၅. ဆဝါလာတသုတ္တဝဏ္ဏနာ

၉၅. ပဉ္စမေ ဆဝါလာတန္တိ သုသာနေ အလာတံ. မဇ္ဈေ ဂူထဂတန္တိ မဇ္ဈဋ္ဌာနေ ဂူထမက္ခိတံ. နေဝ ဂါမေ ကဋ္ဌတ္ထံ ဖရတီတိ ကူဋဂေါပါနသိထမ္ဘသောပါနာဒီနံ အတ္ထာယ အနုပနေယျတာယ ဂါမေ န ကဋ္ဌတ္ထံ သာဓေတိ၊ ခေတ္တကုဋိပါဒံ ဝါ မဉ္စပါဒံ ဝါ ကာတုံ အနုပနေယျတာယ န အရညေ ကဋ္ဌတ္ထံ သာဓေတိ. ဒွီသု ကောဋီသု ဂယှမာနံ ဟတ္ထံ ဍဟတိ၊ မဇ္ဈေ ဂယှမာနံ ဂူထေန မက္ခေတိ. တထူပမန္တိ တံသရိက္ခကံ. အဘိက္ကန္တတရောတိ သုန္ဒရတရော. ပဏီတတရောတိ ဥတ္တမတရော. ဂဝါ ခီရန္တိ ဂါဝိတော ခီရံ. ခီရမှာ ဒဓီတိအာဒီသု ပရံ ပရံ ပုရိမတော ပုရိမတော အဂ္ဂံ၊ သပ္ပိမဏ္ဍော ပန တေသု သဗ္ဗေသုပိ အဂ္ဂမေဝ. အဂ္ဂေါတိအာဒီသု ဂုဏေဟိ အဂ္ဂေါ စေဝ သေဋ္ဌော စ ပမုခေါ စ ဥတ္တမော စ ပဝရော စာတိ ဝေဒိတဗ္ဗော. ဆဝါလာတူပမာယ န ဒုဿီလော ပုဂ္ဂလော ကထိတော၊ အပ္ပဿုတော ပန ဝိဿဋ္ဌကမ္မန္တော ဂေါဏသဒိသော ပုဂ္ဂလော ကထိတောတိ ဝေဒိတဗ္ဗော. ဆဋ္ဌေ သဗ္ဗံ ဥတ္တာနတ္ထမေဝ.