၁. သံဃဘေဒကသုတ္တဝဏ္ဏနာ

၂၄၃. ပဉ္စမဿ ပဌမေ အပိ နု တံ၊ အာနန္ဒ၊ အဓိကရဏန္တိ ဝိဝါဒါဓိကရဏာဒီသု အညတရံ အဓိကရဏံ ဘိက္ခုသံဃဿ ဥပ္ပဇ္ဇိ၊ သတ္ထာ တဿ ဝူပသန္တဘာဝံ ပုစ္ဆန္တော ဧဝမာဟ. ကုတော တံ၊ ဘန္တေတိ၊ ဘန္တေ၊ ကုတော ကိန္တိ ကေန ကာရဏေန တံ အဓိကရဏံ ဝူပသမိဿတီတိ ဝဒတိ. ကေဝလကပ္ပန္တိ သကလံ သမန္တတော. သံဃဘေဒါယ ဌိတောတိ သံဃေန သဒ္ဓိံ ဝါဒတ္ထာယ ကထိတံ ပဋိကထေန္တောဝ ဌိတော. တတြာယသ္မာတိ တသ္မိံ ဧဝံ ဌိတေ အာယသ္မာ အနုရုဒ္ဓေါ. န ဧကဝါစိကမ္ပိ ဘဏိတဗ္ဗံ မညတီတိ ‘‘မာ၊ အာဝုသော၊ သံဃေန သဒ္ဓိံ ဧဝံ အဝစာ’’တိ ဧကဝစနမ္ပိ ဝတ္တဗ္ဗံ န မညတိ. ဝေါယုဉ္ဇတီတိ အနုယုဉ္ဇတိ အနုယောဂံ အာပဇ္ဇတိ. အတ္ထဝသေတိ ကာရဏဝသေ. နာသေဿန္တီတိ ဥပေါသထပ္ပဝါရဏံ ဥပဂန္တုံ အဒတွာ နိက္ကဍ္ဎိဿန္တိ. သေသံ ပါဠိဝသေနေဝ ဝေဒိတဗ္ဗံ.