၂. ဒုတိယပုညာဘိသန္ဒသုတ္တဝဏ္ဏနာ

၅၂. ဒုတိယေ အရိယကန္တေဟီတိ မဂ္ဂဖလသမ္ပယုတ္တေဟိ. တာနိ ဟိ အရိယာနံ ကန္တာနိ ဟောန္တိ ပိယာနိ မနာပါနိ. သေသံ သုတ္တန္တေ တာဝ ယံ ဝတ္တဗ္ဗံ သိယာ၊ တံ ဝိသုဒ္ဓိမဂ္ဂေ (ဝိသုဒ္ဓိ. ၁.၁၂၄ အာဒယော) ဝုတ္တမေဝ.

ဂါထာသု ပန သဒ္ဓါတိ သောတာပန္နဿ သဒ္ဓါ အဓိပ္ပေတာ. သီလမ္ပိ သောတာပန္နဿ သီလမေဝ. ဥဇုဘူတဉ္စ ဒဿနန္တိ ကာယဝင်္ကာဒီနံ အဘာဝေန ခီဏာသဝဿ ဒဿနံ ဥဇုဘူတဒဿနံ နာမ. အာဟူတိ ကထယန္တိ. ပသာဒန္တိ ဗုဒ္ဓဓမ္မသံဃေသု ပသာဒံ. ဓမ္မဒဿနန္တိ စတုသစ္စဓမ္မဒဿနံ.