၃. ပဌမနာနာကရဏသုတ္တဝဏ္ဏနာ

၁၂၃. တတိယေ တဒဿာဒေတီတိ တံ ဈာနံ သုခဿာဒေန အဿာဒေတိ. နိကာမေတီတိ ပတ္ထေတိ. ဝိတ္တိံ အာပဇ္ဇတီတိ တုဋ္ဌိံ အာပဇ္ဇတိ. တဒဓိမုတ္တောတိ တသ္မိံ အဓိမုတ္တော၊ တံ ဝါ အဓိမုတ္တော. တဗ္ဗဟုလဝိဟာရီတိ တေန ဈာနေန ဗဟုလံ ဝိဟရန္တော. သဟဗျတံ ဥပပဇ္ဇတီတိ သဟဘာဝံ ဂစ္ဆတိ၊ တတ္ထ နိဗ္ဗတ္တတီတိ အတ္ထော. ကပ္ပေါ အာယုပ္ပမာဏန္တိ ဧတ္ထ ပဌမဇ္ဈာနံ အတ္ထိ ဟီနံ၊ အတ္ထိ မဇ္ဈိမံ၊ အတ္ထိ ပဏီတံ. တတ္ထ ဟီနေန ဥပ္ပန္နာနံ ကပ္ပဿ တတိယော ကောဋ္ဌာသော အာယုပ္ပမာဏံ၊ မဇ္ဈိမေန ဥပဍ္ဎကပ္ပေါ၊ ပဏီတေန ကပ္ပေါ. တံ သန္ဓာယေတံ ဝုတ္တံ. နိရယမ္ပိ ဂစ္ဆတီတိ နိရယဂမနီယဿ ကမ္မဿ အပ္ပဟီနတ္တာ အပရာပရံ ဂစ္ဆတိ၊ န အနန္တရမေဝ. တသ္မိံယေဝ ဘဝေ ပရိနိဗ္ဗာယတီတိ တသ္မိံယေဝ ရူပဘဝေ ဌတွာ ပရိနိဗ္ဗာယတိ၊ န ဟေဋ္ဌာ ဩတရတိ. ယဒိဒံ ဂတိယာ ဥပပတ္တိယာ သတီတိ ယံ ဣဒံ ဂတိယာ စ ဥပပတ္တိယာ စ သတိ သေခဿ အရိယသာဝကဿ ပဋိသန္ဓိဝသေန ဟေဋ္ဌာ အနောတရိတွာ တသ္မိံယေဝ ရူပဘဝေ ဥပရိ ဒုတိယတတိယာဒီသု အညတရသ္မိံ ဗြဟ္မလောကေ ပရိနိဗ္ဗာနံ၊ ပုထုဇ္ဇနဿ ပန နိရယာဒိဂမနံ၊ ဣဒံ နာနာကရဏန္တိ အတ္ထော.

ဒွေ ကပ္ပါတိ ဧတ္ထာပိ ဒုတိယဇ္ဈာနံ ဝုတ္တနယေနေဝ တိဝိဓံ ဟောတိ. တတ္ထ ပဏီတဘာဝနေန နိဗ္ဗတ္တာနံ အဋ္ဌကပ္ပါ အာယုပ္ပမာဏံ၊ မဇ္ဈိမေန စတ္တာရော၊ ဟီနေန ဒွေ. တံ သန္ဓာယေတံ ဝုတ္တံ. စတ္တာရော ကပ္ပါတိ ဧတ္ထ ယံ ဟေဋ္ဌာ ဝုတ္တံ ‘‘ကပ္ပေါ၊ ဒွေ ကပ္ပါ’’တိ၊ တမ္ပိ အာဟရိတွာ အတ္ထော ဝေဒိတဗ္ဗော. ကပ္ပေါတိ စ ဂုဏဿပိ နာမံ၊ တသ္မာ ကပ္ပေါ ဒွေ ကပ္ပါ စတ္တာရော ကပ္ပါတိ အယမေတ္ထ အတ္ထော ဒဋ္ဌဗ္ဗော. ဣဒံ ဝုတ္တံ ဟောတိ – ယော ပဌမံ ဝုတ္တော ကပ္ပေါ၊ သော ဒွေ ဝါရေ ဂဏေတွာ ဧကေန ဂုဏေန ဒွေ ကပ္ပါ ဟောန္တိ၊ ဒုတိယေန စတ္တာရော၊ ပုန တေ စတ္တာရော ကပ္ပါတိ ဣမေဟိ စတူဟိ ဂုဏေဟိ ဂုဏိတာ ဧကေန ဂုဏေန အဋ္ဌ ဟောန္တိ၊ ဒုတိယေန သောဠသ၊ တတိယေန ဒွတ္တိံသ၊ စတုတ္ထေန စတုသဋ္ဌီတိ. ဧဝမိဓ ပဏီတဇ္ဈာနဝသေန စတုသဋ္ဌိ ကပ္ပါ ဂဟိတာတိ ဝေဒိတဗ္ဗာ. ပဉ္စ ကပ္ပသတာနီတိ ဣဒံ ပဏီတဿေဝ ဥပပတ္တိဇ္ဈာနဿ ဝသေန ဝုတ္တံ. ဝေဟပ္ဖလေသု ဝါ ပဌမဇ္ဈာနဘူမိအာဒီသု ဝိယ တိဏ္ဏံ ဗြဟ္မလောကာနံ အဘာဝတော ဧတ္တကမေဝ အာယုပ္ပမာဏံ. တသ္မာ ဧဝံ ဝုတ္တံ.