၇. မလ္လိကာဒေဝီသုတ္တဝဏ္ဏနာ

၁၉၇. သတ္တမေ မလ္လိကာ ဒေဝီတိ ပသေနဒိရညော ဒေဝီ. ယေန မိဓေကစ္စော မာတုဂါမောတိ ယေန ဣဓေကစ္စာ ဣတ္ထီ. ဒုဗ္ဗဏ္ဏာတိ ဗီဘစ္ဆဝဏ္ဏာ. ဒုရူပါတိ ဒုဿဏ္ဌိတာ. သုပါပိကာတိ သုဋ္ဌု ပါပိကာ သုဋ္ဌု လာမိကာ. ဒဿနာယာတိ ပဿိတုံ. ဒလိဒ္ဒါတိ ဓနဒလိဒ္ဒါ. အပ္ပဿကာတိ သကေန ဓနေန ရဟိတာ. အပ္ပဘောဂါတိ ဥပဘောဂပရိဘောဂဘဏ္ဍကရဟိတာ. အပ္ပေသက္ခာတိ အပ္ပပရိဝါရာ. အဍ္ဎာတိ ဣဿရာ. မဟဒ္ဓနာတိ ဝဠဉ္ဇနကဓနေန မဟဒ္ဓနာ. မဟာဘောဂါတိ ဥပဘောဂပရိဘောဂဘဏ္ဍဘောဂေန မဟာဘောဂါ. မဟေသက္ခာတိ မဟာပရိဝါရာ. အဘိရူပါတိ ဥတ္တမရူပါ. ဒဿနီယာတိ ဒဿနယုတ္တာ. ပါသာဒိကာတိ ဒဿနေန ပါသာဒိကာ. ဝဏ္ဏပေါက္ခရတာယာတိ ဝဏ္ဏေန စေဝ သရီရသဏ္ဌာနေန စ.

အဘိသဇ္ဇတီတိ လဂ္ဂတိ. ဗျာပဇ္ဇတီတိ ပကတိံ ပဇဟတိ. ပတိတ္ထီယတီတိ ကောဓဝသေန ထိနဘာဝံ ထဒ္ဓဘာဝံ အာပဇ္ဇတိ. န ဒါတာ ဟောတီတိ န ဒါယိကာ ဟောတိ. သေယျာဝသထပဒီပေယျန္တိ ဧတ္ထ သေယျာတိ မဉ္စပလ္လင်္ကာဒိသယနံ. အာဝသထောတိ အာဝသထာဂါရံ. ပဒီပေယျံ ဝုစ္စတိ ဝဋ္ဋိတေလာဒိပဒီပူပကရဏံ. ဣဿာမနိကာတိ ဣဿာယ သမ္ပယုတ္တစိတ္တာ. ဣမိနာ နယေန သဗ္ဗတ္ထ အတ္ထော ဝေဒိတဗ္ဗော. ကောဓနာ အဟောသိန္တိ ကောဓမနာ အဟောသိံ. အနိဿာမနိကာ အဟောသိန္တိ ဣဿာဝိရဟိတစိတ္တာ အဟောသိံ. သေသမေတ္ထ ဥတ္တာနတ္ထမေဝါတိ.