၃. ပတောဒသုတ္တဝဏ္ဏနာ

၁၁၃. တတိယေ ပတောဒစ္ဆာယန္တိ ဝိဇ္ဈနတ္ထံ ဥက္ခိတ္တဿ ပတောဒဿ ဆာယံ. သံဝိဇ္ဇတီတိ ‘‘ဇဝေါ မေ ဂဟေတဗ္ဗော’’တိ သလ္လက္ခဏဝသေန သံဝိဇ္ဇတိ. သံဝေဂံ အာပဇ္ဇတီတိ သံဝေဂံ ပဋိပဇ္ဇတိ လောမဝေဓဝိဒ္ဓေါတိ လောမကူပေ ပတောဒဝေဓေန ဝိဒ္ဓမတ္တော. စမ္မဝေဓဝိဒ္ဓေါတိ ဆဝိစမ္မံ ဆိန္ဒန္တေန ပတောဒဝေဓေန ဝိဒ္ဓေါ. အဋ္ဌိဝေဓဝိဒ္ဓေါတိ အဋ္ဌိံ ဘိန္ဒန္တေန ဝေဓေန ဝိဒ္ဓေါ. ကာယေနာတိ နာမကာယေန. ပရမသစ္စန္တိ နိဗ္ဗာနံ. သစ္ဆိကရောတီတိ ပဿတိ. ပညာယာတိ သဟဝိပဿနာယ မဂ္ဂပညာယ.