနာ

၇၁. တတိယဿ ပဌမေ ယတော ခေါ၊ ဘိက္ခဝေတိ ဟေဋ္ဌာ ဝုတ္တနယေန ဝိပဿနံ ဝဍ္ဎေတွာ အရဟတ္တံ ပတ္တဿ ဘိက္ခုနော ဣဒါနိ ဝဏ္ဏဘဏနတ္ထံ ဣဒံ အာရဒ္ဓံ. တတ္ထ ယတော ခေါတိ ယဒါ ခေါ. ဥက္ခိတ္တပလိဃောတိ အဝိဇ္ဇာပလိဃံ ဥက္ခိပိတွာ အပနေတွာ ဌိတော. သံကိဏ္ဏပရိခေါတိ သံသာရပရိခံ သံကိရိတွာ ဝိနာသေတွာ ဌိတော. အဗ္ဗူဠှေသိကောတိ တဏှာသင်္ခါတံ ဧသိကာထမ္ဘံ အဗ္ဗုယှ လုဉ္စိတွာ ဌိတော. နိရဂ္ဂဠောတိ နီဝရဏကဝါဋံ ဥဂ္ဃါဋေတွာ ဌိတော. ပန္နဒ္ဓဇော ပန္နဘာရောတိ မာနဒ္ဓဇဉ္စ ခန္ဓာဘိသင်္ခါရကိလေသဘာရဉ္စ ပါတေတွာ ဩတာရေတွာ ဌိတော. ဝိသံယုတ္တောတိ ဝဋ္ဋေန ဝိသံယုတ္တော. သေသံ ပါဠိနယေနေဝ ဝေဒိတဗ္ဗံ. ဧတ္တာဝတာ ဘဂဝတာ မဂ္ဂေန ကိလေသေ ခေပေတွာ နိရောဓသယနဝရဂတဿ နိဗ္ဗာနာရမ္မဏံ ဖလသမာပတ္တိံ အပ္ပေတွာ ဝိဟရတော ခီဏာသဝဿ ကာလော ဒဿိတော.

ယထာ ဟိ ဒွေ နဂရာနိ ဧကံ စောရနဂရံ ဧကံ ခေမနဂရံ. အထ ဧကဿ မဟာယောဓဿ ဧဝံ ဘဝေယျ – ‘‘ယာဝိမံ စောရနဂရံ တိဋ္ဌတိ၊ တာဝ ခေမနဂရံ ဘယတော န မုစ္စတိ၊ စောရနဂရံ အနဂရံ ကရိဿာမီ’’တိ သန္နာဟံ ကတွာ ခဂ္ဂံ ဂဟေတွာ စောရနဂရံ ဥပသင်္ကမိတွာ နဂရဒွါရေ ဥဿာပိတေ ဧသိကာထမ္ဘေ ခဂ္ဂေန ဆိန္ဒိတွာ သဒ္ဓိံ ဒွါရဗာဟာဟိ ကဝါဋံ ဘိန္ဒိတွာ ပလိဃံ ဥက္ခိပိတွာ ပါကာရံ ဘိန္ဒိတွာ ပရိခံ ဝိကိရိတွာ နဂရသောဘတ္ထာယ ဥဿိတေ ဓဇေ ပါတေတွာ နဂရံ အဂ္ဂိနာ ဈာပေတွာ ခေမနဂရံ ပဝိသိတွာ ပါသာဒံ အာရုယှ ဉာတိဂဏပရိဝုတော သုရသဘောဇနံ ဘုဉ္ဇေယျ. ဧဝံ စောရနဂရံ ဝိယ သက္ကာယော၊ ခေမနဂရံ ဝိယ နိဗ္ဗာနံ၊ မဟာယောဓော ဝိယ ယောဂါဝစရော. တဿေဝံ ဟောတိ – ‘‘ယာဝ သက္ကာယဝဋ္ဋံ ဝဋ္ဋတိ၊ တာဝ ဒွတ္တိံသကမ္မကာရဏာအဋ္ဌနဝုတိရောဂပဉ္စဝီသတိမဟာဘယေဟိ ပရိမုစ္စနံ နတ္ထီ’’တိ. သော မဟာယောဓော သန္နာဟံ ဝိယ သီလသန္နာဟံ ကတွာ ပညာခဂ္ဂံ ဂဟေတွာ ခဂ္ဂေန ဧသိကာထမ္ဘေ ဝိယ အရဟတ္တမဂ္ဂေန တဏှေသိကံ လုဉ္စိတွာ၊ သော ယောဓော သဒွါရဗာဟကံ နဂရကဝါဋံ ဝိယ ပဉ္စောရမ္ဘာဂိယသံယောဇနအဂ္ဂဠံ ဥဂ္ဃါဋေတွာ၊ သော ယောဓော ပလိဃံ ဝိယ အဝိဇ္ဇာပလိဃံ ဥက္ခိပိတွာ၊ သော ယောဓော ပါကာရံ ဘိန္ဒန္တော ပရိခံ ဝိယ ကမ္မာဘိသင်္ခါရံ ဘိန္ဒန္တော ဇာတိသံသာရပရိခံ ဝိကိရိတွာ၊ သော ယောဓော နဂရံ သောဘတ္ထာယ ဥဿာပိတဒ္ဓဇေ ဝိယ မာနဒ္ဓဇေ ပါတေတွာ သက္ကာယနဂရံ ဈာပေတွာ၊ သော ယောဓော ခေမနဂရေ ဥပရိပါသာဒေ သုဘောဇနံ ဝိယ ကိလေသပရိနိဗ္ဗာနနဂရံ ပဝိသိတွာ အမတံ နိရောဓာရမ္မဏံ ဖလသမာပတ္တိသုခံ အနုဘဝမာနော ကာလံ ဝီတိနာမေတိ.

၂. ဒုတိယစေတောဝိမုတ္တိဖလသုတ္တဝဏ္ဏနာ

၇၂. ဒုတိယေ အနိစ္စသညာတိ ခန္ဓပဉ္စကံ ဟုတွာ အဘာဝါကာရေန အနိစ္စန္တိ ဥပ္ပဇ္ဇနကသညာ. အနိစ္စေ ဒုက္ခသညာတိ ယဒနိစ္စံ၊ တံ ပဋိပီဠနာကာရေန ဒုက္ခန္တိ ဥပ္ပဇ္ဇနကသညာ. ဒုက္ခေ အနတ္တသညာတိ ယံ ဒုက္ခံ၊ တံ အဝသဝတ္တနာကာရေန အနတ္တာတိ ဥပ္ပဇ္ဇနကသညာ. သေသံ ဟေဋ္ဌာ ဝုတ္တနယမေဝ. ဣမေသု ပန ဒွီသုပိ သုတ္တေသု ဝိပဿနာဖလံ နာမ ကထိတန္တိ.

၃. ပဌမဓမ္မဝိဟာရီသုတ္တဝဏ္ဏနာ

၇၃. တတိယေ ဒိဝသံ အတိနာမေတီတိ ဒိဝသံ အတိက္ကာမေတိ. ရိဉ္စတိ ပဋိသလ္လာနန္တိ ဧကီဘာဝံ ဝိဿဇ္ဇေတိ. ဒေသေတီတိ ကထေတိ ပကာသေတိ. ဓမ္မပညတ္တိယာတိ ဓမ္မဿ ပညာပနာယ. ဓမ္မံ ပရိယာပုဏာတီတိ နဝင်္ဂဝသေန စတုသစ္စဓမ္မံ ပရိယာပုဏာတိ ဝဠဉ္ဇေတိ ကထေတိ. န ရိဉ္စတိ ပဋိသလ္လာနန္တိ ဧကီဘာဝံ န ဝိဿဇ္ဇေတိ. အနုယုဉ္ဇတိ အဇ္ဈတ္တံ စေတောသမထန္တိ နိယကဇ္ဈတ္တေ စိတ္တသမာဓိံ အာသေဝတိ ဘာဝေတိ၊ သမထကမ္မဋ္ဌာနေ ယုတ္တပ္ပယုတ္တော ဟောတိ.

ဟိတေသိနာတိ ဟိတံ ဧသန္တေန. အနုကမ္ပကေနာတိ အနုကမ္ပမာနေန. အနုကမ္ပံ ဥပါဒါယာတိ အနုကမ္ပံ စိတ္တေန ပရိဂ္ဂဟေတွာ၊ ပဋိစ္စာတိပိ ဝုတ္တံ ဟောတိ. ကတံ ဝေါ တံ မယာတိ တံ မယာ ဣမေ ပဉ္စ ပုဂ္ဂလေ ဒေသေန္တေန တုမှာကံ ကတံ. ဧတ္တကမေဝ ဟိ အနုကမ္ပကဿ သတ္ထု ကိစ္စံ ယဒိဒံ အဝိပရီတဓမ္မဒေသနာ၊ ဣတော ပရံ ပန ပဋိပတ္တိ နာမ သာဝကာနံ ကိစ္စံ. တေနာဟ – ဧတာနိ ဘိက္ခု ရုက္ခမူလာနိ။ပေ။ အမှာကံ အနုသာသနီတိ. တတ္ထ စ ရုက္ခမူလာနီတိ ဣမိနာ ရုက္ခမူလသေနာသနံ ဒဿေတိ. သုညာဂါရာနီတိ ဣမိနာ ဇနဝိဝိတ္တဋ္ဌာနံ. ဥဘယေနာပိ စ ယောဂါနုရူပံ သေနာသနမာစိက္ခတိ၊ ဒါယဇ္ဇံ နိယျာတေတိ. ဈာယထာတိ အာရမ္မဏူပနိဇ္ဈာနေန အဋ္ဌတိံသာရမ္မဏာနိ၊ လက္ခဏူပနိဇ္ဈာနေန စ အနိစ္စာဒိတော ခန္ဓာယတနာဒီနိ ဥပနိဇ္ဈာယထ၊ သမထဉ္စ ဝိပဿနဉ္စ ဝဍ္ဎေထာတိ ဝုတ္တံ ဟောတိ. မာ ပမာဒတ္ထာတိ မာ ပမဇ္ဇိတ္ထ. မာ ပစ္ဆာ ဝိပ္ပဋိသာရိနော အဟုဝတ္ထာတိ ယေ ဟိ ပုဗ္ဗေ ဒဟရကာလေ အာရောဂျကာလေ သတ္တသပ္ပါယာဒိသမ္ပတ္တိကာလေ သတ္ထု သမ္မုခီဘာဝကာလေ စ ယောနိသောမနသိကာရဝိရဟိတာ ရတ္တိန္ဒိဝံ မင်္ကုလဘတ္တာ ဟုတွာ သေယျသုခမိဒ္ဓသုခမနုယုတ္တာ ပမဇ္ဇန္တိ၊ တေ ပစ္ဆာ ဇရာကာလေ ရောဂကာလေ မရဏကာလေ ဝိပတ္တိကာလေ သတ္ထု ပရိနိဗ္ဗာနကာလေ စ တံ ပုဗ္ဗေ ပမာဒဝိဟာရံ အနုဿရန္တာ သပ္ပဋိသန္ဓိကာလကိရိယဉ္စ ဘာရိယံ သမ္ပဿမာနာ ဝိပ္ပဋိသာရိနော ဟောန္တိ. တုမှေ ပန တာဒိသာ မာ အဟုဝတ္ထာတိ ဧတမတ္ထံ ဒဿေန္တော အာဟ – ‘‘မာ ပစ္ဆာ ဝိပ္ပဋိသာရိနော အဟုဝတ္ထာ’’တိ. အယံ ဝေါ အမှာကံ အနုသာသနီတိ အယံ အမှာကံ သန္တိကာ ‘‘ဈာယထ မာ ပမာဒတ္ထာ’’တိ တုမှာကံ အနုသာသနီ၊ ဩဝါဒေါတိ ဝုတ္တံ ဟောတိ.

၄. ဒုတိယဓမ္မဝိဟာရီသုတ္တဝဏ္ဏနာ

၇၄. စတုတ္ထေ ဥတ္တရိ စဿ ပညာယ အတ္ထံ နပ္ပဇာနာတီတိ တတော ပရိယတ္တိတော ဥတ္တရိ တဿ ဓမ္မဿ သဟဝိပဿနာယ မဂ္ဂပညာယ အတ္ထံ နပ္ပဇာနာတိ၊ စတ္တာရိ သစ္စာနိ န ပဿတိ နပ္ပဋိဝိဇ္ဈတီတိ အတ္ထော. သေသဝါရေသုပိ ဧသေဝ နယော. ဧဝမေတေသု ဒွီသုပိ သုတ္တေသု ဗဟုဿုတဘိက္ခု ဝိပဿနာကမ္မိကော သောတာပန္နော သကဒါဂါမီ အနာဂါမီ ခီဏာသဝေါတိ ဆ ဇနာ ဓမ္မဝိဟာရိနော နာမာတိ ဝေဒိတဗ္ဗာ.

၅. ပဌမယောဓာဇီဝသုတ္တဝဏ္ဏနာ

၇၅. ပဉ္စမေ ယောဓာဇီဝါတိ ယုဒ္ဓူပဇီဝိနော. ရဇဂ္ဂန္တိ ဟတ္ထိအဿာဒီနံ ပါဒပ္ပဟာရဘိန္နာယ ဘူမိယာ ဥဂ္ဂတံ ရဇက္ခန္ဓံ. န သန္ထမ္ဘတီတိ သန္ထမ္ဘိတွာ ဌာတုံ န သက္ကောတိ. သဟတိ ရဇဂ္ဂန္တိ ရဇက္ခန္ဓံ ဒိသွာပိ အဓိဝါသေတိ. ဓဇဂ္ဂန္တိ ဟတ္ထိအဿဒီနံ ပိဋ္ဌေသု ဝါ ရထေသု ဝါ ဥဿာပိတာနံ ဓဇာနံ အဂ္ဂံ. ဥဿာရဏန္တိ ဟတ္ထိအဿရထာနဉ္စေဝ ဗလကာယဿ စ ဥစ္စာသဒ္ဒမဟာသဒ္ဒံ. သမ္ပဟာရေတိ သမာဂတေ အပ္ပမတ္တကေပိ ပဟာရေ. ဟညတီတိ ဝိဟညတိ ဝိဃာတံ အာပဇ္ဇတိ. ဗျာပဇ္ဇတီတိ ဝိပတ္တိံ အာပဇ္ဇတိ၊ ပကတိဘာဝံ ဇဟတိ. သဟတိ သမ္ပဟာရန္တိ ဒွေ တယော ပဟာရေ ပတွာပိ သဟတိ အဓိဝါသေတိ. တမေဝ သင်္ဂါမသီသန္တိ တံယေဝ ဇယက္ခန္ဓာဝါရဋ္ဌာနံ. အဇ္ဈာဝသတီတိ သတ္တာဟမတ္တံ အဘိဘဝိတွာ အာဝသတိ. ကိံ ကာရဏာ? လဒ္ဓပဟာရာနံ ပဟာရဇဂ္ဂနတ္ထဉ္စေဝ ကတကမ္မာနံ ဝိသေသံ ဉတွာ ဌာနန္တရဒါနတ္ထဉ္စ ဣဿရိယသုခါနုဘဝနတ္ထဉ္စ.

ဣဒါနိ ယသ္မာ သတ္ထု ယောဓာဇီဝေဟိ ကိစ္စံ နတ္ထိ၊ ဣမသ္မိံ ပန သာသနေ တထာရူပေ ပဉ္စ ပုဂ္ဂလေ ဒဿေတုံ ဣဒံ ဩပမ္မံ အာဘတံ. တသ္မာ တေ ပုဂ္ဂလေ ဒဿေန္တော ဧဝမေဝ ခေါတိအာဒိမာဟ. တတ္ထ သံသီဒတီတိ မိစ္ဆာဝိတက္ကသ္မိံ သံသီဒတိ အနုပ္ပဝိသတိ. န သက္ကောတိ ဗြဟ္မစရိယံ သန္ဓာရေတုန္တိ ဗြဟ္မစရိယဝါသံ အနုပစ္ဆိဇ္ဇမာနံ ဂေါပေတုံ န သက္ကောတိ. သိက္ခာဒုဗ္ဗလျံ အာဝိကတွာတိ သိက္ခာယ ဒုဗ္ဗလဘာဝံ ပကာသေတွာ. ကိမဿ ရဇဂ္ဂသ္မိန္တိ ကိံ တဿ ပုဂ္ဂလဿ ရဇဂ္ဂံ နာမာတိ ဝဒတိ. အဘိရူပါတိ အဘိရူပဝတီ. ဒဿနီယာတိ ဒဿနယောဂ္ဂါ. ပါသာဒိကာတိ ဒဿနေနေဝ စိတ္တပ္ပသာဒါဝဟာ. ပရမာယာတိ ဥတ္တမာယ. ဝဏ္ဏပေါက္ခရတာယာတိ သရီရဝဏ္ဏေန စေဝ အင်္ဂသဏ္ဌာနေန စ. ဦဟသတီတိ အဝဟသတိ. ဥလ္လပတီတိ ကထေတိ. ဥဇ္ဈဂ္ဃတီတိ ပါဏိံ ပဟရိတွာ မဟာဟသိတံ ဟသတိ. ဥပ္ပဏ္ဍေတီတိ ဥပ္ပဏ္ဍနကထံ ကထေတိ. အဘိနိသီဒတီတိ အဘိဘဝိတွာ သန္တိကေ ဝါ ဧကာသနေ ဝါ နိသီဒတိ. ဒုတိယပဒေပိ ဧသေဝ နယော. အဇ္ဈောတ္ထရတီတိ အဝတ္ထရတိ. ဝိနိဝေဌေတွာ ဝိနိမောစေတွာတိ ဂဟိတဋ္ဌာနတော တဿာ ဟတ္ထံ ဝိနိဗ္ဗေဌေတွာ စေဝ မောစေတွာ စ. သေသမေတ္ထ ဥတ္တာနတ္ထမေဝါတိ. ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ.

၆. ဒုတိယယောဓာဇီဝသုတ္တဝဏ္ဏနာ

၇၆. ဆဋ္ဌေ အသိစမ္မံ ဂဟေတွာတိ အသိဉ္စ စမ္မဉ္စ ဂဟေတွာ. ဓနုကလာပံ သန္နယှိတွာတိ ဓနုဉ္စ သရကလာပဉ္စ သန္နယှိတွာ. ဝိယူဠှန္တိ ယုဒ္ဓသန္နိဝေသဝေသေန ဌိတံ. သင်္ဂါမံ ဩတရတီတိ မဟာယုဒ္ဓံ ဩတရတိ. ဥဿဟတိ ဝါယမတီတိ ဥဿာဟဉ္စ ဝါယာမဉ္စ ကရောတိ. ဟနန္တီတိ ဃာတေန္တိ. ပရိယာပါဒေန္တီတိ ပရိယာပါဒယန္တိ. ဥပလိက္ခန္တီတိ ဝိဇ္ဈန္တိ. အပနေန္တီတိ သကသေနံ ဂဟေတွာ ဂစ္ဆန္တိ. အပနေတွာ ဉာတကာနံ နေန္တီတိ သကသေနံ နေတွာ တတော ဉာတကာနံ သန္တိကံ နေန္တိ. နီယမာနောတိ အတ္တနော ဂေဟံ ဝါ သေသဉာတိသန္တိကံ ဝါ နိယျမာနော. ဥပဋ္ဌဟန္တိ ပရိစရန္တီတိ ပဟာရသောဓနဝဏကပ္ပနာဒီနိ ကရောန္တာ ဇဂ္ဂန္တိ ဂေါပယန္တိ.

အရက္ခိတေနေဝ ကာယေနာတိ အရက္ခိတေန ကာယဒွါရေန. အရက္ခိတာယ ဝါစာယာတိ အရက္ခိတေန ဝစီဒွါရေန. အရက္ခိတေန စိတ္တေနာတိ အရက္ခိတေန မနောဒွါရေန. အနုပဋ္ဌိတာယ သတိယာတိ သတိံ သုပဋ္ဌိတံ အကတွာ. အသံဝုတေဟိ ဣန္ဒြိယေဟီတိ မနစ္ဆဋ္ဌေဟိ ဣန္ဒြိယေဟိ အပိဟိတေဟိ အဂေါပိတေဟိ. ရာဂေါ စိတ္တံ အနုဒ္ဓံသေတီတိ ရာဂေါ ဥပ္ပဇ္ဇမာနောဝ သမထဝိပဿနာစိတ္တံ ဓံသေတိ၊ ဒူရေ ခိပတိ. ရာဂပရိယုဋ္ဌိတောမှိ၊ အာဝုသော၊ ရာဂပရေတောတိ အဟံ၊ အာဝုသော၊ ရာဂေန ရတ္တော၊ ရာဂေန အနုဂတော.

အဋ္ဌိကင်္ကလူပမာတိအာဒီသု အဋ္ဌိကင်္ကလူပမာ အပ္ပဿာဒဋ္ဌေန. မံသပေသူပမာ ဗဟုသာဓာရဏဋ္ဌေန. တိဏုက္ကူပမာ အနုဒဟနဋ္ဌေန. အင်္ဂါရကာသူပမာ မဟာဘိတာပဋ္ဌေန. သုပိနကူပမာ ဣတ္တရပစ္စုပဋ္ဌာနဋ္ဌေန. ယာစိတကူပမာ တာဝကာလိကဋ္ဌေန. ရုက္ခဖလူပမာ သဗ္ဗင်္ဂပစ္စင်္ဂပလိဘဉ္ဇနဋ္ဌေန. အသိသူနူပမာ အဓိကုဋ္ဋနဋ္ဌေန. သတ္တိသူလူပမာ ဝိနိဝိဇ္ဈနဋ္ဌေန. သပ္ပသိရူပမာ သာသင်္ကသပ္ပဋိဘယဋ္ဌေန. ဥဿဟိဿာမီတိ ဥဿာဟံ ကရိဿာမိ. ဓာရယိဿာမီတိ သမဏဘာဝံ ဓာရယိဿာမိ. အဘိရမိဿာမီတိ အဘိရတိံ ဥပ္ပါဒေဿာမိ န ဥက္ကဏ္ဌိဿာမိ. သေသမေတ္ထ ဥတ္တာနတ္ထမေဝ. ဣမသ္မိံ သုတ္တေ ဝဋ္ဋဝိဝဋ္ဋံ ကထိတန္တိ.

၇. ပဌမအနာဂတဘယသုတ္တဝဏ္ဏနာ

၇၇. သတ္တမေ အာရညကေနာတိ အရညဝါသိနာ. အပ္ပတ္တဿာတိ အသမ္ပတ္တဿ ဈာနဝိပဿနာမဂ္ဂဖလပ္ပဘေဒဿ ဝိသေသဿ ပတ္တိယာ. သေသပဒေသုပိ ဧသေဝ နယော. သော မမဿ အန္တရာယောတိ သော မမ ဇီဝိတန္တရာယော စ ဗြဟ္မစရိယန္တရာယော စ၊ ပုထုဇ္ဇနကာလကိရိယံ ကရောန္တဿ သဂ္ဂန္တရာယော စ မဂ္ဂန္တရာယော စ ဘဝေယျ. ဟန္ဒာတိ ဝဝဿဂ္ဂတ္ထေ နိပါတော. ဝီရိယံ အာရဘာမီတိ ဒုဝိဓမ္ပိ ဝီရိယံ ကရောမိ. သတ္ထကာတိ သတ္ထံ ဝိယ သန္ဓိဗန္ဓနစ္ဆေဒကဝါတာ. ဝါဠေဟီတိ ကက္ခဠေဟိ. မာဏဝေဟီတိ စောရေဟိ. ကတကမ္မေဟိ ဝါ အကတကမ္မေဟိ ဝါတိ ဧတ္ထ စောရိကံ ကတွာ နိက္ခန္တာ ကတကမ္မာ နာမ၊ စောရိကံ ကာတုံ ဂစ္ဆန္တာ အကတကမ္မာ နာမ. တတ္ထ ကတကမ္မာ ကမ္မဿ နိပ္ဖန္နတ္တာ သတ္တာနံ ဂလလောဟိတံ ဂဟေတွာ ဒေဝတာနံ ဗလိံ ကရောန္တိ၊ အကတကမ္မာ ‘‘ဧဝံ နော ကမ္မံ နိပ္ဖဇ္ဇိဿတီ’’တိ ပဌမတရံ ကရောန္တိ. ဣဒံ သန္ဓာယ တေ မံ ဇီဝိတာ ဝေါရောပေယျုန္တိ ဝုတ္တံ. ဝါဠာ အမနုဿာတိ ကက္ခဠာ ဒုဋ္ဌာ ယက္ခာဒယော အမနုဿာ.

၈. ဒုတိယအနာဂတဘယသုတ္တဝဏ္ဏနာ

၇၈. အဋ္ဌမေ ပုရာ မံ သော ဓမ္မော အာဂစ္ဆတီတိ ယာဝ သော ဓမ္မော မံ န ဥပဂစ္ဆတိ၊ တာဝ အဟံ ပုရေတရမေဝ ဝီရိယံ အာရဘာမီတိ အတ္ထော. ခီရောဒကီဘူတာတိ ခီရောဒကံ ဝိယ ဘူတာ ဧကီဘာဝံ ဥပဂတာ. ပိယစက္ခူဟီတိ မေတ္တစက္ခူဟိ.

၉. တတိယအနာဂတဘယသုတ္တဝဏ္ဏနာ

၇၉. နဝမေ ဓမ္မသန္ဒောသာ ဝိနယသန္ဒောသောတိ ဓမ္မသန္ဒောသေန ဝိနယသန္ဒောသော ဟောတိ. ကထံ ပန ဓမ္မသ္မိံ ဒုဿန္တေ ဝိနယော ဒုဿတိ နာမ? သမထဝိပဿနာဓမ္မေသု ဂဗ္ဘံ အဂ္ဂဏှန္တေသု ပဉ္စဝိဓော ဝိနယော န ဟောတိ၊ ဧဝံ ဓမ္မေ ဒုဿန္တေ ဝိနယော ဒုဿတိ. ဒုဿီလဿ ပန သံဝရဝိနယော နာမ န ဟောတိ၊ တသ္မိံ အသတိ သမထဝိပဿနာ ဂဗ္ဘံ န ဂဏှာတိ. ဧဝံ ဝိနယသန္ဒောသေနပိ ဓမ္မသန္ဒောသော ဝေဒိတဗ္ဗော. အဘိဓမ္မကထန္တိ သီလာဒိဥတ္တမဓမ္မကထံ. ဝေဒလ္လကထန္တိ ဝေဒပဋိသံယုတ္တံ ဉာဏမိဿကကထံ. ကဏှဓမ္မံ ဩက္ကမမာနာတိ ရန္ဓဂဝေသိတာယ ဥပါရမ္ဘပရိယေသနဝသေန ကာဠကဓမ္မံ ဩက္ကမမာနာ. အပိစ ဒုဋ္ဌစိတ္တေန ပုဂ္ဂလံ ဃဋ္ဋေန္တာပိ တံ ကဏှဓမ္မံ အတ္တနော ဒဟန္တာပိ လာဘသက္ကာရတ္ထံ ကထေန္တာပိ ကဏှဓမ္မံ ဩက္ကမန္တိယေဝ.

ဂမ္ဘီရာတိ ပါဠိဂမ္ဘီရာ. ဂမ္ဘီရတ္ထာတိ အတ္ထဂမ္ဘီရာ. လောကုတ္တရာတိ လောကုတ္တရဓမ္မဒီပကာ. သုညတာပဋိသံယုတ္တာတိ ခန္ဓဓာတုအာယတနပစ္စယာကာရပဋိသံယုတ္တာ. န အညာ စိတ္တံ ဥပဋ္ဌပေဿန္တီတိ ဇာနနတ္ထာယ စိတ္တံ န ဌပေဿန္တိ. ဥဂ္ဂဟေတဗ္ဗံ ပရိယာပုဏိတဗ္ဗန္တိ ဥဂ္ဂဟေတဗ္ဗေ စ ဝဠဉ္ဇေတဗ္ဗေ စ. ကဝိတာတိ သိလောကာဒိဗန္ဓနဝသေန ကဝီဟိ ကတာ. ကာဝေယျာတိ တဿေဝ ဝေဝစနံ. ဗာဟိရကာတိ သာသနတော ဗဟိဒ္ဓါ ဌိတာ. သာဝကဘာသိတာတိ ဗာဟိရသာဝကေဟိ ဘာသိတာ. သေသမေတ္ထ ဟေဋ္ဌာ ဝုတ္တနယတ္တာ သုဝိညေယျတ္တာ စ ဥတ္တာနတ္ထမေဝ.

၁၀. စတုတ္ထအနာဂတဘယသုတ္တဝဏ္ဏနာ

၈၀. ဒသမေ ကလျာဏကာမာတိ သုန္ဒရကာမာ. ရသဂ္ဂါနီတိ ဥတ္တမရသာနိ. သံသဋ္ဌာ ဝိဟရိဿန္တီတိ ပဉ္စဝိဓေန သံသဂ္ဂေန သံသဋ္ဌာ ဝိဟရိဿန္တိ. သန္နိဓိကာရပရိဘောဂန္တိ သန္နိဓိကတဿ ပရိဘောဂံ. ဩဠာရိကမ္ပိ နိမိတ္တန္တိ ဧတ္ထ ပထဝိံ ခဏန္တောပိ ခဏာဟီတိ အာဏာပေန္တောပိ ပထဝိယံ ဩဠာရိကံ နိမိတ္တံ ကရောတိ နာမ. တိဏကဋ္ဌသာခါပလာသံ ဆိန္ဒန္တောပိ ဆိန္ဒာတိ အာဏာပေန္တောပိ ဟရိတဂ္ဂေ ဩဠာရိကံ နိမိတ္တံ ကရောတိ နာမ. အာဇီဝတ္ထာယ ပဏ္ဏနိဝါပအာဒီနိ ဂါဟာပေန္တော ဖလာနိ ဩစိနန္တေ ဝါ ဩစိနာပေန္တေန ဝတ္တဗ္ဗမေဝ နတ္ထိ. ဣမေသု စတူသု သုတ္တေသု သတ္ထာရာ သာသနေ ဝုဒ္ဓိပရိဟာနိ ကထိတာတိ.

ယောဓာဇီဝဝဂ္ဂေါ တတိယော.

(၉) ၄. ထေရဝဂ္ဂေါ

၁. ရဇနီယသုတ္တဝဏ္ဏနာ

၈၁. စတုတ္ထဿ ပဌမေ ရဇနီယေသူတိ ရာဂဿ ပစ္စယေသု အာရမ္မဏေသု. သေသေသုပိ ဧသေဝ နယော.

၂. ဝီတရာဂသုတ္တဝဏ္ဏနာ

၈၂. ဒုတိယေ မက္ခီတိ ဂုဏမက္ခကော. ပဠာသီတိ ယုဂဂ္ဂါဟလက္ခဏေန ပဠာသေန သမန္နာဂတော.

၃. ကုဟကသုတ္တဝဏ္ဏနာ

၈၃. တတိယေ ကုဟကောတိ တီဟိ ကုဟနဝတ္ထူဟိ သမန္နာဂတော. လပကောတိ လာဘသန္နိဿိတာယ လပနာယ သမန္နာဂတော. နေမိတ္တိကောတိ နိမိတ္တကိရိယကာရကော. နိပ္ပေသိကောတိ နိပ္ပေသနကတာယ သမန္နာဂတော. လာဘေန စ လာဘံ နိဇိဂီသိတာတိ လာဘေန လာဘဂဝေသကော. သုက္ကပက္ခော ဝုတ္တဝိပလ္လာသဝသေန ဝေဒိတဗ္ဗော. စတုတ္ထံ ဥတ္တာနမေဝ.

၅. အက္ခမသုတ္တဝဏ္ဏနာ

၈၅. ပဉ္စမေ အက္ခမော ဟောတိ ရူပါနန္တိ ရူပါရမ္မဏာနံ အနဓိဝါသကော ဟောတိ၊ တဒါရမ္မဏေဟိ ရာဂါဒီဟိ အဘိဘုယျတိ. ဧသေဝ နယော သဗ္ဗတ္ထ.

၆. ပဋိသမ္ဘိဒါပ္ပတ္တသုတ္တဝဏ္ဏနာ

၈၆. ဆဋ္ဌေ အတ္ထပဋိသမ္ဘိဒါပ္ပတ္တောတိ ပဉ္စသု အတ္ထေသု ပဘေဒဂတံ ဉာဏံ ပတ္တော. ဓမ္မပဋိသမ္ဘိဒါပ္ပတ္တောတိ စတုဗ္ဗိဓေ ဓမ္မေ ပဘေဒဂတံ ဉာဏံ ပတ္တော. နိရုတ္တိပဋိသမ္ဘိဒါပ္ပတ္တောတိ ဓမ္မနိရုတ္တီသု ပဘေဒဂတံ ဉာဏံ ပတ္တော. ပဋိဘာနပဋိသမ္ဘိဒါပ္ပတ္တောတိ တေသု တီသု ဉာဏေသု ပဘေဒဂတံ ဉာဏံ ပတ္တော. သော ပန တာနိ တီဏိ ဉာဏာနေဝ ဇာနာတိ၊ န တေသံ ကိစ္စံ ကရောတိ. ဥစ္စာဝစာနီတိ မဟန္တခုဒ္ဒကာနိ. ကိံကရဏီယာနီတိ ဣတိ ကတ္တဗ္ဗာနိ.

၇. သီလဝန္တသုတ္တဝဏ္ဏနာ

၈၇. သတ္တမံ ဥတ္တာနတ္ထမေဝ. သီလံ ပနေတ္ထ ခီဏာသဝသီလမေဝ၊ ဗာဟုသစ္စမ္ပိ ခီဏာသဝဗာဟုသစ္စမေဝ၊ ဝါစာပိ ခီဏာသဝဿ ကလျာဏဝါစာဝ၊ ဈာနာနိပိ ကိရိယဇ္ဈာနာနေဝ ကထိတာနီတိ ဝေဒိတဗ္ဗာနိ.

၈. ထေရသုတ္တဝဏ္ဏနာ

၈၈. အဋ္ဌမေ ထေရောတိ ထိရဘာဝပ္ပတ္တော. ရတ္တညူတိ ပဗ္ဗဇိတဒိဝသတော ပဋ္ဌာယ အတိက္ကန္တာနံ ဗဟူနံ ရတ္တီနံ ဉာတာ. ဉာတောတိ ပညာတော ပါကဋော. ယသဿီတိ ယသနိဿိတော. မိစ္ဆာဒိဋ္ဌိကောတိ အယာထာဝဒိဋ္ဌိကော. သဒ္ဓမ္မာ ဝုဋ္ဌာပေတွာတိ ဒသကုသလကမ္မပထဓမ္မတော ဝုဋ္ဌာပေတွာ. အသဒ္ဓမ္မေ ပတိဋ္ဌာပေတီတိ အကုသလကမ္မပထေသု ပတိဋ္ဌာပေတိ.

၉. ပဌမသေခသုတ္တဝဏ္ဏနာ

၈၉. နဝမေ သေခဿာတိ သိက္ခကဿ သကရဏီယဿ. ပရိဟာနာယာတိ ဥပရိဂုဏေဟိ ပရိဟာနတ္ထာယ. ကမ္မာရာမတာတိ နဝကမ္မေ ရမနကဘာဝေါ. ဘဿာရာမတာတိ အာလာပသလ္လာပေ ရမနကဘာဝေါ. နိဒ္ဒါရာမတာတိ နိဒ္ဒါယနေ ရမနကဘာဝေါ. သင်္ဂဏိကာရာမတာတိ ဂဏသင်္ဂဏိကာယ ရမနကဘာဝေါ. ယထာဝိမုတ္တံ စိတ္တံ န ပစ္စဝေက္ခတီတိ ယထာ ယံ စိတ္တံ ဝိမုတ္တံ၊ ယေ စ ဒေါသာ ပဟီနာ၊ ဂုဏာ စ ပဋိလဒ္ဓါ၊ တေ ပစ္စဝေက္ခိတွာ ဥပရိဂုဏပဋိလာဘာယ ဝါယာမံ န ကရောတီတိ အတ္ထော. ဣတိ ဣမသ္မိံ သုတ္တေ သတ္တန္နံ သေခါနံ ဥပရိဂုဏေဟိ ပရိဟာနိကာရဏဉ္စ ဝုဒ္ဓိကာရဏဉ္စ ကထိတံ. ယဉ္စ နာမ သေခဿ ပရိဟာနကာရဏံ၊ တံ ပုထုဇ္ဇနဿ ပဌမမေဝ ဟောတီတိ.

၁၀. ဒုတိယသေခသုတ္တဝဏ္ဏနာ

၉၀. ဒသမေ ဝိယတ္တောတိ ဗျတ္တော ဆေကော. ကိံကရဏီယေသူတိ ဣတိ ကတ္တဗ္ဗေသု. စေတောသမထန္တိ သမာဓိကမ္မဋ္ဌာနံ. အနနုလောမိကေနာတိ သာသနဿ အနနုစ္ဆဝိကေန. အတိကာလေနာတိ အတိပါတောဝ. အတိဒိဝါတိ ဒိဝါ ဝုစ္စတိ မဇ္ဈနှိကော၊ တံ အတိက္ကမိတွာ. အာဘိသလ္လေခိကာတိ အတိဝိယ ကိလေသသလ္လေခိကာ. စေတောဝိဝရဏသပ္ပါယာတိ စိတ္တဝိဝရဏသင်္ခါတာနံ သမထဝိပဿနာနံ သပ္ပါယာ. အပ္ပိစ္ဆကထာတိ အပ္ပိစ္ဆာ ဟောထာတိ ကထနကထာ. သန္တုဋ္ဌိကထာတိ စတူဟိ ပစ္စယေဟိ သန္တုဋ္ဌာ ဟောထာတိ ကထနကထာ. ပဝိဝေကကထာတိ တီဟိ ဝိဝေကေဟိ ဝိဝိတ္တာ ဟောထာတိ ကထနကထာ. အသံသဂ္ဂကထာတိ ပဉ္စဝိဓေန သံသဂ္ဂေန အသံသဋ္ဌာ ဟောထာတိ ကထနကထာ. ဝီရိယာရမ္ဘကထာတိ ဒုဝိဓံ ဝီရိယံ အာရဘထာတိ ကထနကထာ. သီလကထာဒီသု သီလံ အာရဗ္ဘ ကထာ သီလကထာ. သမာဓိံ အာရဗ္ဘ၊ ပညံ အာရဗ္ဘ၊ ပဉ္စဝိဓံ ဝိမုတ္တိံ အာရဗ္ဘ၊ ဧကူနဝီသတိပစ္စဝေက္ခဏသင်္ခါတံ ဝိမုတ္တိဉာဏဒဿနံ အာရဗ္ဘ ကထာ ဝိမုတ္တိဉာဏဒဿနကထာ. န နိကာမလာဘီတိအာဒီသု န ဣစ္ဆိတိစ္ဆိတလာဘီ၊ ဒုက္ခလာဘီ န ဝိပုလလာဘီတိ အတ္ထော. သေသံ ဥတ္တာနတ္ထမေဝါတိ.

ထေရဝဂ္ဂေါ စတုတ္ထော.

(၁၀) ၅. ကကုဓဝဂ္ဂေါ

၁-၂. သမ္ပဒါသုတ္တဒွယဝဏ္ဏနာ

၉၁-၉၂. ပဉ္စမဿ ပဌမေ ပဉ္စ သမ္ပဒါ မိဿိကာ ကထိတာ. ဒုတိယေ ပုရိမာ စတဿော မိဿိကာ၊ ပဉ္စမီ လောကိကာဝ.

၃. ဗျာကရဏသုတ္တဝဏ္ဏနာ

၉၃. တတိယေ အညာဗျာကရဏာနီတိ အရဟတ္တဗျာကရဏာနိ. မန္ဒတ္တာတိ မန္ဒဘာဝေန အညာဏေန. မောမူဟတ္တာတိ အတိမူဠှဘာဝေန. အညံ ဗျာကရောတီတိ အရဟတ္တံ ပတ္တောသ္မီတိ ကထေတိ. ဣစ္ဆာပကတောတိ ဣစ္ဆာယ အဘိဘူတော. အဓိမာနေနာတိ အဓိဂတမာနေန. သမ္မဒေဝါတိ ဟေတုနာ နယေန ကာရဏေနေဝ.

၄-၅. ဖာသုဝိဟာရသုတ္တာဒိဝဏ္ဏနာ

၉၄-၉၅. စတုတ္ထေ ဖာသုဝိဟာရာတိ သုခဝိဟာရာ. ပဉ္စမေ အကုပ္ပန္တိ အရဟတ္တံ.

၆. သုတဓရသုတ္တဝဏ္ဏနာ

၉၆. ဆဋ္ဌေ အပ္ပဋ္ဌောတိ အပ္ပသမာရမ္ဘော. အပ္ပကိစ္စောတိ အပ္ပကရဏီယော. သုဘရောတိ သုခေန ဘရိတဗ္ဗော သုပေါသော. သုသန္တောသောတိ တီဟိ သန္တောသေဟိ သုဋ္ဌု သန္တောသော. ဇီဝိတပရိက္ခာရေသူတိ ဇီဝိတသမ္ဘာရေသု. အပ္ပါဟာရောတိ မန္ဒာဟာရော. အနောဒရိကတ္တန္တိ န ဩဒရိကဘာဝံ အမဟဂ္ဃသဘာဝံ အနုယုတ္တော. အပ္ပမိဒ္ဓေါတိ န ဗဟုနိဒ္ဒေါ. သတ္တမဋ္ဌမာနိ ဥတ္တာနတ္ထာနိ.

၉. သီဟသုတ္တဝဏ္ဏနာ

၉၉. နဝမေ သက္ကစ္စညေဝ ဒေတိ နော အသက္ကစ္စန္တိ အနဝညာယ အဝိရဇ္ဈိတွာဝ ဒေတိ၊ နော အဝညာယ ဝိရဇ္ဈိတွာ. မာ မေ ယောဂ္ဂပထော နဿာတိ မယာ ကတယောဂ္ဂပထော မယှံ မာ နဿတု၊ ‘‘ဧကော သီဟော ဥဋ္ဌာယ ဗိဠာရံ ပဟရန္တော ဝိရဇ္ဈိတွာ ပဟရီ’’တိ ဧဝံ ဝတ္တာရော မာ ဟောန္တူတိ အတ္ထော. အန္နဘာရနေသာဒါနန္တိ ဧတ္ထ အန္နံ ဝုစ္စတိ ယဝဘတ္တံ၊ တံ ဘာရော ဧတေသန္တိ အန္နဘာရာ. ယာစကာနံ ဧတံ နာမံ. နေသာဒါ ဝုစ္စန္တိ သာကုဏိကာ. ဣတိ သဗ္ဗပစ္ဆိမာယ ကောဋိယာ ဧတေသံ ယာစကနေသာဒါနမ္ပိ သက္ကစ္စမေဝ ဒေသေတိ.

၁၀. ကကုဓထေရသုတ္တဝဏ္ဏနာ

၁၀၀. ဒသမေ အတ္တဘာဝပဋိလာဘောတိ သရီရပဋိလာဘော. ဒွေ ဝါ တီဏိ ဝါ မာဂဓကာနိ ဂါမက္ခေတ္တာနီတိ ဧတ္ထ မာဂဓိကံ ဂါမက္ခေတ္တံ အတ္ထိ ခုဒ္ဒကံ၊ အတ္ထိ မဇ္ဈိမံ၊ အတ္ထိ မဟန္တံ. ခုဒ္ဒကံ ဂါမက္ခေတ္တံ ဣတော စတ္တာလီသံ ဥသဘာနိ၊ ဣတော စတ္တာလီသန္တိ ဂါဝုတံ ဟောတိ၊ မဇ္ဈိမံ ဣတော ဂါဝုတံ၊ ဣတော ဂါဝုတန္တိ အဍ္ဎယောဇနံ ဟောတိ၊ မဟန္တံ ဣတော ဒိယဍ္ဎဂါဝုတံ၊ ဣတော ဒိယဍ္ဎဂါဝုတန္တိ တိဂါဝုတံ ဟောတိ. တေသု ခုဒ္ဒကေန ဂါမက္ခေတ္တေန တီဏိ၊ ခုဒ္ဒကေန စ မဇ္ဈိမေန စ ဒွေ ဂါမက္ခေတ္တာနိ တဿ အတ္တဘာဝေါ. တိဂါဝုတဉှိဿ သရီရံ. ပရိဟရိဿာမီတိ ပဋိဇဂ္ဂိဿာမိ ဂေါပယိဿာမိ. ရက္ခဿေတန္တိ ရက္ခဿု ဧတံ. မောဃပုရိသောတိ တုစ္ဆပုရိသော. နာဿဿာတိ န ဧတဿ ဘဝေယျ. သမုဒါစရေယျာမာတိ ကထေယျာမ. သမ္မန္နတီတိ သမ္မာနံ ကရောတိ. ယံ တုမော ကရိဿတိ တုမောဝ တေန ပညာယိဿတီတိ ယံ ဧသ ကရိဿတိ၊ ဧသောဝ တေန ကမ္မေန ပါကဋော ဘဝိဿတိ. သေသံ သဗ္ဗတ္ထ ဥတ္တာနတ္ထမေဝါတိ.

ကကုဓဝဂ္ဂေါ ပဉ္စမော.

ဒုတိယပဏ္ဏာသကံ နိဋ္ဌိတံ.