၅. ပဉ္စမပဏ္ဏာသကံ
(၂၁) ၁. သပ္ပုရိသဝဂ္ဂေါ
၁-၆. သိက္ခာပဒသုတ္တဝဏ္ဏနာ
၂၀၁. ပဉ္စမဿ ပဌမေ အသပ္ပုရိသန္တိ လာမကပုရိသံ တုစ္ဆပုရိသံ မူဠှပုရိသံ အဝိဇ္ဇာယ အန္ဓီကတံ ဗာလံ. အသပ္ပုရိသတရန္တိ အတိရေကေန အသပ္ပုရိသံ. ဣတရေ ဒွေ ဝုတ္တပဋိပက္ခဝသေန ဝေဒိတဗ္ဗာ. သေသမေတ္ထ ဥတ္တာနတ္ထမေဝ. ယထာ စေတ္ထ၊ ဧဝံ ဣတော ပရေသု ပဉ္စသု. ဧတေသု ဟိ ပဌမံ ပဉ္စဝေရဝသေန ဒေသိတံ၊ ဒုတိယံ အဿဒ္ဓမ္မဝသေန၊ တတိယံ ကာယဝစီဒွါရဝသေန၊ စတုတ္ထံ မနောဒွါရဝသေန၊ ပဉ္စမံ အဋ္ဌမိစ္ဆတ္တဝသေန၊ ဆဋ္ဌံ ဒသမိစ္ဆတ္တဝသေန.
၇-၁၀. ပါပဓမ္မသုတ္တစတုက္ကဝဏ္ဏနာ
၂၀၇-၂၁၀. သတ္တမေ ပါပန္တိ လာမကံ သံကိလိဋ္ဌပုဂ္ဂလံ. ကလျာဏန္တိ ဘဒ္ဒကံ အနဝဇ္ဇပုဂ္ဂလံ. သေသမေတ္ထ ဥတ္တာနတ္ထမေဝ. အဋ္ဌမေပိ ဧသေဝ နယော. နဝမေ ပါပဓမ္မန္တိ လာမကဓမ္မံ. ကလျာဏဓမ္မန္တိ အနဝဇ္ဇဓမ္မံ. သေသမေတ္ထ ဥတ္တာနတ္ထမေဝ. ဒသမေပိ ဧသေဝ နယော. ဣမသ္မိံ ဝဂ္ဂေ ဒသသုပိ သုတ္တေသု အဂါရိယပ္ပဋိပဒါ ကထိတာ. သစေပိ သောတာပန္နသကဒါဂါမိနော ဟောန္တိ၊ ဝဋ္ဋတိယေဝါတိ.
သပ္ပုရိသဝဂ္ဂေါ ပဌမော.
(၂၂) ၂. ပရိသာဝဂ္ဂေါ
၁. ပရိသာသုတ္တဝဏ္ဏနာ
၂၁၁. ဒုတိယဿ ပဌမေ ပရိသံ ဒူသေန္တီတိ ပရိသဒူသနာ. ပရိသံ သောဘေန္တီတိ ပရိသသောဘနာ.
၂. ဒိဋ္ဌိသုတ္တဝဏ္ဏနာ
၂၁၂. ဒုတိယေ မနောဒုစ္စရိတေ ပရိယာပန္နာပိ မိစ္ဆာဒိဋ္ဌိ မဟာသာဝဇ္ဇတာယ ဝိသုံ ဝုတ္တာ၊ တဿာ စ ပဋိပက္ခဝသေန သမ္မာဒိဋ္ဌိ.
၃. အကတညုတာသုတ္တဝဏ္ဏနာ
၂၁၃. တတိယေ အကတညုတာ အကတဝေဒိတာတိ အကတညုတာယ အကတဝေဒိတာယ. ဥဘယမ္ပေတံ အတ္ထတော ဧကမေဝ. သုက္ကပက္ခေပိ ဧသေဝ နယော.
၄-၇. ပါဏာတိပါတီသုတ္တာဒိဝဏ္ဏနာ
၂၁၄-၂၁၇. စတုတ္ထံ စတုန္နံ ကမ္မကိလေသာနံ တပ္ပဋိပက္ခဿ စ ဝသေန ဝုတ္တံ၊ ပဉ္စမံ သုက္ကပက္ခာနံ အာဒိတော စတုန္နံ မိစ္ဆတ္တာနံ ဝသေန၊ ဆဋ္ဌံ အဝသေသာနံ စတုန္နံ၊ သတ္တမံ အနရိယဝေါဟာရအရိယဝေါဟာရာနံ. တထာ အဋ္ဌမနဝမဒသမာနိ သပ္ပဋိပက္ခာနံ အဿဒ္ဓမ္မာနံ ဝသေန ဝုတ္တာနိ. သဗ္ဗသုတ္တေသု ပန သုက္ကပက္ခဓမ္မာ လောကိယလောကုတ္တရမိဿကာဝ ကထိတာ. နဝသု သုတ္တေသု ကိဉ္စာပိ ‘‘သဂ္ဂေ’’တိ ဝုတ္တံ၊ တယော ပန မဂ္ဂါ တီဏိ စ ဖလာနိ လဗ္ဘန္တိယေဝါတိ.
ပရိသာဝဂ္ဂေါ ဒုတိယော.
(၂၃) ၃. ဒုစ္စရိတဝဂ္ဂဝဏ္ဏနာ
၂၂၁-၂၃၁. တတိယဿ ပဌမာဒီနိ ဥတ္တာနတ္ထာနေဝ. ဒသမေ ယော စိန္တေတွာ ကဗျံ ကရောတိ၊ အယံ စိန္တာကဝိ နာမ. ယော သုတွာ ကရောတိ၊ အယံ သုတကဝိ နာမ. ယော ဧကံ အတ္ထံ နိဿာယ ကရောတိ၊ အယံ အတ္ထကဝိ နာမ. ယော တင်္ခဏညေဝ ဝင်္ဂီသတ္ထေရော ဝိယ အတ္တနော ပဋိဘာနေန ကရောတိ၊ အယံ ပဋိဘာနကဝိ နာမာတိ.
ဒုစ္စရိတဝဂ္ဂေါ တတိယော.
(၂၄) ၄. ကမ္မဝဂ္ဂေါ
၁. သံခိတ္တသုတ္တဝဏ္ဏနာ
၂၃၂. စတုတ္ထဿ ပဌမေ ကဏှန္တိ ကာဠကံ ဒသအကုသလကမ္မပထကမ္မံ. ကဏှဝိပါကန္တိ အပါယေ နိဗ္ဗတ္တနတော ကာဠကဝိပါကံ. သုက္ကန္တိ ပဏ္ဍရကံ ကုသလကမ္မပထကမ္မံ. သုက္ကဝိပါကန္တိ သဂ္ဂေ နိဗ္ဗတ္တနတော ပဏ္ဍရကဝိပါကံ. ကဏှသုက္ကန္တိ မိဿကကမ္မံ. ကဏှသုက္ကဝိပါကန္တိ သုခဒုက္ခဝိပါကံ. မိဿကကမ္မဉှိ ကတွာ အကုသလေန တိရစ္ဆာနယောနိယံ မင်္ဂလဟတ္ထိဋ္ဌာနာဒီသု ဥပ္ပန္နော ကုသလေန ပဝတ္တေ သုခံ ဝေဒိယတိ. ကုသလေန ရာဇကုလေပိ နိဗ္ဗတ္တော အကုသလေန ပဝတ္တေ ဒုက္ခံ ဝေဒိယတိ. အကဏှံ အသုက္ကန္တိ ကမ္မက္ခယကရံ စတုမဂ္ဂဉာဏံ အဓိပ္ပေတံ. တဉှိ ယဒိ ကဏှံ ဘဝေယျ၊ ကဏှဝိပါကံ ဒဒေယျ. ယဒိ သုက္ကံ ဘဝေယျ၊ သုက္ကဝိပါကံ ဒဒေယျ. ဥဘယဝိပါကဿ ပန အပ္ပဒါနတော အကဏှံ အသုက္ကန္တိ အယမေတ္ထ အတ္ထော.
၂. ဝိတ္ထာရသုတ္တဝဏ္ဏနာ
၂၃၃. ဒုတိယေ သဗျာဗဇ္ဈန္တိ သဒေါသံ. ကာယသင်္ခါရန္တိ ကာယဒွါရစေတနံ. အဘိသင်္ခရောတီတိ အာယူဟတိ သမ္ပိဏ္ဍေတိ. သေသဒွယေပိ ဧသေဝ နယော. သဗျာဗဇ္ဈံ လောကန္တိ သဒုက္ခံ လောကံ. သဗျာဗဇ္ဈာ ဖဿာတိ သဒုက္ခာ ဝိပါကဖဿာ. သဗျာဗဇ္ဈံ ဝေဒနံ ဝေဒိယတီတိ သာဗာဓံ ဝိပါကဝေဒနံ ဝေဒိယတိ. ဧကန္တဒုက္ခန္တိ ဧကန္တေနေဝ ဒုက္ခံ၊ န သုခသမ္မိဿံ. သေယျထာပိ သတ္တာ နေရယိကာတိ ဧတ္ထ သေယျထာပီတိ နိဒဿနတ္ထေ နိပါတော. တေန ကေဝလံ နေရယိကသတ္တေ ဒဿေတိ၊ အညေ ပန တံသရိက္ခကာ နာမ နတ္ထိ. ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗော. သေယျထာပိ မနုဿာတိအာဒီသု ပန မနုဿာနံ တာဝ ကာလေန သုခါ ဝေဒနာ ဥပ္ပဇ္ဇတိ၊ ကာလေန ဒုက္ခာ ဝေဒနာ. ဧကစ္စေ စ ဒေဝါတိ ဧတ္ထ ပန ကာမာဝစရဒေဝါ ဒဋ္ဌဗ္ဗာ. တေသဉှိ မဟေသက္ခတရာ ဒေဝတာ ဒိသွာ နိသိန္နာသနတော ဝုဋ္ဌာနံ၊ ပါရုတဥတ္တရာသင်္ဂဿ ဩတာရဏံ၊ အဉ္ဇလိပဂ္ဂဏှနန္တိအာဒီနံ ဝသေန ကာလေန ဒုက္ခံ ဥပ္ပဇ္ဇတိ၊ ဒိဗ္ဗသမ္ပတ္တိံ အနုဘဝန္တာနံ ကာလေန သုခံ. ဧကစ္စေ စ ဝိနိပါတိကာတိ ဧတ္ထ ဝေမာနိကပေတာ ဒဋ္ဌဗ္ဗာ. တေ နိရန္တရမေဝ ဧကသ္မိံ ကာလေ သုခံ၊ ဧကသ္မိံ ကာလေ ဒုက္ခံ ဝေဒိယန္တိ. နာဂသုပဏ္ဏဟတ္ထိအဿာဒယော ပန မနုဿာ ဝိယ ဝေါကိဏ္ဏသုခဒုက္ခာဝ ဟောန္တိ. ပဟာနာယ ယာ စေတနာတိ ဧတ္ထ ဝိဝဋ္ဋဂါမိနီ မဂ္ဂစေတနာ ဝေဒိတဗ္ဗာ. သာ ဟိ ကမ္မက္ခယာယ သံဝတ္တတီတိ.
၃. သောဏကာယနသုတ္တဝဏ္ဏနာ
၂၃၄. တတိယေ သိခါမောဂ္ဂလ္လာနောတိ သီသမဇ္ဈေ ဌိတာယ မဟတိယာ သိခါယ သမန္နာဂတော မောဂ္ဂလ္လာနဂေါတ္တော ဗြာဟ္မဏော. ပုရိမာနီတိ အတီတာနန္တရဒိဝသတော ပဋ္ဌာယ ပုရိမာနိ၊ ဒုတိယာဒိတော ပဋ္ဌာယ ပုရိမတရာနိ ဝေဒိတဗ္ဗာနိ. သောဏကာယနောတိ တဿေဝ အန္တေဝါသိကော. ကမ္မသစ္စာယံ ဘော လောကောတိ ဘော အယံ လောကော ကမ္မသဘာဝေါ. ကမ္မသမာရမ္ဘဋ္ဌာယီတိ ကမ္မသမာရမ္ဘေန တိဋ္ဌတိ. ကမ္မံ အာယူဟန္တောဝ တိဋ္ဌတိ၊ အနာယူဟန္တော ဥစ္ဆိဇ္ဇတီတိ ဒီပေတိ. သေသံ ဟေဋ္ဌာ ဝုတ္တနယမေဝ.
၄-၉. သိက္ခာပဒသုတ္တာဒိဝဏ္ဏနာ
၂၃၅. စတုတ္ထာဒီနိပိ ဥတ္တာနတ္ထာနေဝ. မဂ္ဂင်္ဂေသု ပန ယသ္မာ သတိယာ ဥပဋ္ဌပေတွာ ပညာယ ပရိစ္ဆိန္ဒတိ၊ တသ္မာ ဥဘယမေဝ ကမ္မံ. သေသာ အင်္ဂါနေဝ ဟောန္တိ၊ နော ကမ္မန္တိ ဝုတ္တံ. ဗောဇ္ဈင်္ဂေသုပိ ဧသေဝ နယော. အဘိဓမ္မေ ပန သဗ္ဗမ္ပေတံ အဝိသေသေန စေတနာသမ္ပယုတ္တကမ္မန္တေဝ ဝဏ္ဏိတံ.
၁၀. သမဏသုတ္တဝဏ္ဏနာ
၂၄၁. ဒသမေ ဣဓေဝါတိ ဣမသ္မိံယေဝ သာသနေ. အယံ ပန နိယမော သေသပဒေသုပိ ဝေဒိတဗ္ဗော. ဒုတိယာဒယောပိ ဟိ သမဏာ ဣဓေဝ၊ န အညတ္ထ. သုညာတိ ရိတ္တာ တုစ္ဆာ. ပရပ္ပဝါဒါတိ စတ္တာရော သဿတဝါဒါ၊ စတ္တာရော ဧကစ္စသဿတိကာ၊ စတ္တာရော အန္တာနန္တိကာ၊ စတ္တာရော အမရာဝိက္ခေပိကာ၊ ဒွေ အဓိစ္စသမုပ္ပန္နိကာ၊ သောဠသ သညိဝါဒါ၊ အဋ္ဌ အသညိဝါဒါ၊ အဋ္ဌ နေဝသညိနာသညိဝါဒါ၊ သတ္တ ဥစ္ဆေဒဝါဒါ၊ ပဉ္စ ဒိဋ္ဌဓမ္မနိဗ္ဗာနဝါဒါတိ ဣမေ သဗ္ဗေပိ ဗြဟ္မဇာလေ အာဂတဒွါသဋ္ဌိဒိဋ္ဌိယော ဣတော ဗာဟိရာနံ ပရေသံ ပဝါဒါ ပရပ္ပဝါဒါ နာမ. တေ သဗ္ဗေပိ ဣမေဟိ စတူဟိ ဖလဋ္ဌကသမဏေဟိ သုညာ. န ဟိ တေ ဧတ္ထ သန္တိ. န ကေဝလဉ္စ ဧတေဟေဝ သုညာ၊ စတူဟိ ပန မဂ္ဂဋ္ဌကသမဏေဟိပိ၊ စတုန္နံ မဂ္ဂါနံ အတ္ထာယ အာရဒ္ဓဝိပဿကေဟိပီတိ ဒွါဒသဟိပိ သမဏေဟိ သုညာ ဧဝ. ဣဒမေဝ အတ္ထံ သန္ဓာယ ဘဂဝတာ မဟာပရိနိဗ္ဗာနေ (ဒီ. နိ. ၂.၂၁၄) ဝုတ္တံ –
‘‘ဧကူနတိံသော ဝယသာ သုဘဒ္ဒ၊
ယံ ပဗ္ဗဇိံ ကိံကုသလာနုဧသီ၊
ဝဿာနိ ပညာသ သမာဓိကာနိ၊
ယတော အဟံ ပဗ္ဗဇိတော သုဘဒ္ဒ၊
ဉာယဿ ဓမ္မဿ ပဒေသဝတ္တီ၊
ဣတော ဗဟိဒ္ဓါ သမဏောပိ နတ္ထိ’’.
‘‘ဒုတိယောပိ သမဏော နတ္ထိ၊ တတိယောပိ သမဏော နတ္ထိ၊ စတုတ္ထောပိ သမဏော နတ္ထိ၊ သုညာ ပရပ္ပဝါဒါ သမဏေဟိ အညေဟီ’’တိ. ဧတ္ထ ဟိ ပဒေသဝတ္တီတိ အာရဒ္ဓဝိပဿကော အဓိပ္ပေတော. တသ္မာ သောတာပတ္တိမဂ္ဂဿ အာရဒ္ဓဝိပဿကံ မဂ္ဂဋ္ဌံ ဖလဋ္ဌန္တိ တယောပိ ဧကတော ကတွာ ‘‘သမဏောပိ နတ္ထီ’’တိ အာဟ၊ သကဒါဂါမိမဂ္ဂဿ အာရဒ္ဓဝိပဿကံ မဂ္ဂဋ္ဌံ ဖလဋ္ဌန္တိ တယောပိ ဧကတော ကတွာ ‘‘ဒုတိယောပိ သမဏော နတ္ထီ’’တိ အာဟ. ဣတရေသုပိ ဒွီသု ဧသေဝ နယော. ဧကာဒသမံ ဥတ္တာနတ္ထမေဝါတိ.
ကမ္မဝဂ္ဂေါ စတုတ္ထော.
(၂၅) ၅. အာပတ္တိဘယဝဂ္ဂေါ
၁. သံဃဘေဒကသုတ္တဝဏ္ဏနာ
၂၄၃. ပဉ္စမဿ ပဌမေ အပိ နု တံ၊ အာနန္ဒ၊ အဓိကရဏန္တိ ဝိဝါဒါဓိကရဏာဒီသု အညတရံ အဓိကရဏံ ဘိက္ခုသံဃဿ ဥပ္ပဇ္ဇိ၊ သတ္ထာ တဿ ဝူပသန္တဘာဝံ ပုစ္ဆန္တော ဧဝမာဟ. ကုတော တံ၊ ဘန္တေတိ၊ ဘန္တေ၊ ကုတော ကိန္တိ ကေန ကာရဏေန တံ အဓိကရဏံ ဝူပသမိဿတီတိ ဝဒတိ. ကေဝလကပ္ပန္တိ သကလံ သမန္တတော. သံဃဘေဒါယ ဌိတောတိ သံဃေန သဒ္ဓိံ ဝါဒတ္ထာယ ကထိတံ ပဋိကထေန္တောဝ ဌိတော. တတြာယသ္မာတိ တသ္မိံ ဧဝံ ဌိတေ အာယသ္မာ အနုရုဒ္ဓေါ. န ဧကဝါစိကမ္ပိ ဘဏိတဗ္ဗံ မညတီတိ ‘‘မာ၊ အာဝုသော၊ သံဃေန သဒ္ဓိံ ဧဝံ အဝစာ’’တိ ဧကဝစနမ္ပိ ဝတ္တဗ္ဗံ န မညတိ. ဝေါယုဉ္ဇတီတိ အနုယုဉ္ဇတိ အနုယောဂံ အာပဇ္ဇတိ. အတ္ထဝသေတိ ကာရဏဝသေ. နာသေဿန္တီတိ ဥပေါသထပ္ပဝါရဏံ ဥပဂန္တုံ အဒတွာ နိက္ကဍ္ဎိဿန္တိ. သေသံ ပါဠိဝသေနေဝ ဝေဒိတဗ္ဗံ.
၂. အာပတ္တိဘယသုတ္တဝဏ္ဏနာ
၂၄၄. ဒုတိယေ ခုရမုဏ္ဍံ ကရိတွာတိ ပဉ္စ သိခဏ္ဍကေ ဌပေတွာ ခုရေန မုဏ္ဍံ ကရိတွာ. ခရဿရေနာတိ ကက္ခဠသဒ္ဒေန. ပဏဝေနာတိ ဝဇ္ဈဘေရိယာ. ထလဋ္ဌဿာတိ ဧကမန္တေ ဌိတဿ. သီသစ္ဆေဇ္ဇန္တိ သီသစ္ဆေဒါရဟံ. ယတြ ဟိ နာမာတိ ယံ နာမ. သော ဝတဿာဟန္တိ သော ဝတ အဟံ အဿံ၊ ယံ ဧဝရူပံ ပါပံ န ကရေယျန္တိ အတ္ထော. ယထာဓမ္မံ ပဋိကရိဿတီတိ ဓမ္မာနုရူပံ ပဋိကရိဿတိ၊ သာမဏေရဘူမိယံ ဌဿတီတိ အတ္ထော. ကာဠဝတ္ထံ ပရိဓာယာတိ ကာဠပိလောတိကံ နိဝါသေတွာ. မောသလ္လန္တိ မုသလာဘိပါတာရဟံ. ယထာဓမ္မန္တိ ဣဓ အာပတ္တိတော ဝုဋ္ဌာယ သုဒ္ဓန္တေ ပတိဋ္ဌဟန္တော ယထာဓမ္မံ ကရောတိ နာမ. ဘသ္မပုဋန္တိ ဆာရိကာဘဏ္ဍိကံ. ဂါရယှံ ဘသ္မပုဋန္တိ ဂရဟိတဗ္ဗဆာရိကာပုဋေန မတ္ထကေ အဘိဃာတာရဟံ. ယထာဓမ္မန္တိ ဣဓ အာပတ္တိံ ဒေသေန္တော ယထာဓမ္မံ ပဋိကရောတိ နာမ. ဥပဝဇ္ဇန္တိ ဥပဝါဒါရဟံ. ပါဋိဒေသနီယေသူတိ ပဋိဒေသေတဗ္ဗေသု. ဣမိနာ သဗ္ဗာပိ သေသာပတ္တိယော သင်္ဂဟိတာ. ဣမာနိ ခေါ၊ ဘိက္ခဝေ၊ စတ္တာရိ အာပတ္တိဘယာနီတိ၊ ဘိက္ခဝေ၊ ဣမာနိ စတ္တာရိ အာပတ္တိံ နိဿာယ ဥပ္ပဇ္ဇနကဘယာနိ နာမာတိ.
၃. သိက္ခာနိသံသသုတ္တဝဏ္ဏနာ
၂၄၅. တတိယေ သိက္ခာ အာနိသံသာ ဧတ္ထာတိ သိက္ခာနိသံသံ. ပညာ ဥတ္တရာ ဧတ္ထာတိ ပညုတ္တရံ. ဝိမုတ္တိ သာရော ဧတ္ထာတိ ဝိမုတ္တိသာရံ. သတိ အာဓိပတေယျာ ဧတ္ထာတိ သတာဓိပတေယျံ. ဧတေသံ ဟိ သိက္ခာဒိသင်္ခါတာနံ အာနိသံသာဒီနံ အတ္ထာယ ဝုဿတီတိ ဝုတ္တံ ဟောတိ. အာဘိသမာစာရိကာတိ ဥတ္တမသမာစာရိကာ. ဝတ္တဝသေန ပညတ္တသီလဿေတံ အဓိဝစနံ. တထာ တထာ သော တဿာ သိက္ခာယာတိ တထာ တထာ သော သိက္ခာကာမော ဘိက္ခု တသ္မိံ သိက္ခာပဒေ.
အာဒိဗြဟ္မစရိယိကာတိ မဂ္ဂဗြဟ္မစရိယဿ အာဒိဘူတာနံ စတုန္နံ မဟာသီလာနမေတံ အဓိဝစနံ. သဗ္ဗသောတိ သဗ္ဗာကာရေန. ဓမ္မာတိ စတုသစ္စဓမ္မာ. ပညာယ သမဝေက္ခိတာ ဟောန္တီတိ သဟဝိပဿနာယ မဂ္ဂပညာယ သုဒိဋ္ဌာ ဟောန္တိ. ဝိမုတ္တိယာ ဖုသိတာ ဟောန္တီတိ အရဟတ္တဖလဝိမုတ္တိယာ ဉာဏဖဿေန ဖုဋ္ဌာ ဟောန္တိ. အဇ္ဈတ္တံယေဝ သတိ သူပဋ္ဌိတာ ဟောတီတိ နိယကဇ္ဈတ္တေယေဝ သတိ သုဋ္ဌု ဥပဋ္ဌိတာ ဟောတိ. ပညာယ အနုဂ္ဂဟေဿာမီတိ ဝိပဿနာပညာယ အနုဂ္ဂဟေဿာမိ. ပညာယ သမဝေက္ခိဿာမီတိ ဣဓာပိ ဝိပဿနာပညာ အဓိပ္ပေတာ. ဖုသိတံ ဝါ ဓမ္မံ တတ္ထ တတ္ထ ပညာယ အနုဂ္ဂဟေဿာမီတိ ဧတ္ထ ပန မဂ္ဂပညာဝ အဓိပ္ပေတာ.
၄. သေယျာသုတ္တဝဏ္ဏနာ
၂၄၆. စတုတ္ထေ ပေတာတိ ကာလကတာ ဝုစ္စန္တိ. ဥတ္တာနာ သေန္တီတိ တေ ယေဘုယျေန ဥတ္တာနကာဝ သယန္တိ. အထ ဝါ ပေတ္တိဝိသယေ နိဗ္ဗတ္တာ ပေတာ နာမ၊ တေ အပ္ပမံသလောဟိတတ္တာ အဋ္ဌိသင်္ဃာတဇဋိတာ ဧကေန ပဿေန သယိတုံ န သက္ကောန္တိ၊ ဥတ္တာနာဝ သေန္တိ. အနတ္တမနော ဟောတီတိ တေဇုဿဒတ္တာ သီဟော မိဂရာဇာ ဒွေ ပုရိမပါဒေ ဧကသ္မိံ၊ ပစ္ဆိမပါဒေ ဧကသ္မိံ ဌာနေ ဌပေတွာ နင်္ဂုဋ္ဌံ အန္တရသတ္ထိမှိ ပက္ခိပိတွာ ပုရိမပါဒပစ္ဆိမပါဒနင်္ဂုဋ္ဌာနံ ဌိတောကာသံ သလ္လက္ခေတွာ ဒွိန္နံ ပုရိမပါဒါနံ မတ္ထကေ သီသံ ဌပေတွာ သယတိ. ဒိဝသမ္ပိ သယိတွာ ပဗုဇ္ဈမာနော န ဥတ္တသန္တော ပဗုဇ္ဈတိ၊ သီသံ ပန ဥက္ခိပိတွာ ပုရိမပါဒါဒီနံ ဌိတောကာသံ သလ္လက္ခေတွာ သစေ ကိဉ္စိ ဌာနံ ဝိဇဟိတွာ ဌိတံ ဟောတိ၊ ‘‘နယိဒံ တုယှံ ဇာတိယာ၊ န သူရဘာဝဿ အနုရူပ’’န္တိ အနတ္တမနော ဟုတွာ တတ္ထေဝ သယတိ၊ န ဂေါစရာယ ပက္ကမတိ. ဣဒံ သန္ဓာယ ဝုတ္တံ – ‘‘အနတ္တမနော ဟောတီ’’တိ. အဝိဇဟိတွာ ဌိတေ ပန ‘‘တုယှံ ဇာတိယာ စ သူရဘာဝဿ စ အနုရူပမိဒ’’န္တိ ဟဋ္ဌတုဋ္ဌော ဥဋ္ဌာယ သီဟဝိဇမ္ဘနံ ဝိဇမ္ဘိတွာ ကေသရဘာရံ ဝိဓုနိတွာ တိက္ခတ္တုံ သီဟနာဒံ နဒိတွာ ဂေါစရာယ ပက္ကမတိ. တေန ဝုတ္တံ – ‘‘အတ္တမနော ဟောတီ’’တိ.
၅. ထူပါရဟသုတ္တဝဏ္ဏနာ
၂၄၇. ပဉ္စမေ ရာဇာ စက္ကဝတ္တီတိ ဧတ္ထ ကသ္မာ ဘဂဝါ အဂါရမဇ္ဈေ ဝသိတွာ ကာလကတဿ ရညော ထူပကရဏံ အနုဇာနာတိ၊ န သီလဝတော ပုထုဇ္ဇနဘိက္ခုဿာတိ? အနစ္ဆရိယတ္တာ. ပုထုဇ္ဇနဘိက္ခူနဉှိ ထူပေ အနုညာယမာနေ တမ္ဗပဏ္ဏိဒီပေ တာဝ ထူပါနံ ဩကာသော န ဘဝေယျ၊ တထာ အညေသု ဌာနေသု. တသ္မာ ‘‘အနစ္ဆရိယာ တေ ဘဝိဿန္တီ’’တိ နာနုဇာနာတိ. စက္ကဝတ္တီ ရာဇာ ဧကောဝ နိဗ္ဗတ္တတိ၊ တေနဿ ထူပေါ အစ္ဆရိယော ဟောတိ. ပုထုဇ္ဇနသီလဝတော ပန ပရိနိဗ္ဗုတဘိက္ခုနော ဝိယ မဟန္တမ္ပိ သက္ကာရံ ကာတုံ ဝဋ္ဋတိယေဝ. ဆဋ္ဌသတ္တမာနိ ဥတ္တာနတ္ထာနေဝ.
၈. ပဌမဝေါဟာရသုတ္တဝဏ္ဏနာ
၂၅၀. အဋ္ဌမေ အနရိယဝေါဟာရာတိ အနရိယာနံ ကထာ. သေသေသုပိ ဧသေဝ နယော.
အာပတ္တိဘယဝဂ္ဂေါ ပဉ္စမော.
ပဉ္စမပဏ္ဏာသကံ နိဋ္ဌိတံ.